Pas Bilong Ol Man
Olgeta Taim Em Asua Bilong Mi Mi gat 15 krismas, na stori “Ol Yangpela i Laik Save . . . Bilong Wanem Olgeta Taim Em Asua Bilong Mi?” (Ogas 8, 1997) i mekim mi i krai. Mi laspela pikinini long famili na olgeta taim ol i sutim tok long mi. Tenkyu long yupela i raitim stori long dispela samting.
N. H., long Amerika
Pikinini i Kamap Gutpela Mi laik tok tenkyu long ol gutpela stori “Helpim Pikinini Long Kamap Gutpela.” (Ogas 8, 1997) Stori i helpim mi na i strongim bel bilong mi. Mi gat wanpela pikinini man i gat 3-pela krismas, na dispela stori i helpim mi long save long tingting bilong em na long senisim pasin bilong mi long stretim em. Mi tenkyu tru long Jehova long ol dispela stori.
P. S., long Itali
Mi pilim tru dispela stori “Hatpela Tok, Bel i Bagarap.” Taim mi yangpela yet i kam inap nau, olgeta taim mi save skelim strong mi yet. Mi amamas yupela i no wok long skelim man, tasol long gutpela pasin yupela traim long helpim ol man i bin karim planti hevi. Mi laik bai Jehova i wok yet long blesim yupela na i stiaim wok bilong yupela long raitim ol stori i save helpim ol man na mekim bel bilong ol i stap isi.
L. D., long Kanada
Mi laik bai ol dispela stori i givim save long ol narapela man na ol i ken save long as na planti bilong mipela i kisim bagarap long tingting na bel. Tenkyu tru long yupela i stori long dispela samting.
L. B., long Amerika
Ol kain stori olsem i helpim mi long mekim gut wok bilong mi olsem tisa long wanpela skul bilong lukautim ol liklik pikinini. Mi laik tok tenkyu long yupela i helpim mipela long ol nupela nupela samting na helpim mipela long kamap gutpela tisa moa.
G. R., long Meksiko
Ol dispela stori i bin strongim mi. Mi kam long wanpela famili i no pas gut wantaim na planti taim mi pilim olsem mi no gutpela meri inap long mi ken mekim wok bilong Jehova na lukautim liklik pikinini meri bilong mi. Bai mi wok strong long bihainim ol tok stori i kamapim. Tenkyu long tingim tru mipela.
A. A., long Amerika
Wanpela Tisa Bilong Lotu Long Rasia Tenkyu tru long yupela i prinim stori “Ol Witnes Bilong Jehova Long Rasia.” (Septemba 8, 1997) Mi litimapim nem bilong Sergei Ivanenko, long wanem, em i no pret na em i gat laik long prinim ol stori i tok tru long ol Witnes Bilong Jehova.
S. M., long Amerika
Pasin Birua Piksa i stap long skin bilong nius i gat ol stori “Bilong Wanem i Gat Planti Pasin Birua? Na No Gat Planti Pasin Sori?” (Septemba 8, 1997), em wanpela gutpela piksa tru, winim ol narapela piksa yupela i prinim. Ol stori i helpim mi long save gut i gat wanem as na ol man i no bilip long ol man ol i no save long ol, na long ol man bilong narapela narapela lain.
J. M., long Amerika
Mipela i Pas Gut Wantaim Tenkyu long stori bilong Anne-Marie Evaldsson. (Me 8, 1997) Mi laikim tru pasin bilong dispela sista long mekim yet ol samting bilong spirit maski em i aipas. Dispela stori i kirapim mi long tingting. Planti bilong yumi i gat gutpela skin bilong mekim wok, tasol yumi no pilim tru samting Jehova i givim long yumi bilong mekim wok bilong em. Mi laik tok amamas long dispela sista na gutpela pren bilong em. Ol i stap olsem gutpela piksa, a?
R. A., long Ekwado
Taim mi save olsem wanpela meri aipas i wok mani, na em i insait long wok autim tok, na em i mekim ol Baibel-stadi, na em i go long ol miting long olgeta wik, dispela i strongim mi tru. Pasin bilong em i mekim na mi pilim olsem, taim mi wok strong long autim tok, na dispela i stap nambawan bikpela samting long laip bilong mi, hatwok bilong mi i no lus nating. Tru tumas, ai i op long ol samting bilong spirit dispela em i bikpela samting. Bai mi amamas long tingim tru Anne-Marie Evaldsson.
J. O., long Naijiria