Ol Binen Bilong Mi i Helpim Ol Kiau Long Bruk!
MI SINDAUN long wanpela liklik fam long hap not bilong Swiden. I no longtaim i go pinis na 2-pela mama kakaruk bilong mi i sindaun long ol kiau na mi wok long lukluk long pasin bilong ol. Tupela de bihain long kiau bilong wanpela mama kakaruk i bruk, sampela pikinini kakaruk i go raun na wokabaut klostu long narapela mama kakaruk. Dispela mama kakaruk i ting em ol pikinini bilong en, olsem na wantu em i lusim ol kiau bilong en na go bungim ol pikinini aninit long wing bilong en. Ol pikinini i no wari long husat mama i lukautim ol.
Mi traim long mekim kakaruk i bekim bek ol pikinini em i “stilim” long narapela mama na kirap gen long sindaun long ol kiau bilong em yet, tasol hatwok bilong mi i lus nating. Taim mi laik tromoi ol dispela kiau mama i bin lusim, mi tingting, ‘Nogut ol pikinini i stap long kiau ol i stap laip yet!’ Orait, nau mi tingim wanpela rot.
Wanpela bikpela lain binen i mekim na hat insait long haus bilong ol i no save senis, hat i olsem 34 digri Selsias long olgeta taim. Olsem na mi putim ol kiau bilong kakaruk long koten na putim dispela antap long ples ol binen i save putim kiau bilong ol insait long wanpela haus binen bilong mi. Orait, nau mi putim 2-pela kap wara klostu long kiau bilong kakaruk bilong helpim hat bilong haus i stap hat yet. Olgeta de mi tanim kiau, olsem na mi bihainim pasin bilong mama kakaruk taim em i sindaun long kiau.
Sampela de bihain, mi harim liklik krai i kamap long sampela kiau. Liklik taim bihain, wanpela pikinini kakaruk i brukim kiau na i kam ausait! Kwiktaim mi kisim em na putim em aninit long mama kakaruk i bin lusim ol kiau bilong en. Em i amamas long lukautim. I no longtaim na em i gat 12-pela pikinini kakaruk bilong lukautim, long wanem, ol binen i helpim dispela wok.—Wanpela man i salim dispela stori i kam.
[Piksa Kredit Lain long pes 31]
Ol piksa: Foto, Roland Berggren, Västerbottens-Kuriren, Sverige