Gutpela Tingting Bilong Sakim Pamuk na Maritim Wanpela Poroman Tasol
I KAM inap long nau, klostu 30 milion manmeri i bin kisim sik AIDS na klostu 6 milion ol i bin dai long en. Inap 8,500 i save kisim dispela sik long olgeta de—1,400 bilong ol em ol pikinini na planti bilong ol i save dai taim ol i no winim yet wanpela krismas. Sampela lain i kirapim ol man long mekim wok long kondom taim ol i pamuk, tasol sampela i ting dispela i no inap helpim tru ol. Long wanpela nius (The Tampa Tribune) Dokta Steven J. Sainsbury i tok olsem: “Sik AIDS em wanpela sik bilong kilim man i dai, na ol rot sampela i bihainim bilong pasim dispela sik na em i no inap kalap i go long ol narapela o ol yet i no inap kisim, em i mas nambawan tru olsem 100 pesen.”
Long pasin bilong mekim wok long kondom bilong abrusim sik AIDS, Dokta Sainsbury i tok: ‘Yumi ken tingting olsem: Sapos ol ka i wok long pairap na bagarap olgeta taim ol man i kirapim ensin, tasol ol i no save long as bilong en, na long olgeta hap bilong kantri ol man i raun long ka ol i dai nabaut. Tasol bihain gavman i tok ol i painim pinis wanpela rot bilong stretim dispela hevi. Ol i tok, kapsaitim tasol wanpela marasin long bensin na bai dispela hevi i no kamap planti taim. Yu ting ol i stretim pinis dispela hevi? Yu bai draivim yet ka bilong yu? Ating nogat. Orait, bilong wanem yumi ting kondom em i rot bilong pinisim sik AIDS?’
Planti taim sik AIDS i save kamap long rot bilong pamuk, olsem na Dokta Sainsbury i tok, wanpela rot bilong stretim em olsem: “No ken slip wantaim narapela inap long taim yu marit tru long poroman em i no gat binatang jem i save kamapim sik AIDS. Bikpela samting em long sakim pamuk na maritim wanpela poroman tasol.”
Baibel i tok ol singel i no ken slip wantaim na ol marit i mas i gat wanpela poroman tasol. Ol stretpela lo bilong Baibel i tambuim pasin pamuk, bagarapim marit, na pasin sem. (Matyu 19:4-6; 1 Korin 6:9, 10; 7:8, 9) Maski planti man i tok bilas long dispela lo na tok em pasin bilong bipo tasol, tok bilong Baibel long ol stretpela pasin i helpim ol man na bai ol i no ken sik planti, na tingting na bel bilong ol i ken i stap isi.—Aisaia 48:17.