Kofi, Ti, o Gwarana?

WANPELA MAN LONG BRASIL I RAITIM DISPELA STORI BILONG KIRAP!

MERI bilong lukautim ol turis em i askim ol olsem: “Yupela i laik dring wanem samting? Kofi, ti, o gwarana?” Planti taim ol i kamapim dispela askim long bung bilong ol man long Brasil. Tasol ol dispela turis i no klia long dispela askim. Olsem na meri i soim wanpela botol i gat piksa bilong 3-pela retpela prut long en. Ol i amamas taim ol i kisim save olsem gwarana em i no wanpela kain snek; tasol em i wanpela kain loliwara.

Ating yu tu i no save long gwarana. Planti man long olgeta hap ol i save laikim kofi na ti, tasol planti man long Brasil ol i laikim gwarana. Tasol olgeta 3-pela dring i gat wanpela samting i wankain: Ol i gat marasin kafin. Tru tumas, long wanpela kap gwarana i gat planti marasin kafin long en, winim wanpela kap kofi inap 3-pela taim! Ol turis i laik kisim save long dispela dring, olsem na ol i tok ol bai dring gwarana. Taim ol i wok long dring dispela gutpela dring i pait liklik, tasol i swit olsem prut, ol i amamas long harim stori bilong gwarana.

Ol i kisim save olsem gwarana em i wanpela kain rop i save go antap long diwai samting, na em i bin kam long ples daun bilong Amason. Em i save kamap nating klostu long taun Maues na Parintins na long ol narapela hap bilong provins Amasonas. Tasol ol man tu i save planim gwarana long ol narapela provins bilong Brasil, olsem Para, Goias, na Mato Groso.

Dispela rop inap i go antap olsem 10-pela mita. Long braunpela han bilong en i gat ol raunpela lip em arere arere bilong en i sap, na ol plaua i pas pas. Long Janueri o Februeri, taim rop gwarana i gat 3-pela krismas, em i kirap karim kaikai. Gwarana i gat 5-pela krismas inap karim planti kaikai, olsem 3-pela kilo samting.

Bikpela bilong prut bilong gwarana i wankain olsem bikpela bilong grep, na insait long en i gat wanpela o tupela raunpela pikinini. Skin bilong prut long antap i retpela na daunbilo i yelopela. Taim ol i laik kisim skin i karamapim pikinini bilong prut, ol i putim prut insait long wara na larim i stap bambai skin i raus long en. Nau ol i wasim ol pikinini bilong prut, na larim ol i drai, na kukim long paia, na bihain ol i wilwilim ol pikinini i kamap paura. Bihain ol i tanim paura i gat marasin kafin long en wantaim wara​—⁠na sampela taim wantaim kakau na tapiok.

Paslain tru long taim ol man bilong ol narapela kantri ol i kam sindaun long Brasil na kisim save long gwarana, ol Indian i ting dispela prut i bikpela samting. Bilong wokim wanpela dring i gutpela tru, ol Indian i kisim tasol ol prut i mau pinis, na ol i no tanim dispela prut wantaim nupela prut o prut i mau tumas na i laik sting. Bihain ol i brukbrukim pikinini bilong prut na tanim wantaim wara bambai em i kamap strong olsem ol i laik wokim bret. Ol i wokim i kamap olsem ol stik, em longpela bilong ol inap 15 sentimita na braitpela bilong ol inap 2.5 sentimita. Ol i larim ol stik i go drai na i kamap strong olsem ston. Em wanpela pasin bilong bipo long lukautim kaikai bambai em i no ken bagarap long ol ples hat. Bihain ol i skrapim ol gwarana stik i drai pinis long bun bilong wanpela bikpela pis. Na bihain ol i tanim dispela paura wantaim wara o wantaim wara bilong sampela prut.

Ol Indian bilong Brasil, ol i ting dispela dring em i gutpela marasin. Ol dokta bilong ples i mekim kain kain wok long dring gwarana bilong givim long ol sikman. Na taim ol Indian i wok strong inap planti aua, ol i dring gwarana bilong strongim skin i les olgeta.

Long yia 1816 samting, ol i bringim gwarana long Frans. Bihain, long yia 1826, wanpela saveman bilong Jemani, em Karl von Martius, em i askim brata bilong em, Theodore, long glasim ol marasin samting i stap long dispela prut. Em namba wan taim ol i bin mekim olsem. Tasol ol i no mekim bikpela wok long gwarana long Yurop, long wanem, ol dokta bilong dispela hap ol i ting mobeta ol i mekim wok long marasin i no gat bikpela pe.

Tasol long Brasil, planti manmeri moa ol i ting gwarana em i marasin bilong oraitim olgeta sik. Long 1905, Luís Pereira Barreto, em wanpela dokta long Brasil, em i litimapim nem bilong namba wan man i bin traim gwarana na kisim save olsem gwarana em i wanpela gutpela samting tru bilong helpim ol manmeri.

Ol man i laikim gwarana, ol i tingting yet olsem em i nambawan dring. Sampela i tok, gwarana i no wanpela marasin tasol bilong strongim man taim skin i les, nogat; em i helpim tu klok bilong man long stap isi, na em i gutpela marasin bilong sakim wanpela kain sik i save mekim ol rop bilong blut i go strong. Na ol i tok tu olsem gwarana inap pinisim pekpek wara, pekpek blut, het pen, na pen nogut tru long ol rop wailis insait long skin. Save ol dokta i kisim pinis i strongim dispela tok o nogat, em yumi no save yet. Tasol kirap long 1929, planti man long Brasil ol i laik dring gwarana.

Dispela stori i bin givim gutpela save long ol turis. Meri bilong lukautim ol, em i askim ol: “Yupela i laik kisim sampela gwarana moa?” Olgeta i tok, yes. Olsem wanem long yu? Yu laik dring gwarana tu?

[Ol Piksa long pes 27]

Gwarana​—⁠taim ol i no wokim em i kamap wanpela dring yet