Eksasais Ol i Strong Tumas Long Mekim
WANPELA nius (The Toronto Star) i tok: “Pasin bilong kirapim ol man long eksasais i kamapim narakain pasin olsem: ol man i strong tumas long mekim eksasais, winim tru mak bilong en.” Nius (Star) i tok, pasin bilong eksasais na ol i no mekim long mak tasol, em wanpela hevi bilong ol man na meri wantaim. Sampela dokta i ting, ol man i mekim planti eksasais tumas inap long ol i ken kisim strongpela skin olsem skin bilong ol yangpela, tasol as tru na ol meri i mekim planti eksasais em ol i ting skin bilong ol i patpela tumas o ol i gat pasin kranki long kaikai.
Planti man i save kirap mekim eksasais bilong strongim skin na long ai skin i gutpela, tasol bihain ol i winim mak bilong eksasais, long wanem, ol i laik eksasais. Wanpela saveman bilong givim tingting long sampela lain bilong pilai spot Olimpik, em Richard Suinn, em i tok, “pasin bilong strong tumas long mekim eksasais i save kamap ples klia sapos bel i as bilong en na em i eksasais; bilong strongim skin tasol, nogat.” Taim ol dokta i skelim dispela kain hevi, ol i traim long kisim save long ol samting eksasais i save mekim long i stap bilong ol sikman. Sapos ol sikman i wok mani na ol i gat wok bilong lukautim haus na ol pikinini tu, pasin bilong strong tumas long eksasais i no inap helpim skin bilong ol. Wanpela bikpela dokta, em Thomas Schwenk, em i tok “skin bilong ol man inap gutpela na strong, tasol ol i gat hevi long sindaun bilong ol, na long ples wok, na famili i no stap wanbel.”
Dispela nius (Star) i kolim sampela samting i makim olsem ol manmeri i kalabus tumas long eksasais, olsem: ‘Ol i laik mekim tasol ol eksasais olsem kikim wilwil, subim wara, ran, o apim ol hevipela ain; na ol i no laik senisim taim bilong ol bilong mekim eksasais; na ol i ting ol i mas eksasais na sapos ol i no mekim, em i no gutpela tumas; na sampela samting long i stap bilong ol i no wok gut.’
Ol man i gat wok long ol ples bilong eksasais, ol i save, eksasais i no winim skel i gutpela bilong helpim skin, tasol ol i toksave olsem, man i winim mak bilong eksasais em inap bagarapim skin bilong em.—1 Timoti 4:8.