Helpim na Pasin Sori i Kam Long Planti Hap
OL VOLANTIA i kam long ol narapela hap bilong Amerika na ol narapela kantri tu. Wanpela volantia em Tom (long piksa antap), em i gat 29 krismas, na em i wanpela paiaman long Ottawa, Kanada. Em i tokim Kirap!: “Mi lukim ol samting i kamap long TV na mi laik strongim bel bilong ol wanwok bilong mi, em ol paiaman long New York. Long Fraide, mi draiv i go long hap bagarap i kamap long en bilong helpim wok. Ol i makim mi long wok wantaim wanpela lain i yusim ol baket bilong rausim pipia.
“Isi isi mipela i rausim pipia, mipela i savolim isi isi na bai mipela i ken painim ol samting em inap helpim mipela long luksave long ol paiaman i dai. Mi painim wanpela tul bilong opim ol dua i pas, na sampela ring bilong joinim ol raba hos. Em i hatwok tru. Mipela 50 volantia i mekim dispela wok na insait long tupela aua, mipela i pulimapim wanpela trak bilong kisim pipia.
“Long Mande, Septemba 17, mipela i painim bodi bilong sampela paiaman em ol i bin ran i go insait long taua long Tunde i go pinis. Mi no inap tru long lusim tingting long samting mi lukim—olgeta man i wok long dispela hap, ol i rausim ol strongpela hat bilong ol na ol i sanap—ol i soim rispek long ol wanwok bilong ol i dai.
“Taim mi sanap lukluk long ol samting long dispela hap bagarap i kamap long en, mi pilim tru olsem laip bilong man inap pinis wantu tasol. Dispela i kirapim mi long tingim i stap bilong mi, wok mani, na famili bilong mi. Maski bagarap inap painim mi, wok bilong mi i givim amamas long mi—mi inap helpim ol man, na helpim ol tu long abrusim bagarap.”
Ol Witnes i Helpim Ol Man
Long namba wan na namba tu de bagarap i kamap long en, inap olsem 70 manmeri i go long hetkota bilong ol Witnes Bilong Jehova bilong kisim helpim. Sampela em kago na rum bilong ol long hotel i bagarap, ol i kisim ples slip na sampela klos, na kaikai. Na bikpela samting moa, ol elda Kristen i save gut long mekim wok, ol i strongim bel bilong ol.
Ol Witnes Bilong Jehova i givim ol samting bilong helpim ol man i wok long hap bagarap i kamap long en, em ol man i kolim dispela hap olsem Graun Siro. Na tu, ol i givim trak long dipatmen bilong kilim i dai paia bilong ol i ken bringim ol paiaman i go long hap bagarap i kamap long en. Ricardo (han sut, long antap), em i wanpela Witnes i gat 39 krismas na em i save mekim wok bilong rausim pipia, na long hia em i wok wantaim planti handet volantia na ol i rausim planti hip pipia long olgeta de. Em i tokim Kirap!: “Ol samting mipela i lukim i bagarapim tru bel bilong mipela, na i bagarapim moa yet ol paiaman, em ol i wok long painim ol wanwok bilong ol em ol i lus. Mi lukim ol i kamautim long pipia wanpela paiaman i stap laip yet. Bodi bilong wanpela man i pundaun antap long wanpela paiaman na i kilim em i dai. Planti paiaman i krai i stap. Mi tu kirap long krai. Long dispela de, ol paiaman i gat strongpela bel, winim olgeta narapela man.”
“Taim Nogut”
Planti tausen manmeri i dai long dispela bikpela bagarap. Inap 14 Witnes tu ol i dai, em ol i bin stap long dispela hap bagarap i kamap long en o klostu long en. Joyce Cummings, em i gat 65 krismas na em i bilong Trinidat, em i bin stretim tok long i go lukim dentis klostu long Wol Tred Senta. Tasol sori tru, long dispela taim bagarap i kamap. Bikpela smok i bagarapim em na kwiktaim ol i bringim em i go long haus sik. Tasol em i dai. Indai bilong em i wankain olsem bilong planti narapela man tu em “taim nogut” i painim ol. (Saveman 9:11) Em i gat nem olsem meri bilong givim bel tru long autim tok.
Calvin Dawson (lukim blok) i save wok long wanpela kampani long plua namba 84 bilong saut taua. Em i stap long ofis bilong em na em inap lukim gut ol samting i kamap bihain long balus i flai i go insait long not taua. Bos bilong em i no stap long ofis, em i ring bilong painimaut long ol samting i bin kamap. Bos i tok: “Calvin i laik tokim mi long ol samting em i lukim. Em i tok, ‘Ol manmeri i wok long kalap i go daun!’ Mi tokim em long lusim ofis na tokim ol narapela tu long lusim ofis.” Tasol bagarap i painim Calvin na em i dai. Bos bilong em i tok moa: “Calvin em i gutpela man na mipela i save amamas long em, maski mipela sampela i no save tingim ol samting bilong spirit. Mipela i laikim pasin bilong em long givim bel long God na tingim gut ol narapela.”
Narapela Witnes i bin i dai long dispela bagarap em James Amato (han sut long daunbilo, pes 10), em i gat 4-pela pikinini na em i kepten bilong dipatmen bilong kilim i dai paia long New York. Ol man i save long em ol i tok olsem em i no save pret, na “em i save i go insait long haus i paia, maski ol manmeri i ranawe i kam ausait.” Bihain long James i dai, ol i givim namba long em olsem wanpela ofisa bilong ol paiaman.
Narapela Witnes husat i bin i dai em George DiPasquale. Em i bin mekim wok paiaman inap 7-pela yia. Em i maritim Melissa na em i gat wanpela pikinini meri i gat 2-pela krismas, em Georgia Rose. Em i wanpela elda long wanpela kongrigesen bilong ol Witnes Bilong Jehova long ailan Staten, na em i bin i stap long plua namba 10 bilong saut taua taim taua i pundaun. Em tu i lusim laip bilong em taim em i laik helpim ol narapela long abrusim bagarap.
Mipela i stori tasol long tupela paiaman, tasol planti handet paiaman, polisman, na ol man i givim helpim ol i bin i dai taim ol i laik helpim ol narapela long abrusim bagarap. Yumi tingim tru pasin bilong ol long strongim bel na i no pret. Bihain, bikman bilong New York City, em Rudolph Giuliani, i tok long sampela paiaman em ol i bin givim bikpela namba long ol: “Yupela i givim bel long mekim yet wok bilong yupela long taim bilong bikpela hevi, na dispela pasin i kirapim mipela olgeta. . . . Na Dipatmen Bilong Kilim i Dai Paia long New York City i stap olsem gutpela piksa long pasin bilong strongim bel na i no pret.”
Wok Bilong Mekim Gut Bel
Long ol de bihain long dispela bikpela bagarap i kamap, inap olsem 900,000 Witnes Bilong Jehova long Amerika ol i wok strong long mekim gut bel bilong ol man i stap bel hevi. Pasin bilong laikim tru ol narapela i kirapim ol long mekim gut bel bilong ol man i krai sori. (Matyu 22:39) Long wok bilong ol long autim tok, ol i bin wok strong long helpim ol man long save long rot tru bilong helpim ol man i stap bel hevi.—2 Pita 3:13.
Ol Witnes i mekim pasin sori long ol man. Ol i laik kamapim ol tok bilong Baibel bilong mekim gut bel bilong ol man, na bihainim pasin bilong Jisas. Em i bin tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.”—Matyu 11:28-30.
Ol i orait long sampela lain elda bilong ol kongrigesen long Manhattan long i go long hap ol i kolim Graun Siro, na bai ol i ken toktok wantaim ol lain i wok long dispela hap na mekim gut bel bilong ol. Planti ol i amamas tru long harim tok. Ol dispela elda i tok: “Aiwara i pundaun long ai bilong ol dispela man taim mipela i kamapim ol skripsa long ol.” Sampela man i wok long hap bagarap i kamap long en, ol i sindaun malolo long wanpela bot long hap ol i save putim ol bot long en. “Ol i bel hevi tru na daunim het, ol samting ol i bin lukim i bagarapim tru tingting bilong ol. Mipela i sindaun wantaim ol na kamapim sampela tok bilong Baibel. Ol i tenkyu tru long mipela i go lukim ol, na ol i tok ol i sot tru long kain gutpela tok olsem bilong mekim gut bel bilong ol.”
Bihain long dispela bagarap, planti man ol Witnes i bungim ol i laik kisim ol nius samting bilong ritim, na ol Witnes i givim nating planti tausen buklet long ol. Sampela bilong ol dispela buklet em Taim Wanpela Long Famili i Dai, Will There Ever Be a World Without War?, na Tru God i Save Tingim Yumi? Na tu, ol Witnes i bin mekim gutpela wok long tupela stori bilong nius Awake! em: “The New Look of Terrorism” (Me 22, 2001) na “Coping With Post-traumatic Stress” (Ogas 22, 2001). Ol Witnes i stori gut long planti man long tok bilong Baibel olsem ol man i dai pinis ol inap kirap bek. (Jon 5:28, 29; Aposel 24:15) Ating planti milion man i bin harim dispela tok bilong mekim gut bel.
Dispela Samting i Mas Kirapim Yumi Long Tingting
Ol bikpela bagarap olsem dispela bagarap i kamap long New York City i mas kirapim yumi olgeta long skelim ol samting yumi mekim long i stap bilong yumi. Yumi stap bilong tingim laik bilong yumi yet tasol, o yumi save mekim ol samting bilong helpim ol narapela long i stap amamas? Profet Maika i tok: “Bikpela i . . . laik bai yumi mekim pasin olsem tasol. Yumi mas bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol.” (Maika 6:8) Pasin daun i mas kirapim yumi long skelim Baibel bilong kisim save long gutpela samting bai painim ol man i dai pinis, na ol samting klostu nau God bai mekim bilong kamapim gen Paradais long graun. Sapos yu laik kisim sampela save moa long ol tok promis bilong Baibel, mipela i laik kirapim yu long toktok wantaim ol Witnes Bilong Jehova long hap bilong yu.—Aisaia 65:17, 21-25; KTH 21:1-4.
[Blok/Ol Piksa long pes 11]
BETEN BILONG TATIANA
Meri bilong Calvin Dawson, em Lena, i stori long Kirap! long beten em pikinini meri bilong em i gat 7-pela krismas i bin mekim sampela de bihain long em i kisim save olsem papa bilong em bai no kam bek long haus. Lena i beten pinis na Tatiana i askim em, “Mama, inap mi beten?” Mama i tok orait long dispela. Tatiana i beten: “Jehova, Papa bilong mipela long heven, mipela i laik tok tenkyu long yu long dispela kaikai na long dispela de mipela i stap laip. Na mipela i laik askim yu long larim spirit bilong yu i stap wantaim mi na mama na bai mitupela i ken i stap strong. Na mipela i laik askim yu long larim spirit bilong yu i stap wantaim papa, na bai em i ken stap strong taim em i kam bek. Na taim em i kam bek, em bai mekim gutpela pasin, stap strong, na amamas na i no gat sik, na mipela bai lukim em gen. Long nem bilong Jisas . . . o, na no ken lusim tingting long strongim mama. Amen.”
Lena i no save sapos Tatiana i klia long ol samting i bin kamap, olsem na em i tok: “Tiana, em gutpela beten. Tasol gutpela pikinini, yu save olsem papa bai no kam bek?” Wantu Tatiana i kirap nogut, na em i tok: “Em i no inap i kam bek, a?” Mama i tok: “Yes. Mi ting mi tokim yu pinis. Mi ting yu klia long tok bilong mi olsem papa bai no kam bek.” Tatiana i tok: “Tasol oltaim yu bin tokim mi olsem em bai kam bek long nupela taim!” Bihain Lena i klia long tok bilong pikinini bilong em, na em i tok: “Sori tru, Tatiana. Mi no klia gut long tok bilong yu. Mi ting yu tok olsem papa bai kam bek tumora.” Lena i tok: “Mi amamas long save olsem em i bilip tru long nupela taim bai kamap.”