Mi Lusim Skin—Yu Tu Inap!

YU SAVE bel hevi taim yu skelim skin bilong yu? Mi bin bel hevi. Wanpela taim long yia i go pinis mi bin sanap long skel na mi bel hevi stret taim skel i makim hevi bilong mi olsem 110 kilo. Mi bin tingting olsem: ‘Hevi bilong mi i winim hevi bilong traipela nambawan man bilong boksen na planti ol man bilong pilai kikbal long Amerika. Dispela samting i nogut tru. Mi mas mekim wanpela samting bilong lusim skin; nogut skin i bagarap olgeta!’

Ating yu save long wanpela man i kain olsem mi​—em i lapun liklik na em i wok long ofis. Taim em i yangpela em i bin wokabaut planti na pilai spot samting, tasol nau em i sindaun long ofis na em i no wokabaut planti. Tasol olsem mi, em i no ting em i gat hevi, maski mak bilong blut i go antap tru, na mak bilong gris kolestrol long skin i antap liklik, na skin i bikpela liklik, winim mak bilong skin long 23 kilo.

Tasol bikpela hevi i stap. Long olgeta de planti manmeri olsem mi ol i dai​—planti i save kisim sik olsem klok i bagarap. Yumi mas tingim gut dispela samting. Planti meri i stap wanpis na ol pikinini i no gat papa, long wanem, ol papa i gat patpela skin tumas na ol i kisim sik na ol i dai. Mi laik tok strong olsem: Tingim ol pikinini. Sapos papa i dai, mama i gat bikpela wok long mekim bikpela long ol.

Yupela ol papa i mas tingim gut dispela samting.

Taim mi bin pasim tok long bel olsem mi bai lusim skin, mi bin tingim ol gutpela tok long Kirap! (tok Inglis) bilong Me 22, 1989, olsem: ‘Yu Hatwok Long Lusim Skin?’ Em i bin kamapim 4-pela rot bilong helpim yumi long winim dispela hevi, olsem: (1) kaikai ol kaikai i no gat gris, (2) kaikai long taim stret, (3) kaikai inap long skel tasol, (4) eksasais.

Dispela 4-pela samting i bin helpim mi! Mi bin lusim 27 kilo, olsem na yu tu inap mekim. Taim mi lusim skin mi bin lain long sampela samting na ating ol dispela samting inap helpim yu.

Em Samting Bilong Tingting

Planti bilong mipela i no kisim patpela skin wantu, nogat. Ating taim mipela i gat 35 krismas samting, isi isi skin i wok long go patpela. Inap sampela taim mipela tambuim sampela kaikai bilong lusim skin na skin i lus, tasol bihain skin i go patpela gen. Taim dispela samting i kamap long skin bilong mi, mi no inap givim bel long lusim skin. Mi pilim olsem i no gat rot bilong lusim skin, olsem na mi les long mekim.

Sapos yu ting i no gat rot bilong lusim skin, yu no ken tingim skin tasol, yu mas senisim tingting bilong yu​—yu gat wanem kain tingting long kaikai? No ken giaman. Yu mas tingting gut na askim skin bilong yu yet​—mi givim bel tumas long kaikai o nogat? Sapos yu giaman, yu no inap tru lusim skin.

Long wanpela wik mi bin skelim ol samting mi bin kaikai na dring, na mi kirap nogut tru. Long taim tru bilong kaikai mi bosim gut skin na mi no save kisim bikpela kaikai, tasol long nait mi mekim save long ol liklik kaikai i go i go. Olsem na samting mi mekim long nait i bagarapim gutpela samting mi mekim long san. Taim mi save long hamas gris i stap long sis na ol galip na pinat-bata na ol bisket mi kaikai long nait, mi kirap nogut tru. Na tu, ol dispela kaikai i gat bikpela suga long en. Mi save mi no inap lusim skin sapos mi no tambuim ol dispela liklik kaikai mi wok long kisim long olgeta nait. Olsem wanem? Yu gat wankain pasin?

Na mi save sapos mi laik lusim skin na skin i no ken kamap patpela gen, mi no ken tambuim kaikai tasol, mi mas tambuim dring. Dring i gat planti gris long en tu. Na sapos olgeta nait mi dring wanpela glas wain, mi no inap bosim skin​—mi kirap na kaikai. Taim mi dring dispela glas wain, mi save kaikai planti bisket na galip wantaim! Tasol mi kisim save olsem, sapos mi dring ti long nait, mi no gat laik long wain o kaikai. Na maski mi lusim skin pinis, mi no save dring olsem bipo mi bin mekim.

Tupela samting i bin helpim mi long lusim skin nabaut olsem:

1. No ken kaikai liklik kaikai long nait.

2. No ken dring wain o bia samting.

Abrusim Sampela Kaikai!

Ol manmeri bilong Frans i gat wanpela savetok olsem: Sapos yu kaikai planti bai yu hangre moa. Long mipela planti man dispela savetok i tru. Taim mipela kirap na kaikai, ating mipela i no hangre tumas, tasol wanpela samting insait long skin i mekim, na nau mipela i dai long hangre. Olsem na mipela kirap na kaikai i go i go inap long olgeta kaikai i pinis, o 4-pela taim mipela i bin pulapim kaikai long plet na nau bel i pen. Bilong wanem dispela hevi i painim mipela?

Hevi bilong mi em mi save laikim bret. Meri bilong mi i save tru long wokim bret, olsem na taim mi laik lusim skin em i no wokim moa, nogut dispela samting i traim mi! Ating hevi bilong yu em sokolat o narapela samting, a? Maski em wanem samting, yu mas save long samting yu kaikai long en na em i mekim yu i hangre moa moa yet, na yu mas abrusim dispela kaikai. I gat planti kaikai yumi inap kisim. Taim mi save kaikai letis, tomato, kukamba, sayor, pamken, poteto, kumu samting ol i bin kukim nating long sospen dispela i swit long maus bilong mi na bel i pulap na mi no save hangre kwik.

Sampela Samting Bilong Winim Hevi

Pasin bilong lusim skin na bihain skin i go patpela gen, i no save helpim yu, em i save helpim tasol ol man i wok bisnis long helpim ol man long lusim skin. Long planti kantri long Wes i gat planti kain bisnis olsem. Mi bin lusim skin na bihain i go patpela gen, tasol bihain mi pasim tok long bel olsem mi mas lusim skin. Mi bin mekim olsem wanem?

No ken sem long askim narapela long helpim yu. Toktok wantaim dokta bilong yu. Na toktok wantaim sampela wantok ol bai tok amamas long yu taim ol i lukim yu i lusim skin. Na sapos yu gat wanpela wantok em tu i wok long lusim skin, toktok wantaim em. Sapos yu mekim olsem na nau em i tok amamas long yu, long wanem, yu lusim skin, dispela bai strongim bel na tingting bilong yu, na nau yu no ken pundaun gen long dispela hevi long lusim skin na bihain kamap patpela gen.

Narapela samting yu mas mekim em yu mas skelim gut kaikai yu save kisim. Nogut yu kaikai wanpela kain kaikai tasol o liklik kaikai tumas na nau skin i les o em i stap hangre yet. Mi bin lusim skin, long wanem, olgeta moningtaim mi bin kaikai musli samting i no gat gris na hap bilong bikpela switmuli. Long belo mi bin kaikai planti letis, tomato, kukamba samting, na long apinun mi bin kaikai abus i no gat gris na pamken na poteto na kumu ol i bin kukim nating long sospen. Mi no bin kaikai bret na switpela kaikai. Na sapos namel long taim tru bilong kaikai mi hangre liklik, mi bin kaikai apel, o sapos mi hangre tru, mi bin mekim wok long wanpela samting yu tu i ken mekim wok long en bilong daunim hangre.

Samting Bilong Helpim Yu Tru

Wanem dispela samting yu ken mekim wok long en? Em wanpela samting bilong helpim skin, na em i no gat gris, na taim yu kisim, bel bilong yu i pulap. Na em i no gat bikpela pe! Em wara. Sapos yu dring 6-pela i go inap 8-pela glas wara long olgeta de dispela bai helpim yu long lusim skin. Taim skin bilong yu i lain, olsem taim yu hangre yu bai dring wara, skin i no ken krai moa long kisim kaikai. Wara i bin winim ol narapela samting mi bin mekim bilong pinisim pasin bilong mi long kaikai ol liklik kaikai long nait.

Narapela samting bilong helpim yu long bosim skin na em i no ken patpela gen, em eksasais. Taim yu eksasais tingting na bel bilong yu i stap gut, long wanem, skin i strong na long ai bilong yu na ol narapela man skin i gutpela. Olsem na yu amamas long tambuim sampela kaikai, long wanem, yu kisim gutpela strongpela skin. Na ol dispela samting i helpim yu long bosim yet skin bilong yu, na maski ol narapela man i kaikai switpela kaikai na yu kaikai samting i no gat gris, yu no save mangalim kaikai bilong ol.

Na kaikai na eksasais i save wok gut wantaim. Taim yu lusim skin i no olsem yu mas kamap bun nating. Na sapos olgeta taim yu eksasais, em bai strongim ol masol, na skin bilong yu bai lait. Mi no bin mekim wanpela kain eksasais tasol, mi bin pilai spot wantaim narapela man olsem tenis, na taim mi stap wanpis mi bin eksasais long apim ol hevipela ain samting. Dispela ol eksasais i mekim na nau ol masol bilong mi i strong na gris bilong skin i no karamapim moa. Bipo hevi bilong skin bilong mi em 110 kilo, na bihain taim mi lusim skin mi gat 82 kilo. Olsem na mi amamas long eksasais wantaim sampela yangpela na save, ol inap winim mi o nogat!

Sapos skin bilong yu i patpela inap longpela taim liklik olsem skin bilong mi bipo, ating taim yu kirap long olgeta moningtaim, skin bilong yu i les, maski yu no bin mekim wanpela samting, a? Na long san ating yu wokabaut isi isi, olsem yu no gat strong, na long nait, taim yu sindaun, kwiktaim yu save slip, a? Sapos skin bilong yumi i winim skel long 20 o 30 kilo samting, dispela i wankain long man i stap kalabus na ol i pasim wanpela hevipela sen ain long lek bilong em na em i wokabaut! Planti yia skin bilong mi i patpela, na mi no inap lusim bet hariap, na long san skin i save les. Tasol nau skin bilong mi i no save les olsem, long wanem, mi lusim skin pinis.

No Ken Slek

Taim yu lusim skin i olsem yu winim wanpela pait. Tasol yu no ken les, pait i stap yet. Olsem: Yumi ol manmeri i lapun liklik na yumi wok long ofis samting, yumi mas bosim gut kaikai sapos yumi no laik bai skin i patpela gen. Yumi mas hatwok i go i go. Sapos yu kirap gen na mekim wankain pasin yu bin mekim bipo taim skin i patpela, orait, skin bai go patpela gen.

Bilong kamapim amamas bilong yu long lusim skin, kisim sampela nupela klos. Na ating i gutpela long tromoi ol olpela klos bilong yu. Sapos yu holim ol olpela klos, i olsem yu ting yu no inap bosim skin na bai yu go patpela gen, a? Na yu mas pasim klos i stret long skin bilong yu, olsem na sapos bihain klos i pas liklik long skin, yu save skin i wok long go patpela gen. Taim yu lusim skin ating nau yu kirap na kaikai kain kain kaikai, a? Tasol i gutpela sapos olgeta taim yu kaikai ol samting i no gat planti gris na planti suga long en. Na bikpela samting tu​—olgeta taim yu mas eksasais.​—Wanpela man i salim dispela stori i kam.