Ol Yangpela i Laik Save . . .

Bilong Wanem Mi Tingting Tasol Long Hevi Bilong Skin?

Jaimee i tok: ‘Tupela strongpela laik i wok long pulim mi. Wanpela i pulim mi long kaikai, tasol narapela i pasim mi long kaikai, long wanem, mi pret, nogut skin bilong mi i kamap bikpela tumas.’

WANEM samting em i nambawan samting yu save pret long en? Planti yangpela meri bai bekim wantu tasol olsem: Mi pret skin bilong mi bai kamap bikpela. Wanpela lain i kisim save olsem ol yangpela meri bilong nau, ol i pret moa long ol bai kamap patpela; ol i no pret tumas long pait nuklia, o long sik kensa, o long papamama i dai!

Sampela meri i kirap long tingting planti long hevi bilong skin bilong ol taim ol i liklik yet. Savemeri Catherine Steiner-Adair i tok, taim ol i yangpela yet planti meri i bung wantaim na toktok long hevi bilong skin bilong ol​—⁠ol i toktok long ol samting bilong skin ol i no amamas long en. Tasol ol i no stori tasol long dispela samting, nogat. Wanpela lain i skelim 2,379 yangpela meri, na planti bilong ol (40 pesen) i traim long lusim skin. Na ol dispela yangpela meri ol i gat 9-pela na 10-pela krismas tasol!

Bihain, planti bilong ol bai tambuim ol yet long kisim sampela kaikai. Na samting i nogut moa bai painim sampela, olsem samting i bin painim Jenna i gat 20 krismas. Longpela bilong dispela yangpela meri em 160 sentimita, na hevi bilong em i olsem 40 kilo tasol! Jenna i tok: “Mi no laik kaikai. Inap 3-pela yia mi bin wok long lusim skin, na mi pret olsem taim mi kaikai skin bai patpela gen insait long wanpela mun tasol.”

Ating yu inap pilim tingting bilong Jenna. Ating yu tu i gat laik long lusim skin liklik bambai skin bilong yu i naispela tru. Tru, i no gat rong long tingim ol samting bilong skin bilong yu. Tasol Jenna i laik kamap bun nating na dispela i mekim na klostu em i dai. Olsem wanem dispela i kamap?

Ol i Dai Long Hangre

Jenna i gat wanpela kain pasin kranki long kaikai em ol i kolim anoreksia nevosa. Jaimee, em yumi stori long em long kirap bilong dispela stori, em tu i gat dispela sik. Inap sampela mun samting, dispela tupela yangpela meri ol i tambuim ol yet long kisim sampela kaikai na klostu ol i dai. Na i no dispela tupela meri tasol i save mekim olsem, nogat. Ol i ting olsem long olgeta 100 100 yangpela meri, wanpela i gat sik anoreksia. Olsem na planti milion yangpela meri i gat dispela sik, na ating yu save long sampela meri olsem!a

Sik anoreksia inap kamap maski meri i no ting em inap kisim dispela sik. Wanpela yangpela meri inap tambuim skin long kisim sampela kaikai bambai skin i ken lus liklik. Tasol taim em i winim mak bilong em, em i no amamas. Em i lukluk long glas na em i no amamas long skin bilong em, na em i tok: “Mi patpela yet!” Olsem na em i laik yet long lusim skin i go i go. Em nau, dispela pasin bai mekim na em inap kisim sik anoreksia.

Tru, i no olgeta meri i tambuim ol yet long kisim sampela kaikai ol i gat sik anoreksia. Sampela i gat gutpela as na ol i tingting planti long hevi bilong skin, na i gutpela sapos ol i lusim skin liklik. Tasol planti yangpela meri ol i no gat stretpela tingting long skin bilong ol. Wanpela nius (FDA Consumer) i tok, ol meri i gat tingting kranki long skin bilong ol, i olsem ol i lukluk long wanpela kain glas i mekim skin bilong ol i luk narapela kain. Dispela nius i tok: ‘Yu lukim skin i olsem patpela, tasol skin i no patpela.’

Olsem na meri i gat sik anoreksia em i pret long em bai kamap patpela​—⁠maski em i bun nating pinis. Ating em i save eksasais planti bambai em i no ken kamap patpela, na planti taim long wanpela de em i save skelim hevi bilong skin long skel, nogut skin i wok long i go bikpela. Taim em i kaikai, em i kaikai liklik tasol, o em i no kaikai. Heather i tok: “Long olgeta de mi kisim kaikai i go long skul em mama i bin redim bilong mi, na klostu olgeta de mi tromoi dispela kaikai. I no longtaim na mi lain long stap nating, na maski mi gat laik long kaikai, mi no inap. Mi no save hangre.”

Pastaim ol meri i gat sik anoreksia olsem Heather, ol i amamas tru long lusim skin. Tasol taim ol i no kisim kaikai i save helpim skin, bihain ol i kisim hevi long dispela. Skin bilong meri i gat sik anoreksia bai les tru. Em i no inap mekim gut ol wok bilong skul. Sik bilong mun inap pinis.b Bihain, klok bilong em i no wok strong na mak bilong blut inap i go daun tru. Tasol meri i gat sik anoreksia em i no save olsem bagarap i laik painim em. Em i pret long wanpela samting tasol​—⁠em i pret long em bai kisim bek skin em i bin lusim​—⁠maski em i hap kilo tasol.

Tasol i gat ol narapela pasin kranki long kaikai na ol i stap long olgeta hap, i no sik anoreksia tasol. Planti yangpela meri i gat wanpela sik ol i kolim bulimia nevosa, winim ol meri i gat sik anoreksia inap 3-pela taim. Na sampela ol i save kaikai oltaim na kaikai planti, dispela sik i wankain liklik olsem sik bulimia. Nau yumi ken skelim ol dispela sik.

Hevi i Stap Hait

“I no longtaim i go pinis na wanpela pren bilong mi i tokim mi olsem em i save kaikai long pasin hait. Bihain em i subim em yet long trautim dispela kaikai. Em i tok, em i bin mekim olsem inap 2-pela yia.” Em tok bilong wanpela yangpela i raitim pas i go long wanpela nius, na dispela tok i kamapim mak bilong wanpela pasin kranki long kaikai em ol i kolim bulimia.

Meri i gat sik bulimia, em bai kaikai planti tru insait long sotpela hap taim tasol. Bihain em bai rausim dispela kaikai em i bin kisim. Planti taim em bai trautim bek kaikai bilong mekim olsem.c Tru, ating em bai pilim nogut long rausim kaikai long bel long dispela kain pasin. Tasol wanpela meri i mekim wok olsem welfe, em Nancy J. Kolodny, em i tok: ‘Taim yu mekim dispela pasin planti taim, olsem yu kaikai planti na bihain yu trautim bek dispela kaikai, orait, bihain yu no hatwok tumas long mekim olsem. Pastaim yu pilim olsem dispela pasin i nogut tru o yu pret long mekim, tasol i no longtaim na yu gat strongpela laik long mekim olsem.’

Ol mak bilong sik anoreksia na sik bulimia i no wankain, tasol as bilong dispela tupela pasin kranki long kaikai i wankain, em pasin bilong tingting tasol long kaikai.d Meri inap haitim sik bulimia, tasol em i no inap haitim sik anoreksia. Meri i kisim planti kaikai tru em i no lusim skin, na taim em i trautim bek kaikai, em i no kamap patpela. Olsem na meri i gat sik bulimia em i no patpela o bun nating, na long ai bilong ol man ating pasin bilong em long kaikai i orait tasol. Wanpela meri nem bilong em Lindsey, em i tok: ‘Inap 9-pela yia, mi mekim dispela pasin inap 4-pela o 5-pela taim long olgeta de, olsem mi kaikai planti tru na bihain mi trautim bek dispela kaikai. I no gat wanpela man i save long sik bulimia bilong mi, long wanem, mi save mekim gut wok, na amamas, na mi no patpela tumas o bun nating tumas.’

Tasol meri i save kaikai planti tru long olgeta taim, em i gat ol narapela hevi. Olsem meri i gat sik bulimia, dispela meri i save kaikai planti kaikai tru long wanpela taim. Wanpela buk (The New Teenage Body Book) i tok: “Meri i gat dispela sik bilong kaikai planti tru em i no save trautim bek kaikai, olsem na em bai kamap patpela liklik o patpela nogut tru.”

Bagarapim Skin

Olgeta dispela 3-pela kain pasin kranki long kaikai inap bagarapim skin. Sik anoreksia inap mekim na skin i sot tru long kisim gutpela kaikai i save strongim skin, na planti meri​—⁠sampela i ting inap 15 pesen bilong ol meri i gat dispela sik, ol inap i dai. Pasin bilong kaikai planti, maski meri i trautim bek dispela kaikai o nogat, em inap bagarapim skin bilong em. Bihain, sapos skin i patpela nogut tru skin inap bagarap long bikpela sik bilong klok, o sik daiabitis, o sampela kain sik kensa. Taim meri i subim em yet long traut, dispela inap bagarapim sampela hap bilong nek bilong em, na sapos em i kisim planti marasin bilong helpim em long pekpek na pispis, sampela taim dispela inap mekim na klok bilong em i no wok moa.

Olsem na yumi mas tingting gut sapos yumi gat pasin kranki long kaikai. Ol meri i gat sik anoreksia, o sik bulimia, o ol i save kaikai oltaim na kaikai planti, ol i no stap amamas. Ol i no save amamas long ol yet, na planti bilong ol i save tingting planti na bel hevi.

[Ol Futnot]

[Blok long pes 14]

Tingting Kranki Long Skin

I no gat as na planti yangpela meri i save tingting planti long hevi bilong skin. Wanpela lain i kisim save olsem, inap 58 pesen bilong ol pikinini meri i gat 5 i go inap 17 krismas, ol i ting ol i patpela tumas, tasol 17 pesen tasol bilong ol i patpela. Narapela lain i kisim save olsem, inap 45 pesen bilong ol meri i bun nating, ol i ting ol i patpela! Wanpela lain long Kanada i kisim save olsem, inap 70 pesen bilong ol meri long dispela kantri ol i tingting tasol long hevi bilong skin, na 40 pesen i save tambuim ol yet long kisim sampela kaikai bilong lusim skin na bihain skin i kamap patpela gen.

Tru tumas, pasin bilong tingting kranki long skin inap mekim na sampela yangpela meri ol i tingting tumas long hevi bilong skin bilong ol, maski em i no wanpela hevi tru bilong ol. Kristin i gat 16 krismas, em i tok: “Mi gat wanpela pren i save dring planti marasin bilong lusim skin, na mi save long sampela yangpela meri ol i gat sik anoreksia.” Em i tok moa: “I no gat wanpela bilong ol em i patpela.”

I gat as tru na nius FDA Consumer i tok: ‘Yu no ken tambuim yu yet long kisim sampela kaikai, long wanem, “olgeta” i save mekim olsem o skin bilong yu i no liklik olsem yu laikim. Pastaim askim dokta​—⁠yu patpela tumas o nogat, o yu gat planti gris tumas long skin bilong yu o nogat, na dispela i stret wantaim krismas na longpela bilong yu.’

[Piksa long pes 15]

I no gat as na planti meri i save tingting planti long hevi bilong skin bilong ol