Pas Bilong Ol Man

Sik Bilong Kidni  Stori “ ‘Em i Bilong Nau Tasol!’​—Mi Gat Sik Bilong Kidni” (Disemba 8, 1996) i strongim mitupela man bilong mi long wanpela taim bilong bikpela hevi. Wankain olsem man bilong raitim stori, man bilong mi i kirap mekim wok long dispela rot bilong klinim blut olsem peritonial daialisis, na dispela i hatwok tru. Sampela taim mipela tingting planti na dispela i daunim mipela. Tasol stori bilong yupela i mekim gut tru bel bilong mipela, na i kirapim mipela long tingim dispela sik bilong kidni em i samting bilong nau tasol na klostu nau bai Kingdom bilong God i pinisim dispela sik wantaim olgeta narapela sik.

V. Q., long Itali

Aiwara i kamap long ai bilong mi taim mi kaunim dispela stori bilong wanpela man em i no lusim tingting long famili o lotu bilong em, maski inap longtaim em i pait long winim sik. Mi gat 18 krismas na gutpela skin, na mi save autim tok long olgeta de, tasol planti taim mi no tingim gut skin bilong mi. Stori bilong Lee Cordaway i gutpela stori bilong kaunim. Bilip na gutpela pasin bilong em i strongim mi tru.

J. S., long Amerika

Long 1992, taim mi gat 11-pela krismas, mi kisim save olsem mi gat sik bilong kidni, na bihain kidni bilong mi i no wok moa. Mi mas kisim daialisis. Mi amamas long yupela i stori gut long dispela samting, long wanem, ol man i laik save olsem wanem em i wok. Dispela i strongim bel bilong mi na ol poroman bilong mi tu taim mipela i kaunim dispela stori na mipela i save, sik mi karim long nau i no inap stap oltaim.

A. H., long Amerika

Kirap long taim mi kaunim stori bilong Lee Cordaway i kam inap nau, mi laik krai. Mi no inap bilip olsem em i dai! Mitupela man bilong mi i laik salim sori bilong mipela long gutpela meri na famili bilong em. Dispela i givim stretpela tingting long mi long ol liklik hevi mi save tingting planti long en. Man! Lee Cordaway em i wanpela gutpela strongpela man Kristen! Pasin bilong em i strongim mi.

F. H., long Amerika

Maski mi gat 10-pela krismas tasol na mi no gat sik, mi laikim kain gutpela stori olsem. Mi laik bai Lee Cordaway i kaunim dispela pas, tasol mi save em i no inap mekim olsem, inap long taim em i kirap bek long Paradais.

E. T., long Amerika

Kisim Amamas  Tenkyu long stori “Ol Yangpela i Laik Save . . . Olsem Wanem Mi Ken Kisim Amamas?” (Oktoba 8, 1996) Mi gat 15 krismas, na i gat planti yangpela long kongrigesen bilong mipela. Planti taim mipela i save mekim ol samting wantaim. Sampela taim mipela i save go autim tok long moning na bihain long apinun, mipela i go waswas. Em gutpela amamas tru! Sampela taim ol narapela bilong kongrigesen bilong mipela ol tu i kam bung wantaim mipela. Na dispela i mekim gut bel bilong papamama bilong mipela, long wanem, ol i save mipela i gat ol gutpela poroman.

I. W., long Jemani

Sori i Save Pasim Ol Gut Wantaim  Mi laik tok tenkyu long yupela ol brata long raitim stori “Baibel i Tok Wanem? Sori i Save Pasim Ol Gut Wantaim.” (Oktoba 8, 1996) Planti samting i bin traim bilip bilong mi long ol yia i go pinis, na wantu tasol papamama bilong mi i bin dai tu. Tasol bikpela traim tru i bin painim mi, i kamap insait long kongrigesen yet. Dispela stori i bin strongim mi na mekim gut bel bilong mi; mi save Jehova i lukim dispela hevi na em i tingim aiwara na bel hevi bilong mi. Mi kisim save olsem aposel Pol tu em i kisim wankain hevi. Mi bilip olsem bihain Jehova bai oraitim bel hevi bilong mi.

S. B., long Kanada

Long dispela taim nogut bilong hevi, i no hatwok long lusim tingting long ol samting bilong spirit. Dispela stori i bin strongim mi na kirapim mi long tingim ol samting bilong spirit. Sampela taim, mi tingting planti long i stap bilong mi long wan wan de. Dispela stori i helpim mi long save, em i bikpela samting, yumi mas bilip long sori bilong Jisas tasol, na long tingting na bel, nogat.

A. M., long Amerika

Mi mas karim hevi, long wanem, wanpela marasin insait long skin bilong mi i no wok gut, olsem na planti taim mi bel hevi. Dispela stori i helpim mi long karim dispela bel hevi bilong mi.

B. U., long Amerika