‘Em i Olsem Mi Kaikai Hani’
EM JUN 1993. Long Altus, Oklahoma, Yunaitet Stets, wanpela papa, em i nambawan saiden long ami i pait long balus, em i tingting planti na em i beten bilong kisim helpim bilong stiaim tingting bilong pikinini meri bilong em i gat hevi long marit na em i tingting long katim marit. Long moningtaim long de bihain, wanpela Witnes Bilong Jehova i kam long haus bilong em na tilim Kirap! bilong Epril 8, 1994 long em. Nius i stori long “Katim Marit—Rot Bilong i Stap Amamas?”
Dispela man i no save laikim ol Witnes na bipo em i no harim tok bilong ol, tasol nau em i orait long kisim dispela nius Kirap! na kaunim. Bihain em i stori long ol skripsa bilong Baibel na ol bikpela tok bilong en wantaim pikinini bilong em. Na em i kaunim tu nius Wastaua ol i bin tilim wantaim Kirap! Nius i gat wanpela stori i kirapim em long skelim gut bilip bilong em long God Triwan, samting em i bin bilip long en inap longtaim. Em i save God i bin harim beten em i mekim bilong helpim pikinini meri bilong em, tasol em i tingting long as na God i salim ol man i no bilip long God Triwan long kam long em. Em i ting, God i no inap mekim wok long ol manmeri bilong helpim man i beten long em, sapos ol i no man bilong skulim ol man long tok i tru.
Olsem na em i kirap na telefon long Haus Kingdom bilong ol Witnes Bilong Jehova na askim ol long sampela buk samting i stori gut long bilip bilong ol long God Triwan. Man i bekim telefon em i stap long wanpela miting bilong ol elda Kristen. Wantu tasol dispela saiden bilong ami i go long Haus Kingdom, na ol i givim em buk Yu Inap i Stap Oltaim Long Paradais Long Graun na buklet Gutpela Yu Bilip Long God Triwan o Nogat?
Long dispela nait man i kaunim buklet olgeta. Taim em i wok long kaunim, bel bilong em i kirap tru, na bihain em i tok, em i mas malolo liklik na tokim em yet olsem: ‘Stap isi. Dispela samting i tru tru o olsem wanem. Dispela tok i gutpela tru ya.’ Buklet i kamapim klia tru ol tok bilong Baibel olsem i no gat God Triwan, olsem na dispela man i tok, “em i olsem mi kaikai hani.” Long de bihain long apinun, em i go long namba wan miting bilong ol Witnes Bilong Jehova na em i amamas tru long ol tok em i harim.
Bihain long namba wan Baibel-stadi ol Witnes Bilong Jehova i mekim wantaim em na ol i stori gut long tok bilong Baibel long smok, em i tromoi ol sigaret bilong em na em i no kisim smok gen. Ol i stadi wantaim em tupela o tripela taim long wik. Tripela mun bihain long em i kaunim buklet God Triwan, na bihain long em i pinis long wok ami, em i kirap mekim wok autim tok wantaim ol Witnes. Tripela mun bihain em i dediket long God Jehova na kisim baptais. Nau em i mekim wok bilong God long olgeta de.