Pas Bilong Ol Man
Sik Strok Ol stori “Karim Hevi Bilong Sik Strok” (Februeri 8, 1998) i makim olsem God i harim beten bilong mi. Inap sampela yia i go pinis, mitupela man bilong mi i bin i stap long wanpela kibung taim em i kisim strok. Taim em i traim long raitim sampela tok long pepa bilong givim long mi, han bilong em i wel nating long pepa; han sut bilong skin olgeta i bin kisim bagarap. Mi no inap kolim olgeta samting dispela stori i bin helpim mi long en. Em gutpela samting tru long save Jehova i no lusim tingting long yumi.
F. S. H., long Amerika
Sampela aua paslain long mi kisim dispela nius, mi traim long tokim meri bilong mi long tingting bilong mi, tasol mi no inap kamapim gut tingting bilong mi, long wanem, mi bin kisim sik strok. Mi kaunim pinis dispela nius inap 3-pela taim. Na meri bilong mi i kaunim tu.
R. Z., long Itali
Papa bilong mi em i wanpela gutpela wokman bilong Jehova inap planti yia, na long yia i go pinis em i dai long sik strok. Dispela stori bilong sik strok i helpim mi long save long as bilong sampela pasin bilong em taim em i no dai yet. Yupela i stori long kain kain senis i save kamap long tingting na bel bilong ol man i kisim dispela sik, na tu, man i kisim strok em i hatwok long toktok wantaim narapela. Dispela i helpim mi long save liklik long hevi papa i bin karim.
V. C., long Amerika
Inap wanpela yia i go pinis mi kisim sik strok na mi hatwok yet, long wanem, han kais bilong skin i no gat strong. Dispela stori bai daunim sampela tingting kranki na pasin pret em sik strok i save kamapim. Toktok bilong ol man olsem ol lapun tasol ol i save kisim sik strok, em i wanpela toktok nating. Mi gat 47 krismas tasol taim mi kisim strok.
A. A., long Inglan
Dispela stori i helpim mi tru long save long pikinini meri bilong mi Lucia. Taim em i gat 2-pela mun em i kisim bikpela bagarap long het bilong em taim ka i bam. Em i no inap toktok gut long ol tingting i stap long bel bilong em. Tasol dispela stori i helpim mi long save long as bilong dispela samting.
N. K., long Slovakia
Mi wanpela nes i gat namba bilong givim eksasais long sikman bilong strongim bek skin bilong em. Mi bin helpim planti man em sik strok i bin bagarapim ol. Wanpela samting mi laikim tru long dispela stori, em gutpela pasin bilong yupela long stori long ol hevi ol famili bilong man i kisim strok ol i save karim.
L. C., long Amerika
Mama bilong mi i kisim sampela mak bilong sik strok (transient ischemic attack). Klostu skin i orait olgeta, tasol long tingting na bel em i bagarap. Bipo skin i strong na em i gat strongpela bel, tasol nau em i no gat strong. Tenkyu long kamapim ol bikpela samting dispela sik i mekim long tingting na bel.
R. C., long Itali
Tupela yia i go pinis, mama bilong mi em i kisim sik strok 2-pela taim. Namba wan strok i mekim na tingting bilong em i lus, na namba 2 strok i mekim na han sut bilong skin i dai. Sampela taim mi les kwik long em na mekim tok i save mekim em i bel hevi. Stori bilong yupela i helpim mi long tingim gut man i gat dispela kain sik.
R. T. S., long Brasil
Stori Bilong Ginger Klauss Man! Tenkyu tru long dispela gutpela stori “Nau Mi Amamas Long i Stap Laip.” (Me 8, 1997) Sik i mekim, olsem na ol masol bilong han lek bilong mi i no gat strong. Inap bikpela hap taim mi mas slip long bet, na mi hatwok tru long autim tok long wilsia. Stori bilong Ginger i bin strongim mi tru na i helpim mi long taim mi bel hevi long sik bilong mi.
M. R., long Itali