De Tupela Taua i Pundaun

OL SAMTING i kamap long Septemba 11, 2001, long New York City, Washington, D.C., na long Pennsylvania, ol dispela samting bai stap oltaim long tingting bilong planti milion, o yumi ken tok planti bilion man. Yu stap we taim yu lukim o harim nius long ol birua i bagarapim Wol Tred Senta long New York na haus Pentagon long Washington?

Insait long sotpela taim tasol planti samting i bagarap na planti manmeri i dai, na dispela i kirapim ol man long skelim i stap bilong ol.

Yumi bin kisim wanem save long ol samting i bikpela samting long i stap bilong yumi na ol samting yumi laik mekim? Olsem wanem dispela bagarap i bin kamapim klia sampela gutpela pasin bilong yumi ol man​​—⁠olsem pasin bilong daunim laik bilong yumi yet, pasin sori, karim hevi, na tingim laik bilong ol narapela? Dispela stori na narapela i kamap bihain long en bai bekim namba tu askim.

Lain i Abrusim Bagarap i Stori

Kwiktaim bihain long bagarap i kamap long New York, ol i pasim raun bilong ol tren aninit long graun, olsem na planti tausen manmeri i laik lusim Manhattan ol i mas wokabaut i go kalapim bris bilong Brooklyn na Manhattan. Ol inap lukim gut ol bikpela haus ofis na faktori bilong hetkota bilong ol Witnes Bilong Jehova. I no longtaim na sampela manmeri i ranawe i go long ol dispela bikpela haus.

Alisha (long han sut), em i pikinini meri bilong wanpela Witnes, na em i wanpela bilong namba wan lain i kamap long dispela hap. Das na sit bilong paia i karamapim skin bilong em.a Em i tok: “Mi stap long tren bilong i go long wok, na mi lukim smok i kamap long Wol Tred Senta. Taim mi kamap long hap bagarap i kamap long en, ol glas i stap nabaut long olgeta hap, na mi inap pilim hat bilong paia. Ol manmeri i ran nabaut nabaut, na ol polis i tokim ol man long lusim dispela hap. Dispela hap i luk olsem wanpela ples bilong pait.

“Mi ran i go painim ples hait insait long wanpela haus. Mi harim bikpela pairap taim namba tu balus i flai i go insait long saut taua. Ples i bagarap olgeta, blakpela smok i pulap long olgeta hap. Ol i tokim mipela long lusim dispela hap em bagarap i kamap long en. Ol i putim mi long wanpela bot bilong i go long hapsait bilong wara East, long Brooklyn. Taim mi kamap long hapsait, mi lukluk i go antap na mi lukim wanpela bikpela rait i tok, ‘WATCHTOWER.’ Em hetkota bilong lotu bilong mama! Kwiktaim mi go long dispela bikpela haus ofis. Mi save olsem em i nambawan gutpela hap bilong kisim helpim. Long dispela hap mi inap klinim skin bilong mi, na bihain mi ringim papamama.”

Wendell (long han sut) i wok long hotel Marriott. Dispela hotel i stap namel long dispela tupela taua. Em i tok: “Mi wok long hap ol man i save kam insait, taim namba wan balus i pairap. Mi lukim pipia i pundaun long olgeta hap. Mi lukluk i go long hapsait bilong rot na mi lukim wanpela man i slip long graun na paia i lait long em. Mi rausim saket na siot bilong mi na mi ran i go long em bilong kilim i dai paia. Wanpela man moa i kam helpim mi. Paia i kukim olgeta klos bilong em, na ol sok na su tasol nogat. Ol paiaman i kam kisim em i go long haus sik.

“Bihain liklik, Bryant Gumbel bilong CBS televisen nius i ring bilong kisim stori bilong man i lukim ol samting i bin kamap. Famili bilong mi long ol ailan Vejin ol i lukim mi long TV, na long dispela rot ol i save olsem mi stap laip.”

Donald, em i strongpela man i longpela inap 195 sentimita, em i wok long Wol Fainensel Senta, na em i stap long namba 31 plua na lukluk i go stret long Tupela Taua na hotel Marriott. Em i tok: “Mi kirap nogut long ol samting mi lukim. Ol manmeri i pundaun i go daun o kalap i go daun long ol windo bilong not taua. Mi pret nogut tru na mi lusim ples wok na siksti i go ausait.”

Narapela stori i bilong wanpela mama i gat 65 krismas samting na tupela pikinini meri bilong em ol i gat 45 krismas samting. Ruth na susa bilong em, Joni, ol i stap wantaim mama bilong ol, Janice, long wanpela hotel klostu long Tupela Taua. Ruth, em i wanpela nes, i tok: “Mi stap long rum waswas. Wantu mama na susa bilong mi ol i singautim mi long kam ausait. Mipela i stap long namba 16 plua na tupela inap lukim pipia i pundaun ausait long windo. Mama i lukim bodi bilong wanpela man i flai i go kalapim wanpela haus, i olsem ol i bin tromoim em.

“Mi hariap long pasim klos na mipela i bihainim lata i go daun. Ol manmeri i wok long singaut nabaut. Mipela i kamap long rot. Mipela i harim ol bikpela pairap na lukim ol lait bilong paia. Ol i tokim mipela long ranawe kwik i go long pak Battery, em bot bilong i go long ailan Staten i stap long en. Taim mipela i ranawe i go, mama i lus, na em i gat sik sotwin tu. Olsem wanem em inap abrusim bagarap long bikpela smok, sit bilong paia, na das? Mipela i traim long painim em inap 30 minit samting tasol mipela i no lukim em. Tasol mipela i no tingting planti tumas, long wanem, em inap lukautim em yet.

“Bihain liklik ol i tokim mipela long wokabaut i go long Brooklyn bris na go long hapsait. Mipela i amamas tru na bel bilong mipela i stap isi taim mipela i kamap long hapsait bilong bris long Brooklyn na lukim bikpela rait i tok ‘WATCHTOWER’! Mipela i save olsem mipela bai stap gut.

“Ol i tok welkam long mipela na givim ples slip long mipela. Mipela i no gat klos bilong senis, olsem na ol i givim ol klos long mipela. Tasol mama i stap we? Long nait olgeta mipela i traim long sekim em long ol haus sik, tasol mipela i no painim em. Long de bihain long 11 klok long moningtaim, mipela i kisim wanpela toksave. Mama i kamap pinis long hap mipela i stap long en! Wanem samting i bin painim em?”

Janice, em mama bilong tupela meri hia i skruim stori: “Taim mipela i ranawe lusim hotel, mi tingting planti long wanpela lapun meri em i pren bilong mipela, em i no inap ranawe wantaim mipela. Mi laik i go bek long hotel na karim em i kam ausait. Tasol bagarap inap painim mi sapos mi mekim olsem. Planti samting i kamap wantaim planti pairap na long dispela taim mi lus long ol pikinini bilong mi. Tasol mi no tingting planti tumas, long wanem, ol i save bihainim gutpela tingting na Ruth i mekim wok nes.

“Long olgeta hap mi lukluk long en, mi lukim ol man i sot long helpim​​—⁠na moa yet ol pikinini na ol bebi. Mi helpim planti inap long skel bilong strong bilong mi. Mi go long hap ol i wok long skelim ol man i kisim bagarap na givim marasin samting long ol. Pastaim ol i helpim ol man i bin kisim bikpela bagarap. Mi helpim ol lain i wok long dispela hap, mi wasim han na pes bilong ol polisman na paiaman em blakpela smok na das i pas strong long skin bilong ol. Mi stap long dispela hap i go inap 3 klok long moningtaim. Bihain mi kalap long laspela bot i go long ailan Staten. Mi ting ol pikinini bilong mi i go long dispela hap. Tasol mi no painim ol.

“Long moningtaim mi traim long kalap long namba wan bot i go bek long Manhattan, tasol mi no inap, long wanem, mi no mekim wok bilong helpim ol man i kisim bagarap. Mi lukim wanpela polisman mi bin helpim. Mi singaut long em: ‘John! Mi mas i go bek long Manhattan.’ Em i tok: ‘Bihainim mi.’

“Taim mi kamap long Manhattan, mi go bek long hotel Marriott. Ating mi inap helpim yet lapun pren bilong mi. Tasol nogat tru! Hotel i bagarap olgeta. I no gat wanpela man i stap long dispela hap bilong taun. Ol polisman na paiaman tasol i stap em skin bilong ol i no gat strong moa, na ol i luk sore.

“Mi bihainim rot i go long Brooklyn bris. Taim mi kamap klostu long hapsait bilong bris, mi inap lukim wanpela rait mi save gut long en, ‘WATCHTOWER.’ Ating mi inap painim ol pikinini bilong mi long dispela hap. Na tru tumas, ol i kam bungim mi. Narapela i holim narapela na mipela i krai!

“Mi kirap nogut long mi no bin sotwin, maski i gat planti smok, das, na sit bilong paia. Mi beten planti taim, long wanem, mi laik helpim ol narapela na mi no laik givim hatwok long ol.”

“I No Gat Ples Bilong Balus i Ken Pundaun!”

Rachel, em meri i gat 24 krismas em i stori olsem long wanpela man bilong raitim stori long nius Kirap!: “Mi wokabaut long strit bilong mi long hap bilong Manhattan taim mi harim balus i flai. Krai bilong balus i bikpela tru, olsem na mi lukluk i go antap. Mi kirap nogut tru​​—⁠wanpela bikpela balus i laik pundaun. Mi tingting long i gat wanem as na balus i flai daunbilo na i spit tru. I no gat wanpela ples bilong balus i ken pundaun! Ating pailot i no inap stiaim balus. Nau mi harim wanpela meri i singaut, ‘Dispela balus i flai i go insait long taua!’ Bikpela paia i sut i kam ausait long not taua. Mi lukim traipela blakpela hul long taua.

“No gat wanpela taim mi bin lukim wanpela samting i nogut tru olsem dispela samting nau mi lukim. Mi ting olsem mi driman tasol na dispela samting i no kamap tru tru. Maus bilong mi i op na mi sanap lukluk tasol. Bihain liklik, namba tu balus i flai i go insait long namba tu taua, na tupela taua wantaim i bruk i go daun. Mi singaut strong tru. Dispela samting i bagarapim tru bel na tingting bilong mi!”

“Sapos Mi Mas Swim, Orait Bai Mi Swim”

Denise, em i gat 16 krismas, em i kamap long skul bilong em klostu long Amerikan Stok Ekseins i no longwe tumas long Wol Tred Senta. “Em 9 klok samting long moningtaim. Mi save olsem wanpela samting i bin kamap, tasol mi no save em wanem samting. Mi stap long wanpela sosel saiens klas, na mipela i stap long namba 11 plua bilong skul. Olgeta sumatin i pret. Tisa i laik bai mipela i mas mekim tes. Tasol mipela i laik lusim skul na go long haus.

“Orait nau dispela bikpela haus i guria taim namba tu balus i flai i go insait long saut taua. Tasol mipela i no save yet long wanem samting i kamap. Long dispela taim stret mi harim wanpela nek i toktok long liklik redio bilong tisa bilong salim tok i go i kam na nek i tok: ‘Tupela balus i flai i go insait long Tupela Taua!’ Mi tingting, ‘I no gutpela long stap yet long skul. Dispela em i pasin teroris na ol bai tingting long bagarapim haus Stok Ekseins tu.’ Mipela i lusim skul na i go ausait.

“Mipela i ran i go long pak Battery. Mi tanim na lukluk long ol samting i kamap. Mi lukim olsem saut taua i laik pundaun. Nau mi tingting olsem nogut dispela tupela taua i pundaun na mekim ol narapela bikpela haus tu i pundaun. Mi hatwok long pulim win, long wanem, sit bilong paia na das i go insait long nus na maus bilong mi. Mi ran i go long wara East na mi tingting, ‘Sapos mi mas swim, orait bai mi swim.’ Taim mi ranawe i go, mi beten long Jehova long helpim mi long abrusim bagarap.

“Bihain liklik, ol i putim mi long wanpela bot bilong i go long New Jersey. Mama i wok long painim mi inap 5-pela aua, tasol bikpela samting em bagarap i no bin painim mi!”

“Ating Dispela i Laspela De Bilong Mi Long i Stap Laip?”

Josua, em i gat 28 krismas, em i bilong Princeton, New Jersey, na em i wok long skulim ol sumatin long namba 40 plua bilong not taua. Em i tok: “Wantu i olsem wanpela bom i bin pairap. Haus i seksek na bihain mi tingting, ‘Nogat, em wanpela guria.’ Mi lukluk i go ausait na mi lukim ol narakain samting tru​​—⁠smok na pipia i flai nabaut klostu long bikpela haus mipela i stap long en. Mi tokim ol sumatin, ‘Lusim olgeta samting bilong yupela. Yumi go!’

“Mipela i bihainim lata i go daun, na smok i wok long kam insait, na wara i kamaut long ol paip. Tasol mipela i wokabaut gut i go daun. Mi beten olsem lata mipela i bihainim bai helpim mipela long abrusim paia.

“Taim mi wok long ran bihainim lata i go daun, mi tingting, ‘Ating dispela i laspela de bilong mi long i stap laip?’ Mi beten yet long Jehova, na mi pilim narapela kain bel isi tru. I no gat wanpela taim bipo mi bin pilim kain bel isi olsem. Mi no inap tru long lusim tingting long dispela samting.

“Taim mipela i kamap ausait, ol polis i tokim olgeta manmeri long lusim dispela hap. Mi lukluk i go antap long tupela taua na mi lukim olsem ol i bruk long namel. Mi no inap bilip long samting mi lukim.

“Nau mi harim wanpela kain samting i mekim mi pret​​—⁠i olsem planti tausen manmeri i stap isi na i wet long wanpela samting bai kamap. I olsem New York i stap isi tru. Bihain long dispela, ol manmeri i singaut nabaut. Saut taua i wok long bruk i go daun! Bikpela smok, na sit bilong paia, na das i sut i kam long mipela. Em i kain olsem ol narakain samting i save kamap long ol piksa long televisen. Tasol dispela samting i kamap tru tru. Mipela i hatwok long pulim win taim bikpela smok na das i kam karamapim mipela.

“Mi kamap long Manhattan bris, na mi tanim na lukim not taua i bruk i go daun wantaim bikpela antena bilong televisen i sanap long rup bilong en. Taim mi kalapim bris i go, mi beten olsem mi inap kamap gut long Betel, em hetkota bilong ol Witnes Bilong Jehova. Mi amamas tru long lukim dispela hap, winim olgeta taim bipo. Na long banis bilong faktori, mi inap lukim bikpela rait em planti tausen man i save lukim long olgeta de, ‘Ritim Tok Bilong God Em Baibel Holi Long Olgeta De’! Mi tingting, ‘Klostu bai mi kamap long hap. Mi mas strong yet long wokabaut i go.’

“Taim mi tingim gen ol dispela samting, mi pilim tru olsem mi mas skelim gut wanem ol samting i bikpela samting long i stap bilong mi​​—⁠ol samting i bikpela samting i mas i stap namba wan.”

“Mi Lukim Ol Manmeri Long Taua i Kalap i Go Daun”

Jessica, em i gat 22 krismas, em i lukim ol dispela samting taim em i kam ausait long wanpela hap bilong kisim tren. “Mi lukluk i go antap na mi lukim sit bilong paia, pipia, na ol kain kain hap ain i pundaun i kam daun. Ol manmeri i sanap long lain bilong yusim ol telefon, tasol lain i longpela na dispela i mekim na ol i no inap stap isi. Mi beten long mi ken i stap bel isi. Nau narapela bikpela pairap i kamap. Ol hap ain na glas i pundaun i kam daun. Mi harim ol manmeri i singaut, ‘Em narapela balus gen!’

“Mi lukluk i go antap na ol samting mi lukim i nogut tru​​—⁠ol manmeri i stap long ol plua antap long dispela taua, ol i wok long kalap i kam daun, na smok na paia i sut i kam ausait long ol windo. Mi inap tingim yet samting mi lukim​​—⁠wanpela man na meri i kalap i kam daun. Inap sotpela taim ol i holim wanpela windo. Tasol bihain ol i mas lusim na ol i pundaun i kam daun olgeta. Em i samting nogut tru long lukim.

“Bihain liklik, mi kamap long Brooklyn bris na long dispela hap mi rausim su bilong mi na mi ran i go long Brooklyn long hapsait bilong wara East. Mi wokabaut i go insait long bikpela haus ofis bilong Wastaua we ol i mekim gut bel bilong mi.

“Long dispela nait, long haus mi ritim stori ‘Coping With Post-traumatic Stress’ long nius Awake! bilong Ogas 22, 2001. Ol tok bilong dispela nius i helpim mi tru!”

Dispela bikpela bagarap i kirapim ol man long helpim ol narapela long wanem wanem rot ol inap long mekim olsem. Stori i kamap bihain long dispela i stori long dispela samting.

[Futnot]

[Sat/Ol Piksa long pes 8, 9]

(Bilong save ol dispela rait i stap we long pes, lukim buk o magasin)

BAGARAP OLGETA

1 NOT TAUA 1 Wol Tred Senta

2 SAUT TAUA 2 Wol Tred Senta

3 HOTEL MARRIOTT 3 Wol Tred Senta

7 7 WOL TRED SENTA

BIKPELA HAP I BAGARAP

4 4 WOL TRED SENTA

5 5 WOL TRED SENTA

L WAN LIBETI PLASA

D DEUTSCHE BENG 130 Liberty Strit

6 U.S. HAUS KASTOM 6 Wol Tred Senta

N S OL BRIS BILONG WOKABAUT BILONG NOT NA SAUT

SAMPELA HAP I BAGARAP

2F 2 WOL FAINENSEL SENTA

3F 3 WOL FAINENSEL SENTA

W WINTA GADEN

[Kredit Lain]

As of October 4, 2001 3D Map of Lower Manhattan by Urban Data Solutions, Inc.

[Ol Piksa]

Antap tru: Saut taua i bruk i go daun pastaim

Antap: Sampela ol i ranawe i go long ol ofis bilong Wastaua bilong kisim helpim

Han sut: Planti handet paiaman na ol man i helpim ol lain i kisim bagarap, ol i givim bel long wok long Graun Siro

[Ol Kredit Lain]

AP Photo/Jerry Torrens

Andrea Booher/FEMA News Photo

[Piksa Kredit Lain long pes 3]

AP Photo/Marty Lederhandler

[Piksa Kredit Lain long pes 4]

AP Photo/Suzanne Plunkett