“Traim Wok Bilong Ol”—Olsem Wanem?
1 Oganaisesen bilong Jehova i wok long i go bikpela, olsem na i mas i gat ol strongpela brata bilong kamap wokman bilong kongrigesen. Planti brata na ol yangpela tu em ol i no kamap wokman yet, ol i gat laik long mekim wok insait long kongrigesen. Taim ol elda i givim sampela wok moa long ol, ol i amamas long dispela na ol i pilim olsem ol inap mekim gutpela wok. Bilong ol i ken winim mak bilong mekim sampela wok moa, ol elda “i mas traim wok bilong ol.” (1 Ti 3:10) Ol elda i save mekim dispela olsem wanem?
2 Wok Bilong Ol Elda: Ol elda i save tingim tok bilong 1 Timoti 3:8-13, em i stori long ol mak brata i mas winim bilong kamap wokman bilong kongrigesen, na ol i skelim olsem brata i winim ol dispela mak o nogat, na tu, ol bai traim wok bilong em, em inap lukautim sampela wok long kongrigesen o nogat. Ating ol bai makim em long mekim sampela wok, olsem helpim wok bilong lukautim ol magasin na litresa, ol maikrofon, stretim Haus Kingdom, o sampela narapela wok olsem. Ol elda bai skelim pasin bilong dispela brata long lukautim dispela wok. Ol i laik save em inap stap gut long wok, em i save kam long taim stret, em i save givim bel long wok, em i gat pasin daun, em i gat laik tru long mekim wok, na em inap wok gut wantaim ol narapela o nogat. (Fl 2:20) Em i stap olsem gutpela piksa long pasin bilong bilas na pasim klos? Em i pilim olsem em i gat wok bilong em yet long mekim? Ol i laik save em i gat “pasin bilong gutpela tingting na save, na ol man bai i lukim gutpela pasin em i mekim.” (Je 3:13) Em i gat laik tru long winim mak bilong helpim ol wok bilong kongrigesen? Em i bihainim tok bilong Jisas long “mekim ol manmeri bilong olgeta lain i kamap disaipel” long rot bilong givim bel long autim tok?—Mt 28:19, 20; lukim Wastaua, Jun 1, 1991, p. 10-21.
3 Ol i no makim hamas krismas brata i mas winim bambai em i ken kamap wokman, tasol Baibel i tok long ol dispela man olsem “ol man i stap wokman.” Yumi no ting krismas bilong ol i olsem 13 i go inap 17 krismas samting, long wanem, Baibel i kolim olsem ol dispela lain inap marit na kamapim pikinini. (1 Ti 3:12, 13) Ol kain man olsem i no ken larim ol “laik nogut i save kamap long bel bilong ol yangpela man” i pulim ol, nogat. Ol i mas bihainim gutpela tingting, na kisim gutpela nem na bel bilong ol i no ken kotim ol long ai bilong God na ol man.—2 Ti 2:22.
4 Em i gutpela samting sapos man i gat gutpela save long mekim ol wok samting, tasol pasin na tingting bilong em, dispela em i bikpela samting. Olsem wanem? Brata i gat pasin daun na i gat laik long litimapim nem bilong God na long mekim ol wok bilong helpim ol brata bilong em? Sapos olsem, Jehova bai blesim hatwok em i mekim bilong winim ol mak bilong mekim ol wok insait long kongrigesen.