Mekim Nogut Long Ol Meri—Wanpela Hevi Long Olgeta Hap
NOVEMBA 25, em Intenesenel De Bilong Pinisim Pasin Bilong Mekim Nogut Long Ol Meri. Long 1999, Jeneral Asembli Bilong Yunaitet Nesen i makim dispela de bilong kirapim olgeta manmeri long tingim olsem ol man i save bagarapim ol raits bilong ol meri. Bilong wanem ol i mas makim wanpela de olsem?
Planti lain i save tingim ol meri olsem ol i samting nating, na pasin bilong tingting nogut long ol i strong tru. Long olgeta taim ol man i save mekim kain kain pasin nogut long ol meri, na long ol kantri we ol man i gat gutpela sindaun tu. Kofi Annan, bipo em i Seketeri-Jeneral Bilong Yunaitet Nesen, em i tok “pasin bilong mekim nogut long ol meri i stap long olgeta hap, na i save kamap namel long ol lain bilong olgeta kain sindaun na ples. Dispela i save bagarapim ol meri bilong olgeta kain skin, lain, sindaun, na namba samting.”
Radhika Coomaraswamy, bipo em i Spesel Ripota Bilong Komisen Bilong Human Raits Bilong Yunaitet Nesen, em i kamapim ol ripot long pasin bilong mekim nogut long ol meri na em i tok planti meri i ting dispela em i samting yumi no ken “toktok long en, em samting i stap hait na samting bilong sem long en.” Wanpela lain long Holan i kamapim ripot long pasin bilong mekim nogut long ol meri na ol i tok, inap 23 pesen bilong ol meri long wanpela kantri long Saut Amerika, olsem wanpela long olgeta 4-pela 4-pela meri, i kisim sampela bagarap insait long famili. Na tu, Kaunsil Bilong Yurop i kamapim olsem wanpela long olgeta 4-pela 4-pela meri long Yurop i save kisim bagarap insait long famili. Wanpela dipatmen bilong gavman long Inglan (British Home Office) i tok, long Inglan na Wels insait long wanpela yia i no longtaim i go pinis, inap 2-pela meri (averes) long olgeta wan wan wik i dai long han bilong man ol i stap wantaim em long nau o man bipo ol i bin stap wantaim em. Nius India Today International i tok, “long olgeta hap bilong India, oltaim ol meri i save pret long ol man inap reipim ol long kain kain ples, long rot, long pablik ples, na long kain kain taim.” Lain Amnesty International i tok pasin bilong mekim nogut long ol meri na ol gels long nau, em i “wanpela bikpela hevi bilong ol human raits long olgeta hap.”
Yu ting ol ripot nau yumi stori long en i kamapim tingting bilong God long ol meri? Bai yumi skelim dispela askim long stori i kamap bihain long dispela.