Ol Meri—Ol Man i Save Tingim Gut Ol?
ATING sampela man i kirap nogut long dispela askim na ol i ting, wanem samting i mekim na dispela askim i kamap? Taim yumi skelim ol samting i kamap long ol meri long olgeta hap, kirap long bipo tru na i kam inap long nau, sampela askim i ken helpim yumi long save, bilong wanem sampela man i no save tingim gut ol meri.
Taim yumi tingim olgeta manmeri, husat i save kisim planti hevi—man o meri? Na husat i save bosim strong narapela—man o meri? Na long marit, planti taim husat i paitim narapela na em i kisim bagarap—man o meri? Long gutpela taim na long taim bilong pait, ol man i bin bagarapim husat, olsem repim ol—man o meri? Taim man o meri i mekim pasin sem long pikinini, planti bilong ol dispela pikinini i pikinini man o pikinini meri? Sampela gavman i tok sampela i no inap vot. Husat i no inap—man o meri? Na husat ol lain i no gat planti ol inap long go long skul—man o meri?
Na yumi inap kamapim planti askim moa. Long buk bilong em, wanpela meri i tokaut long samting em i bin lukim long India, na em i tok: ‘Long India i gat 4 handet milion meri na pikinini meri. Na long olgeta wan handet wan handet bilong ol dispela meri, 75 i save stap long ples. Ol i gat laik long rit rait, tasol ol i no gat rot long lain. Wan wan taim tasol ol dispela meri i save lusim as ples, na taim ol i lusim, ol i no go longwe—inap olsem 30 kilomita tasol.’ Dispela hevi long India, olsem man i skul na meri nogat, i no save stap long India tasol, em i stap long planti kantri.—Buk May You Be the Mother of a Hundred Sons.
Long Japan na planti kantri moa, ol man i save skul gut na meri nogat. Wanpela buk bilong 1991, (The Asahi Yearbook) i tok, 1,460,000 man i save go long yunivesiti na 600,000 meri tasol. Ating long olgeta hap ol meri inap tokaut olsem, em i no hatwok long man i skul gut, tasol em i hatwok tru long meri. Long planti kantri ol i save ting, ‘skul em i bilong ol pikinini man tasol.’
Long buk bilong em (Backlash—The Undeclared War Against American Women) Susan Faludi i bin kamapim sampela bikpela askim olsem: ‘Sapos ol meri Amerika i wankain long ol man Amerika, bilong wanem planti meri i stap rabis? Bilong wanem planti ol i no gat gutpela haus? Bilong wanem ol i no kisim liklik mani long gavman bilong helpim ol taim ol i sik, o taim ol i pinis long wok?’
Tru tumas, planti taim em ol meri i save kisim ol hevi, ol man nogat. Ol man i save toknogutim ol, na mekim nogut long ol, na mekim pasin sem long ol. Na yumi no ken ting ol dispela kain pasin i kamap long ol kantri i no gat planti wok bisnis long en tasol, nogat. Wanpela lain (U.S. Senate Judiciary Committee) i kamapim wanpela ripot long ol samting nogut tru i painim ol meri long Amerika. Dispela ripot i tok: ‘Long olgeta 6-pela 6-pela minit, man i repim meri; long olgeta 15 15 sekon, man i paitim meri. I no gat wanpela meri long dispela kantri i no inap kisim wanpela bikpela hevi. Long olgeta 4-pela 4-pela meri Amerika i stap laip long nau, 3-pela bai kisim wanpela bilong ol dispela bikpela hevi.’ Long wanpela yia i gat klostu 4 milion meri i bin kisim bikpela hevi long man bilong ol, olsem man i paitim ol o mekim narapela samting nogut long ol. Dispela samting i mekim na gavman bilong Amerika i kamapim ol lo bilong helpim ol meri sapos man bilong ol i bagarapim ol.—Senate Report, “The Violence Against Women Act of 1990.”
Long olgeta hap planti man i no save tingim gut ol meri na nau ai yumi stori long dispela samting. Bihain long tupela stori moa bai yumi toktok long olsem wanem man i ken tingim gut meri, na meri i ken tingim gut man.