Askim

◼ Olsem wanem ol atendan i ken helpim ol papamama bambai ol pikinini bilong ol i ken bihainim gutpela pasin long taim bilong ol miting?

Skin bilong ol pikinini i gat strong, na ol i no inap sindaun tasol inap longpela taim. Bihain long taim miting i pinis, ol pikinini i gat bikpela strong i stap yet long skin bilong ol na dispela inap mekim na ol i laik ran ran nabaut na ranim ol narapela pikinini insait long Haus Kingdom o long ol narapela ples bilong mekim miting, o long ol ples bilong putim ol ka, o long ples ol man i save wokabaut i go i kam long en. Tasol wanpela savetok i tok tru olsem: “Sapos pikinini i bihainim laik bilong em yet oltaim, orait em bai i mekim papamama bilong en i sem.”​​—⁠Snd 29:⁠15.

Olsem na bilong bagarap i no ken painim ol pikinini o ol narapela, ol papamama i no ken larim ol i ran ran nabaut na pilai insait o ausait long Haus Kingdom. Sori tru sapos wanpela lapun brata o sista i kisim bikpela bagarap, long wanem, wanpela pikinini i ran na bamim em. Dispela inap kamapim pen na hevi long dispela brata o sista, na tu, ating papamama na kongrigesen i mas tromoi mani long dispela samting.

Ol papamama i gat wok olsem Baibel i makim long skulim ol pikinini bilong ol long tingim gut ples bilong yumi long lotuim God. (Sav 5:1a) Long ol miting Kristen bilong yumi, na long ol kibung sekit na kibung distrik, ol atendan i gat wok long was long yumi bambai yumi ken “bihainim stret ol gutpela pasin” na bilong olgeta samting i “wok stret.” (1 Ko 14:40; Kl 2:⁠5) Paslain long program i kirap, na long taim bilong program, na bihain long en, ol atendan i mas was long ol samting insait na ausait long Haus Kingdom o ples kibung. Sapos wanpela pikinini i wok long ran ran nabaut o i hatwok long bosim em, orait long pasin isi atendan i ken pasim pikinini, na tokim em bilong wanem dispela pasin em i mekim i no stret. Na long gutpela pasin atendan i mas tokim papamama bilong dispela pikinini long dispela samting na long ol i mas bosim gut pikinini. Na papamama i mas bihainim tok bilong atendan.

Yumi save olsem long sampela taim ol bebi na ol liklik pikinini inap krai o mekim planti pairap samting, na dispela inap pulim tingting bilong yumi long taim bilong ol miting. Ol atendan i save kamap long Haus Kingdom inap 20 minit paslain long taim miting i kirap, na ol i ken makim sampela sia long baksait bilong Haus Kingdom long ol papamama i gat ol liklik pikinini na ol i laik sindaun long dispela hap. Na yumi ol narapela i ken wok gut wantaim ol atendan na lusim ol dispela sia long ol papamama.

Sapos pikinini i pairap, papamama i mas mekim sampela samting. Na sapos papamama i no mekim wanpela samting na dispela i pulim tingting bilong ol narapela, orait long gutpela pasin atendan i mas askim papamama bilong dispela pikinini long kisim em i go ausait. Sapos yumi singautim ol nupela man i gat ol pikinini i kam long ol miting, yumi mas sindaun wantaim ol na helpim ol sapos pikinini i krai o i mekim narapela samting inap bagarapim miting.

Yumi amamas taim yumi lukim ol pikinini i gat kain kain krismas i stap long Haus Kingdom na ol i bihainim gutpela pasin insait long lain bilong God. (1 Ti 3:​15) Taim ol i tingim tru ol samting bilong lotu bilong Jehova, ol bai litimapim nem bilong em na olgeta insait long kongrigesen bai laikim ol.

This article is repeated in km 7/06.