Mi Laik Mekim Wok Bilong God Long Olgeta De Mi Stap Laip

EM STORI BILONG MAX LARSON

MAMAPAPA bilong mama bilong mi tupela i bin i dai. Long yia 1910 mama bilong mi i kisim sip na go long Amerika. Em i gat 18 krismas tasol, na em i no save long tok Inglis, na em i no save liklik long wanpela man o meri i stap long dispela kantri.

Taim em i kam kamap long bikpela taun Nu Yok, em i kalap long wanpela tren na i go long Saut Dakota. Em longwe inap 2,400 kilomita. Long Saut Dakota i gat wanpela ples i stap na ol man bilong lain Denmak i stap long en. Long dispela ples em i bungim wanpela man, bihain em i kamap papa bilong mi. Long Septemba 20, 1911 tupela i marit.

Long kirap bilong yia 1913 papa yet i go long Montana long karis i gat haus long en, long wanem i gat hap graun i stap bilong wokim haus na gaden na lukautim ol animal samting. Long dispela hap em i wokim wanpela haus long diwai na i gat wanpela rum long en. Long taim bilong san, em i pinisim dispela haus, olsem na mama bilong mi wantaim brata bilong mi, em Norman, em i liklik pikinini i gat sampela mun tasol, tupela i kisim tren na i go na bungim papa.

Tupela yia bihain mama i gat bel long namba tu pikinini, em mi yet. Long de paslain long taim mama i karim mi, em i bin wok long putim morota long rup bilong haus, olsem na planti taim mi tok pilai olsem mi bin “helpim” mama long mekim dispela wok. Long de mama i karim mi, em Epril 29, 1915, papa i lusim wok gaden long belo na kam long haus long kaikai, na mama i tokim em: “Ating nau bai mi karim pikinini,” Na tru, long belo bek mama i bin karim mi. Tasol taim papa i kam bek gen long haus long apinun, mama i wokim pinis kaikai bilong papa na i redi i stap!

Tripela yia bihain, long dispela ples tasol, mama i karim susa bilong mi, em Jean. Long yia bihain famili bilong mipela i go long hap bilong is long Montana, na long dispela hap papa i kisim hap graun na baim long mun samting. Long yia 1921, mama i karim namba tu susa bilong mi, em Laverna, na mipela 4-pela pikinini i kamap bikpela long dispela hap bilong Montana.

Ol Samting i Stiaim Wokabaut Bilong Mi

Papamama bilong mi ol i bilong lotu Luteran, na long olgeta Sande mipela 6-pela olgeta, em mipela 4-pela pikinini na papamama i go long lotu. Tasol bihain liklik wanpela man i stap klostu long mipela, em wanpela Witnes Bilong Jehova bipo ol i save kolim Intenesenel Baibel Stiudens, em i wok long i kam lukim mama na em i stadi Baibel wantaim em. Mama i wok long lainim ol tok i tru bilong Baibel, na em i bilip na inap olsem tupela yia bihain, olsem long yia 1925, em i kisim baptais long bokis bilong putim wara bilong ol hos. Papa na mipela ol pikinini mipela i no go long dispela nupela lotu, tasol mipela i amamas long lusim lotu Luteran. Long olgeta taim mama i save tokim mipela: “Yupela no laik mekim wok bilong Jehova, tasol yupela no ken tru brukim lo bilong em.” Dispela tok i helpim mipela long wokabaut stret na abrusim ol pasin nogut.

Mipela 6-pela olgeta long famili, mipela wokim gaden long hap graun i bikpela olsem 320 hekta na mipela i gat 14-pela hos na wanpela trakta bilong helpim mipela. Mipela i no gat paua o wara long haus. Wanpela hul wara em i stap longwe inap olsem 4-pela kilomita long haus na mipela kisim wara long en. Long yia 1930 inap 1934 samting i no gat ren long hap bilong mipela na inap 4-pela yia gaden i no karim kaikai, olsem na mipela i lusim Montana na i go long Provins Wosington. Bilong redi long i go long Wosington, mipela i mas kisim ol samting bilong wokim gaden na sampela samting bilong haus i go long Wosington. Olsem na wok bilong mi em mi mas kalap long tren wantaim ol hos na lukautim ol, olsem givim kaikai na wara long ol, i go inap long Wosington. Mi stap long tren inap 6-pela de na mi kamap pinis long hap bilong nambis bilong Provins Wosington long hap bilong san i go daun.

Long dispela hap mi helpim papa long kirapim wanpela wok bisnis bilong lukautim ol bulmakau na kisim susu long ol. Mi wok wantaim em long mekim dispela wok. Wanpela yia bihain taim mi gat 20 krismas, mi kirap painim wanpela wok mani. Mi kisim wok bilong draivim ol bikpela trak bilong kisim ol diwai long ples maunten, na mi mekim wok olsem ensinia bilong sip inap olsem 6-pela mun long Alaska. Long yia 1938 mi na susa bilong mi Jean, mipela wok mani long Siatel na mipela stap long wanpela bot long Raunwara Yunion, em bot i gat haus long en. Mama bilong mipela em i stap longwe olsem 80 kilomita samting. Em i kam long wanpela kibung bilong ol Witnes Bilong Siatel long taim bilong san long yia 1938. Ples bilong kibung em i no longwe long ples mipela stap long en, olsem na mipela tokim mama long kam stap wantaim mipela. Em i stap wantaim mipela, na mipela tok orait long go wantaim em long dispela kibung.

Mi Tingim Wok Mi Laik Mekim Bilong Olgeta De Mi Stap Laip

Long dispela kibung, long Sarere apinun, presiden bilong Sosaiti Was Taua, em Joseph F. Rutherford, em i givim wanpela tok: “Ol Manmeri i Laikim Tumas Stretpela Pasin.” Em i toktok long wok painia, olsem mekim wok bilong God long olgeta de. Bihain wanpela brata em i sindaun klostu long mi, em Bill Griffith, em i tok: “Max, em nau. Yumi go mekim wok painia!”

Mi tok: “Em gutpela. Yumi go mekim.” Bill i askim mi: “Ating yu tok pilai, a? Mi bekim tok olsem: “Nogat. Taim mi harim dispela tok, mi save olsem i stret mi mas mekim dispela wok.”

Bill i tok: “Tasol yu no kamap pablisa yet na yu no baptais.”

Mi tok: “Em stret, tasol nau ol i bin mekim wanpela toksave olsem ol manmeri bai kisim baptais long tumora. Mi bai kisim baptais tumora.”

Olsem na mipela amamas tru, na mipela go long Dipatmen Bilong Wok Autim Tok na kisim pepa bilong raitim nem bilong mipela na kirap mekim wok painia. Mipela bungim Brata Van Amburgh long dispela dipatmen, em kuskus bilong lukautim mani bilong Sosaiti. Taim mipela tokim em long ol samting mipela laik mekim, em i kisim mipela i go longwe liklik na toktok wantaim mipela olsem wanpela papa. Em i tok: “Samting yupela i laik mekim em i stret, tasol yupela i no ken amamas nating long mekim o mekim traim tasol na bihain yupela i lusim. Yupela mas mekim dispela wok olsem wanpela wok yupela laik mekim long olgeta de yupela i stap laip.” Dispela tok em i bin helpim mi tru. Olsem na mipela putim aplikesen bilong mipela, na long de bihain, long Jun 5, 1938, mi kisim baptais.

Namba Wan Ples Ol i Makim Mi Bilong Mekim Wok Painia long En

Long de bihain, em Mande, mi tokim bos bilong mi long ples wok bai mi lusim wok na kamap wanpela man bilong autim tok. Long namba wan wik, mi wok long stadi gut long wanpela nupela buk bilong Sosaiti (ol i kolim “Enemies”), na mi go long olgeta miting. Long namba tu wik, mi stadi long narapela nupela buk (em “Riches”). Na long namba tri wik, mi kisim pepa i makim ples mi mas i go mekim wok painia long en, em biktaun Reimon, long Wosington.

Mitupela Bill i go long dispela hap na mipela lukim inap olsem 27 manmeri ol i save mekim miting long haus bilong wanpela Witnes. Sosaiti i tokim mipela long lukautim olgeta miting na helpim ol pablisa na lainim ol long mekim ol Baibel-stadi. Dispela wok bilong mekim Baibel-stadi em nupela wok long dispela taim.

Long Miting Bilong Wok Autim Tok long Fonde, em namba wan miting bilong mipela, mi askim wasman siaman bilong kongrigesen, bipo ol i save kolim wokboi bilong kongrigesen, long kam wantaim mi na traim long kirapim wanpela Baibel-stadi. Em i tok em i gat planti wok. Olsem na mi na Bill mipela yet i go. Taim mipela kam bek, mipela mas sanap na wet i stap long wanpela bikrot, long wanem lain bilong sampela manmeri bipo ol i stap long ami (American Legion) ol i mats i kam. Mipela kirap nogut tru, long wanem man i go pas long ol em wasman siaman bilong kongrigesen.

Long namba wan Sande bilong mipela long dispela kongrigesen, mi kirapim namba wan Baibel-stadi bilong mi wantaim wanpela man. Bihain mi lukautim Stadi Wastaua long kongrigesen, em namba wan taim mi bin mekim dispela wok. Mipela stadi long Wastaua (tok Inglis) bilong Jun 1, 1938, em i kamapim rot bilong bosim wok bilong kongrigesen, olsem God i makim. Inap olsem 27 manmeri i bung, na tripela tasol i orait long dispela nupela rot bilong lukautim kongrigesen.

I Gat Planti Painia long Famili

Mi kirap mekim wok painia na bihain liklik, tupela susa bilong mi na brata bilong mi Norman, ol i kirap mekim wok painia tu. Norman wantaim meri bilong em i gat hap graun ol i wokim gaden long en na lukautim ol bulmakau samting, tasol nau ol i baim i go long ol man na ol i kisim wanpela haus i gat wil, em longpela inap olsem 3.7 mita. Ol i go autim tok wantaim pikinini meri bilong ol, em Joan, em i gat 3-pela krismas. Long yia 1941 ol i wok wantaim kongrigesen long biktaun Reimon, na Norman i raitim pas na tokim mi, dispela 24 manmeri ol i no laikim nupela rot bilong lukautim kongrigesen, ol i bin lusim kongrigesen na i go bung wantaim wanpela lain ol i lusim Jehova pinis. Tasol taim Norman i stap long Reimon, dispela namba wan Baibel-stadi bilong mi em i stap wasman siaman bilong kongrigesen!

Pikinini bilong Norman, em Joan, wantaim man bilong em, Maurice O’Callaghan, ol i mekim wok sekit na raun lukim ol kongrigesen. Ol i bin mekim dispela wok inap olsem 24 yia pinis. Liklik susa bilong mi, em Laverna, em i go long Skul Gileat long yia 1949, long namba 12 klas, na bihain em i mekim wok misineri long Itali. Tasol taim gavman i lukim wok bilong autim tok i kamap strong long Itali, ol i rausim ol misineri, na susa bilong mi i go long Swiselan. Nau em i stap yet long Swiselan wantaim man bilong em.

Mi Gat Laik long Mekim Bikpela Wok Moa

Mi mekim wok painia oltaim inap tupela mun, na bihain ol i makim mi bilong mekim wok painia salim. Wanpela brata, em Warren Henschel, em bikbrata bilong Milton Henschel, em i kam wok wantaim mitupela Bill. Nau Milton em wanpela bilong Lain Bilong Bosim Ol Witnes Bilong Jehova.

Wanpela apinun long namba wan mun mi bin mekim wok painia salim, mi go na lukim Albert Hoffman. Em wasman distrik, na em wantaim meri bilong em Zola i stap long wanpela haus i gat wil. Ol i stap hapsait long rot bilong Haus Kingdom. Bihain long taim bilong Namba 2 Pait, ol man i no gat mani, olsem na ol i save givim kaikai long mipela olsem pe bilong kisim ol buk na nius samting. Long dispela de mi bin kisim wanpela bikpela basket prut, ol i kolim pear, olsem pe bilong kisim ol buk na nius, na mi laik givim sampela long Brata Hoffman. Em i amamas long dispela na em i singautim mi i go insait long haus.

Em i wok long stori long Betel (bipo ol i kolim Baibel Haus ), em hetkota bilong ol Witnes Bilong Jehova i stap long Bruklin Nu Yok. Taim mipela kirap long stori em i olsem 9 klok long nait. Bihain meri bilong em i tok: “Yupela save em i wanem taim nau? Em i 4:30 long moningtaim.” Mipela bin toktok long nait olgeta! Mi go slip long rum bilong mi, em liklik rum antap long Haus Kingdom, tasol pastaim mi raitim pas long Sosaiti na tokim ol mi laik wok long Betel. Taim mi kirap long moningtaim, kwiktaim mi go salim dispela pas.

Long olgeta de mi beten long Jehova na tokim em long dispela samting. Na 3-pela mun bihain, mi amamas long kisim pas long Sosaiti i singautim mi long go long Betel long Bruklin. Taim mi laik i go, mi givim ka bilong mi long susa bilong mi Jean, em wanpela painia salim long dispela taim. Mi kalap long bas na inap 6-pela de na 6-pela nait bas i ran i go. Strongpela win na ren wantaim ais i painim mipela long Montana na long Not na Saut Dakota. Bihain mi kamap long biktaun Nu Yok. Em Janueri 14, 1939.

Wok long Betel

Grant Suiter, em wanpela wokboi long Betel, em i putim nem bilong mi long lista na salim mi i go long faktori bilong lukim Nathan Knorr, em wasman bilong faktori. Namba wan wok bilong mi, em olsem: Mi mas pasim rop long ol bokis bilong ol nius na buk samting long ples ol i salim ol buk na nius i go long ol narapela hap. Long namba 2 wik ol i makim mi bilong wok long wanpela masin bilong wokim ol buk na nius samting. Brata Knorr i tokim mi: “Sapos yu lain long mekim wok long dispela masin insait long 6-pela mun, bai yu kamap man bilong mekim wok long en, long wanem man bilong mekim wok long dispela masin em bai mekim wok long nupela masin.” Mi bin lain long mekim wok long dispela masin na mi amamas tru long mekim dispela wok.

Mi bin wok long hap bilong ol masin bilong wokim ol nius na buk samting inap olsem wan na hap yia, na wanpela de Brata Knorr i kam na tokim mi: “Max, olsem wanem? Yu laik wok long ofis o nogat?”

Na mi tok, “Sori, Brata Knorr, mi no laik mekim dispela kain wok, tasol sapos Sosaiti i tok mi mas wok long ofis, bai mi givim bel long mekim dispela wok.”

Em i bekim tok na tokim mi: “Kam lukim mi long ofis long moningtaim long Mande.”

Kirap long dispela taim na i kam inap long nau, mi bin wok long ofis. Pastaim mi wok olsem namba tu bilong Brata Knorr, na taim Brata Rutherford i dai long Janueri 8, 1942, Brata Knorr i kamap presiden, na ol i mekim mi long kamap wasman bilong faktori. Long dispela taim mi gat 26 krismas na mi bin mekim wok long Betel inap olsem 3-pela yia tasol. Mi pilim olsem dispela em i bikpela wok tru long mi.

Tasol ol brata bilong liklik lain em ol i lukautim ol kain kain dipatmen long Betel, ol i bin helpim mi long pasin sori. Ol i gat pasin daun na ol i helpim gut ol brata long wok bilong ol, na dispela i kirapim mi long laikim tru ol na pilim gutpela pasin bilong ol. Brata Knorr i helpim mi tru na lainim mi gut. Mi wok wantaim em long stretim tok wantaim ol man bilong bisnis bambai mipela inap wokim ol buk na nius samting na wok bilong wokim ol nupela haus samting. Mi wok wantaim Brata Knorr winim 35 yia, inap long em i dai long yia 1977. Em i gat bikpela save long lukautim ol wok na em i helpim mi long inapim wok bilong mi.

Long Ai Bilong Ol Bikman Bilong Gavman

Long Namba 2 Pait pepa i sot, olsem na Sosaiti i hatwok long kisim pepa samting bilong wokim ol nius na buk. Olsem na mi bin go long biktaun Wosington, tupela o tripela taim long olgeta yia bilong bungim sampela lain bilong gavman (War Production Boards, na Senate Committee). Mi askim ol long pepa na ol narapela samting bilong wokim ol nius na buk, na Jehova em i blesim ol hatwok bilong mi.

Bilong kirapim ol long orait long mipela i kisim pepa, wanpela taim mi soim sampela pes bilong ol niuspepa long ol, em ol pes i gat ol piksa na toksave long sampela samting i no bikpela samting. Long nambawan niuspepa bilong Nu Yok, long wanpela pes olgeta ol i putim piksa bilong wanpela longpela saket ol i wokim long gras bilong kapul samting, em bilong grisim ol man long baim. Mi soim dispela long ol dispela lain bilong gavman na mi tokim ol: “Ol pepa ol i mekim wok long en bilong putim ol kain piksa nating olsem long wanpela niuspepa bilong Sande tasol, em inap olsem dispela pepa mipela laik kisim bilong wanpela yia olgeta.”

Wanpela bikman i tok. “Yu kamapim gut tok bilong yu.” Jehova i blesim wok bilong mi, olsem na long taim bilong pait mipela i no sot long pepa na ol narapela samting, na ol masin bilong mipela bilong wokim ol buk na nius i wok i stap. Tasol long dispela taim bipo, mipela no save mekim wok long planti pepa olsem mipela i mekim long nau.

Wokim Sampela Haus Faktori Moa

Inap 12-pela yia paslain long taim mi kam long Betel, Sosaiti i bin wokim namba wan faktori i gat 8-pela plua long 117 Adams Street. Ol i wokim long wanpela hap graun i bikpela inap olsem hap bilong wanpela bikpela blok long biktaun. Long 1949 ol i mas wokim narapela haus faktori na ofis i gat 9-pela plua long narapela hap bilong dispela graun. Olsem na long dispela blok i gat wanpela bikpela faktori i bikpela inap 15,000 skwea mita.

Long dispela taim ol i bin makim mi long lukautim wok bilong wokim ol haus na faktori bilong Sosaiti hia long hetkota. Long dispela taim long Bruklin, mipela i gat wanpela bikpela haus tasol i gat ol ofis na faktori long en, na wanpela haus slip. Tasol nau, olsem 40 yia bihain, mipela i gat 10-pela bikpela haus i gat ol faktori bilong wokim ol buk samting na ol ofis, na 20 haus slip long Bruklin! Na long ol narapela hap tu mipela i gat ol haus faktori na haus ofis na haus slip.

Long 1951 samting mipela laik baim ol haus samting i stap long hap long not hapsait long rot long faktori na ofis bilong 117 Adams Street, tasol papa bilong dispela haus i no orait long pe mipela laik givim bilong baim. Em i no laik toktok wantaim mipela long stretim dispela samting, long wanem em i putim bikpela pe tru na em i ting Sosaiti bai baim dispela graun na haus samting, maski i gat bikpela pe tumas. Olsem na mipela tingting long baim narapela blok long hap bilong is long faktori i stap long Adams Street, hapsait long Pearl Street. I gat olsem 8-pela liklik blok insait long dispela bikpela blok. Mipela mas stretim tok wantaim papa bilong olgeta wan wan liklik blok, tasol Jehova i opim rot na mipela kisim olgeta dispela 8-pela liklik blok insait wanpela yia tasol na pe em olsem K97 long wanpela skwea mita tasol!

Long dispela graun long 77 Sands Street, long 1955 na 1956, Sosaiti i wokim faktori bilong ol i gat 13-pela plua long en. Dispela em namba 2 faktori bilong mipela, na nau ples bilong wokim ol buk samting i go bikpela inap dabol, na em inap olsem 33,000 skwea mita samting. Tasol oganaisesen i wok long i go bikpela, na mipela i save, liklik taim bihain mipela mas i gat sampela haus faktori moa. Olsem na long yia 1958, mipela baim faktori mipela i stap long en long nau, em i stap long kona bilong Prospect Street na Pearl Road na mipela putim sampela samting i stap long en, olsem bakstua.

Mipela laik wokim bris antap long rot i go long ol narapela haus faktori, tasol bilong mekim olsem mipela mas baim dispela hap graun long not em bipo mipela laik baim. Mipela save olsem sapos Sosaiti i laik baim dispela graun, papa bilong graun bai putim pe i go antap moa. Olsem na mipela tok wantaim wanpela man i wok bisnis long baim ol haus i go na baim i kam, na mipela tokim em long baim dispela graun. Em i stretim tok wantaim papa bilong graun na ol i wanbel long pe bilong graun, na pe bilong graun i liklik tru long pe papa bilong en i bin kolim long mipela long pastaim. Bihain ol i raitim nem bilong Sosaiti Wastaua em i olsem papa bilong dispela graun, na taim papa bilong en bilong pastaim em i save long dispela, em i belhat tru.

Long yia 1966 na 1967 mipela wokim wanpela haus faktori i gat 10-pela plua long en na i bikpela inap olsem 21,000 skwea mita. Nau mipela i gat 4-pela blok i gat haus faktori long en na i gat bris antap long rot bilong i go i kam long ol dispela haus. Bihain, olsem long yia 1983 na 1986, mipela baim tupela haus faktori i stap hapsait long rot long saut, na mipela wokim bris i longpela inap 49 mita antap long rot. Dispela bris i go long ol narapela 4-pela faktori bilong mipela. Ol dispela 6-pela haus faktori i gat bris bilong i go i kam long en na ol dispela haus i bikpela inap olsem 95,000 skwea mita. Long yia 1983 mipela bin baim narapela traipela haus, i bikpela inap olsem 93,000 skwea mita. Dispela haus i stap long Furnam Street, arere long wara, klostu liklik long ol narapela haus faktori bilong mipela. Nau mipela putim ol buk na nius long dispela haus bilong salim i go long ol narapela hap long sip.

Kisim Haus Ofis

Narapela wok mi mekim bilong baim ol haus, em mi stretim rot bambai Sosaiti i ken baim ol 10-pela haus ofis bilong wanpela kampani bilong wokim ol marasin (Squibb Pharmaceuticals). Taim Sosaiti i baim pinis ol dispela haus, ol i brukim 4-pela na sanapim nupela haus na ol i skruim dispela haus long wanpela haus i stap pinis, na dispela i kamap olsem namba wan ofis bilong Sosaiti Wastaua. Atres bilong dispela ofis i olsem 25 Columbia Heights. Orait, nau mi ken stori long ol samting mi bin mekim bilong stretim rot bambai ol i ken baim ol dispela haus.

Wok bilong mipela long wokim ol buk na nius i go bikpela na long yia 1969 mipela wok long painim sampela haus faktori moa bilong mekim wok bilong mipela. Mi go long ol bisnis i gat haus faktori long dispela hap bilong mipela, tasol long dispela taim ol bisnis i wok gut na i no gat wanpela i laik givim haus faktori bilong mipela i baim.

Long dispela taim Sosaiti i salim mi i go long Not Karolaina bilong toktok wantaim kampani i wokim pepa mipela save baim bilong wokim ol Baibel. Taim mi stap long haus faktori bilong ol mi toktok wantaim wanpela wokman na mi tokim em, Sosaiti i sot long ol haus faktori na ol i wok long painim wanpela long Bruklin. Brata bilong dispela man em i gutpela pren bilong wanpela papa bilong ol dispela haus bilong kampani Squibb long Bruklin. Olsem na em i toktok wantaim brata bilong em na brata bilong em i toktok wantaim dispela bos bilong kampani na em i tok, taim mi go bek long Bruklin mi mas telefon na toktok wantaim dispela bos bilong kampani.

Taim mi go bek mi mekim olsem, na em i tok, tru kampani i laik baim ol dispela haus bilong ol long Bruklin i go long ol man, long wanem kampani i laik lusim biktaun. Em i tok, taim ol i redi long lusim ol dispela haus bai em i telefon long mi na mitupela i ken stretim tok long baim ol dispela haus. Sampela mun bihain em i telefon na tokim mi ol i redi pinis long baim ol dispela haus i go long mipela, na mi mas go long ofis bilong ol long tumora.

Mi tupela Brata Knorr i bung wantaim na stretim tok long pe Sosaiti i laik givim long ol bilong baim ol dispela haus. Tasol taim mipela miting wantaim ol long tumora ol i tok, ol i makim pinis pe na mipela i no ken toktok wantaim ol bilong senisim. Ol i tok, “Yupela mas givim mani stret inap olsem 3 milion dola.” Mipela i bosim gut skin bambai ol i no ken save mipela i kirap nogut long dispela pe, long wanem dispela pe ol i kolim i liklik tru long pe mipela i bin tingting long givim long ol. Olsem na kwiktaim Sosaiti i baim. Long dispela taim, nau tasol mipela wokim pinis nupela haus faktori em pe bilong en inap olsem 4 milion dola, tasol taim lain bilong Bikpela ol i harim tok olsem Sosaiti i laik kisim sampela mani moa bambai ol i ken baim ol dispela narapela haus, kwiktaim ol i wokim rot bambai Sosaiti i kisim mani inap long ol i baim.

Sampela Haus Slip Moa

Namel long 1950 na 1959 Sosaiti i bin baim sampela haus i stap klostu long haus bilong Sosaiti long 124 Columbia Heights. Ol dispela haus i stap long hapsait bilong rot. Long yia 1959 na 1960 Sosaiti i sanapim bikpela nupela haus slip long dispela hap. Tasol kirap long yia 1965 i hatwok long Sosaiti i sanapim ol nupela haus slip long dispela hap, long wanem gavman i makim dispela hap em Betel i stap long en i olsem wanpela olpela hap tru bilong biktaun Nu Yok na ol i no laik bai ol man i sanapim ol nupela haus long dispela hap o wokim ol olpela haus i kamap narapela kain. Ol i laik bai ol haus long dispela hap i mas i stap olsem long pastaim. Tasol Jehova i helpim Sosaiti na mipela i kisim ol haus slip inap long mipela.

Long yia 1967 mipela laik sanapim wanpela haus slip long 119 Columbia Heights, em haus i gat 6-pela plua. Pastaim mipela laik sanapim haus i gat 12-pela plua, tasol kaunsil i tambuim ol man long wokim haus i antap tumas, olsem na mipela i tok long wokim haus i gat 6-pela plua tasol. Tasol kaunsil i strong long mipela mas wokim haus i gat 5-pela plua tasol.

Long mun Jun mi toktok wantaim presiden bilong kaunsil bilong Bruklin na em i tok, sapos mipela i putim pinis as bilong haus paslain long taim lain bilong skelim dispela samting i miting long Septemba, orait bai em i tokim ol olsem ol i mas orait long mipela i sanapim haus i gat 6-pela plua. Lain bilong mipela bilong wokim haus ol i wok strong, na ol i putim pinis as bilong haus paslain long Septemba.

Presiden bilong kaunsil i telefon long mi na toktok wantaim mi long de paslain long taim ol i makim bilong toktok long dispela samting bilong mipela long ai bilong ol manmeri. Em i tok mipela mas kam long Haus Kaunsil inap olsem tupela aua paslain long taim lain bilong skelim dispela samting i kirapim miting bilong ol. Em i laik bai mipela i bung wantaim em pastaim. Olsem na Brata Knorr wantaim Brata Grant Suiter, em kuskus bilong lukautim mani bilong Sosaiti, na mi, mitripela i go long Haus Kaunsil long moningtaim tru. Mipela i toktok wantaim em long gutpela rot bilong stori long Kaunsil bambai ol i ken orait long haus mipela i laik wokim. Mipela i toktok i stap na nau wanpela samting bilong pasim rot i kamap ples klia, em wanpela lo bilong Komiti Bilong Biktaun, em ol i gat wok long bosim wanem kain haus ol man i ken wokim long biktaun Nu Yok. Mipela telefon long dispela Komiti bambai mipela i ken save gut olsem dispela inap pasim rot bilong mipela o nogat, na bos bilong dispela Komiti, olsem Komisina, i tok em yet bai kam stretim tok. Em i tok, “Mi save, bai planti man i gat tok long dispela haus yupela i laik wokim, olsem na mi yet bai mi stap olsem maus bilong Sosaiti Wastaua na toktok wantaim lain bilong Kaunsil.”

Mipela i amamas tru long Komisina yet i laik helpim mipela. Taim lain bilong Kaunsil i bung bilong harim tok bilong ol manmeri i gat tok long sampela haus ol man i laik sanapim, ol i save wokim miting olsem: Pastaim ol i kolim nem bilong ol lain i laik wokim haus na Kaunsil i laik stretim tok long en long dispela de. Sapos wanpela man i gat tok long wanpela haus ol man i laik wokim, orait ol i surikim taim bilong skelim dispela i go long apinun. Sapos ol man i no gat tok, orait ol i skelim long dispela taim stret na tokaut olsem man i ken wokim haus o nogat. Ol i kolim mipela pastaim tru long moningtaim, na Komisina i kirap na em i tokim nambawan kaunsil: “Mi laik mekim ol tok olsem maus bilong Sosaiti Wastaua.”

Nambawan kaunsil i tok: “Yu save pinis, mipela i no save wok long stretim tok long moningtaim taim mipela kolim nem long pastaim [ol i save mekim dispela long apinun], tasol Komisina, mi save yu gat planti wok, olsem na long dispela taim mipela orait long yu kamapim ol tok nau long moningtaim.” Komisina i kirap na stori gut long wok mipela i laik mekim na olgeta long dispela Lain Bilong Skelim ol i orait long dispela wok. Mipela i lusim dispela rum i go ausait na nau loya bilong ol lain i gat tok long dispela haus mipela i laik wokim em i ran i kam. Em i singaut strong na em i tok: “Mi gat planti tok mi laik kamapim inap wanpela aua samting bilong pasim dispela lain long wokim dispela haus!” Sori tumas, em i lus! Ol i orait pinis long mipela. Mipela wokabaut i go tasol na tenkyu long Jehova, long wanem em i bin helpim mipela long win.

Mi amamas tru long ol dispela wok mi bin mekim olsem maus bilong Sosaiti long sampela wok bilong baim haus na wokim haus samting. Na mi amamas tru long lukim wok bilong autim tok i go bikpela long olgeta hap bilong graun na long dispela as tasol mipela i mas kisim olgeta dispela nupela haus. Wanpela samting i bin helpim mi long mekim gut ol dispela wok em olsem: Long Janueri 1, 1977 ol i bin makim mi i stap namba tu long presiden bilong Sosaiti Wastaua bilong Nu Yok.

Mi Amamas long Mekim Wok long Betel

Taim mi kam nupela long Betel long yia 1938, lain bilong Betel ol inap olsem 185 tasol. Tasol nau dispela lain i go bikpela na inap olsem 2,800 samting ol i save wok long Betel long Bruklin, na 900 ol i wok long ol gaden bilong Sosaiti (Watchtower Farms)! Planti taim ol brata i save askim mi: “Wanem samting i bin helpim yu na yu stap longtaim long Betel, inap olsem 50 yia?” Mi save bekim tok olsem: “Mi no bin tingting long mekim narapela wok; mi laik wok long Betel tasol.”

Na tu, taim mi raitim pepa na tok mi laik wok long Betel, wanpela askim long dispela pepa i olsem: “Yu orait long i stap long Betel inap long Bikpela yet i tekewe yu long dispela wok?” Mi bin sainim nem bilong mi long dispela pepa na orait long dispela tok. Bikpela i no tekewe mi long dispela wok, olsem na mi stap yet long Betel na amamas long mekim ol wok bilong Jehova. Kirap long taim mi dediket long God, mi pasim tok long bel olsem mi laik mekim wok bilong God long olgeta de mi stap laip.

Taim mi nupela long Betel i no gat rot long mipela i marit na i stap long Betel, olsem na mi stap singel wankain olsem planti narapela brata sista long Betel, na mi amamas long i stap singel na mekim wok long Betel. Tasol bihain, ol i stretim rot na ol i orait long mipela ol lain bilong Betel i marit na wok yet long Betel. Olsem na long Epril 7, 1956 mi maritim Helen Lapshanski. Em i bin kam wok long Betel kirap long yia 1951. Mitupela i poroman gut wantaim na narapela i helpim gut narapela na mitupela i pilim tru dispela gutpela pasin bilong marit.

Mitupela i marit pinis na i no longtaim na wanpela sik (multiple sclerosis) i painim Helen. Long dispela taim nau dispela sik i bagarapim em moa yet na em i no inap wokabaut gut. Tasol em i gat wanpela samting bilong holim na helpim em long wokabaut, na em i gat wilsia i gat bateri na em inap raun. Maski dispela hevi i painim em, em i save amamas na em i wok long Betel long olgeta de. Em i save wok long ofis i lukautim Haus Betel.

Taim mi yangpela yet, mi pas tru wantaim susa bilong mi Jean. Mitupela i save poroman wantaim long mekim olgeta samting. Olsem na em i laik bihainim mi na wok long Betel. Long yia 1943 ol i singautim em i kam wok long Betel. Long yia 1952 em i maritim Russell Mock na tupela i wok yet wantaim mipela hia long Betel. Mi bilip tru olsem Betel em i nambawan gutpela ples bilong i stap long en taim Paradais i no kamap yet long graun. I no gat wanpela taim mi bel hevi long mi bin mekim wok bilong God long olgeta de. Mi bin kisim bikpela amamas tru long lukim lain bilong Jehova long graun i kamap bikpela tru! Mi tingting strong long Jehova i mas helpim mi na bai mi inap i stap yet long Betel na givim bel olgeta long mekim ol wok bilong helpim wok bilong Kingdom.

[Rait long pes 30]

“Mi bilip tru olsem Betel em i nambawan gutpela ples bilong i stap long en taim Paradais i no kamap yet long graun”

[Ol Piksa long pes 24, 25]

Antap: Haus long 360 Furman Street, em Sosaiti i baim long 1983

Daunbilo: Haus long Columbia Heights em Sosaiti i baim long Kampani Squibb long 1969

Han Kais: Brata Knorr i bin helpim mi na lainim mi gut

Daunbilo: I kam inap long 1986 na mipela i gat 6-pela haus faktori i gat 6-pela haus faktori i gat bris antap long rot bilong go i kam long ol dispela haus

[Piksa long pes 27]

Haus faktori taim mipela skruim i go bikpela long 1949

[Piksa long pes 30]

Piksa bilong mitupela long de mitupela i marit