Ol Witnes Bilong Jehova Long Rasia
Tingting Bilong Wanpela Tisa Bilong Lotu
LONG Rom, ol hetman bilong ol Juda long taim bilong ol aposel ol i bin tok long ol Kristen olsem: “Long olgeta ples, ol manmeri i save mekim tok nogut long dispela nupela lain i bin kamap namel long yumi Juda.” Ol dispela hetman i bin mekim wanem? Ol i bin mekim wanpela gutpela samting; ol i go lukim aposel Pol long dispela taim, em i stap kalabus long wanpela haus, na ol i tok: “Mipela i laik harim yu yet yu autim tingting bilong yu.” (Aposel 28:22) Ol i harim tok bilong wanpela Kristen i gat save, ol i no harim tok bilong ol man i sakim lotu Kristen.
Wanpela man bilong Rasia i gat nem olsem tisa bilong lotu, em Sergei Ivanenko, em i bin mekim wankain samting. I gat planti tok i kamap long Rasia bilong daunim ol Witnes, tasol maski em i bilip long planti tok olsem, em i tingting long go long brens-ofis bilong ol Witnes klostu long Sen Pitasbek na kisim save long ol. Orait brens-ofis i singautim em long kam na bai em i ken kamapim sampela askim na lukim wok bilong ol Witnes bilong kisim stretpela save long ol, na em i orait long i go.
Taim Mista Ivanenko i kamap long brens-ofis long Oktoba 1996, klostu wok i pinis bilong wokim ol haus slip bilong 200 Witnes i save mekim wok long brens-ofis long Rasia. Inap 3-pela de rot i op bilong Mista Ivanenko i ken lukim wok konstraksen, na kisim kaikai long rum kaikai, na long raun givim askim long ol Witnes em i laik givim askim long ol.
Wanpela stori Mista Ivanenko i raitim long ol Witnes i kamap long nius Moscow News bilong Februeri 16-23, 1997, em wanpela nius bilong Rasia planti man i save kaunim. Het-tok bilong stori i olsem: “Olsem Wanem? Yumi Mas Pret Long Ol Witnes Bilong Jehova?” Dispela stori i bin kamap tu long wankain nius ol i wokim long tok Inglis, bilong Februeri 20-26. Planti man i save kaunim Kirap! ol i gat bikpela laik long save long wok bilong ol Witnes Bilong Jehova long Rasia, olsem na nau mipela i kamapim dispela stori em mipela i bin kisim tok orait long kamapim. Long blakpela rait tru, Mista Ivanenko i kirapim stori bilong em olsem:
“Ol memba bilong wanpela lain politik (LDPR bilong Zhirinovsky) i sanap long wanpela hap ol Witnes Bilong Jehova i wokim miting long en na ol i holim wanpela bikpela rait i tok: ‘Yupela liklik lotu nating, yupela klia long Rasia!’ Mi askim wanpela man i stap, olsem: ‘Wanem samting bilong dispela lain i mekim na yu no laikim ol?’ Em i givim wanpela nius long mi (Megapolis-Express) i gat het-tok olsem: ‘Sifilis Bilong Lotu i Kamap Long Kamsatka.’ Nius i tok, lain Witnes Bilong Jehova i save bosim ol pamukmeri bilong kisim mani bilong helpim lain bilong ol, na dispela i save mekim ol sik bilong pamuk i go bikpela moa namel long ol boskru bilong ol sip. Mi askim dispela man, olsem: ‘Olsem wanem? Yu tu i bin kisim nogut long en? Yu save bilipim tok bilong dispela nius?’ Em i bekim tok olsem: ‘Maski mi bilipim dispela tok o nogat, bikpela samting i olsem: Dispela liklik lotu nating bilong Amerika i wok long bagarapim ol pasin bilong ples ol Rasia i save bihainim na bagarapim ol long ol samting bilong spirit tu. Yumi mas pasim dispela lain.’ ”
Stori Mista Ivanenko i raitim, em i kam bihain long wanpela tok olsem: “Em stori bilong Sergei Ivanenko, wanpela tisa bilong lotu, na wanpela saveman.”
“Wan wan man tasol i gat stretpela pasin olsem ol, tasol planti man long Rasia i no save tingting gut long ol Witnes Bilong Jehova. Sapos yumi kamapim wanpela tok tasol long dispela lain, dispela i save kirapim ol man long kamapim planti toktok long en, olsem: Ol Witnes i givim bel tumas long lotu, em i wanpela lotu i bin kamap long Amerika, ol manmeri i insait long en ol i bilip nating long ol bikman bilong ol, na ol i bilip olsem las de bilong dispela graun i klostu pinis nau. Planti man i pret long ol Witnes Bilong Jehova tasol ol i laik save long ol tu.
“Em Wanem Kain Lotu? Yumi Mas Pret Long En?
“Mi yet i laik save long dispela samting, olsem na mi go long liklik ples Solnesnoye, long provins Kurutnoye, Sen Pitasbek, em hap nambawan ofis bilong ol Witnes Bilong Jehova long Rasia i stap long en.
***
“Bipo em ples ol man i bin wokim kem bilong ol pikinini long en. Tasol long 1992, namba wan haus bilong i stap long dispela hap i bagarap tru na ol pikinini i no go moa na wokim kem; ol man i no gat ples slip ol i kam slip long dispela haus i gat planti planti rat long en. Ples i stap nogut tru, olsem na dispela i bin helpim ol Witnes Bilong Jehova long kisim dispela hap graun i gat 7-pela hekta, na ol i kisim tok orait bilong mekim wok long en inap longtaim. Ol Witnes i stretim ol olpela haus na ol i kirap wokim ol nupela haus tu. Wanpela haus i gat 4-pela plua na insait long en i gat ol ofis, na [Haus Kingdom] em 500 man inap sindaun long en, na rum kaikai. Na ol Witnes Bilong Jehova i wok long planim gras (ol i kisim long Finlan) na kain kain diwai i gat wan wan tasol bilong ol. Ol i ting klostu nau long taim bilong san, wok bilong ol bai pinis. Bikpela wok bilong dispela nambawan ofis em long lukautim wok autim tok na long salim ol nius na buk i go long ol kongrigesen bilong ol Witnes Bilong Jehova. Solnesnoye i no gat haus faktori bilong wokim ol nius na buk long tok Rasia, olsem na ol i wokim long Jemani, na bihain ol i salim i kam long Sen Pitasbek, na kirap long hia ol i salim i go long ol provins. Inap olsem 190 manmeri i wok long dispela nambawan ofis. Ol i wok olsem volantia na maski ol i no kisim pe, ol i kisim ol samting bilong skin ol i mas kisim, olsem ples slip, kaikai, na klos.
“Wanpela komiti i gat 18 elda, ol i stiaim ol wok i save kamap long dispela nambawan ofis. Kirap long 1992, Vasily Kalin em i stap olsem kodineta bilong dispela ples. Mama i karim em long Ivano-Frankovsk. Long 1951, em i gat 4-pela krismas, na gavman i rausim em na papamama na ol i mas go sindaun long Saibiria, (long 1949 na 1951, gavman i mekim nogut long 5,000 famili, long wanem, ol i Witnes Bilong Jehova). Vasily Kalin i baptais long 1965 na em i bin sindaun long provins Irkutsk. Em i bin wok olsem nambatu bos long wanpela kampani bilong timba.
“Tasol i gat sampela volantia moa i wok long dispela nambawan ofis long Solnesnoye, em 200 man i kam long Rasia, Finlan, Swiden, Nowe, na ol i wok konstraksen: Planti bilong ol i bin lusim wok mani bilong ol inap liklik taim bilong i kam na wok. Na i gat planti Witnes Bilong Jehova i kam long Yukren, Moldova, Jemani, Yunaitet Stets, Finlan, Polan, na sampela kantri moa. (Ol Witnes Bilong Jehova i no save bel nogut long man bilong narapela lain o skin. Maski ol man bilong Jojia, Abkas, Asebaijan, na Amenia ol i sindaun wantaim long dispela ples inap 4-pela yia pinis, i no gat wanpela hevi i bin kamap namel long ol.)
“Planti samting bilong wokim ol dispela haus na ol masin samting i bin kam long ol kantri bilong Skandinevia, na klostu olgeta samting ol wanbilip i salim i kam, no gat pe. Ol i soim wanpela buldosa long mi em wanpela Witnes bilong Swiden i bin bringim i kam long Solnesnoye long 1993. Long olgeta taim dispela Witnes i stap long Solnesnoye em yet i draivim buldosa, na taim em i laik go bek long ples, em i givim buldosa long ol wanbilip bilong em. Ol man i wok konstraksen i save slip long ol gutpela haus. Sindaun bilong ol i olsem: Long 7 klok moningtaim ol i kaikai na beten; wok i kirap long 8 klok i go inap 5 klok apinun, na inap wanpela aua ol i kaikai long belo. Long olgeta Sarere ol i wok i go inap long belo, na long Sande ol i malolo.
“Ol i kaikai gut, na olgeta de ol i kaikai prut. Dispela lotu i no gat lo olsem ol man i mas stap tambu long kaikai samting. Taim wok i pinis, planti bilong ol i go long wanpela kain ples waswas i gat smok bilong hatwara i pulap long en na bihain ol i kisim wanpela bia na sindaun na harim musik. I no gat wanpela spakman namel long ol Witnes Bilong Jehova, tasol dring i no tambu. Ol Witnes inap dring liklik bia, wain o votka samting. Tasol ol Witnes Bilong Jehova i no save smok.
***
“Tripela taim long olgeta wik ol i save bung na stadi long Baibel na planti yangpela i save go long en. Tasol planti Witnes Bilong Jehova, em ol i bin stap Witnes longtaim olsem 30-40 yia samting, ol tu i go. Klostu olgeta Witnes bilong longtaim, bipo ol i bin stap long kalabus, o long banis kalabus, o gavman i bin rausim ol long ples na ol i mas go sindaun long narapela hap. Taim wok bilong ol Witnes i no tambu moa, planti dokta, loya, ensinia, tisa, bisnisman, na sumatin, ol i kam insait long lain Witnes.
“Ol kongrigesen i wok strong long mekim wankain pasin long olgeta manmeri i insait long lain bilong ol. Olsem: Man i gat wok olsem kodineta bilong nambawan ofis, em tu i save wasim ol plet long apinun long taim bilong em long mekim. Ol Witnes i save kolim nem tasol bilong ol narapela na kolim ‘brata’ o ‘sista’ wantaim nem bilong ol.
“Taim wanpela Witnes Bilong Jehova i brukim lo bilong Baibel na em i no laik tanim bel, strafe i save painim em—em i raus long lain Witnes. Em inap kam yet long ol miting, tasol ol wanbilip i no save tok gude long em. Sapos wanpela i mekim rong, tasol em i tanim bel, ol Witnes i save givim tok long em bilong stretim em.
***
“Inap longpela taim mi skelim pasin bilong ol Witnes Bilong Jehova bambai mi ken save wanem samting i mekim na planti kain kain man i kam insait long dispela lain bilong lotu, em ol i gat narapela narapela pasin, na skul, na laik. Ol Witnes Bilong Jehova i no save lotu wantaim ol lotu i save insait long ol samting bilong dispela graun. Ol i no amamas long i stap long ol ples ol manmeri i mas bilip nating long ol man i gat wok long bosim ol man, na long ol lain i save wok hait, na long ol lain i bruk long tupela hap olsem ol bikman na ol man i bihainim tok bilong ol.
“Ol Witnes Bilong Jehova i gat nem olsem ol man i gat strongpela bilip long bihainim ol tok bilong Baibel. Long olgeta samting ol i mekim, ol i save kamapim wanpela lo bilong Baibel i stret long dispela, o ol i kolim sampela tok bilong Olpela o Nupela Testamen. Ol Witnes Bilong Jehova i bilip olsem Baibel tasol i gat bekim bilong olgeta askim. Long ol Witnes Bilong Jehova, Baibel i olsem mama lo, na lo bilong olgeta man, na nambawan tok i tru.
“Long dispela as, olgeta man i save ol Witnes Bilong Jehova i bihainim tru ol lo bilong gavman na ol i strong long givim takis. Planti taim ofis bilong takis i kam lukim ol na ol i kirap nogut, long wanem, ol i no painim wanpela lo ol Witnes i kalapim. Tru, sapos ol Witnes Bilong Jehova i laik, ol inap mekim olsem planti man i save mekim na painim rot na ol i no ken givim takis, tasol Baibel i tok man i mas bihainim stretpela pasin na givim takis, na ol Witnes Bilong Jehova i bilip olsem Baibel i as bilong tingting bilong ol.
“Tasol planti taim, tingting bilong ol Witnes long ol i no ken mekim wanpela samting sapos i no stret long tok bilong Baibel, dispela i save kamapim bikpela hevi namel long ol na gavman. Gavman i gat bikpela tok long ol Witnes taim ol i strong long ol i no ken insait long olgeta samting bilong politik, na narapela samting bilong dispela, em ol i no laik go insait long ami.
“Ol Witnes Bilong Jehova i bihainim tru tok bilong Jisas, olsem ol disaipel bilong em na kingdom bilong em i no bilong dispela graun, na long dispela as ol i no laik insait long ol wok politik na pait, maski pait i kamap we na i gat wanem as. Ol Witnes Bilong Jehova i no laik singaut, ‘Heil Hitler’ na go insait long ami bilong Hitler, olsem na Hitler i bin salim planti tausen Witnes i go long ol banis kalabus nogut bilong ol Natsi, na sampela tausen i bin dai. Ol Rasia i ting, olgeta wan wan Witnes Bilong Jehova long Jemani i bin lusim laip bilong em, long wanem, em i no laik insait long ami na pait long Soviet Yunion, em i wanpela man i bin mekim pasin i stret. Tasol planti man bilong Rasia i no bel sori long ol Witnes Bilong Jehova long Rasia, em ol i bin dai o karim bikpela hevi, long wanem, ol i no laik insait long Namba 2 Pait o insait long ami long taim i no gat pait. Tasol ol dispela Witnes Bilong Jehova long Jemani na Rasia, ol i bin mekim olsem, long wanem, ol i bin bihainim bilip bilong lotu na ol samting bilong wok politik nogat.
“I no longtaim i go pinis na kain hevi olsem i bin kamap long Japan. Sampela sumatin em ol i Witnes Bilong Jehova, ol i no laik insait long ol spot bilong skulim ol man long pait, olsem judo na kung-fu samting, na yunivesiti i tok sapos ol i no insait long dispela spot ol bai rausim ol. Long 1996, Sprim-Kot bilong Japan i tok, ol dispela sumatin i no gat rong na i stret ol i ken mekim narapela kain spot olsem senis bilong ol dispela spot ol i no laik mekim.
***
“Wanem samting i mekim na ol man i gat tingting bilong nau ol i kirap nogut long ol Witnes Bilong Jehova? Bikpela samting tru, em pasin bilong ol long wok strong long autim tok olsem las de bilong dispela graun i klostu nau (ol i save mekim wok misineri bilong ol long rot na long haus bilong ol man). Long nau ol elda i tokim ol dispela man bilong autim tok long ol i no ken toktok tumas long ‘las de bilong dispela graun’ na long ol samting nogut em bai painim ol man i mekim rong, mobeta ol i tokim ol man i harim tok olsem Jehova i opim rot bilong ol i ken kisim ‘laip oltaim long paradais long graun.’
“Narapela samting sampela man i no amamas tumas long en, em tingting bilong ol Witnes long ol i no laik bung wantaim ol narapela lotu, na ol i no bilip long pasin bilong kamap wanbel wantaim ol narapela lotu. Ol i bilip olsem ol lotu bilong graun i gat nem Kristen ol i bin lusim God na Baibel, na olgeta narapela i kranki olgeta. Ol Witnes Bilong Jehova i tok ol dispela lotu i olsem ‘pamukmeri bilong Babilon,’ na ol bai kisim wankain strafe olsem Babilon bilong bipo i bin kisim. I no longtaim i go pinis wanpela Kirap! i tok, pinis bilong ol kain kain lotu i klostu na wanpela lotu tasol bai stap, em lotu ol Witnes Bilong Jehova i save autim tok long en.
“Ol Witnes Bilong Jehova i bilip olsem i stret olgeta man inap bihainim maus bilong bel bilong ol.
***
“Sampela kantri i tingting planti long ol bilip bilong ol Witnes Bilong Jehova, nogut bilip bilong ol i bagarapim sindaun bilong ol man. Sprim-Kot long provins Konektikat, Yunaitet Stets (1979), na Sprim-Kot long Nu Saut Wels, Ostrelia (1972), na Provinsial-Kot Bilong Britis Kalambia, Kanada (1986) na sampela kot moa i tok, i no gat wanpela samting i makim olsem ol Witnes Bilong Jehova inap bagarapim sindaun bilong ol man, o ol i laik pasim rot bilong ol man bilong oraitim sik bilong ol, o ol i bagarapim bel bilong ol. Yuropian Kot Bilong Human Raits (1993) i pasim tok long kot olsem i stret ol Witnes Bilong Jehova i stap fri long mekim lotu; long Grik na Ostria ol Witnes i no stap fri olgeta bilong mekim wok bilong lotu. Long nau gavman i mekim nogut long ol Witnes Bilong Jehova long 25 kantri . . .
“Ol Witnes Bilong Jehova i stap olsem gutpela piksa long ol narapela man, long wanem, ol i save givim bel tru long tok i tru bilong Baibel, na ol i strong long holimpas bilip bilong ol, maski ol i kisim nogut long dispela. Tasol i gat askim olsem: Ol lain i save bihainim tok bilong Baibel long olgeta samting na long pasin i narakain tru na ol i no surik liklik, ol man bilong nau i redi long larim ol dispela lain i stap fri long bihainim maus bilong bel bilong ol o nogat?”
Long dispela laspela tok, Mista Ivanenko i bin kamapim wanpela bikpela askim. Long taim bilong ol Kristen long bipo, aposel Pol em Krais yet i makim em bilong kamap mausman bilong em, em i kisim strafe i no stret em i kisim na em i stap “kalabus.” Olsem na Pol i raitim pas i go long ol wanbilip long wok em i save mekim bilong helpim wok bilong autim gutnius na lo bilong gavman i ken orait long dispela wok.—Filipai 1:7; Aposel 9:3-16.
Ol Witnes Bilong Jehova long nau ol i amamas sapos ol man i skelim gut wok bilong ol, olsem Mista Ivanenko i bin mekim. Mipela i save sapos ol man i mekim olsem, ol bai kisim save olsem ol stori i save daunim ol Witnes ol i no stret olsem ol stori i bin daunim ol Kristen long bipo, ol tu i no stret. Ol Witnes i save bihainim “nupela lo” Jisas i givim long ol disaipel bilong em, olsem: “Mi bin laikim tru yupela na olsem tasol yupela wan wan i mas laikim tru ol arapela.”—Jon 13:34, 35.
[Blok long pes 15]
Ol Pepa Bilong Nius MN
(Ol tok daunbilo i kam long ol pepa i stap wantaim lain bilong nius Moscow News na ol i bin prinim wantaim dispela stori bilong Sergei Ivanenko.)
“Ol Witnes Bilong Jehova long Rasia ol i insait long wanpela lain Kristen i stap long olgeta hap na i wok long 233 kantri na i gat inap 5.4 milion memba. Long Bruklin, Nu Yok, Lain Bilong Bosim Ol Witnes i save stiaim olgeta Witnes Bilong Jehova long ol samting bilong spirit. Lain Witnes Bilong Jehova long nau i bin kirap long 1870 taim Charles Taze Russell bilong Pitsbek, Pensilvenia, em i kirapim wanpela liklik lain long stadi long Baibel. Dispela lain i kam long Rasia long 1887. Semyon Kozlitsky em i olsem namba wan Witnes Bilong Jehova long Rasia. Gavman i rausim em long Mosko na salim em i go long Saibiria long 1891. Maski dispela lain i karim planti hevi, long 1956 i gat 17,000 Witnes Bilong Jehova long Soviet Yunion. Inap long Mas 1991 gavman i no orait long ol Witnes, tasol long dispela yia gavman i kirap bihainim lo olsem ‘Ol Man i Stap Fri Long Mekim Lotu.’ Long nau i gat 500 samting kongrigesen na inap olsem 70,000 Witnes i mekim wok long Rasia. Dispela lain i save tilim nius ‘Wastaua’ (ol i save wokim 20 milion long 125 tok ples), na nius ‘Kirap!’ (ol i save wokim 18 milion long 81 tok ples.)”
[Piksa long pes 15]
Em wanpela hap bilong brens-ofis long Rasia
[Piksa long pes 16]
Haus Kingdom em famili bilong Betel long Rasia i save bung long en bilong stadi long Baibel
[Ol Piksa long pes 17]
Ol famili Witnes i save amamas long stadi na malolo wantaim
[Ol Piksa long pes 18]
Ol i save helpim ol narapela long kisim save long Baibel