God i Save Tingim Yumi!
PASIN bilong God long stretim dispela pasin bikhet i bin kirap long gaden Iden i soim olsem em i laikim tru yumi wan wan na em i tingim i stap bilong yumi long bihain. Plis tingim ol dispela tok hia i kamapim long ples klia olsem God i save tingim yumi, na ritim long Baibel bilong yu yet ol dispela skripsa ol i putim daunbilo.
● Em i givim graun long yumi. Graun em i luk naispela tru, i gat ol narapela narapela kain animal i stap, na graun i save kamapim gutpela kaikai.—Aposel 14:17; Rom 1:20.
● Em i givim wanpela gutpela bodi long yumi. Bodi i mekim na yumi inap kisim amamas long ol samting yumi mekim long olgeta de, olsem pilim swit bilong gutpela kaikai, lukim san i go daun, harim pikinini i lap, na pilim narapela husat yumi laikim tumas i holim yumi.—Song 139:14.
● Em i givim gutpela tok bilong stiaim yumi na helpim yumi long winim o karim ol hevi i painim yumi.—Song 19:7, 8; 119:105; Aisaia 48:17, 18.
● Em i givim gutpela hop long yumi, olsem yumi inap i stap long wanpela paradais hia long graun na lukim ol manmeri yumi laikim tumas i kirap bek long matmat.—Luk 23:43, Nupela Testamen na Ol Sam; Jon 5:28, 29.
● Em i bin salim dispela wanpela Pikinini bilong em i kam bilong i dai bilong helpim yumi na bai yumi inap kisim laip i stap gut oltaim oltaim.—Jon 3:16.
● Em i kamapim Kingdom Bilong Mesaia long heven na em i mekim planti samting i soim olsem klostu nau Kingdom bai bosim dispela graun olgeta.—Aisaia 9:6, 7; Matyu 24:3, 4, 7; KTH 11:15; 12:10.
● Em i singautim yumi long beten long em, kamapim bel bilong yumi long em, na taim yumi mekim olsem yumi save em i save harim olgeta beten bilong yumi.—Song 62:8; 1 Jon 5:14, 15.
● Planti taim em i tokim ol man bilong graun olsem em laikim ol tru na em i save tingim ol.—1 Jon 4:9, 10, 19.