Kaikai—Samting Yumi Mas Tingim
BAIBEL i tok: “Goan, yu go kaikai na amamas.” (Saveman 9:7) Tru tumas, kaikai i wanpela samting yumi no ken lusim, tasol em i wanpela samting i givim bikpela amamas long yumi tu.
Tingim Thomas. Em i gat 34 krismas na em i man bilong kaikai abus. Em i save kaikai abus long olgeta de—sampela de em i kaikai abus planti taim. Kaikai bilong em long olgeta moningtaim em susu, sampela kiau, bret i gat bikpela hap bata long en, sosis o bekon. Long ol liklik haus kaikai nabaut em i save baim sisbega, sips, na milk-sek. Taim em i go long ol bikpela haus kaikai, em i save kaikai mit bilong bulmakau. Long wanpela haus kaikai em i save laikim tru, ol i wokim kaikai long pasin em i laikim—bikpela hap mit bilong bulmakau (680 gram), na poteto ol i bin kukim long aven na antap long en i gat strongpela susu i gat pait. Na switpela kaikai em i save laikim tru, em kek wantaim aiskrim ol i bin wokim long sokolat.
Thomas i longpela inap 178 sentimita na hevi bilong em i olsem 89 kilogram, tasol wanpela buk bilong 1995 em gavman bilong Yunaitet Stets i bin kamapim bilong helpim ol man long kaikai, i kamapim klia olsem Thomas i patpela tumas; em i winim skel inap 9-pela kilogram. Thomas i tok: “Mi no save tingting planti long skin bilong mi. Mi no save sik. Insait long 12-pela yia i no gat wanpela de mi bin lusim wok. Klostu olgeta taim skin bilong mi i pilim gutpela na i gat strong. Bihain long mi kaikai bikpela hap mit, long dispela taim tasol mi no pilim gutpela tumas.”
Tasol olsem wanem? Kaikai bilong Thomas inap mekim nogut long em na isi isi dispela bai mekim na bihain em i kisim hat-atek? Long buk bilong em (How We Die), Dokta Sherwin Nuland i tok, ‘long sampela pasin bilong yumi long kaikai, yumi inap kisim bagarap long en,’ olsem pasin bilong yumi long kaikai planti ‘mit bilong bulmakau, na bikpela hap bekon, na bata.’
Olsem wanem sampela kain kaikai i kamapim sik bilong klok long planti man? Wanem samting long ol dispela kain kaikai i as na em inap nogutim man? Paslain long yumi stori long ol dispela askim, yumi ken tingim ol sik yumi inap kisim sapos skin i patpela tumas.
[Piksa long pes 3]
Bilong wanem yu mas tingting gut long ol kain kaikai olsem?