“Yumi Mas Holim Strong Long Tingting”

“Dispela tok yumi harim pinis, yumi mas holim strong long tingting na bihainim gut. Nogut yumi slek long bihainim dispela tok na yumi lusim olgeta.”​—⁠HIBRU 2:⁠1.

1. Stori long olsem wanem bagarap inap kamap sapos man i larim ol samting i pulim tingting bilong em.

LONG olgeta yia, inap 37,000 manmeri long Amerika i save dai long bagarap i save painim ol long ka. Ol saveman i tok, planti ol inap abrusim bagarap sapos ol draiva i bin putim gut tingting i go long rot. Sampela draiva i lukim ol toksave i stap long arere bilong rot na dispela i pulim tingting bilong ol, o ol i mekim wok long telefon bilong ka na dispela i pulim tingting bilong ol. Na sampela i save kaikai taim ol i draivim ka. Long ol kain taim olsem, sapos draiva i larim ol samting i pulim tingting bilong em, bagarap inap kamap.

2, 3. Pol i givim wanem tok long ol Kristen Hibru? Bilong wanem i stret em i givim dispela tok long ol?

² Klostu 2,000 yia paslain long taim ol i kisim save long wokim ol ka, aposel Pol i kamapim klia wanpela samting i wok long pulim tingting bilong ol Kristen Hibru na i laik bagarapim ol. Pol i tokaut strong olsem taim Jisas Krais i kirap bek pinis em i kisim bikpela namba tru, winim olgeta ensel, long wanem, em i sindaun long han sut bilong God. Orait nau Pol i tok: “Olsem na dispela tok yumi harim pinis, yumi mas holim strong long tingting na bihainim gut. Nogut yumi slek long bihainim dispela tok na yumi lusim olgeta.”​​—⁠Hibru 2:⁠1.

³ Bilong wanem ol Kristen Hibru i mas “holim strong long tingting” ol tok bilong Jisas ‘ol i harim pinis’? Long wanem, klostu 30 yia i go pinis na Jisas i bin lusim graun. Em nau, Bikpela bilong ol i no stap moa wantaim ol, olsem na isi isi sampela Kristen Hibru i wok long surik na lusim bilip tru. Lotu Juda, em bipo ol i bin bihainim, em i wok long pulim tingting bilong ol.

Ol i Mas Putim Gut Yau

4. Wanem samting i mekim na ating sampela Kristen Hibru i tingting long go bek gen long lotu Juda?

⁴ I gat wanem as na wanpela Kristen inap tingting long go bek gen long lotu Juda? Pasin bilong lotu ol i save mekim aninit long Lo i gat ol samting ol man inap lukim tru long ai. Ol inap lukim ol pris na smelim ol ofa ol pris i kukim long paia. Tasol long sampela samting, lotu Kristen i narapela kain tru. Ol Kristen i gat wanpela Hetpris, em Jisas Krais, tasol ol i no bin lukim em long graun inap 30 yia pinis. (Hibru 4:14) Ol i gat wanpela tempel, tasol ples holi bilong en em heven yet. (Hibru 9:24) Aninit long Lo ol i bihainim pasin bilong katim skin, tasol pasin bilong ol Kristen long katim skin, em i save “kamap insait long bel na tingting” bilong ol. (Rom 2:29) Olsem na ating ol Kristen Hibru i wok long kisim tingting olsem lotu Kristen i no samting tru tru.

5. Olsem wanem Pol i soim olsem pasin bilong lotu em Jisas i bin kamapim i winim tru pasin bilong lotu aninit long Lo?

⁵ Ol Kristen Hibru i mas save long wanpela bikpela samting tru bilong pasin bilong lotu em Krais i bin kamapim. Pasin bilong bilip i as bilong en, na i no samting ol i lukim long ai, tasol em i winim tru Lo ol i bin kisim long rot bilong profet Moses. Pol i tok: “Sapos ol manmeri i kamap doti long ai bilong God, orait ol pris i save kisim blut bilong meme na bilong bulmakau man, wantaim sit bilong paia i kamap long bulmakau meri ol i kukim olgeta long paia, na kapsaitim long ol dispela manmeri. Ol i mekim olsem bilong mekim ol dispela manmeri i kamap klin gen long ai bilong God, na bilong makim ol i stap manmeri bilong God stret. Tasol blut bilong Krais i winim dispela. Krais i no gat asua bilong wanpela rong i stap long em. Nogat tru. Na long strong bilong Spirit i stap oltaim oltaim, em i givim laip bilong em yet long God olsem ofa. Olsem na blut bilong em i no mekim bodi tasol bilong yumi i kamap klin. Nogat. Em i pinisim asua bilong yumi na yumi save olsem yumi stap klin tru long ai bilong God. Olsem na yumi no mas bihainim moa ol dispela lo i no gat laip, na yumi ken mekim wok bilong God bilong i stap oltaim.” (Hibru 9:​13, 14) Em nau, long pasin bilong bilip long ofa bilong Jisas Krais long baim bek ol man, God inap lusim rong bilong yumi, na long planti samting dispela pasin i winim tru wok bilong ol ofa ol i bin mekim aninit long Lo bilong lusim rong bilong man.​—⁠Hibru 7:​26-28.

6, 7. (a) Wanem samting i mekim na ol Kristen Hibru i “mas holim strong long tingting” ol tok ol i harim na ol i no ken lusim taim? (b) Taim Pol i raitim pas i go long ol Hibru, i gat hamas yia i stap yet na Jerusalem bai bagarap? (Lukim sta long pes 12.)

⁶ I gat narapela as na ol Kristen Hibru i mas holim strong long tingting ol tok bilong Jisas ol i bin harim. Em i bin tok profet olsem Jerusalem bai bagarap. Jisas i tok: “Yu harim. Bihain wanpela taim bai i kamap, na ol birua bilong yu bai i kam hipim graun raunim bikpela banis bilong yu. Na ol bai i banisim yu tru long olgeta hap. Na ol bai i brukim yu na bagarapim yu tru, yu wantaim ol pikinini bilong yu i stap insait long yu. Na ol bai i no larim wanpela ston bilong yu i stap antap long narapela ston, long wanem, yu no bin save long taim God i kam bilong helpim yu.”​—⁠Luk 19:​43, 44.

⁷ Wanem taim dispela samting bai kamap? Jisas i no tokaut long de na aua, nogat. Tasol em i givim dispela tok long ol: “Taim yupela i lukim ol ami i kam raunim Jerusalem i stap, orait yupela i ken save, taim bilong taun i mas bagarap em i klostu nau. Long dispela taim ol manmeri i stap long distrik Judia ol i mas ranawe i go long ples maunten. Na ol man i stap insait long Jerusalem ol i mas lusim taun na i go long narapela hap. Na ol man i stap ausait long taun, ol i no ken i go insait long en.” (Luk 21:​20, 21) Insait long 30 yia bihain long taim Jisas i bin mekim dispela tok, sampela Kristen long Jerusalem i no pilim moa olsem taim i sot pinis, na ol samting i wok long pulim nabaut tingting bilong ol. I olsem ol i no lukluk moa long rot. Sapos ol i no stretim tingting bilong ol, bagarap bai painim ol. Klostu nau bagarap bai painim Jerusalem, maski ol i ting olsem o nogat!a Yumi laik ting olsem tok bilong Pol i bin kirapim tingting bilong ol Kristen long Jerusalem em ol i slip i stap long ol samting bilong spirit.

“Holim Strong Long Tingting” Long Nau

8. Bilong wanem yumi mas “holim strong long tingting” ol tok i tru bilong Baibel?

⁸ Olsem ol Kristen bilong pastaim, yumi mas “holim strong long tingting” ol tok i tru bilong Baibel. Bilong wanem? Long wanem, wanpela bikpela bagarap i laik kamap, tasol em i no ken painim wanpela kantri tasol, nogat. Em bai painim olgeta samting bilong dispela graun. (KTH 11:18; 16:​14, 16) Tru, yumi no save wanem de na aua stret Jehova bai kirap mekim dispela samting. (Matyu 24:36) Tasol long ai bilong yumi yet yumi lukim truim bilong ol tok profet bilong Baibel i makim olsem yumi stap long “taim bilong las de.” (2 Timoti 3:​1-5) Olsem na yumi mas was gut, nogut wanpela samting i pulim nabaut tingting bilong yumi. Yumi mas holim strong long tingting ol tok bilong God long Baibel na pilim tru olsem taim i sot pinis. Long dispela rot tasol bai yumi “abrusim olgeta dispela samting i laik kamap.”​—⁠Luk 21:⁠36.

9, 10. (a) Olsem wanem yumi ken soim olsem yumi holim strong long tingting ol samting bilong spirit? (b) Olsem wanem tok bilong God em i ‘lam bilong helpim yumi long wokabaut stret,’ na ‘lait bilong soim rot long yumi’?

⁹ Nau long dispela bikpela taim yumi stap long en, olsem wanem yumi ken soim olsem yumi “holim strong long tingting” ol samting bilong spirit? Wanpela rot, em yumi mas go oltaim long olgeta miting na kibung Kristen. Na tu, yumi mas givim bel long stadi long Baibel bambai yumi ken i go klostu moa long Man i as bilong ol tok bilong Baibel, em Jehova. (Jems 4:⁠8) Sapos yumi kisim save long Jehova long rot bilong stadi na go long ol miting, bai yumi wankain olsem man bilong raitim song, em i bin tokim God: “Tok bilong yu i olsem lam bilong helpim mi long wokabaut stret, na i olsem lait bilong soim rot long mi.”​—⁠Song 119:105.

¹⁰ Baibel i stap olsem ‘lait bilong soim rot long yumi’ taim em i tokim yumi long ol samting God i tingting pinis long mekim bihain. Na tu, Baibel em i ‘lam bilong helpim yumi long wokabaut stret.’ Olsem: Em inap helpim yumi long mekim ol samting i stret taim sampela bikpela hevi i painim yumi. Olsem na em i bikpela samting tru long yumi mas putim gut yau taim yumi bung wantaim ol wanbilip bilong kisim save na taim yumi ritim Baibel. Ol save yumi wok long kisim bai helpim yumi long bihainim gutpela tingting na mekim ol samting Jehova i laikim na i mekim bel bilong em i amamas. (Sindaun 27:11; Aisaia 48:17) Orait olsem wanem yumi ken lain long putim tingting long ol tok i kamap long miting na long taim yumi yet i stadi na yumi no larim tingting i wokabaut, na bai ol kaikai bilong spirit God i givim long yumi i ken helpim gut yumi?

Lain Long Putim Gut Yau Long Miting

11. Bilong wanem sampela taim i hatwok long putim gut yau long ol tok i kamap long ol miting?

¹¹ Sampela taim i hatwok long putim gut yau long tok i kamap long ol miting Kristen. Ol samting inap pulim kwik tingting bilong yumi, olsem long taim wanpela liklik pikinini i krai, o wanpela i kam bihaintaim long miting na i laik painim sia. Na taim yumi mekim bikpela wok i go inap long apinun, ating skin bilong yumi i les. Na ating man bilong mekim tok long miting i no man bilong kirapim tingting bilong yumi, na i no longtaim na tingting bilong yumi i wokabaut​—⁠o yumi slip! Tasol ol tok bilong miting i bikpela samting tru, olsem na yumi mas lain long putim gut yau long ol tok i kamap long miting bilong kongrigesen. Tasol yumi ken mekim olsem wanem?

12. Wanem samting bai helpim yumi na i no hatwok tumas long putim gut yau long ol tok i kamap long miting?

¹² Sapos yumi bin redim gut ol tok bai kamap, i no hatwok tumas long putim gut yau. Olsem na i gutpela sapos yumi makim hap taim bilong tingim ol tok bai kamap long miting, a? Bai yumi lusim sampela minit tasol long olgeta de bilong ritim wanpela hap bilong ol sapta bilong Baibel ol i bin makim bilong ritim long ol wan wan wik, na tingim tingim long bel. Na sapos yumi skelim taim bilong yumi, yumi inap painim hap taim tu bilong redim ol tok bilong Buk-Stadi na Stadi Wastaua. Maski yumi makim wanem sediul long bihainim, yumi ken save tru olsem: Taim yumi redi gut, dispela bai helpim yumi long putim gut yau long ol tok ol bai kamapim long miting.

13. Wanem ol samting inap helpim yumi long putim gut yau long ol tok i kamap long miting?

¹³ Na tu, sampela i lukim olsem taim ol i sindaun klostu long poret bilong pletfom, dispela i save helpim ol long putim gut yau long ol tok bilong miting. Na sapos yumi lukluk long brata bilong mekim tok, na taim em i ritim wanpela skripsa, yumi bihainim long Baibel bilong yumi yet, na yumi raitim sampela bikpela tok em i kamapim, orait tingting bilong yumi i no ken wokabaut. Tasol bikpela samting tru, em yumi mas redim bel bilong yumi. Yumi mas pilim tru as na yumi bung wantaim. Nambawan as na yumi save bung wantaim ol wanbilip, em bilong lotuim Jehova. (Song 26:12; Luk 2:​36, 37) Ol miting em wanpela bikpela rot bilong yumi ken kisim ol kaikai bilong spirit. (Matyu 24:​45-47) Na tu, ol miting i save givim rot long yumi long ‘kirapim ol manmeri bilong God long laikim ol arapela na mekim ol gutpela pasin.’​—⁠Hibru 10:​24, 25.

14. Wanem samting tru i mekim na miting i gutpela?

¹⁴ Sampela i save skelim wok tisa bilong ol man bilong mekim tok na ol i ting dispela i makim olsem miting i gutpela o nogat. Sapos ol i save gut long mekim tok, ating bai yumi tok em i gutpela miting. Tasol sapos ol man bilong mekim tok i no gutpela tisa, ating bai yumi ting em i no gutpela miting. Tru, ol man bilong mekim tok long pletfom ol i mas wok strong long mekim gutpela wok tisa na long putim tok i go daun long bel bilong ol man. (1 Timoti 4:16) Tasol yumi ol lain i sindaun na harim ol tok i kamap, yumi no ken skelim tumas pasin bilong ol long mekim tok. Tru, pasin bilong ol brata long mekim gutpela wok tisa em i bikpela samting, tasol i no dispela samting tasol i mekim na miting i gutpela. Ating bai yu wanbel long tok olsem nambawan bikpela samting yumi mas tingim, em pasin bilong yumi long putim yau long ol tok brata i mekim, na i no olsem em i mekim gut tok bilong em o nogat. Taim yumi go long miting na putim gut yau long ol tok i kamap, yumi save lotuim God long pasin i stret wantaim laik bilong em. Dispela yet i mekim na gutpela miting i kamap. Sapos yumi givim bel long kisim save long God, ol miting bai helpim yumi, maski brata i save gut long mekim tok o nogat. (Sindaun 2:​1-5) Olsem na yumi mas pasim tok long bel olsem yumi bai “holim strong long tingting” ol tok i kamap long ol miting bilong yumi.

Taim Yumi Yet i Stadi

15. Olsem wanem stadi na tingim tingim long bel em i ken helpim yumi?

¹⁵ Taim yumi yet i stadi, sapos yumi “holim strong long tingting” ol tok yumi stadi long en na tingim tingim long bel, dispela stadi bai helpim yumi tru. Pasin bilong ritim Baibel na ol buk na nius Kristen na tingim tingim ol tok bilong en, dispela bai mekim na yumi gat gutpela rot bilong putim ol tok i tru bilong Baibel i go daun long bel bilong yumi. Em nau, dispela bai stiaim ol tingting na pasin bilong yumi. Na em bai helpim yumi long kisim amamas long mekim laik bilong Jehova. (Song 1:2; 40:⁠8) Olsem na yumi mas lain long putim gut tingting long ol tok yumi harim o ritim, na dispela bai helpim yumi long taim yumi stadi. Ol liklik samting tasol inap mekim na tingting bilong yumi i wokabaut​—⁠olsem telefon i ring, o i gat wanpela pairap samting. O ating yumi save hatwok long putim tingting i go long stadi inap longpela taim, maski i no gat pairap samting. Taim yumi sindaun bilong kisim ol kaikai bilong spirit, yumi gat laik long mekim, tasol i no longtaim na tingting bilong yumi i wokabaut. Orait taim yumi stadi long Tok Bilong God, olsem wanem yumi ken “holim strong long tingting” ol dispela tok?

16. (a) Bilong wanem em i bikpela samting long yumi mas makim hap taim bilong stadi? (b) Yu bin mekim wanem bilong makim hap taim bilong stadi long Baibel?

¹⁶ Bilong helpim yumi, i gutpela sapos yumi wokim sediul na makim wanpela gutpela ples em yumi inap long stadi gut. Planti bilong yumi i no gat bikpela hap taim na gutpela ples bilong i stap wanpis na mekim stadi. Ating yumi pilim olsem ol planti wok samting bilong olgeta de i mekim na yumi kain olsem wanpela liklik han bilong diwai em strongpela tait bilong wara i wok long karim i go. Tasol yumi mas pait strong long sakim dispela tait na wok long painim hap taim bilong yumi ken i stap isi na mekim stadi bilong yumi. Nogut yumi wetim rot i op na bai yumi ken stadi. Yumi yet i mas strong na makim hap taim bilong mekim stadi. (Efesus 5:​15, 16) Sampela i save makim liklik hap taim long moningtaim​—⁠long dispela taim i no gat planti samting bilong pulim nabaut tingting bilong ol. Na sampela i ting long apinun em i gutpela taim bilong stadi. Tasol bikpela samting i olsem: Yumi mas wok long kisim stretpela save long God na Pikinini bilong em. (Jon 17:⁠3) Olsem na yumi mas makim taim bilong stadi na bihainim stret dispela taim.

17. Pasin bilong tingim tingim long bel ol tok yumi stadi long en, dispela inap helpim yumi olsem wanem?

¹⁷ Pasin bilong tingim tingim long bel ol tok yumi bin lainim long taim yumi stadi, dispela em i bikpela samting. Em i save helpim yumi long kisim ol tingting bilong God i stap long buk na putim i go daun long bel bilong yumi. Pasin bilong tingim tingim long bel ol tok yumi stadi long en i helpim yumi long save, olsem wanem yumi ken bihainim ol tok bilong Baibel bambai yumi ken kamap man bilong ‘bihainim dispela tok, na yumi no harim nating tasol.’ (Jems 1:​22-25) Na tu, pasin bilong tingim tingim ol tok long bel i save helpim yumi long go klostu moa long Jehova, long wanem, yumi inap tingim ol gutpela pasin bilong em na olsem wanem ol tok yumi stadi long en i kamapim klia ol dispela gutpela pasin.

18. Yumi mas mekim wanem na bai pasin bilong tingim tingim long bel ol tok yumi stadi long en inap helpim gut yumi?

¹⁸ Tasol bilong kisim gutpela helpim long pasin bilong stadi na tingim tingim long bel, yumi mas sakim ol samting i laik pulim nabaut tingting bilong yumi. Bilong putim ol nupela save long tingting taim yumi tingim tingim long bel, i olsem yumi mas pasim dua bilong tingting na bai ol samting i kamap long olgeta wan wan de i no ken go insait long en. Tru, bilong tingim tingim long bel ol tok yumi stadi long en, yumi mas lusim hap taim na stap wanpis, tasol taim yumi kisim ol kaikai bilong spirit na wara bilong tok i tru i stap long Baibel, bai yumi kisim nupela strong.

19. (a) Wanem samting i bin helpim sampela long putim tingting i go long stadi inap longpela taim? (b) Yumi mas i gat wanem tingting long stadi? Bai yumi kisim wanem ol gutpela samting long dispela wok?

¹⁹ Olsem wanem sapos tingting bilong yumi i save wokabaut taim yumi stadi inap sotpela taim tasol? Sampela i bin lukim olsem ol inap lain long putim gut tingting i go long stadi sapos pastaim ol i stadi inap sotpela taim tasol, na isi isi ol i wok long skruim hap taim moa long stadi. Mak yumi laik winim, em yumi laik stadi i go longpela taim liklik, na yumi no laik pinisim hariap. Yumi mas wok long kisim pasin bilong laikim tru ol dispela tok yumi stadi long en. Na yumi ken wok long painim sampela save moa long ol planti planti buk samting em lain wokboi i gat gutpela tingting i bin givim long yumi. Taim yumi wok strong long painim ol “tingting hait bilong God,” dispela bai helpim yumi tru. (1 Korin 2:​10) Em bai helpim yumi long kisim sampela save moa long God na kisim pasin bilong skelim gut ol samting long tingting. (Hibru 5:14) Na tu, sapos yumi givim bel long stadi long Baibel, bai yumi “inap long skulim ol arapela man.”​—⁠2 Timoti 2:⁠2.

20. Olsem wanem yumi ken kisim pasin bilong pas gut wantaim God Jehova na holimpas dispela pasin?

²⁰ Pasin bilong go long ol miting Kristen na mekim stadi bilong yumi yet, dispela bai helpim yumi tru long kisim pasin bilong pas gut wantaim Jehova na holimpas dispela pasin. Ating dispela samting i bin painim man bilong raitim song, em i tokim God olsem: “Mi laikim tru lo bilong yu. Mi save tingting long en long san na long nait.” (Song 119:97) Olsem na yumi mas go oltaim long ol miting na ol kibung. Na tu, yumi mas makim hap taim bilong stadi long Baibel na tingim tingim long bel. Tru tumas, sapos yumi “holim strong long tingting” ol tok bilong Baibel, bai yumi kisim gutpela samting tru.

[Futnot]

Yu Tingim Yet?

• Bilong wanem sampela Kristen Hibru i wok long surik na lusim bilip tru?

• Olsem wanem yumi ken putim gut yau long ol tok i kamap long ol miting?

• Wanem samting bai helpim yumi long kisim gutpela samting long pasin bilong stadi long Baibel na tingim tingim long bel?

[Piksa long pes 11]

Ol Kristen Hibru i mas was i stap bambai ol i ken luksave olsem liklik taim bai Jerusalem i bagarap

[Piksa long pes 13]

Ol papamama inap helpim ol pikinini na bai ol miting Kristen i ken helpim gut ol