Sik Strok!

WANPELA bikpela samting i save kamapim indai na ol bagarap bilong skin long ol kantri i gat planti wok bisnis long en long hap bilong Wes, em sik strok. Dispela tok “strok” i makim olsem wantu tasol dispela sik i kamap long kru bilong man. Nau yu no gat sik, tasol wantu yu pilim olsem wanpela klaut i pairap na sutim yu​—bikpela sik strok inap senisim tru i stap bilong yu wantu tasol. Em inap bagarapim tru skin bilong yu, olsem yu no inap toktok moa, na em inap bagarapim tru bel bilong yu, na senisim pasin bilong yu na tingting i no inap wok gut, na yu gat hatwok oltaim long stretim ol samting long i stap bilong yu wantaim famili bilong yu na bai yu ken stap gutpela olsem bipo.

Tingim Ellen Morgan.a Long Trinde, Ellen em i wanpela strongpela meri i gat 64 krismas na i no gat sik. Long Fonde, taim em wantaim man bilong em i baim ol samting long stua, wantu tasol Ellen i no inap toktok moa na pes bilong em i senis olgeta. Skin bilong em i no gat strong moa, na em i wokabaut kranki olsem man i spak. Bikpela sik strok i kisim Ellen!

Taim dispela sik strok i kisim em, skin bilong Ellen i bagarap tru na em yet i no inap mekim ol liklik wok olsem waswas o pasim klos. Em i no inap long rait, o samapim samting, na sampela taim em i krai nating nating, na skin bilong em i les olgeta. Long dispela taim, tingting bilong Ellen inap wok gut yet; tasol sampela taim em i sem, long wanem, em i ting ol narapela i ting em i longlong. Bihain Ellen i tok: “Ol dispela senis i kamap wantu tasol long skin. I no gat planti man i save olsem wanem dispela inap nogutim man long samting bilong bel na tingting. Mi ting dispela i olsem pinis bilong i stap bilong mi.”

Wanem samting i save kamapim sik strok? Olsem wanem? Wankain samting tasol i save painim ol man i gat sik strok? Ol man i winim dispela sik olsem wanem ol i bin karim ol hevi bilong en? Ol famili bilong ol man i bin kisim sik strok ol i karim ol dispela hevi olsem wanem? Yumi olgeta i ken mekim wanem bilong helpim ol? Nius Kirap! i skelim ol kain askim olsem na i helpim yu long save gut long i stap bilong ol man i bin kisim sik strok na famili bilong ol, em ol i karim hevi wantaim ol.

[Futnot]