Amarant—Kaikai i Kam Long Ol Astek
WANPELA MAN LONG MEKSIKO I RAITIM DISPELA STORI BILONG KIRAP!
ALEGRÍA em wanpela gutpela loli, na insait bilong dispela tok Spen i olsem “amamas.” Long ol maket bilong Meksiko, ol man i sanapim ol samting olsem liklik stua i gat kala kala na maketim planti alegría. Ol i wokim dispela loli long ol pikinini bilong liklik diwai amarant i gat retpela plaua. Bilong loli i ken pas gut ol i putim hani, na sampela taim ol i bilasim loli long sampela kain galip na pikinini wain ol i bin mekim drai. Na ol inap wilwilim ol pikinini bilong amarant bilong wokim plaua samting, na long plaua ol i wokim bret na kek.
Ol Astek i bin wokim pankek totila na tamale long plaua bilong amarant. Na amarant i bikpela samting taim ol Astek i bin mekim ol pasin bilong lotu. Wanpela nius (The News) bilong Meksiko Siti i tok: “Ol Astek i gat planti bilaspasin bilong lotu na long wanpela ol i bin kisim hap bret ol i wokim long amarant na putim insait long blut bilong wanpela birua bilong ol, em ol i bin holim em na [kilim em i dai], na ol i kaikai dispela bret.” Narapela pasin bilong ol i olsem: Ol i wilwilim pikinini bilong amarant na abusim wantaim kon na hani na wokim ol liklik god giaman long en. Bihain ol i bin kaikai ol dispela god giaman long wanpela pasin bilong lotu i wankain olsem Komyunio bilong ol Katolik.
Ernan Kotes bilong Spen i kisim ami bilong em i kam bilong daunim ol Astek, na dispela 2-pela pasin bilong ol Astek i mekim em i belhat, olsem na em i tambuim ol long planim na kaikai amarant. Sapos wanpela man i brukim lo bilong em, ol i kilim em i dai o katim na rausim han em i bin mekim wok long en bilong planim o kaikai amarant. Olsem na wanpela nambawan kaikai bilong ol Meksiko long dispela taim bipo, klostu i pinis olgeta.
Tasol amarant i no pinis olgeta, na long wanpela rot ol man i no save long en, dispela liklik diwai i lusim Sentral Amerika na kamap long ol maunten Himaleya. Inap 100 yia nau, amarant i olsem wanpela nambawan kaikai bilong ol lain i sindaun long ol ples maunten long India, Nepal, Pakistan, Saina, na Tibet.
Long Meksiko, ol saveman long nau i wok long traim rausim marasin protin long pikinini bilong amarant bilong wokim susu long en, em susu i gutpela bilong helpim skin olsem susu bilong bulmakau. Ol i laik putim dispela marasin protin insait long kaikai na dring bilong ol man i no inap baim kiau, susu bilong bulmakau, pis, o retpela mit.
Maski ol hevi i bin painim amarant long bipo, planti man long nau i amamas yet long kaikai dispela gutpela kaikai ol inap mekim planti wok long en.