Sapta 4
I Stap Bilong Ol Man i Abrusim Bagarap
TAIM bikpela “de bilong Jehova” i kamap, bai ol man i pret, tasol dispela “de” i no ken bagarapim graun olgeta na bai ol man i no inap sindaun moa long en, olsem pait nuklia inap mekim. Sapos pait nuklia i kamap, dispela bai bagarapim ol diwai samting na bai ol dispela samting i no inap mekim moa wok bilong en long helpim ol man long i stap laip, na win nogut bilong ol bom nuklia bai kukim nogut skin bilong ol man i stap laip yet. Tasol God i no ken bagarapim graun olsem na bai ol man i no inap i stap long en. Nogat. Em bai “bagarapim ol man i bin bagarapim graun!”—Joel 2:30, 31, NW; Revelesen 11:18.
2 Ol gutpela wokman bilong Jehova ol i bilip tru olsem Jehova inap lukautim ol maski wanem kain strong em i mas mekim wok long en bilong bagarapim ol man nogut. Ol i save, taim Jehova “i mekim hatpela ston wantaim paia” i kam daun na bagarapim ol man nogut bilong Sodom na Gomora, ol ensel bilong Jehova i bin lukautim Lot wantaim tupela pikinini meri bilong em na ol i no bagarap. (Jenesis 19:15-17, 24-26) Na ol i save, taim ensel bilong Jehova i bagarapim ol namba wan pikinini bilong ol Isip long taim bilong Moses, ensel i kalapim haus bilong ol Isrel, em ol i bin penim blut bilong sipsip bilong Pasova long en. (Eksodas 12:21-29) Olsem tasol long bikpela bagarap em bai kamap long taim bilong “bikpela hevi tru,” bai Jehova i lukautim ol man i hait long em.—Sam 91:1, 2, 14-16; Aisaia 26:20.
3 Tru, taim dispela bikpela bagarap i kamap, skin bilong ol man Jehova i bin kilim ol i dai bai slip nabaut long graun. Tasol God i save long ol samting bilong helpim ol man ol i stap laip yet na bai sik i no ken kisim ol. Em i tok, em bai singautim ol pisin na ol animal bilong bus i kam long “bikpela kaikai bilong God” na bai ol i kaikai skin bilong ol dispela man i dai pinis. (Revelesen 19:17, 18; Esikiel 39:17-20) Ol hap skin samting ol pisin na animal i no kaikai, em Jehova bai pinisim long narapela rot. Orait, nau ol samting God i laik mekim long graun, olsem em i bin tok long Iden, ol dispela samting bai wok long kamap tru.
LAIK BILONG GOD LONG PASTAIM I KAMAPIM PLES KLIA WANEM SAMTING?
4 Gutpela sindaun Jehova i givim long namba wan man na meri long Iden i makim gutpela sindaun ol man inap kisim bihain long taim bilong “bikpela hevi tru.” Taim God i redim dispela graun bambai ol man i ken i stap long en, em i wokim kain kain diwai sayor samting, na ol pis na pisin na animal. “Yawe God i wokim wanpela gaden i stap long Iden, long hap bilong sankamap. Na long dispela gaden God i putim dispela man em i wokim pinis.” (Jenesis 2:8) Tasol God i no wokim paradais long olgeta hap bilong graun na lukautim olsem wanpela gutpela ples ol man i ken i stap long en. Nogat. God i mekim gut tru long namba wan man na meri na em i givim wok long tupela. Em i givim wok long ol, em ol inap mekim long save bilong ol na kisim amamas long en. Bai ol i no i stap nating tasol. God i givim gutpela wok tru long ol—ol i ken kamapim ol pikinini i bihainim gutpela pasin bilong God, na ol i ken skruim Paradais i go i go inapim olgeta hap bilong graun, na ol i ken lukautim olgeta narapela samting i stap laip long graun! Sapos Adam tupela Iv i wok long bihainim tok bilong Jehova, em i King bilong ol, bai tupela i no ken i dai. Tupela inap i stap gutpela olgeta na i stap oltaim oltaim long graun.—Jenesis 1:26-28; 2:16, 17.
5 Tru, taim “bikpela hevi tru” i pinis bai graun i no i stap gutpela ples olsem Iden bipo. Tasol laik bilong God long pastaim i mas kamap long graun; em i no ken senisim dispela laik bilong em. Paradais i mas kamap long olgeta hap bilong graun. Bai ol man i kisim wok bilong lukautim dispela graun, na bai ol i wanbel long lotuim God tru. Bai ol i gat rot bilong i stap oltaim oltaim na bai ol i ken i stap fri tru olsem ol pikinini bilong God.—Luk 23:42, 43; Revelesen 21:3, 4; Rom 8:20, 21.
6 Pastaim ol i mas rausim olgeta pipia bilong olpela pasin na klinim graun. Ol samting bilong pait bai ol i wokim i kamap samting bilong wokim gaden o mekim ol narapela wok bilong gutaim. (Esikiel 39:8-10; lukim tu Maika 4:3.) Kaikai i stap yet long ol gaden nabaut, em bai helpim ol man i abrusim bagarap na ol i ken kisim na kaikai. Orait, bihain ol i ken planim nupela gaden na kisim kaikai bilong en na bai wanpela tok promis i kamap tru, olsem: “Planti gutpela kaikai i kamap pinis long graun bilong mipela. God, em i God bilong mipela, em i bin mekim gut tru long mipela.” (Sam 67:6; lukim tu Diuteronomi 28:8.) Olgeta samting bilong olpela pasin i brukim ol man na kirapim ol long tingim ol yet tasol, ol dispela samting bai pinis, na bai i no gat wanpela man i hangre na em i mas slip nating. Nogat tru.—Sam 72:16.
7 Olgeta manmeri i stap long dispela taim, em ol manmeri i pilim tru olsem Jehova yet i mas bosim na lukautim ol. God bai mekim olsem long gutpela savepasin na pasin sori. Dispela man Jehova i makim em bilong i stap King bilong graun, em Pikinini bilong em yet, Krais Jisas. Baibel i tok, long rot bilong Krais Jisas God i bin wokim graun na olgeta samting i stap laip long en. (Kolosi 1:15-17) Dispela Pikinini bilong God i save moa long helpim ol samting long i stap laip long graun, na em i laikim tumas ol man.—Provep 8:30, 31.
8 Na bikpela samting tru em olsem: Pikinini bilong God i stap gut long wok king bilong Jehova. Baibel i tok profet long Jisas, olsem: “Spirit bilong Jehova i mas i kam i stap long em, bilong givim save na tingting long em, em spirit bilong givim gutpela tok na strong long em, em spirit bilong givim save long em na bilong mekim em i pret na i stap aninit long Jehova; na bai em i amamas long pret na i stap aninit long Jehova.” (Aisaia 11:2, 3, NW) Bai em i helpim lain bilong em long graun na bai ol tu i amamas long bihainim ol lo bilong Jehova. Ol man i abrusim bagarap na i stap long graun aninit long King Krais Jisas, bai ol i kisim gutpela sindaun, em dispela kain sindaun God i laik givim long olgeta man taim em i putim namba wan man na meri long Iden.
WOK BILONG JISAS I KAMAPIM PLES KLIA WANEM SAMTING?
9 Tasol bilong kisim gutpela sindaun olsem, ol samting nogut sin i mekim long yumi i mas tekewe long yumi. Yumi olgeta i bin kisim sin long Adam. Adam i no bihainim lo bilong Bikpela King Jehova; em i bikhet. Olsem na skin na tingting bilong em i no i stap gutpela moa. Sin i bagarapim skin na tingting bilong man long kain kain rot. Em i givim sik long ol man, na kain kain bagarap long skin, na i putim tingting nogut long bel bilong man na dispela i kirapim man long tingting kranki na mekim tok kranki na pasin kranki. Orait, bihain sin i kamapim dai. (Rom 5:12; 6:23) Taim Jisas i stap long graun, em i mekim planti strongpela wok na ol dispela mirakel i kamapim long ples klia ol samting em bai mekim bilong helpim ol man i stap aninit long Kingdom bilong God.
10 Tasol sampela man i kaunim ol gutpela stori bilong Baibel long ol mirakel bilong Jisas na ol i no bilip. Bilong wanem ol i no bilip? Long wanem, nau long dispela taim planti man i no bilip. Ol dispela man i no bilip, ating ol i pilim olsem sapos ol saveman bilong saiens inap mekim wankain strongpela wok o kamapim as bilong ol dispela mirakel, orait bai ol i bilip. Tasol bilong wanem ol saveman bilong saiens i wok yet long tromoi bikpela mani na bikpela hap taim bilong ol bilong kisim save? Long wanem i gat planti samting ol i no save yet long en. Tasol sapos yumi laik bilip long ol strongpela wok Jisas i bin mekim long graun, yumi mas bilip olsem em i bin mekim long strong bilong God.
11 Long yia 33 C.E. aposel Pita i autim tok long bikpela lain man long Jerusalem na em i stori long Jisas, em i tok: “Yupela yet i save long ol strongpela wok na ol kain mirakel God i bin wokim namel long yupela long han bilong dispela man.” (Aposel 2:22) Olsem Pita i tok ol dispela mirakel em “ol strongpela wok,” ol narapela man i no inap mekim wankain wok o kamapim as bilong en. Ol dispela mirakel i kamapim long ples klia olsem strong bilong God i mekim wok long rot bilong Jisas, na Jisas em i Krais tru, Pikinini bilong God yet. Ol dispela mirakel i olsem mak bilong ol gutpela samting Jisas bai mekim bihain.
12 Kaunim Gutnius long Baibel, em Matyu na Mak na Luk na Jon i raitim, na tingim dispela samting, olsem: Ol mirakel Jisas i wokim i olsem piksa bilong ol samting em bai mekim bilong helpim ol man ol bai stap long graun aninit long Kingdom bilong God. Long dispela taim bihain ol man i gat ol kain kain sik i bagarapim tru skin bilong ol, olsem sik lepra samting, skin bilong ol dispela man bai kamap gutpela gen. Jisas i bin oraitim sik lepra bilong 10-pela man taim em i wokabaut i go long Jerusalem long yia 33 C.E. Dispela samting em i mekim i kamapim long ples klia olsem em inap helpim ol man i gat kain sik olsem, na em i laik tru long mekim. (Luk 17:11-19; Mak 1:40-42) Planti man, bun bilong ol i dai olgeta. Tasol skin bilong ol tu bai orait bek olsem wanpela man bilong bipo, em bun bilong em i dai olgeta na Jisas i oraitim sik bilong em. Taim Jisas i mekim olsem em i tok tu long sin bilong dispela man i tekewe.—Mak 2:1-12.
13 Ol aipas bai lukluk gen, na ol yaupas bai harim gen, na ol mauspas bai toktok gen—Jisas i bin helpim ol kain man olsem long Galili na long Dekapolis. (Matyu 9:27-30; Mak 7:31-37) Long nau i gat planti sikman i stap—em ol dokta i no inap oraitim sik bilong ol. Olsem wanpela meri long Kapaneam long bipo, em “planti dokta i bin givim planti pen long em, na dispela meri i bin lusim olgeta mani bilong en long ol. Tasol sik bilong en i no orait liklik. Nogat.” Tasol Jisas i oraitim sik bilong dispela meri, na em bai mekim olsem tasol long planti sikman moa. (Mak 5:25-29) Sik kensa, sik bilong klok, malaria, fiva—no gat wanpela sik i hatwok tumas long Jisas na em i no inap oraitim. Nogat. Em i kamapim pinis strong bilong em bipo taim em i raun long Galili na em i “mekim orait olgeta kain sik bilong bodi.”—Matyu 9:35.
14 Long dispela taim bihain ol man i dai pinis bai ol tu i gat rot. Ol dispela man i no ol man God i bagarapim ol long taim bilong “bikpela hevi tru.” Nogat. Em ol narapela planti bilion manmeri bipo ol i dai pinis. Bai ol i gat rot bilong i stap laip gen na kisim planti gutpela samting bipo ol i no inap tru long kisim. Orait, olsem wanem long ol man i abrusim bagarap long taim bilong “bikpela hevi tru”? Klostu long liklik ples Nen, Jisas i mekim gut bel bilong wanpela meri wanpis, em pikinini man bilong em i dai pinis—Jisas i kirapim bek pikinini bilong dispela meri. Na long Kapaneam Jisas i kirapim bek wanpela pikinini meri i dai pinis na papamama bilong dispela pikinini i amamas moa yet. (Luk 7:11-16; Mak 5:35-42) Orait, taim ol wanblut o famili bilong yu i kirap bek, yu laik i stap na sekanim ol? Ol man i abrusim bagarap na i stap long “nupela graun” ol inap mekim olsem!
15 Bihain ol man i no ken karim bikpela hevi na bel bilong ol i bagarap olsem long nau. Ol mirakel na ol tok bilong Jisas tu i kamapim klia dispela samting, long wanem ol man i disaipel tru bilong Jisas ol tasol bai stap long “nupela graun.” (Jon 3:36) Jisas i skulim lain bilong em long tingim ol samting bilong spirit i bikpela samting na ol samting bilong skin i namba tu. Em i lainim ol long givim bel tru long Jehova na bilip long Em, na larim Jehova i soim rot long ol, na ol i mas pilim tru ol gutpela samting Jehova i mekim bilong helpim ol. Ol tok bilong Jisas na pasin em i mekim i lainim ol long bihainim pasin sori na pasin daun, na ol i mas tingim tru ol narapela man na wok strong long helpim ol. Long nau tu, ol man i kamap disaipel pinis na ol i bihainim tru ol dispela lo, bel bilong ol i painim malolo na ol inap mekim gut bel bilong ol narapela man. (Matyu 11:28, 29; Jon 13:34, 35) Ol i stap belgut na dispela i olsem piksa bilong gutpela i stap ol inap kisim bihain sapos ol i stap laip yet taim ol man i no gat pasin sori ol i bagarap. Sapos nau yu bihainim savepasin, yu inap kisim kain gutpela i stap olsem.
[Askim Bilong Stadi]
1. Olsem wanem yumi save “de bilong Jehova” i no ken bagarapim olgeta samting bilong graun na bai graun i stap nating? (Aisaia 45:18)
2. Olsem wanem yumi inap bilip tru olsem Jehova bai lukautim ol man i stap gut long em na ol i no ken bagarap long taim bilong “bikpela hevi tru”?
3. Skin bilong planti man bai slip nabaut long graun, tasol bilong wanem dispela i no ken givim sik long ol man i stap laip yet?
4. Jehova i givim wanem kain sindaun long namba wan man na meri? Bilong wanem yumi mas tingim dispela?
5. Olsem na ol man i winim taim bilong “bikpela hevi tru” bai ol i gat rot bilong mekim wanem?
6. (a) Olsem wanem long ol samting bilong pait long bihain? (b) Olsem wanem na bai i no gat wanpela man i hangre na i no gat kaikai?
7. Jehova i makim Krais Jisas bilong i stap King, na olsem wanem dispela i kamapim long ples klia savepasin na pasin sori bilong Jehova?
8. Krais bai i helpim lain bilong em long graun long mekim wanem long Bikpela King Jehova?
9. (a) Sin yumi kisim long Adam i mekim wanem ol samting nogut long yumi? (b) Ol mirakel bilong Jisas i kamapim long ples klia wanem gutpela samting yumi ken wetim i kamap?
10. Olsem wanem i stret yumi ken bilip olsem Jisas inap mekim ol strongpela wok ol saveman bilong graun i no inap mekim?
11. Ol mirakel bilong Jisas em wanem samting, olsem Aposel 2:22 i tok? Ol dispela mirakel i kamapim long ples klia wanem samting?
12. (a) Taim yu kaunim stori bilong Jisas i oraitim bek skin bilong ol man i gat sik lepra, olsem wanem dispela i strongim bilip bilong yu? (b) Jisas i oraitim wanpela man bun bilong em i dai olgeta na yumi mas tingim wanem tok em i mekim long dispela taim?
13. Stori long wanpela mirakel bilong Jisas i strongim bel bilong (a) ol aipas, (b) ol yaupas o mauspas, (c) ol sikman em ol dokta i no inap oraitim sik bilong ol. (d) Olsem wanem yu save Jisas inap oraitim olgeta kain sik?
14. Yumi kaunim ol stori long Jisas i kirapim bek man i dai pinis na yumi save, taim em i mekim dispela wok long bihain, orait ol man i bin abrusim bagarap bai ol inap mekim wanem?
15. (a) Wanem kain man bai stap long graun long bihain, olsem tok bilong Jisas i makim? (b) Yumi mas mekim wanem long nau na bai yumi ken pilim gutpela i stap yumi inap kisim bihain?
[Blok\Piksa long pes 33]
LAIK BILONG GOD LONG PASTAIM
Em i laik bai ol man i pulap long graun na ol i bihainim ol gutpela pasin bilong em
Em i laik bai Paradais i kamap long olgeta hap bilong graun na
ol man i ken lukautim Paradais na ol animal samting
Em i laik bai ol man i stap oltaim oltaim long graun