Wanpela Saveman Bilong Pilaim Piano i Stori Long Bilip Bilong Em

Hau na yu kamap saveman bilong pilaim musik?

Papamama bilong mi i save gut long pilaim piano. Ol i skulim mi taim mi gat 5-pela krismas. Bihain, mi stadi long wanpela skul bilong musik long Tashkent.

Wanem ol hatwok bilong pilaim musik long okestra?

Olgeta okestra i no wankain. Ol i olsem ol traipela musik instramen em ol kondakta i save kontrolim. Hatwok bilong wanpela man tasol i pilaim wanpela instramen em long lukluk long kondakta na traim long bihainim em. Em olsem toktok namel long tupela pren we tupela i rispektim aidia bilong narapela narapela. Planti taim, yu bai mekim wanpela o tupela traim tasol bilong bihainim gut kondakta.

Yu save lusim hamas taim bilong prektis?

Mi save lusim 3-pela aua long wanpela de long prektisim ol hap bilong musik i hatwok long pilaim. Na tu, mi stadi long ol hap bilong musik em mi bai pilaim, maski mi no pilaim dispela musik. Narapela samting em mi save harim ol musik bilong man i raitim dispela musik mi bai pilaim, bambai mi ken kliagut long musik mi laik pilaim.

Wanem samting inap makim olsem man i save gut long pilaim piano?

Save bilong em long mekim saun bilong piano i krai gut tru olsem wanpela singsing. Mi laik stori long dispela. Piano em instramen we yu mas presim ol ki bilong en wantaim pinga bilong yu. Taim yu pilaim wanpela not, saun bilong en bai i go pinis hariap, em i no wankain long ol win instramen o vois bilong man we saun i ken stap longpela taim na i go antap moa. Hatwok bilong ol man bilong pilaim piano em long mekim saun i stap longpela taim. Ol i yusim gut han bilong ol na muvim ol pinga hariap long presim ol ki bilong piano, na wankain taim ol i yusim lek long presim pedal bilong piano bilong mekim musik i krai longpela taim. Taim ol i save gut hau long mekim olsem, ol inap mekim piano i krai olsem saun bilong flut, horn, o wanpela okestra. Na tu, ol inap mekim saun bilong en i kamap olsem nambawan instramen tru, em vois bilong ol man.

I klia olsem yu laikim tru musik.

Long mi yet, musik i olsem wanpela tokples we i kamapim stret ol tingting na ol filings we i hatwok long tokim ol narapela long en.

Wanem samting i kirapim yu long kisim save long God?

Mipela i gat planti buk long haus em papa i kisim i kam long Moscow. Wanpela buk mi laikim i gat stori bilong Baibel long ol samting i bin kamap long bipo na long ol samting i bin painim lain Israel. Narapela buk mi laikim em buk Yu Inap i Stap Oltaim long Paradais long Graun em ol Witnes Bilong Jehova i wokim.a Mi kirap nogut long dispela buk i kamapim klia ol tok bilong Baibel. Taim mi muv i go long Spen long 1991 long stadim musik, mi kisim tu dispela buk i go wantaim mi na ritim planti taim. Mi kisim save long wanpela bilip i stret na ol tok i tru i as bilong en na i no tingting bilong ol man i as bilong en.

Wanpela bilip i bin kirapim tru laik bilong mi, em dispela tok promis bilong Baibel long ol man inap i stap laip oltaim long graun. Dispela tok i stret olgeta! Long dispela taim mi no bungim yet ol Witnes Bilong Jehova. Tasol mi tingting strong olsem taim mi bungim ol, bai mi askim ol long stadi Baibel wantaim mi.

Yu bungim ol Witnes olsem wanem?

Sampela de bihain long mi mekim dispela disisen, mi lukim tupela meri em tupela wantaim i holim Baibel long han. Mi tingting, ‘Ol i luk olsem dispela lain em mi bin ritim stori bilong ol long buk bilong mi. Ol i autim tok wankain olsem ol Kristen long taim bilong ol man i bin raitim Baibel.’ I no longtaim, mi kirap stadi Baibel wantaim wanpela Witnes. Nau, mi amamas tru long helpim ol narapela long kisim save long Man Bilong Wokim yumi.

Wanem samting i kirapim yu long bilip long Krieta maski bipo yu no bilip long God?

Musik yet i kirapim mi long bilip. Klostu olgeta man i save amamas long harim musik, em samting ol animal i no inap mekim. Musik i save kamapim amamas, pasin bilong bilip long yu yet, pasin sori, na klostu olgeta narapela pasin em man i save pilim long bel na tingting. Taim yumi harim musik, dispela i save mekim sampela samting long bel na tingting bilong yumi. Tasol yu ting yumi nidim musik bilong i stap laip? Yu ting musik i givim strong long ol samting i ken stap laip olsem ol tisa bilong evolusen i tok? Nogat. Long tingting bilong mi, i no stret long ting olsem kru bilong man i kamap long rot bilong evolusen—kru bilong yumi i helpim yumi long pilaim musik na amamas long harim ol musik olsem bilong Mozart na Beethoven em ol saveman bilong mekim musik. Dispela i kamapim klia olsem wanpela Man i gat savetingting na pasin laikim i wokim kru bilong yumi.

Wanem samting i kirapim yu long bilip olsem Baibel i kam long God?

Baibel i gat 66 liklik buk long en em 40 narapela narapela man i bin raitim insait long 1,600 yia. Mi askim mi yet, ‘Husat tru inap bungim rait bilong ol man we ol tok bilong en i stret wantaim?’ God tasol inap mekim olsem. Long tingting bilong mi, ol buk insait long Baibel i stap stret long ples bilong en, i gat ol sapta na ol ves, na ol tok bilong en i gat strong bilong helpim olgeta kain man.