Musik God i Amamas Long En

Sampela i tok musik i “stap longpela taim tru na i winim ol narapela samting ol man i bin wokim bilong kisim amamas long en olsem ol gutpela piksa samting.” Musik i wankain olsem pasin bilong toktok, em wanpela gutpela presen i kamapim klia olsem man i narapela kain tru long ol animal. Musik i save kirapim bel. Musik inap amamasim yau bilong man, na musik inap stap longpela taim long tingting, na bikpela samting tru, musik inap amamasim God.

OLSEM Baibel i kamapim, ol Israel ol i lain bilong wokim musik. Wanpela dikseneri bilong Baibel (Unger’s Bible Dictionary) i tok musik i olsem “bikpela samting tru long taim bilong ol man i bin raitim Baibel.” Em pasin bilong ol long wokim sampela musik long taim bilong lotu, em musik ol i wokim long gita samting na musik ol i kamapim long rot bilong singsing. Tasol planti taim em ol singsing bilong ol man i bikpela samting moa long bung bilong ol long lotu.

Taim ol i no wokim yet bikpela bung bilong makim olsem ol i wokim pinis tempel bilong Solomon, papa bilong em King Devit i bin makim sampela bilong ol lain Livai “bilong bosim wok bilong mekim musik” long haus lotu sel. (1 Stori 6:​31, 32) Taim ol i kisim Bokis Kontrak i kam long Jerusalem​—⁠em i makim olsem Jehova i stap namel long ol​—⁠Devit i bin makim sampela bilong lain Livai long “beten na tok tenkyu long God na litimampim nem bilong en.” Ol i singsing na mekim wok long “ol gita . . . ol plet bras . . . [na ol] biugel.” Ol dispela man Devit i bin makim i “singim song bilong tok tenkyu long Bikpela . . .[long wanem] ‘oltaim Bikpela i save laikim yumi moa yet.’ ”​—⁠1 Stori 16:​4-6, 41; 25:⁠1.

Dispela singsing “Oltaim oltaim [Jehova] i save laikim yumi moa yet,” em i stap planti taim long Buk Song, em i wanpela buk bilong Baibel i gat planti singsing long en. Olsem: Dispela tok i stap long namba tu hap bilong olgeta 26 ves long Song 136. Wanpela saveman bilong Baibel i tok: “Dispela tok i sotpela na em i isi long kolim, na taim ol man i harim, ol inap long tingim.”

Ol het-tok bilong Buk Song i makim olsem planti ol i save mekim wok long ol gita samting bilong kamapim musik. Buk Song 150 i tok ol i mekim wok long biugel, plet bras, na kundu, wantaim ol gita samting. Tasol tok i stap long dispela Song i makim olsem singsing i kamap long nek bilong man i bikpela samting moa long ol. Ves 6 i tokim ol man olsem: “Yupela olgeta samting i gat laip, litimapim nem bilong Bikpela! [Yupela] litimapim nem bilong Bikpela!”

Long rot bilong musik man inap kamapim bel bilong em, olsem na long taim bilong ol man i bin raitim Baibel, ol hevi i bin kirapim ol man long kamapim singsing bilong sori. Tasol i no gat planti singsing bilong sori long ol singsing bilong lain Israel. Wanpela buk i kamapim insait bilong ol tok i stap long Baibel (Insight on the Scripturesa) i tok: “Long ol singsing bilong sori tasol ol bai kolim ol tok planti taim long wankain nek, na ol i no bihainim pasin bilong ol gutpela singsing o pasin bilong senisim nek long taim bilong toktok.”

Long nait paslain long em i dai, Jisas wantaim ol gutpela aposel bilong em i bin mekim ol Song Halel bilong litimapim nem bilong Jehova. (Song 113 -118) Tru tumas, ol dispela singsing i bin strongim bel bilong ol aposel na helpim ol long stap strong taim Jisas i no stap moa wantaim ol! Na i no dispela tasol​—⁠pasin bilong kolim dispela tok, “oltaim oltaim em i save laikim yumi tumas,” inap 5-pela taim i bin strongim ol long stap gut yet long Jehova, em Nambawan King bilong heven na graun.​—⁠Song 118:​1-4, 29.

Ol Kristen bilong pastaim long Efesus na Kolosi ol i singsing long “ol song bilong Buk Song” (em ol singsing bilong litimapim nem bilong God). Na tu, ol i mekim “ol arapela song bilong lotu” long bel bilong ol. (Efesus 5:19; Kolosi 3:16) Long rot bilong toktok na singsing ol i mekim wok long maus bilong ol bilong litimapim nem bilong God. Jisas yet i bin tok olsem: “Man em i save autim kain tingting i pulap long bel bilong en.”​—⁠Matyu 12:⁠34.

Musik God i No Laikim

Baibel i stori long sampela musik God i no amamas long en. Tingim samting i bin kamap long maunten Sainai, long dispela taim God i givim ol lo wantaim Tenpela Lo long Moses. Taim Moses i kam daun long maunten, em i harim wanem samting? Em i no harim “singaut bilong ol man i winim pait,” o “krai bilong ol man i lus long pait,” nogat; em i “harim nek bilong singsing tasol.” Em singsing ol i mekim bilong lotuim god giaman, em dispela pasin i kirapim belhat bilong God na 3,000 bilong ol lain i insait long dispela singsing ol i dai.​—⁠Kisim Bek 32:​18, 25-28.

Tru, ol man inap kamapim sampela singsing, na wokim sampela musik na amamas long ol kain kain musik, tasol yumi no ken ting God i amamas long olgeta musik ol man i kamapim. Bilong wanem? Pol, em wanpela aposel Kristen, em i tok olsem: “Yumi olgeta man yumi bin mekim sin.” (Rom 3:23) Bikpela tok bilong planti ol singsing na musik bilong bipo i olsem, pasin ol haiden i mekim bilong lotuim ol god giaman bilong kamapim planti pikinini, na dispela bilip olsem man i gat tewel i no save dai, na pasin bilong lotuim Maria olsem “mama bilong God.” Tasol ol dispela kain bilip na pasin kranki ol man i wokim i daunim nem bilong God bilong tok i tru, long wanem, dispela ol samting i no stret wantaim ol tok God i bin kamapim long Baibel.​—⁠Lo 18:​10-12; Esekiel 18:4; Luk 1:​35, 38.

Makim Ol Musik i Stret Long Harim

I gat planti musik tumas, olsem na i hatwok liklik long makim musik i stret long harim. Ol i wokim ol karamap bilong ol CD bilong kirapim ol man long baim ol kain kain musik. Tasol sapos man bilong lotuim God i laik amamasim Em, dispela man bai tingting gut taim em i baim sampela musik. Long dispela rot em bai abrusim ol singsing o musik i stori long sampela bilip giaman bilong lotu o long pasin pamuk o long wok bilong ol spirit nogut.

Albert, bipo em i wanpela misineri Kristen long Afrika, i tok olsem wan wan taim tasol rot i op bilong pilaim piano taim em i stap long Afrika. Tasol planti taim em i pilaim sampela musik em i bin karim i kam long ples bilong em. Long nau Albert i stap long as ples bilong em na mekim wok olsem wasman bilong raun na lukim ol kongrigesen Kristen. Em i no gat bikpela hap taim bilong harim ol musik. Em i tok olsem: “Man mi save laikim tru ol musik bilong em, em Beethoven. Inap long planti yia mi wok long kisim na bungim ol musik bilong em.” Albert i kisim bikpela amamas long harim ol dispela musik. Tru, olgeta man wan wan i gat laik bilong em yet long wanem kain musik em i laikim, tasol yumi ol Kristen i tingim dispela tok bilong Pol: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.”​​—⁠1 Korin 10:⁠31.

Musik na Dediket

Long pastaim yet musik i stap olsem nambawan samting Susie i gat bikpela laik long en. Em yet i tok olsem: “Taim mi gat 6-pela krismas, mi kirap pilaim piano, na taim mi gat 10-pela krismas mi pilaim vaiolin, na taim mi gat 12-pela krismas mi pilaim harp.” Sampela yia bihain, Susie i go long wanpela skul koles (Royal College of Music) long Landon, Inglan, bilong skul moa long pilaim harp. Inap 4-pela yia wanpela meri i gat nem long pilaim harp i skulim Susie, na bihain Susie i skul wanpela yia long skul bilong lain long musik long Paris. Em i kisim namba long bikpela save bilong em long musik wantaim sampela setifiket long pasin bilong em long pilaim harp na em i kisim ol setifiket i tok olsem em i gat save long skulim ol narapela long piano.

Susie i kirap na bung wantaim wanpela kongrigesen bilong ol Witnes Bilong Jehova long Landon. Taim em i bung wantaim ol dispela lain, em i lukim pasin bilong ol long tingim ol narapela na pasin sori i stap namel long ol. Isi isi pasin bilong laikim tumas Jehova i kamap strong moa na em i gat bikpela laik long mekim wok bilong Em, na dispela i kirapim Susie long stretim ol samting na bai em inap mekim ol dispela wok. Dispela laik i kirapim em long dediket na baptais. Susie i tok olsem: “Taim musik i stap olsem wok bilong yu, i olsem yu dediket long en, olsem na mi save pinis long pasin bilong dediket long wanpela samting.” Bilong bihainim tok bilong Jisas, Susie i mekim wok Kristen na autim tok long gutnius bilong Kingdom, olsem na em i no gat bikpela hap taim moa long wokim ol musik long ol bikpela bung olsem long bipo.​—⁠Matyu 24:14; Mak 13:⁠10.

Long nau Susie i no save mekim wok bilong em long pilaim musik planti taim olsem pastaim em i bin mekim, olsem na em i gat wanem tingting long dispela samting? Em i tok: “Sampela taim mi bel hevi liklik, long wanem, mi no gat bikpela hap taim moa bilong wokim musik, tasol mi save amamas long musik na mi save wokim yet ol musik. Musik i olsem presen i kam long Jehova. Nau mi save kisim bikpela amamas moa long musik, long wanem, mi wok long tingim laik bilong Jehova pastaim.”​—⁠Matyu 6:⁠33.

Musik Bilong Givim Biknem Long God

Albert na Susie wantaim 6 milion ol narapela Witnes Bilong Jehova i save givim biknem long God Jehova long rot bilong musik. Long ol miting Kristen i save kamap long ol Haus Kingdom long 234 kantri, sapos ol inap ol Witnes i save kirapim na pinisim ol miting wantaim ol singsing bilong givim biknem long Jehova. Ol i bihainim pasin bilong kamapim ol gutpela singsing i gat ol tok bilong Baibel long en bilong givim biknem long Jehova.

Olgeta lain i stap long miting i save singsing strong olsem Jehova em i God bilong tingim tru yumi (Singsing 44). Ol i mekim singsing bilong litimapim nem bilong Jehova (Singsing 190). Ol singsing i kamapim ol tok i stori long pasin bilong stap amamas wantaim ol brata sista Kristen, na wok bilong bihainim pasin Kristen long i stap bilong ol. Musik bilong ol dispela singsing i gutpela na i gat kain kain stail bilong em, long wanem, dispela musik ol i raitim i kam long ol kantri olsem Esia, Ostrelia, Yurop, Not na Saut Amerika.b

Kirap bilong wanpela singsing bilong man i raitim song bilong litimapim King i olsem: “Yupela i mas singim nupela song long Bikpela. Yupela olgeta manmeri bilong graun i mas singim song bilong Bikpela. Singim song long Bikpela. Litimapim nem bilong en.” Na dispela singsing i tok moa olsem: “Long olgeta de yupela i mas tokaut olsem, Bikpela i save kisim bek ol manmeri. Yupela i mas tokim olgeta lain manmeri long biknem bilong em na long ol gutpela gutpela wok em i bin mekim.” (Song 96:​1-3) Ol Witnes Bilong Jehova i save mekim dispela wok long hap yu stap long en, na ol i laik kirapim yu long mekim olsem. Ol bai amamas sapos yu kam na bung wantaim ol bilong lain long litimapim nem bilong Jehova long ol musik em i save amamas long en.

[Ol Futnot]

[Piksa long pes 28]

Ol i mekim singsing bilong litimapim nem bilong Jehova