Nambawan Pren Bilong Yumi i Stap Long Ples Spirit

BAIBEL i kamapim klia husat i stap long ples spirit. God Jehova em i nambawan bikpela long heven. Krais Jisas i nambatu long Jehova long holim namba na strong. Ol gutpela ensel ol i save mekim wok bilong God na helpim lain bilong God long graun. Satan na ol spirit nogut bilong em i birua long God na ol i wok long giamanim ol man. Ol man i dai pinis i olsem ol i slip na wetim taim God bai kirapim bek ol.

Ol Spirit Nogut i Laik Yumi Lotuim Ol

Ol man i dai pinis ol i no i stap moa, olsem na maski yumi lotu long ol, ol i no inap helpim yumi. Pasin bilong givim ofa long ol man i dai pinis i save helpim ol tok giaman bilong Satan na ol spirit nogut.

Olsem wanem? Ol ensel bilong God i laik yumi lotu long ol? Nogat tru! Ol gutpela ensel i save givim biknem long God na ol i kirapim ol man long mekim olsem. Tupela taim aposel Jon i laik lotuim ol ensel, tasol ol i krosim em na tok: “Yu no ken mekim olsem! . . . Yu mas lotu long God.”​—KTH 19:10; 22:​8, 9.

Satan na ol spirit nogut i narapela kain long ol gutpela ensel, ol i laik ol man i lotuim ol na givim biknem long ol. Na dispela samting i kamap ples klia taim Jisas i stap man long graun na Satan i traim em. Baibel i tok: “Satan i kisim Jisas gen na i go long wanpela maunten i antap moa. Na Satan i soim em olgeta strongpela kantri bilong dispela graun wantaim ol gutpela samting bilong ol. Na em i tokim Jisas olsem, ‘Sapos yu brukim skru na lotu long mi, orait bai mi givim yu dispela olgeta samting.’ ”​—Matyu 4:​8, 9.

Jisas i tok: “Satan, yu klia. Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” (Matyu 4:10) Jisas i save long Lo bilong Jehova na em i no laik tru long brukim.​—Lo 6:13.

Satan i no inap kirapim Jisas long lotuim em, tasol em i bin grisim sampela man long mekim olsem. Tru, i no laik bilong olgeta man na ol i lotuim Satan. Tasol long rot bilong trik, na giaman, na pret, Satan na ol spirit nogut ol i bin pulim planti man long lusim lotu i tru bilong Jehova, olsem na aposel Jon i tok: “Dispela graun olgeta em i stap aninit long strong bilong Satan.” (1 Jon 5:19) Ol man i lotu long pasin i no stret long Tok Bilong God, ol i givim biknem long Satan, ol i no givim biknem long Jehova. Baibel i tok: “Samting ol haiden i save ofaim, em ‘ol i ofaim long ol spirit nogut. Ol i no ofaim long God.’ ”​—1 Korin 10:20.

Lotu i Samting Bilong Jehova

Yumi mas lotu long God wanpela tasol. Jehova i tokim Moses olsem: “Yupela i no ken bihainim ol giaman god. Yupela i no ken wokim wanpela giaman god, na yupela i no ken wokim piksa bilong wanpela samting i stap long heven o i stap long graun o insait long wara i stap aninit long graun. Yupela i no ken brukim skru long wanpela giaman god o piksa na lotuim em, long wanem, mi Bikpela, mi God bilong yupela, na mi no inap larim wanpela giaman god i senisim mi. Nogat tru.”​—Kisim Bek 20:​3-5.

Jehova i gat bikpela strong na em i bosim olgeta samting, tasol yumi inap go klostu long em. Disaipel Jems i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Aposel Pol i tok: “[God] i no i stap longwe long yumi olgeta wan wan.” (Aposel 17:27) Na aposel Jon i tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. . . . Olsem na taim yumi askim em long givim wanpela samting long yumi, yumi save olsem yumi kisim tru dispela samting.”​—1 Jon 5:​14, 15.

Olsem na Jon i tok, sapos yumi laik Jehova i harim beten bilong yumi, yumi mas ‘bihainim laik bilong em.’ Bilong save long laik bilong God, yumi mas kisim save long ol tok bilong Baibel. Ol Witnes Bilong Jehova bai amamas long lainim yu long ol tok bilong Baibel.

Taim yu kisim sampela save moa long Jehova bai yu kisim save long husat i stap long ples spirit. Dispela save bai helpim yu long stap fri long ol bilip kranki bilong ol tumbuna, na ol bilip na pasin Satan i save mekim wok long en bilong pretim na kalabusim ol man. Stretpela save long God bai helpim yu long bilip olsem em bai helpim yu long abrusim o winim ol hevi bilong olgeta de. Yu inap kamap pren bilong God. Na God bai kamap ‘ples hait bilong yu, na em bai strongim yu oltaim. Em i stap klostu na i redi long helpim yu long taim bilong bikpela hevi.’​—Song 46:1.

Ol Spirit Nogut Bai Pinis

Yu no ken ting olsem ol gutpela spirit i no inap daunim ol spirit nogut. Wanpela bikpela pait i bin kamap pinis long ples spirit bilong rausim Satan wantaim ol narapela spirit nogut long heven. Buk Kamapim Tok Hait i tok: “Bikpela pait i kirap long heven. Maikel [em Krais Jisas taim em i kirap bek] wantaim ol ensel bilong en ol i pait long dispela traipela snek. Na snek wantaim ol ensel bilong en ol i bekim pait long ol, tasol ol i no gat strong bilong winim pait. Olsem na ol i no inap i stap moa long heven, na ol ensel bilong God i tromoi dispela snek i go daun. Em dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun. Ol i tromoi em i go daun long graun, na ol i tromoi ol ensel bilong en i go daun wantaim em.”​—KTH 12:​7-9.

Wanem samting i kamap long dispela pait? Baibel i tok moa: “Olsem na yu heven, na yupela olgeta lain i stap long heven, yupela i ken amamas. Tasol yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” (KTH 12:12) Ol ensel i ken amamas, long wanem, Satan wantaim ol spirit nogut i no stap moa long heven bilong kamapim hevi. Em i raus long heven, olsem na ol bikpela hevi tru i kamap long ol man bilong graun. Yumi stap nau long dispela taim bilong hevi.​—2 Timoti 3:​1-5.

Bihain Pasin Nogut Bai Pinis

Tasol Baibel i makim gutpela samting yumi ken wetim. Baibel i tok, Satan i gat “sotpela taim tasol bilong i stap” na Jehova bai pasim em na em i no inap mekim wok moa. Taim dispela samting i kamap, Jehova bai kamapim ol gutpela blesing long ol man i laik stap pren bilong em. Tingim sampela bilong ol tok promis bilong God ol bai kamap bihain:

“Planti rais na wit samting i ken kamap long ol gaden bilong ol manmeri.”​—Song 72:16.

“Ol manmeri bilong mi . . . bai ol i amamas long ol samting ol yet i bin hatwok long kamapim. Wok ol i mekim bai i no inap lus nating.”​—Aisaia 65:​22, 23.

“I no gat man i stap . . . bai i tok olsem, ‘Mi gat sik.’ ”​—Aisaia 33:24.

“Ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.”​—Aisaia 35:​5, 6.

“Em [God] bai i mekim drai wara i stap long ai bilong olgeta . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—KTH 21:4.

“Ol stretpela man bai i kisim graun God i givim ol, na bai ol i stap oltaim long en.”​—Song 37:29.

Jehova, em God tru, em tasol inap truim ol dispela gutpela tok promis. I no gat wanpela samting bai pasim em long kamapim laik bilong em. “I no gat wanpela samting God i no inap mekim.”​—Luk 1:37.

[Ol Piksa long pes 9]

Taim yu kamap pren bilong God, em bai helpim yu long karim ol hevi i kamap