Amamas Long Mekim Wok Bilong God
1 Ol i kam bek na “ol i amamas tru.” Baibel i stori long ol samting ol 70 disaipel i pilim taim ol i kam bek na stori long Jisas long ol samting ol i bin mekim long bikpela raun bilong wok autim tok. Ol i mekim laik bilong God, olsem na ol i belgut na amamas tru. (Lu 10:17) Wanem samting inap helpim yu long kisim wankain amamas taim yu mekim wok bilong God?
2 Stretpela Tingting: God i givim yu wanpela gutpela wok tru bilong helpim ol man long kisim save long laik bilong Jehova. Long rot bilong wok autim tok, yu inap helpim wanpela man long lusim ol pasin nogut bilong dispela graun na kalabus bilong ol lotu giaman. Yu ken helpim ol man long wetim nupela taim i no gat pasin bilong kros na pait i stap long en olsem i stap nau long olgeta hap. Tingim amamas Jehova i save kisim taim yu planim tok i tru long bel bilong wanpela man i laik harim tok. Yu mas bilip na beten askim God long spirit bilong Em i ken givim amamas long yu taim yu givim bel long mekim wok autim tok.
3 Gutpela Samting Bilong Skulim Yumi: Dispela hap taim Jisas i bin skulim 70 disaipel long en, em i wankain olsem Miting Bilong Wok Autim Tok long nau. Em i skulim ol bambai ol i ken mekim gut wok autim tok. (Lu 10:1-16) Long nau Miting Bilong Wok i save skulim yu long ol pasin bilong toktok wantaim ol man, na long pasin bilong kirapim na mekim ol Baibel-stadi. Taim yu wok strong long lainim ol samting na long kamap gutpela moa long pasin bilong autim tok, bai yu no tingting planti o pilim olsem yu no inap mekim dispela wok, nogat. Bai yu amamas na pilim olsem yu inap mekim dispela wok.
4 Tingim Ol Samting Bilong Bihain: Jisas i amamas long mekim wok bilong God, maski em i karim ol bikpela hevi. Bilong wanem? Long wanem, em i tingim ol blesing em bai kisim na ol gutpela wok em bai mekim long bihain. (Hi 12:2) Yu tu inap mekim olsem taim yu tingting strong long nem bilong Jehova na long ol gutpela blesing God bai kamapim long nupela taim. Dispela bai mekim na yu amamas long mekim wok autim tok, na yu pilim olsem wok bilong yu i gat as bilong en.
5 Nambawan gutpela samting yu inap mekim long nau em wok bilong God. Olsem na i gutpela sapos yu tok, “God bilong mi, mi laikim tumas long bihainim laik bilong yu.”—Sng 40:8.