Sik Blak Det i No Bin Kamapim Pinis Bilong Dispela Graun
LONG Oktoba bilong yia 1347, ol kago-sip bilong Is ol i kam insait long pasis bilong Mesina, long Sisili. Ol man bilong pul ol i gat bikpela sik na ol i wok long i dai. Long skin bilong ol i gat ol blakpela buk, bikpela bilong ol i olsem bikpela bilong kiau, na blut na susu nogut i kamap long ol. Ol boskru i kisim bikpela pen, na taim samting i kamap i makim olsem ol i kisim dispela sik, ol i dai insait long sampela de tasol.
Ol rat i ranawe lusim ol sip na bung wantaim ol rat bilong ples. Ol i karim laus i go wantaim ol, na ol dispela laus i gat wanpela binatang jem i save kilim i dai man. Em nau, long dispela rot sik ol i kolim Blak Det em i go kamap long planti hap. Bipo i no gat wanpela bikpela sik olsem long Yurop.
Ol man inap kisim dispela sik long tupela rot. Wanpela rot i olsem: Taim laus i gat sik i kaikaim man, sik i go insait long blut bilong man na mekim skin i solap olsem buk na blut i kapsait insait long bel. Na narapela rot: Taim man i kus long maus o nus, sik i kalap long ol narapela na givim sik long wetlewa bilong ol. I gat tupela rot bilong kisim dispela sik, olsem na kwiktaim tru planti man i kisim dispela sik na ol i bagarap. Insait long 3-pela yia tasol, dispela sik i kilim i dai inap 25 pesen bilong ol manmeri long Yurop—em 25 milion manmeri.
Long dispela taim bipo, ol i no gat save long olsem wanem dispela sik i kalap long ol narapela man. Sampela i ting win i gat marasin nogut long en, long wanem, guria samting i bin kamap long wanpela hap o ol samting antap olsem ol planet ol i no sindaun gut long ples stret bilong ol. Na sampela moa i ting ol manmeri i kisim dispela sik taim ol i lukluk tasol long wanpela sikman. Maski i gat kain kain tingting, ol i save em wanpela sik bilong kalap kwik long planti man. Wanpela dokta bilong Frans i tok, i olsem wanpela sikman tasol em “inap givim sik long olgeta man.”
Ol man i no gat save long rot bilong pasim o oraitim dispela sik. Planti man i bin tingim ol tok profet bilong Baibel, olsem tok bilong Luk 21:11, i stori long ol bikpela sik bai kamap long taim bilong las de. Maski ol man i givim mani long ol lotu, dispela bikpela sik i no pinis. Wanpela man bilong Itali long dispela taim i tok: “Ol belo bilong ol haus lotu i no krai, na no gat wanpela man i krai maski husat i bin dai, long wanem, klostu olgeta man i ting bai ol i dai . . . ol manmeri i tok na i bilip olsem: ‘Em pinis bilong dispela graun.’ ”
Tasol em i no pinis bilong dispela graun. Klostu long yia 1400 dispela sik i pinis. Dispela graun na ol manmeri i stap.
[Piksa Kredit Lain long pes 3]
Archive Photos