King Devit na Musik

I GAT wanpela nem i save kirapim yumi long tingim ol musik long taim bilong ol man i bin raitim Baibel, em nem bilong Devit. Devit em i wanpela gutpela man i bin i stap olsem 3,000 yia i go pinis. Planti stori bilong musik bilong bipo em yumi save long en, ol dispela stori i stap long Baibel, em ol stori bilong ol wok Devit i bin mekim​—kirap long taim em i stap yangpela wasman bilong ol sipsip na i go inap long taim em i kamap king na man bilong bosim wok.

Long ol stori bilong Devit, yumi inap lainim planti samting long ol musik long taim bilong ol man i bin raitim Baibel. Olsem: Ol i save pilaim wanem kain ol samting bilong mekim musik? Na ol i singim wanem kain ol song? Musik i gat wanem wok long laip bilong Devit, na moa yet, long lain Israel?

Wok Bilong Musik Long Israel Bilong Bipo

Taim yumi kolim ol tok bilong wanpela singsing, planti taim yumi save tingim nek bilong dispela singsing. Baibel i gat ol tok bilong planti song em yumi no save long nek bilong ol. Ating ol i naispela singsing tru, na tu, i kirapim tru bel. Ol gutpela tok i stap long Buk Song i kamapim olsem musik bilong en tu i nambawan tru.

Long sait bilong ol samting bilong mekim musik, Baibel i stori liklik tasol long en. (Lukim blok “Ol Samting Bilong Mekim Musik Long Bipo.”) Olsem na ol man i no save long wanem kain gita stret em Devit i bin yusim. Tasol ol Israel i bin kamapim sampela samting bilong mekim musik, olsem wanpela kain naispela gita ol i bin wokim long diwai.​—2 Stori 9:11; Amos 6:5.

Musik i bikpela samting long ol Hibru, na moa yet long taim ol i mekim lotu long God. Ol i save mekim musik long taim ol i mekim man i kamap king, taim ol i mekim ol bung bilong lotu, na long taim bilong woa. Na tu, musik i amamasim lain insait long haus king, amamasim ol manmeri long ol weding na long ol bung bilong ol famili, na i mekim bel bilong ol manmeri i stap isi long taim bilong kisim ol pikinini wain na wit samting i mau pinis. Tasol sori tru, ol i save mekim musik tu long ol ples nogut. Na taim man i dai, musik i mekim gut bel bilong ol man i krai sore.

Long Israel, musik i mekim ol narapela samting tu. Em i redim tingting bilong ol profet na ol i redi long kisim ol tok i kam long God. Taim naispela krai bilong gita i kamap, Elisa i kisim tok i kam long Jehova. (2 King 3:15) Ol i pilaim musik tu bilong makim sampela bikpela de long yia. Ol i winim tupela silva trampet bilong toksave long ol nupela mun na ol narapela bikpela de. Long namba 50 yia, ol i save winim biugel bilong makim olsem ol man i wok kalabus ol i kamap fri, ol papa graun i kisim bek graun bilong ol, na ol papa bilong haus i kisim bek ol haus bilong ol. Man! Ol man i stap rabis ol i mas amamas tru taim ol i harim krai bilong biugel i toksave long ol i kamap fri na ol inap kisim bek ol samting bilong ol!​—Wok Pris 25:9; Namba 10:10.

Sampela Israel ol i saveman tru bilong mekim musik na singsing. Long wanpela piksa bilong Asiria em ol i bin katim long ston, piksa i soim olsem King Senakerip i tokim King Hesekia long givim pe long em, dispela pe em sampela man na meri bilong pilaim musik. I luk olsem ol i nambawan lain stret bilong mekim musik. Tasol Devit i winim tru olgeta dispela lain long mekim musik.

Hapman Bilong Mekim Musik

Devit em i hapman tru bilong pilaim musik na raitim ol naispela stori. Em i raitim planti song moa, winim ol arapela man. Taim em i mangi yet, em i save lukautim ol sipsip na lukim ol naispela ples na diwai samting bilong Betlehem na em i save pilim tru na putim gut long tingting. Em i save amamas long harim pairap bilong ol liklik wara i ron na krai bilong ol pikinini sipsip taim ol i harim nek bilong em. Bel bilong em i pilim tru ol naispela pairap bilong ol samting em i lukim, na dispela i kirapim em long kisim gita bilong em na mekim singsing bilong litimapim nem bilong God. Man! Ol man i harim musik em Devit i bin raitim long Song 23, bel bilong ol i pilim tru!

Taim em i yangpela man yet, em i save gut tru long paitim gita, olsem na ol man i tokim King Sol long em na Sol i kisim em i kam wok long em. Taim Sol i tingting planti na em i no stap isi, Devit i go long em na mekim naispela musik tru long gita bilong em na mekim bel bilong king i stap isi. Olsem na ol tingting nogut na belhat bilong Sol i pinis.​—1 Samuel 16:16.

Ol musik em Devit i save laikim tumas na i amamasim em, sampela taim ol dispela musik i kamapim ol hevi. Wanpela taim, Devit na Sol i go pait wantaim ol Filistia na ol i winim pait na kam bek, na king i harim ol meri i singsing bilong amamas long ol Israel i winim pait. Ol meri i singsing olsem: “Sol i kilim planti tausen man. Na Devit i kilim planti planti tausen.” Sol i harim ol dispela tok na em i belhat nogut tru na “stat long dispela de Sol i ting long dispela samting na i bel nogut long Devit.”​—1 Samuel 18:​7-9.

Musik i Kirapim Em

Ol dispela singsing em God i stiaim Devit long raitim, ol i gutpela tru. Long ol singsing bilong em, em i singsing long ol samting em i save tingim tingim long bel na ol gutpela ples em i save lukautim ol sipsip long en. Singsing bilong em i kolim ol gutpela tok bilong litimapim nem bilong God na i kolim tu stori bilong ol samting i bin kamap bipo, taim bilong amamas long kisim pikinini wain i mau, bung bilong dediketim haus king, taim ol i tingim bek ol samting bilong bipo, taim ol i wetim gutpela taim bai kamap, na taim ol i krai na askim God long helpim ol. (Lukim Song 32, 23, 145, 8, 30, 38, 72, 51, 86 na ol tok i go pas.) Taim Sol na pikinini bilong em Jonatan i dai, Devit i raitim wanpela singsing sore na em i kolim olsem “Song Bilong Banara,” na long kirap bilong en i gat tok olsem “Ol nambawan man bilong yumi Israel, ol i bin i dai long ol maunten.” Dispela singsing i gat sore nek. Long rot bilong ol tok na musik em i pilaim long gita bilong em, Devit i save gut long kamapim ol samting em i pilim long bel.​—2 Samuel 1:​17-19.

Devit em i man bilong amamas, na em i laikim ol musik i gat naispela pairap bilong en na i mekim man i amamas. Taim em i kisim Bokis Kontrak i go long Saion, em i kalap kalap na danis bilong amamas long dispela bikpela de. Stori bilong Baibel i kamapim olsem dispela musik i kirapim tru bel bilong em. Yu inap piksaim long tingting samting i kamap? Dispela i mekim na meri bilong em Mikal i sutim tok long em. Tasol Devit i no wari long dispela. Em i laikim tru Jehova, na dispela musik i mekim em i amamas tru, na i kirapim em long danis long ai bilong God bilong em.​—2 Samuel 6:​14, 16, 21.

Maski Devit i mekim olgeta dispela samting, em i kamapim yet ol nupela nupela samting bilong mekim musik. (2 Stori 7:6) Devit i saveman bilong mekim kain kain samting, man bilong wokim ol samting bilong mekim musik, raitim ol naispela stori, raitim ol singsing, na man bilong singsing na paitim gita samting. Tasol Devit i mekim ol wok i bikpela moa.

Singsing na Musik Long Tempel

Wanpela samting Devit i bin mekim, em i stretim wok bilong mekim singsing na musik long haus bilong Jehova. Em i putim Asap, Heman, na Jedutun (narapela nem bilong em Etan) olsem hetman bilong ol 4,000 man bilong singsing na bilong mekim musik. Devit i bungim ol wantaim ol 288 man em ol i save gut tru long singsing na ol i save skulim na bosim grup olgeta. Ol 4,000 man bilong singsing na mekim musik, olgeta i stap long tempel long taim bilong mekim 3-pela bikpela bung bilong lotu i save kamap long olgeta yia. Tingim naispela nek tru bilong dispela bikpela lain i mekim kwaia!​—1 Stori 23:5; 25:​1, 6, 7.

Long tempel, ol man tasol i save singsing. Dispela hap tok “Yangpela meri,” long tok i go pas long Song 46, em i makim krai bilong nek o bilong gita samting em i antap, olsem soprano. Ol i bungim nek na mekim kwaia, olsem yumi lukim long tok i stap long 2 Stori 5:​11-13: “Ol man bilong singim song . . . i save mekim naispela song tru, na i kamap olsem wanpela nek stret.” Ating ol dispela song ol i naispela singsing tru, olsem long Song 3 na planti ol narapela song bilong Devit, na tu, sampela taim i gat ol sotpela tok bilong singsing em taim ol i singim ol i mas kolim gen wankain tok planti taim, olsem dispela song long Song 42:​5, 11 na Song 43:5. Ol man i save laikim tumas kain pasin bilong singsing we i gat wanpela man o i gat tupela lain insait long kwaia i singsing, na wanpela lain i kirap singsing i go pas na bihain narapela lain i kirap singsing bihainim ol, na ol i mekim olsem i go i go. Ol i mekim olsem long Song 24, em Devit i bin raitim dispela singsing bilong mekim long taim em i bringim Bokis Kontrak i kam long Saion.​—2 Samuel 6:​11-17.

Tasol i no olsem ol Livai tasol i mas singsing, nogat. Ol manmeri i bin singsing taim ol i wokabaut i go antap long Jerusalem bilong mekim ol bikpela bung bilong lotu i save kamap long olgeta yia. Olsem na ating dispela tok “Song bilong ol lain i wokabaut i go long ples bilong lotu,” i makim dispela pasin. (Song 120 i go long Song 134) Long Song 133, Devit i litimapim dispela pasin bilong i stap brata brata namel long ol Israel long dispela taim. Long namba wan ves em i tok: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.” Long tingting bilong yu, traim long piksaim musik bilong dispela singsing!

Musik na Mekim Lotu Long Jehova

Ol kain singsing olsem i stap long sampela hap tasol bilong Baibel, na Buk Song i kirapim olgeta man long singim ol song bilong litimapim nem bilong God. (Song 150) Musik i gat strong inap long mekim man i lusim tingting long ol hevi bilong em, na singsing i olsem marasin bilong mekim gut bel bilong man em bel bilong em i bagarap tru. Na tu, Baibel i tok ol manmeri i amamas, ol i mas singim ol song.​—Jems 5:13.

Singsing em i wanpela samting we man inap kamapim klia bilip na pasin bilong em long laikim God. Long nait paslain long ol i kilim i dai Jisas, em na ol aposel bilong em i kaikai pinis na ol i mekim wanpela singsing. (Matyu 26:30) Man! Tingim naispela strongpela nek bilong dispela Pikinini Bilong Devit, husat i bin save long gutpela singsing tru i kamap long heven bilong litimapim nem bilong God! Ating ol i bin singim ol song i litimapim nem bilong God, em long tok Hibru, ol i kolim olsem ol Song Halel, long Song 113 i go Song 118. Sapos olsem, taim Jisas i singsing wantaim ol aposel​—ol aposel i no save long wanem bikpela samting bai kamap liklik taim​—ating Jisas i singsing strong tru olsem: “Bikpela i save harim singaut bilong mi. Olsem na mi laikim em tumas. Tru tumas, em i save harim beten bilong mi. . . . Dai i olsem rop i pasim mi. Mi tingting long ples bilong ol man i dai pinis, na dispela i mekim mi . . . wari moa yet. . . . ‘Bikpela, mi singaut bai yu kisim bek mi, nogut mi dai.’ ”​—Song 116:​1-4.

Musik i no samting em ol man yet i kamapim, nogat. Baibel i stori long musik na singsing i kamap long heven, i olsem ol ensel i paitim ol gita na mekim singsing long ai bilong sia king bilong Jehova. (KTH 5:9; 14:3; 15:​2, 3) God Jehovah i givim musik long ol man, em i putim pasin bilong laikim musik insait long bel bilong ol, olsem na long rot bilong paitim gita o singsing, ol inap kamapim ol samting ol i pilim long bel. Long ol bilipman, musik i olsem gutpela presen i kam long God.​—Jems 1:17.

[Rait long pes 27]

“[Long taim bilong amamas na] long ol bikpela de bilong lotu, . . . yupela i maswinim biugel.”​—NAMBA 10:10

[Rait long pes 28]

“Bikpela em i wasman bilong mi. Olsem na mi no inap sot long wanpela samting. Em i mekim mi i slip long gutpela gras. Na em i bringim mi i go long ol liklik wara na mi dring na mi malolo.”​—SONG 23:​1, 2

[Rait long pes 29]

“Devit i tok olsem, ‘. . . 4,000 i mas mekim musik bilong litimapim nem bilong Bikpela. Mi bin wokim ol kain kain samting bilong mekim musik, na ol i ken kisim ol dispela samting na mekim musik long en.’ ”​—1 STORI 23:​4, 5

[Rait long pes 29]

Long ol tok na musik, Devit i kamapim ol samting em i pilim long bel

[Rait long pes 30]

“Litimapim nem bilong God. . . . Paitim kundu na mekim singsing na litimapim nem bilong en. . . . Yupela olgeta samting i gat laip, litimapim nem bilong Bikpela!”​—SONG 150:​1, 4, 6

[Blok/Piksa long pes 28]

Ol Samting Bilong Mekim Musik Long Bipo

I gat kain kain samting bilong mekim musik, olsem lute, harp, na ol kain kain samting i gat string long en. (Song 92:​3, NW) Ol i mas tiunim krai bilong en i go antap, olsem soprano, na i go daun liklik, olsem alto. (1 Stori 15:​17-21) I gat ol plet bras na ol samting bilong mekim musik em ol i save winim long maus, olsem ol beg paip, flut, biugel, na ol trampet, em ol i save “winim” strong. (2 Stori 7:6; 1 Samuel 10:​5, NW; Song 150:​3, 4, NW) Long taim ol i dediketim tempel, ol man bilong winim biugel na ol man bilong singsing i mekim naispela song tru, na “i kamap olsem wanpela nek stret.” (2 Stori 5:​11-13) Dispela i makim olsem olgeta man i singsing long wanpela nek tasol na nek i no krai narapela narapela. I gat ol samting bilong mekim musik olsem dram, na tambarin, na tu, i gat ‘ol kain kain samting bilong mekim musik ol i bin wokim long diwai pain.’ I gat ol plet bras tu​—“krai” bilong ol liklik plet bras i naispela tru na ol bikpela plet bras i save pairap strong.​—2 Samuel 6:5; Song 150:5.

[Ol Piksa]

Antap: Piksa ol i katim long Banis Ston Bilong Taitus long Rom, Itali, i makim ol biugel em ol i bin kisim long tempel long Jerusalem long yia 70 C.E. Koins bilong yia 130 C.E. samting, i gat piksa bilong ol samting bilong ol Juda long mekim musik

[Kredit Lain]

Coins: © 2007 by David Hendin. All rights reserved.