Ol Yangpela i Laik Save . . .

Olsem Wanem Mi Ken Putim Tingting Long Ol Samting?

“Inap planti yia mi bin sindaun long ol miting na mi no kisim save. Mi bin larim tingting bilong mi i wokabaut.”​—⁠Em tok bilong Matthew.

OLSEM WANEM? Yu bin sindaun long klas-rum o long wanpela miting Kristen na yu no bin harim ol tok i kamap long en? Sapos sampela taim tingting bilong yu i wokabaut, i no yu wanpela tasol i gat dispela hevi. Planti yangpela i gat dispela hevi​—⁠ol i save tingim wanpela samting na kwiktaim ol i lusim na tingim narapela samting.a Tasol sapos yu wok strong liklik na stretim sampela tingting bilong yu long dispela hevi, yu inap lain long putim gut tingting long wanpela samting.

Givim Bel

Tingim wanpela man i bin lain long resis. Aposel Pol i tok: “Olgeta man i laik win long resis, ol i save daunim olgeta laik bilong bodi.” Sapos man bilong resis i larim wanpela samting i pulim nabaut tingting bilong em, maski em sotpela taim tasol, dispela inap mekim na em bai no inap winim resis. Bilong winim resis, em i mas lain long putim tingting long resis tasol​—⁠em i no ken tingim bikpela pairap bilong ol man i lukim resis, na maski skin i pen na i les olgeta, em i mas lusim tingting long en, na em i no ken tru ting olsem em bai lus long resis. Tasol wanem samting i kirapim ol man bilong resis long taitim bun na wok strong olsem? Aposel Pol i tok, ol i mekim olsem “bilong kisim prais”​—⁠ol man i litimapim nem bilong man i winim resis o ol i sapim piksa bilong em, o em i kisim ol narapela prais.​—⁠1 Korin 9:⁠25.

Na olsem tasol, bel i mas kirapim yu long putim gut tingting long ol samting yu mas stadi long en! Wanpela buk (Study Is Hard Work bilong William H. Armstrong) i tok: ‘Em wok bilong sumatin yet long laik long kisim save. Narapela i no ken mekim dispela wok bilong yu, na narapela i no ken mekim laik bilong yu long kisim save i go bikpela moa sapos yu no laik mekim olsem.’ Taim yu kisim save, dispela em nambawan rot bilong helpim yu long save long planti samting bilong dispela graun. Sapos save bilong yu i bikpela liklik, bai yu no hatwok long kisim sampela save moa. Sindaun 14:6 i tok: “Sapos tingting bilong man i gutpela, em bai i no inap hatwok long kisim gutpela save.” Ating yu no inap tingim olgeta samting yu lain long en long skul, tasol skul i helpim yu long lain long wokim tingting na bai yu inap kisim gutpela save. (Skelim wantaim Sindaun 1:⁠4.) Sapos yu bosim gut tingting na yu inap putim tingting long ol samting yu lain long en, dispela bai helpim yu long olgeta taim bihain.

Les Long Skul na Ol Tisa i No Givim Bel

Tasol sampela yangpela i tok i olsem ol tisa tu i les na ol i no gat laik long skulim ol. Yangpela Jesse i tok: “Ol tisa i sanap long ai bilong mipela, na ol i mekim sampela tok, na bihain ol i givim wok long mipela, na nau ol i tok, ‘Orait yupela ken go nau.’ Mi ting ol i les long skulim mipela. Ol tisa i mekim olsem skul i no bikpela samting, olsem na mipela i ting i no gat as na mipela i mas putim tingting long tok bilong ol.”

Olsem wanem? Sapos yu putim tingting long tok bilong tisa, yu ken ting yu lusim nating taim bilong yu? Nogat. Ating planti tisa i gat hevi long ol skulmanki na dispela i putim bikpela hevi moa long ol. Yangpela Collin i tok: “Ol sumatin i no putim yau long tok bilong tisa, olsem na tisa i ting ol sumatin i no laik lain. Em nau, tisa i no givim bel long skulim ol.”

Tasol ating yu inap pinisim dispela kain pasin. Olsem wanem yu inap mekim olsem? Putim gut yau long tok bilong tisa. Sapos wanpela sumatin tasol i putim gut yau long harim tok bilong tisa, dispela inap kirapim tisa long givim bel gen long wok bilong em. Tru, sampela tisa i no save gut long pasin bilong kirapim tingting bilong ol sumatin, olsem na ol sumatin i les. Tasol yu no ken larim tingting bilong yu i wokabaut. Askim skin bilong yu yet olsem: ‘Tisa i save gut long dispela samting em i toktok long en?’ Sapos olsem, orait bosim gut tingting bilong yu bambai yu ken kisim sampela save long tok bilong em. Putim gut yau​—⁠putim gut tingting! Na taim tisa i kirapim ol sumatin long toktok wantaim long klas, em i gutpela sapos yu tu yu insait long dispela toktok. Kamapim sampela gutpela askim. Wanpela buk (How to Study in High School) i tok: ‘Samting i save helpim planti sumatin em pasin bilong raitim long notbuk ol piksa, na sampela hap tok, na ol lista, na ol bikpela tok tisa i save raitim long blekbot o em i ting i bikpela samting.’

Putim Yau Moa Yet Long Ol Tok

Tasol sapos yu no putim gut yau long ol miting Kristen, yu inap lus long planti gutpela samting moa. Jesse i tok: “Sampela taim ol yangpela i no save putim gut yau long ol miting, long wanem, ol i no ting ol miting i bikpela samting.” Baibel i tok: “Tok yumi harim pinis, yumi mas holim strong long tingting. . . . Nogut yumi slek long bihainim dispela tok na yumi lusim olgeta.” (Hibru 2:⁠1) Olsem wanem? Bihain long wanpela miting, yu inap tingim bek sampela hap bilong wan wan tok i bin kamap long en? O sampela taim yu no inap tingim husat brata i bin mekim tok?

Em nau, yu mas save olsem ol samting yu lain long en, em i bikpela samting. Nogut bihain laip bilong yu i lus! (Jon 17:⁠3) Na i gat narapela samting tu yu ken tingim: Taim yu kisim save long Baibel, yu lain long kisim wankain tingting olsem God yet! (Aisaia 55:​8, 9) Na taim yu bihainim ol samting yu lain long en, yu wok long kisim dispela pasin Baibel i kolim olsem pasin bilong “nupela man.” (Kolosi 3:​9, 10) Tasol sapos yu no putim gut yau, ating bai yu no stretim sampela pasin yu mas stretim; bai yu no kamap strong long ol samting bilong spirit. Jehova i save sampela taim yumi olgeta i save larim sampela samting i pulim tingting bilong yumi. Olsem na em i tok: “Putim gut yau long tok bilong mi, na mekim olsem mi tok. . . . Yupela ol manmeri bilong mi, harim. Yupela kam long mi na bai yupela i stap gut.”​—⁠Aisaia 55:​2, 3.

Rot Bilong Kisim Sampela Save Moa Long Ol Miting

Tru, ating pastaim bai yu hatwok long putim gut yau long ol tok bilong ol miting. Tasol ol saveman i tok, sapos olgeta taim yumi traim long putim gut tingting long ol tok, em nau, kru bilong yumi bai lain moa long dispela pasin. Matthew, em yumi stori pinis long em long kirap bilong dispela stori, em i winim dispela hevi long larim tingting bilong em i wokabaut long taim bilong ol miting. Em i tok: “Mi mas bosim strong tingting bilong mi bambai mi inap putim gut yau. Bihain liklik i no hatwok tumas long mekim olsem, na mi inap putim gut tingting long ol tok inap longpela taim liklik.” Na Matthew i tok, nambawan bikpela samting i bin helpim em long amamas long ol miting i olsem: “Paslain long ol miting, mi save stadi.” Yangpela Charese i tok: “Taim mi stadi na redim ol tok bai kamap long ol miting, mi pilim olsem mi no sindaun nating tasol long miting. Ol tok i pulim tingting bilong mi na helpim mi gut.”

Narapela bikpela samting, em yu no ken wok long tingim ol samting i pulim nabaut tingting bilong yu. Tru, ating yu tingting planti long sampela samting na i stret yu tingting long en, olsem: tes em bai kamap long skul long wik bihain, o pasin bilong wanpela i mekim yu i bel hevi, o yu mas painim mani bilong baim wanpela samting. Tasol Jisas i givim gutpela tok long yumi olsem: “Sapos wanpela bilong yupela i wok long tingting planti long rot bilong i stap gut, ating dispela pasin bilong tingting planti bai i skruim liklik hap taim moa long laip bilong en? I no inap tru. Olsem na yupela i no ken tingting tumas long tumora. De tumora em i ken tingting long samting bilong em yet. Hevi bilong wanpela de em inap long dispela de tasol.” (Matyu 6:​27, 34) Taim yu putim gut tingting long ol miting na yu no larim ol narapela samting i pulim nabaut tingting bilong yu, dispela i no inap rausim ol hevi bilong yu, tasol long ol samting bilong spirit, miting bai givim nupela strong long yu inap long yu ken karim ol hevi bilong yu.​—⁠Skelim wantaim 2 Korin 4:⁠16.

Na tu, sapos yu putim gut yau long ol tok, dispela inap helpim yu na ol narapela samting i no inap pulim tingting bilong yu. Matthew i tok: “Mi traim long tingim sampela tok brata bilong mekim tok bai kamapim long tok bilong em, na kisim save long pasin bilong em long mekim olsem.” Askim yu yet: ‘Wanem ol bikpela as tok brata i toktok long en? Olsem wanem mi ken mekim wok long samting em i skulim mipela long en?’ Na pasin bilong tingim wanpela tok brata bai kamapim, dispela tu inap helpim yu long putim gut tingting long tok bilong em. Tingim gut ol tok em i mekim. Na tingim ol tok bilong Baibel em i mekim wok long en bilong strongim tok bilong em. Tingim bek ol bikpela as tok yu harim pinis. Raitim sampela sotpela tok i olsem bikpela tok long notbuk bilong yu. Na taim wanpela tok long miting i gat ol askim na bekim, orait mekim sampela bekim! Dispela inap helpim yu long putim gut tingting long ol tok na tingting i no ken wokabaut.

Tru, i hatwok tru long putim gut tingting long tok bilong wanpela man i no givim bel long mekim tok o tok bilong em i no kirapim tingting bilong ol man. Orait tingim tok sampela Kristen bilong pastaim i bin mekim bilong kamapim tingting bilong ol long tok bilong aposel Pol: “Yumi lukim em i no gat strong tru, na em i no save tru long pasin bilong autim tok.” (2 Korin 10:10) Tasol Pol i bekim tok olsem: “Maski sapos mi no save tumas long pasin bilong autim tok, save bilong mi i no sot liklik.” (2 Korin 11:⁠6) Tru tumas, sapos ol man i bin harim gut tok bilong Pol na ol i no tingim pasin bilong em long toktok​—⁠ol i tingim ol samting em i toktok long en​—⁠ol inap lain long planti “tingting hait bilong God.” (1 Korin 2:10) Na i wankain tu long man i no save toktok gut; yu inap kisim sampela save long tok bilong em sapos yu putim gut tingting na yau long tok bilong em. Yumi no save, tasol ating em bai kamapim insait bilong wanpela tok em yu no bin save long en, o em bai kamapim wanpela skripsa long rot yu no bin tingim bipo.

Tok bilong Jisas long Luk 8:18 i gutpela, em i tok: “Yupela i mas lukaut gut bai yupela i harim gut tok.” Tru, yu mas wok strong long lain long putim gut yau na long skulim tingting bilong yu na bai tingting i no ken wokabaut. Tasol bihain bai yu kisim gutpela samting long en. Taim yu lain long putim gut tingting, ating dispela bai helpim yu long kisim bikpela mak long skul, na bikpela samting moa, bai yu kamap strong long ol samting bilong spirit!

[Futnot]

[Piksa long pes 20]

Sapos yu wok long kisim pasin bilong laikim ol samting yu harim, dispela bai helpim yu long putim gut yau