Go Sindaun Long Narapela Hap—Hevi Bilong En!
WANPELA MAN LONG SAUT AFRIKA I RAITIM DISPELA STORI BILONG KIRAP!
OLSEM WANEM? Yu tingting long go sindaun long narapela kantri? Yu bin tingting gut pastaim? Mipela i no tok long ol samting bilong skin tasol, long wanem, klostu olgeta man i tingting long go sindaun long narapela hap ol i go bilong painim gutpela wok mani. Mipela i tok long ol samting i stap hait long tingting na bel na em i kamap ples klia bihain long ol i sindaun pinis long nupela hap. Tasol taim ol hevi i kamap ples klia, ating i no gat rot long go bek long ples. Ol samting mipela raitim daunbilo i no bilong mekim yu i tingting planti, tasol i gutpela sapos yu tingim:
“Bilong lainim wanpela nupela tok ples, man i mas bihainim pasin daun na wok strong. Man o meri inap tingting planti taim ol liklik pikinini tu i ting em i narapela kain, long wanem, ol i no inap harim tok bilong em. Na sapos yumi popaia long toktok na ol i lap, dispela inap traim bel bilong yumi planti man. Man bilong narapela kantri bai pilim olsem em i stap wanpis sapos em i no inap mekim tok ples bilong kantri em i stap long en.”—Rosemary, em wanpela misineri long Japan.
Ating yu pilim olsem yu save liklik long nupela tok ples, olsem na yu no ken hatwok tumas. Tasol olsem wanem long famili bilong yu? Ol tu i save long tok ples inap long ol i ken amamas long sindaun long nupela hap?
Olsem wanem long famili sapos sampela i no laik go long narapela hap tasol yu grisim ol long go? Nius Psychology of Women Quarterly i tok: ‘Sampela meri bilong Meksiko i no inap kamapim tingting bilong ol taim ol i mas go sindaun long narapela kantri, na em i no laik bilong ol yet long i go, na taim ol i kamap pinis long Yunaitet Stets, ol i no gat laik long stap long dispela hap.’ Sapos olsem, na man i strong long famili i go sindaun long narapela hap, dispela inap mekim na famili i no stap wanbel moa. Tasol olsem wanem sapos papa wanpela tasol i go sindaun long narapela hap?
Buk Population, Migration, and Urbanization in Africa i tok, long wanpela liklik ples long bus long hap saut bilong Afrika, winim 50 pesen bilong “ol man i no stap long ples maski yu go long wanem wanem taim.” Papa i no stap, olsem na famili i no inap stap isi wantaim na belgut. Na tu, rot i op bilong poroman marit i pundaun na mekim pasin pamuk. I gutpela moa sapos famili, maski ol i go sindaun long narapela hap o nogat, ol inap stap wantaim! Famili i pas gut wantaim em wanpela samting mani i no inap baim.
Na sapos sampela i bel nogut long man bilong narapela ples o skin, em bikpela hevi long karim. Wanpela man bilong India i tok: ‘I go inap long taim mi kam long Inglan mi no bin tingim “kala” bilong skin. Taim mi save skin bilong mi i narapela kain, em i samting nogut tru. Bel bilong mi i bagarap stret. Mi laik go bek long ples na ranawe long dispela hevi.’—Buk The Un-melting Pot.
Olsem na paslain long yupela i go sindaun long narapela hap, askim yupela yet olsem: ‘I gat narapela rot? Mipela inap senisim sampela samting bilong mipela yet na stap long ples? Sapos mipela go long narapela kantri, dispela bai helpim mipela?’ Maski em bai helpim yupela o nogat, tasol paslain long yupela i pasim tok long dispela samting, i gutpela sapos yupela i tingim tok bilong Jisas: “Sapos wanpela bilong yupela i laik wokim wanpela haus . . . ating em bai i sindaun pastaim na tingim gut pe bilong wokim dispela haus. Em i laik save, mani bilong en bai inap long pinisim dispela haus, o nogat.”—Luk 14:28.