Ol Gutpela Samting Tru i Stap Long Arere Bilong Wara

Wanpela man long Spen i raitim dispela stori bilong Kirap!

OLGETA taim mi save wokabaut long arere bilong wanpela wara o liklik raunwara, mi wok long painim wanpela gutpela samting mi save laikim tru​—⁠sampela bilong ol i ret, o blu, o grin. Sampela taim mi save lukim wanpela i sindaun long lip na i no meknais liklik, o mi lukim wanpela i hangamap nating antap long wara o i sut nabaut long ai bilong mi. Gutpela samting mi wok long painim em binatang dragonflai​—⁠nambawan “helikopta” bilong ol binatang.

Inap planti yia i go pinis mi kirap tingim dispela gutpela binatang bilong flai taim mi lukim sampela long wanpela wara i ran isi isi insait long bus. Skin bilong sampela i blu na skin bilong ol narapela i olsem yelo liklik, na ol i sut nabaut nabaut long hap i gat san na long hap i gat kol. Inap wanpela aua mi lukim ol i flai olsem ol i danis, olsem na dispela liklik hap bilong bus i kamap olsem wanpela liklik ples bilong danis. Kirap long dispela taim i kam inap nau mi save tingim tru dispela kain binatang.

Mi bin kisim sampela save moa long dragonflai, olsem na dispela i helpim mi long amamas moa long naispela skin bilong en na long save em i no samting nating tasol. Namba wan samting mi kisim save long en i olsem: Binatang dragonflai i narapela kain long binatang damselflai. Dragonflai i strong long flai na skin i bikpela; skin bilong damselflai i liklik na i no strong long flai. Wanpela bikpela samting i mekim dragonflai i narapela kain long damselflai em samting em i save mekim long pul bilong en. Dragonflai i malolo i save stretim 4-pela pul bilong en, tasol damselflai i save brukim ol pul i go pas wantaim antap long bodi bilong en.a

Bihain mi laik save olsem wanem dragonflai i no hatwok long kisim natnat taim em i flai. Mi hatwok long paitim wanpela bikpela lang i sindaun long banis bilong haus kuk, olsem na mi askim skin bilong mi yet olsem: ‘Dragonflai i gat wanem samting mi no gat?’ Em tupela samting: Em i hapman stret long raun antap na nambawan ai bilong en inap mekim wanpela man bilong was em i bel kaskas.

Pasin Bilong En Long Flai

Planti man long Spen i save givim nem helikopta long dragonflai, tasol long kolim dispela kain nem long en i no gutpela tumas. Kwiktaim tru dragonflai inap tanim tanim, olsem na sampela taim ai bilong yumi i no inap lukim em i mekim olsem. Inap liklik taim sampela kain dragonflai inap flai spit i go wantu tasol olsem 96 kilomita insait long wanpela aua. Na wantu ol inap hangamap nating antap, o kostan i go bek, o go stret, o flai i go sait sait. Na taim dragonflai i baut hariap, ol saientis i ting em i mas sakim strong bilong graun long pulim ol samting i kam daun inap long mak 2.5 G.

Dragonflai inap senisim wok bilong 4-pela pul bilong en. Long ai i olsem pul bilong en i no strong, tasol ol inap meknais hariap hariap olsem 40 taim long olgeta wan wan sekon, na sapos ol i bam long wanpela samting, pul bai bruk liklik tasol. Saveman Robin J. Wootton i tok olsem, dragonflai em i “nambawan liklik binatang i kamapim long ples klia bikpela save bilong Man i bin wokim em.”

Em i tok moa: “Taim yumi kisim gut save long pul bilong ol binatang na ol i wok olsem wanem, yumi inap save olsem ol i gutpela samting tru. . . . I gat wan wan samting tasol ol man i wokim em inap bihainim pasin bilong binatang long flai.” Olsem na yumi no ken kirap nogut long save, ol ensinia bilong balus samting, ol i wok long skelim pasin bilong dragonflai long flai.

Em i Gat Planti Ai

Sapos yu kirap nogut long pasin bilong dragonflai long flai, ating yu bai kirap nogut moa long ai bilong en. Em i gat 2-pela bikpela ai ol i inapim klostu het olgeta. Wan wan ai i gat 30,000 liklik samting i olsem ai insait long en na wan wan i save salim samting kain olsem piksa i go long kru bilong dragonflai. Tasol i no olsem dragonflai em inap lukim planti tausen kain kain piksa long wankain taim, nogat. Em i no lukim stret wanpela samting olsem yumi save lukim; em i lukim samting i meknais, o i narapela kain, o mak bilong en, na kain samting olsem.

Dragonflai i mas skelim ol dispela samting. Olsem na em i save mekim wok long bikpela hap (80 pesen) bilong kru bilong en bilong skelim ol samting em i lukim. I gat wan wan ai tasol em inap wok olsem ai bilong dragonflai​—⁠dragonflai inap lukim wanpela natnat i stap longwe olsem 20 mita samting. Na long taim bilong tudak, wanpela man bai hatwok tru long lukim ol liklik lang, tasol dragonflai i no hatwok long lukim na kisim.

Dragonflai i save sut nabaut hariap hariap long gras samting klostu long arere bilong wara, olsem na kru bilong en i mas pasim tok wantu tasol long mekim planti handet samting long wankain taim. Em inap mekim dispela bikpela wok, long wanem, long olgeta wan wan sekon em inap lukim 100 samting i kain olsem piksa, winim yumi man inap 5-pela taim. Olsem na long ai bilong wanpela dragonflai, wanpela piksa wokabaut i save kamapim 24 piksa long olgeta wan wan sekon em bai luk olsem piksa i no wokabaut.

Ol i Save Senis

Taim laip bilong dragonflai i kirap i no gat wanpela samting i makim olsem bihain em bai kamap hapman stret bilong flai. Taim kiau i bruk, samting i kain olsem liklik snek i kamap. Dispela samting i no meknais liklik, em i slip long liklik raunwara o long wanpela wara na wet bilong holimpas wanem wanem kaikai em inap kisim. Em i save senisim skin bilong en planti taim​—⁠sampela kain i save mekim olsem insait long sampela mun na sampela kain insait long sampela yia. Liklik snek i lusim wara na sindaun long wanpela gras. Nau narapela kain senis i kamap.

Skin bilong liklik snek i bruk arere arere long bel na wanpela dragonflai i save kamaut. Olsem bataplai, dispela dragonflai i bikpela pinis i mas wet inap sampela aua na ol pul bilong en bai go strong na nau nupela laip bilong en i ken kirap. Insait long sampela de tasol, save i stap pinis long skin bilong en i kirapim em long kisim kaikai na long mekim ol gutpela pasin bilong en long flai.

I no longtaim na yangpela dragonflai i save tru long kisim natnat na lang taim em i flai. Em i mekim wanpela bikpela wok tru, long wanem, em i save kaikai planti liklik binatang long olgeta de, hevi bilong ol wantaim i olsem hevi bilong dragonflai yet. Inap long ol i no ken sot long kaikai, planti dragonflai man i save makim wanpela liklik hap olsem bilong ol yet bilong painim kaikai, na olgeta taim ol i raun bilong lukautim dispela hap.

Sampela kain dragonflai i save kaikai ol liklik binatang i save dring wara bilong ol lip o kaikai lip, na sampela i save kaikai ol liklik rokrok, na wanpela kain damselflai long ol ples hat em i save kaikai spaida tu. Em i save hangamap nating antap long haus bilong wanpela bikpela spaida (orb) na taim ol liklik spaida i kam bilong kaikai ol pipia kaikai bikpela spaida i bin lusim, em nau, damselflai i kisim ol.

Em i No Kamap Nating Long Rot Bilong Evolusen

Planti saientis, em ol i save bilip long evolusen, ol i ting dragonflai i bin kamap pastaim tru long ol narapela binatang bilong flai. Long Frans ol i painim wanpela ston i gat mak bilong pul bilong wanpela dragonflai long en, em wanpela dragonflai i bin i stap laip bipo na i gat longpela pul olsem 75 sentimita! Ol saientis i no save long narapela binatang i bikpela olsem dispela​—⁠bikpela bilong en i winim dragonflai bilong nau inap 3-pela taim.

Mi askim skin bilong mi yet olsem: ‘Olsem wanem wanpela samting i winim tru ol narapela samting bilong flai em i ken kamap nating tasol na olgeta hap skin bilong en i nambawan olgeta?’ Buk Alien Empire​—⁠An Exploration of the Lives of Insects i tok: “I no gat mak bilong ol binatang i bin i stap laip long bipo na i kamap olsem ston i makim olsem skin bilong ol i bin stap namel long samting i no gat pul na samting i gat pul.” Olsem na yumi ken save, wanpela Man i gat bikpela save tru em i bin wokim dragonflai gutpela tru.

Klostu long olgeta hap bilong graun i gat ol dragonflai. Ol i amamas long stap klostu long raunwara bilong ples maunten, o long ples tais bilong ples hat, o long wanpela ples waswas long ol taun.

Mi bin lukim ol bikpela lain dragonflai long wanpela nambis long Afrika, na long Yurop mi bin lukim ol wan wan empra-dragonflai na ol i no les long raun long wanpela liklik raunwara ol i save laikim. Wanpela taim long Filipin, mi raun long kanu long wanpela traipela baret na arere arere long en i gat bus. Sampela damselflai i bin bihainim kanu na ol i bin sindaun long han bilong mi tu.

I no gat planti samting long dispela graun em inap flai olsem dragonflai, tasol mi no save tingim pasin bilong en long flai tasol, mi save laikim tru ol narapela pasin bilong en na naispela skin bilong en tu. Taim ol i raun long ol liklik raunwara bilong yumi o stap klostu long arere bilong ol wara, i olsem wara i lait. Ol i gutpela samting tru​—⁠ol i stap bilong givim amamas long yumi.

[Futnot]

[Ol Piksa long pes 16, 17]

Dragonflai i save stretim ol pul bilong en; planti bilong ol i bikpela long damselflai, em ol i save brukim ol pul i go pas wantaim antap long bodi bilong en