Namba Wan Renbo

YU SAVE long namba wan samting Noa i mekim taim em na famili bilong em i lusim sip na i kam ausait? Em i mekim ofa long God. Long dispela piksa daunbilo, yu inap lukim em i mekim olsem. Noa i givim sampela animal olsem ofa bilong tenkyu long God long lukautim famili bilong em na Bikpela Tait i no bin bagarapim ol.

Yu ting Jehova i amamas long dispela ofa? Yes, em i amamas. Olsem na em i tok promis long Noa olsem em i no inap bagarapim gen dispela graun long rot bilong tait wara.

Wara i pinis long graun na Noa na famili bilong em ol i lusim sip na kirapim gen nupela sindaun bilong ol. God i blesim ol na i tokim ol: ‘Yupela i mas kamapim planti pikinini na ol i mas i go pulap long olgeta hap bilong graun.’

Tasol bihain, taim ol man i harim stori bilong dispela Bikpela Tait, nogut ol bai pret long bikpela tait olsem i kamap gen. Olsem na God i putim wanpela samting bilong helpim ol man long tingim gen tok promis bilong em long em i no inap kamapim gen bikpela tait wara. Yu save long wanem samting em i bin putim? Em i putim renbo.

Planti taim yumi ken lukim renbo taim ren i pinis na san i lait. Renbo i gat planti naispela kala. Yu lukim pinis wanpela renbo? Yu lukim renbo long dispela piksa?

God i tok: ‘Mi promis olsem mi no ken salim gen bikpela tait i kam na bagarapim ol man na ol animal. Mi putim renbo bilong mi long klaut. Taim renbo i kamap, mi bai lukim na tingim dispela promis bilong mi.’

Olsem na taim yu lukim wanpela renbo, yu mas tingim wanem samting? Yes, yu mas tingim tok promis bilong God olsem em i no inap bagarapim graun gen long rot bilong bikpela tait.