Nius i Kam Long Olgeta Hap

“Mobail fon inap pasim ol man long toktok long narapela narapela—13 pesen bilong ol man i gat mobail fon, ol i save giaman long toktok long fon na bai ol narapela i no ken toktok long ol.”—PEW RESEARCH CENTER, AMERIKA.

Wanpela ripot i tok long taim bilong san insait long 5-pela yia i go pinis, bikpela ais i karamapim solwara Aktik i wok long melt na i go liklik.—BBC NEWS, BRITEN.

“Inap 47 pesen bilong ol hap graun bilong Afrika i stap nating na i no gat gaden long en.”—THE WITNESS, SAUT AFRIKA.

Populesen bilong ol manmeri long graun i go antap winim 7 bilion long 2011, tasol “long 1999 em inap olsem 6 bilion.”—HARVARD SCHOOL OF PUBLIC HEALTH, AMERIKA.

Weda i Senis Senis, Em Nomol Samting Nau

Nau long Amerika weda i wok long senis i go nogut moa. Pastaim ol weda we ol man i save pret tru long en—olsem bikpela tait wara, taim bilong bikpela san we i kilim i dai ol kaikai na sampela man tu, na bikpela ais i pundaun—nau em i olsem nomol samting. Long wanpela bung em lain Union of Concerned Scientists i kamapim, Saientis Katharine Hayhoe, long Texas Tech University, i tokim ol wanwok olsem: “Yumi lain pinis long sampela weda, tasol planti weda i kamap long nau em yumi no lain long en.” Ol dispela saientis i ting ol samting ol man i mekim i as na ol weda long olgeta hap i senis senis na i go nogut moa.

Insait Long Ol Olpela Pilo

Saveman Art Tucker bilong St. Barts Haus Sik long London i tok ol pilo yu putim insait long ol klinpela pilo keis, “ol i pulap long ol samting nogut.” Nius The Times bilong London, i stori long wok painimaut bilong dispela man na i tok taim yu yusim pilo inap 2-pela yia pinis, insait bilong en bai i pulap long “ol liklik binatang ol i kolim das mait—em yumi no inap lukim—em sampela i laip yet na sampela i dai pinis, pekpek bilong ol, ol liklik hap drai skin bilong man, na ol binatang jem.” Hevi bilong ol dispela samting em 33 pesen long hevi bilong pilo yet. Ol das mait na ol binatang jem i save stap long ol pilo. Wanem rot bilong rausim ol? Nius The Times i tok: ‘Ol das mait na binatang jem i save dai taim san i kukim ol, olsem na pasin bilong putim pilo na matres long san i gutpela rot bilong kilim ol i dai.’ Sop i no inap kilim i dai ol binatang, tasol sapos yu wasim long wara i hat, olsem 60 digri Selsias, dispela bai kilim planti bilong ol i dai.