Sampela Tok i Kam Long Olgeta Hap

Bus i Paia Long Meksiko

Paia, em narapela i bin kamap bihain long narapela, em i bin bagarapim bikpela hap bus long Meksiko, olsem na long Epril inap olsem 140,000 hekta bus i bagarap. Ol i tok, dispela “em i wanpela bikpela bagarap i bin painim graun.” Julia Carabias Lillo, em wanpela kuskus bilong gavman bilong Meksiko, em i tok, inap 6,800 paia i bin bagarapim bus long Meksiko. Insait long 57 yia i go pinis i no gat ol paia nogut olsem ol dispela paia. Wanpela nius (El Universal) i tok, long dispela taim san i hat moa na i no gat bikpela ren i bin pundaun, tasol planti paia ‘ol man yet i kirapim​—⁠ol i no gat save, o ol i mekim nabaut na ol i no tingim ol samting nogut em inap kamap long pasin bilong ol, o ol yet i mekim pasin nogut.’ Octavio Escobar López, bikman bilong wanpela lain (Natural Resources Committee), em i tok: “Ating 10-pela yia i mas lus pastaim na ol diwai plaua na animal pisin samting em ol i bagarap insait long 3-pela de tasol, ol inap kamap bek gen.”

Ol i Painim Gen Dia Long Saina

Nius China Today i tok: ‘Ol i bin painim gen wanpela kain dia bilong Tibet ol i ting em i pinis olgeta inap 50 yia i go pinis.’ Inap planti yia ol man bilong raunim abus ol i bin wok long pinisim ol retpela dia, em bikpela bilong en i olsem 1.2 mita na hevi bilong en i olsem 110 kilogram. Ol i laik kisim gutpela kom bilong en, long wanem, ol i save kisim bikpela mani long ol dispela kom bilong dia. Na tu, pait na ol man i bagarapim hap ol dia i save stap long en, dispela tu i mekim na ol dia i dai. Ol i ting inap olsem 200 tasol bilong dispela gutpela dia ol i stap, na nem bilong ol i stap long lista bilong ol animal i laik pinis.

Ol Pisin Balus i Stil?

Ol polis long Saut Afrika ol i holim sampela man em ol i bin mekim wok long ol balus bilong stilim ol ston daimon. Ol polis i tok, ol wokman long wanpela main daimon bilong gavman, ol i bin haitim ol balus insait long ol liklik bokis kaikai bilong ol, o insait long sampela bikpela klos, na long dispela rot ol i bin kisim ol balus i go insait long main. Wanpela nius (Los Angeles Times) i tok, insait long main ol wokman i pasim ol daimon long skin bilong ol balus na bihain ol i larim ol i flai i go. Ol dispela balus inap flai planti kilomita, maski ol i karim ol daimon. Insait long sampela yia, ol polis i bin holim 4-pela balus em ol i karim ol daimon ol wokman i bin stilim. Long wanpela balus, ol man i bin pasim ol daimon aninit long pul bilong en. Inap long nau ol polis i bin holim 70 man em ol i bin mekim wok long ol balus bilong stilim ol daimon. Nius i tok, ol bikman bilong kampani i ting wanpela long olgeta 3-pela 3-pela daimon ol i kamautim long as bilong wara, ol wokman i save stilim.

Ol i Wokim Bung Long Wara Genjis

Long Epril, 1998, sampela milion Hindu i go insait long wara Genjis taim wanpela kain bung bilong ol (Kumbh Mela) i laik pinis. Ol Hindu i save wokim dispela bung bilong lotu i go inap 3-pela mun bilong amamas long ol inap stap laip bihain long taim ol i dai. Ol i save wokim dispela amamas long olgeta 3-pela 3-pela yia na ol i save senisim ples bilong wokim na bai em i kamap long 4-pela biktaun bilong India, long wanem, ol stori tumbuna i tok, gutpela marasin bilong i stap oltaim oltaim na i no inap i dai, dispela marasin i pundaun long hap bilong ol dispela taun taim ol god na ol spirit nogut i bin pait long heven bilong kisim dispela samting. Long bipo, taim planti manmeri i bin resis i go daun long ol wara holi bilong India bilong waswas, planti bilong ol i bin kisim bagarap taim ol i mekim olsem.

Ol Haus i No Gat Haus Kuk

Nau long Ostrelia, planti man i save kaikai long ol haus kaikai, inap 50 pesen. Olsem na nius The Courier-Mail i tok, taim ol i wokim sampela flet long Sidni long nau, ol i no save wokim haus kuk long en. Na tu, ol manmeri long Ostrelia ol i no save lusim bikpela hap taim long redim kaikai, inap 20 minit tasol, olsem na planti supamaket long Ostrelia ol i bin tingim ol kaikai ol i save salim long stua bilong ol. Bos bilong wanpela bikpela lain supamaket long Sidni, em i tok ol lain bilong Ostrelia i wok long bihainim pasin bilong ol lain long Yunaitet Stets, em ol i save kaikai long ol haus kaikai​—⁠long haus bilong ol yet nogat.

Kaikai i No Gat Marasin Bilong Helpim Skin?

Ol prut na kaikai bilong gaden long nau, em ol i planim long graun i no gat gris moa long en, yu ting ol i no gat marasin bilong helpim gut skin? Ol saientis bilong skelim gris bilong graun ol i tok, nogat. Wanpela nius (University of California Berkeley Wellness Letter) i tok: “Ol gutpela marasin olsem vaitamin i stap insait long ol kaikai bilong gaden, ol dispela kaikai yet i save kamapim.” Olsem na sapos graun i sot long gris, kaikai i no inap kamap gut long en. Ol samting long gaden i no ken putim plaua, o kru bilong kaikai bai slip i go daun na bihain em bai dai. Olsem na bilong stretim dispela samting, ol fama i save mekim wok long sampela marasin bilong putim gris i go bek long graun. Dispela nius i tok moa: “Sapos ol prut na kaikai yu baim i luk gutpela, orait yu ken save, ol i gat marasin bilong helpim gut skin.”

Pasin Raskol na Bel Nogut Long Ol Narapela

Long nau planti pasin raskol moa i save kamap long kantri Grik na sampela i putim asua bilong dispela i go long planti refyuji na ol lain i lusim kantri bilong ol yet bilong painim wok mani long kantri Grik. Ol dispela lain i kam long Isten Yurop na ol hap bilong Bolkan, na planti bilong ol i bin kam long Albenia. Richardos Someritis, em wanpela niusman bilong nius To Vima, em i tok, ol man i tingting planti long ol pasin raskol i kamap planti moa, olsem na “ol i pret na bel nogut long ol lain bilong narapela ples,” em ol i kam na sindaun long kantri Grik. Tasol ol i kisim save olsem, ol man bilong narapela ples ol i no mekim planti pasin raskol, winim ol man bilong kantri Grik, nogat. Olsem: Nius i tok, sampela lain i bin skelim dispela samting ol i tok, “long olgeta 100 100 pasin raskol, 96 em ol man bilong kantri Grik i bin mekim. Na as bilong ol pasin raskol em mani na sindaun bilong ol man; pasin bilong bel nogut long ol man bilong narapela ples nogat.” Na dispela niusman i putim asua tu long televisen na ol nius samting, long wanem, taim ol i tok giaman long husat tru i save mekim ol pasin raskol long kantri Grik, dispela i ‘kirapim ol man long pret na bel nogut long ol man bilong narapela ples.’

Samting Bilong Kompyuta i Was Long Ol

Long dispela yia, ol man i insait long longpela resis bilong Boston, ol i bin karim wanpela liklik samting bilong kompyuta ol i kolim maikrosip taim ol i resis inap 42,195 mita. Wanpela nius (InformationWeek) i tok, bilong save long spit na pasin bilong ol long resis, olgeta man i insait long en ol i bin pasim dispela liklik maikrosip long klos bilong ol. Orait, long olgeta 5-pela 5-pela kilomita bilong rot i gat ol redio i kisim toksave long ol maikrosip i pas long klos bilong ol man i resis. Long dispela rot, ofis bilong ol man i bosim resis inap kisim toksave long spit bilong ol man i resis. Em nau, ofis i putim dispela toksave i go long kompyuta Intenet na ol man inap save long dispela resis. Ol inap save long ol man ol i laikim long resis ol i ran olsem wanem, na sapos sampela man i no bihainim lo bilong resis na ol i giaman na sotim rot, ol inap save long ol tu. Ol man bilong resis i no inap giamanim dispela nupela save bilong kompyuta.

Eksasais na Stap Longtaim

Nius The New York Times i kamapim ripot bilong wanpela lain i bin skelim pasin bilong i stap longtaim. Nius i tok: “I olsem pasin bilong wokabaut hariap liklik inap 30 minit na mekim inap 6-pela taim long wanpela mun, dispela i mekim na namba bilong ol man i save dai taim ol i no lapun yet em i go daun inap 44 pesen.” Inap 19 yia sampela saveman long Finlan ol i bin skelim 16,000 manmeri em mama bilong ol i bin karim tupela wantaim. Ol i kisim save olsem, maski wanpela bilong tupela em i mekim eksasais long wan wan taim tasol, “inap 30 pesen bilong ol i no dai hariap olsem narapela i bin kamap wantaim ol long bel bilong mama na ol i no save eksasais.” Save dispela lain i kisim em i bikpela samting, long wanem, bilong save olsem eksasais i helpim skin bilong ol long i stap longtaim o nogat, ol i bin tingim ol pasin long skin ol dispela manmeri i bin kisim long papamama, ol i kolim jin. Steve Farrell, em wanpela saveman bilong eksasais tasol em i no insait long wok bilong dispela lain, em i tok: “Maski sampela i kisim long papamama ol jin i no strong, save dispela lain i bin kisim i kamapim klia olsem, sapos yumi mekim sampela eksasais moa, dispela inap helpim yumi long stap longtaim moa.”

Ol Pilai Bilong Traim Tingting

Em namba wan taim ol i bin wokim wanpela kain resis (U.S. National Memory Championship) long Yunaitet Stets bilong ol man i ken traim save bilong ol long tingim ol samting. Ol dispela man i insait long 5-pela kain pilai bilong mekim olsem. Ol i mas tingim pes bilong 100 manmeri nating, na ol i mas kolim stret olgeta hap tok bilong wanpela stori (ol koma na fulstop tu) i gat 50 lain, na ol i mas kolim 125 hap tok Inglis, em narapela i mas bihainim stret narapela na ol i mas tingim ol namba em wanpela man i kolim nating na ol i kolim stret ol dispela namba, na kain samting olsem. Ol man i insait long dispela pilai ol i kirap nogut long save bilong Wallace Bustello. Dispela man inap tingim bek 109 namba ol i bin kolim nating, na em inap kolim stret ol dispela namba. Tasol wanpela meri i gat 26 krismas, em Tatiana Cooley, em i winim dispela resis. Wanpela nius (New York Daily News) i tok, dispela meri na papa bilong em, em wanpela man i save wokim ol program bilong kompyuta bilong wanpela kampani i save wokim ol roket samting, ol i bin mekim ol kain pilai long haus bilong ol yet bilong traim save bilong ol. Tatiana i tok: “Planti taim mi win.”