Pas Bilong Ol Man
Kisim Amamas Mi gat 12-pela krismas, na mi bin amamas tru long kaunim stori “Ol Yangpela i Laik Save . . . Bilong Wanem Ol Narapela i Kisim Amamas?” (Ogas 8, 1996) Bipo mi tu i gat wankain askim. Long skul bilong mi, mipela inap raitim nem bilong go long ol pati, ol danis, na ol narapela samting. Planti taim mi gat laik long i go. Tasol dispela stori i bin helpim mi long pilim tru olsem Jehova bai skelim ol samting mi bai mekim. Olsem na mi bai pas gut wantaim ol poroman Kristen bilong mi.
A. S., long Amerika
Olsem yupela i kamapim long stori, sampela taim mi bin kisim wankain tingting olsem [wanpela man bilong raitim Baibel] em Asap. Dispela stori i bin strongim mi moa long was gut long ol samting i save kamap long skul.
A. S., long Japan
Tru sampela yangpela i ting ol i lus long kisim ol amamas, long wanem, papamama i no “larim” ol i insait long ol pati samting bilong dispela graun. Tasol i no olgeta pikinini bilong ol Witnes Bilong Jehova i gat wankain tingting! Mi yet i no save amamas long planti samting i kamap long ol pati bilong dispela graun, na ol poroman Kristen bilong mi tu ol i gat wankain tingting. Mipela na ating planti moa, mipela i no ting mipela i lus long kisim amamas!
C. H., long Amerika
Nektai Tenkyu tru long stori “Husat i Wokim Nektai Pastaim?” (Novemba 8, 1996) Mi wanpela Witnes Bilong Jehova, na taim mi autim tok mi bin pasim nektai long taim san i hat nogut tru. Planti taim mi save ting wanpela man nogut long yia 1200 samting i bin wokim nektai bilong mekim pretim man i bin lusim bilip bilong misin bambai em i mas bihainim laik bilong em, o em i mekim dispela wok long hap ain, o wanpela kain skru long memeim pinga, o em bai kukim em long wel, o em i mas pasim nektai long traipela san long apinun.
W. B., long Amerika
Ating sampela man bai pilim olsem i no gutpela long pasim nektai, maski em taim bilong san o taim bilong ren. Tasol gutpela tru, long ol kantri em pasin bilong ol man long pasim nektai, ol Witnes Bilong Jehova i save pasim nektai long taim bilong autim tok na taim ol i go long ol miting.—Edita.
Em i Senisim Tingting Mi laik tokim yupela olsem stori “As na Em i Senisim Tingting Long Wanem Samting i Bikpela Samting” (Ogas 8, 1996) i bin strongim mi tru. Mi bin mekim wok bilong autim tok long olgeta de winim 13 yia, na bilong tingim wanem ol samting i bikpela samting long dispela taim nogut yumi stap long en, em i no isi. Long olgeta yia, i hatwok moa long i stap yet na mekim wok bilong autim tok long olgeta de. Taim mi tingim stori bilong Jeremy na em i lusim gutpela wok bilong em olsem wasman bilong wanpela hap graun bilong lukautim ol pisin samting bambai em i ken kamap man bilong autim tok long olgeta de, dispela i bin strongim mi long tingim wok autim tok i nambawan bikpela samting long i stap bilong mi, maski i hatwok long mekim.
N. C., long Amerika
Pasin Bilong i Stap Stret Tenkyu tru long sotpela gutpela stori, nem bilong en “Pasin Bilong i Stap Stret—Bilong Wanem?” (Septemba 8, 1996) Nau long taim bilong yumi, ol man i ting sapos skin bilong yu i no gutpela, yu bai tingting long i stap stret. Tasol i gutpela tru long lukim ol naispela yangpela manmeri i holimpas ol stretpela lo bilong Jehova. Mi laik tok tenkyu gen long yupela!
R. D., long Amerika