Nius i Kam Long Olgeta Hap

◼ “Ol Saina i sot tru long ol nem. . . . Wanpela wok painimaut long 2006 i kamapim olsem long 1.4 bilion manmeri long Saina, 85 pesen bilong ol i gat 100 famili nem tasol.”​​—⁠CHINA DAILY, CHINA.

◼ Taim ol i skelim raun bilong ol ka na motobaik, “planti man moa i save dai long motobaik, winim 32 taim ol man i save dai long ka.”​​—⁠UC BERKELEY WELLNESS LETTER, U.S.A.

◼ Long olgeta 100 100 man long Amerika, inap 90 ol i gat gan, olsem na Amerika i namba wan kantri long ol man i holim planti gan. Kantri i “namba tu long holim gan,” em India. Long olgeta 100 100 man, “4-pela tasol i gat gan.”​​—⁠TIME, U.S.A.

◼ Wanpela mama long Miami long Florida, Amerika, i karim bebi i gat 21 wik na 6-pela de, hevi bilong bebi em 283.5 gram tasol, na “ating em namba wan bebi i bin bon hariap olsem, na em i no dai.” “Ol bebi em mama i karim ol paslain long 23 wik na hevi bilong ol i no winim 400 gram, ol dokta i tok ol i no inap i stap laip.”​​—⁠REUTERS NEWS SERVICE, U.S.A.

Planti Man i Sakim Lo

Nius The Times bilong London i tok: “Dispela tingting olsem ‘planti man i save bihainim lo,’ dispela tingting i no stret. . . . Planti man bilong Briten i tok ol i save bihainim tasol ol lo em ol i gat laik long bihainim na long taim ol i gat laik long bihainim.” Wok painimaut bilong wanpela lain (Centre for Crime and Justice Studies) long King’s College, London, i kamapim olsem planti man i sakim lo em ol man ol narapela i save rispek long ol. Long ol man em ol i givim askim long ol, inap 33 pesen i tok ol i save baim ol samting long rot we ol i ken abrusim takis, na narapela 33 pesen i tok taim man i popaia na givim bikpela mani long ol, ol i no save givim bek hap mani, na 20 pesen i tok ol i save stil long ples wok. Dispela wok painimaut i ‘kamapim klia olsem klostu olgeta manmeri i save sakim lo, na i no ol raskol tasol.’

Ol i Painim Ol Olpela Bun

Lain Reuters long Cherskiy, Sakha, long Rasia, i tok: “Long hap not tru bilong Saibiria, . . . hat bilong san i mekim na strongpela ais i wok long kamap olsem wara na bun bilong ol animal bilong bipo bipo i kamap ples klia. Em ol animal i kain olsem elefan, raino, na laion.” Sampela lain i redi long tromoi bikpela mani tru long baim ol bun i no bagarap tumas, olsem na ol asples i save raun bilong painim kain bun olsem. Lain Reuters i tok moa: “Ais i wok long bruk na lus hariap, olsem na long sampela hap planti bun i kamap ples klia.”

Ol i Tingim Ol Animal Pastaim

Nius The Sydney Morning Herald i stori long wanpela wok painimaut ol i mekim long Intenet na i tok: “Wanpela long olgeta 4-pela 4-pela Australia ol i tok, ol animal bilong ol i namba wan long famili, winim poroman marit o papamama bilong ol.” Wanpela kampani long Australia bilong helpim ol man long bosim gut mani bilong ol, i kisim save olsem wanpela long olgeta 3-pela 3-pela man i save “lusim bikpela hap taim na mani long lukautim animal bilong ol, winim helt bilong ol yet.” Sampela samting ol i tromoi mani long en bilong lukautim helt bilong animal bilong ol, em eksre, operesen, marasin kimoterapi, na rausim lewa samting i bagarap na putim lewa bilong narapela animal long em.