Ol Gutpela Samting Gutnius Inap Kamapim Long Komiuniti Bilong Yu
LONG nau planti taim yumi save harim dispela tingting bilong ol man: “Ol bikpela tok na lo Kristen i no inap helpim yumi. Ol i no inap wok gut long dispela taim bilong yumi i narapela kain tru.” Tasol taim wanpela bikman bilong ol Hindu, em Mohandas K. Gandhi na wanpela bikman bilong gavman Inglan, em Bikman Irwin i toktok wantaim, ol i kamapim narapela tingting. Ol man i tok, Bikman Irwin i askim Gandhi long em i ting wanem ol samting inap stretim ol hevi i stap namel long Briten na India. Gandhi i kisim Baibel na opim sapta 5 bilong Buk Matyu na tok: “Sapos kantri bilong yu na kantri bilong mi i wok wantaim long bihainim ol tok Krais i autim antap long maunten, bai yumi inap stretim ol hevi bilong ol kantri bilong yumi na bilong olgeta kantri.”
Dispela bikpela tok i stori long pasin bilong tingim ol samting bilong spirit, pasin daun, bel isi, pasin marimari, na pasin bilong laikim stretpela pasin. Em i no tok tasol olsem i no stret long kilim man i dai o mekim pasin pamuk, nogat; em i tok tu olsem i no stret long kros na bel nogut long ol narapela o tingting strong long mekim pasin pamuk. Em i tok pasin bilong katim nating marit i no stret, em dispela samting i save brukim ol famili na nogutim ol pikinini. Em i tok: ‘Laikim ol man i no save laikim yu, helpim ol man i sot, no ken skelim skelim pasin bilong ol narapela, na ol pasin yu laik bai ol narapela i mekim long yu, ol dispela pasin tasol yu mas mekim long ol.’ Olgeta dispela tok—sapos ol man i bihainim—bai kamapim planti gutpela samting. Taim planti man moa long komiuniti bilong yu i mekim ol dispela pasin, i stap bilong komiuniti bilong yu bai kamap gutpela moa!
Ol Witnes Bilong Jehova i save strongim ol dispela pasin. Baibel i lainim ol long rispektim ol samting bilong marit. Ol i lainim ol pikinini bilong ol long bihainim ol stretpela lo. Ol i ting famili em i bikpela samting. Ol famili i stap wanbel i helpim sindaun bilong komiuniti, na bilong kantri tu. Ol samting i bin kamap bipo i soim olsem planti strongpela kantri i bin pundaun taim ol famili i bagarap na pasin pamuk i go bikpela. Taim ol Witnes Bilong Jehova i kirapim planti man na famili moa long bihainim ol lo Kristen, orait pasin bikhet, pasin pamuk, na pasin raskol bai i go liklik long komiuniti bilong yu.
Wanpela bikpela hevi i save bagarapim sindaun bilong ol komiuniti na ol kantri, em pasin bilong bel nogut long narapela skin. Tasol aposel Pita i tok: “Nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” Na Pol i tok: “Long lain bilong Krais, i no gat ol Juda na ol Grik. I no gat ol wokboi nating na ol man i stap fri. I no gat ol man na ol meri. Nau long Krais Jisas yupela olgeta i stap wanpela tru.” (Aposel 10:34, 35; Galesia 3:28) Ol Witnes Bilong Jehova i bilip long dispela. Ol man bilong kain kain lain na skin i save stap na wok wantaim long hetkota bilong ol, na long ol brens-ofis, na long ol kongrigesen.
Long Afrika sampela lain i no inap bung wantaim, sapos ol i bung wantaim ol bai pait. Tasol long ol kibung bilong ol Witnes Bilong Jehova long dispela hap, ol manmeri bilong planti kain kain lain i save kaikai, slip, na lotu wantaim long pasin wanbel na gutpela pasin pren. Ol bikman bilong gavman i kirap nogut taim ol i lukim dispela samting. Nius Amsterdam News bilong Ogas 2, 1958, bilong New York, i stori olsem lotu Kristen tru i mekim na ol man i stap wanbel wantaim. Ol i mekim dispela tok taim ol i lukim ol samting i kamap long kibung intenesenel mipela i stori pinis long en, winim 250 tausen Witnes i bin bung long biktaun New York.
“Ol blakskin, waitskin, na ol Esia, bilong kain kain sindaun na bilong olgeta hap bilong graun ol i stap bel isi na amamas wantaim. . . . Ol Witnes i kam long 120 kantri ol i lotu na stap wanbel wantaim, na ol i soim long ol Amerika olsem i no hatwok long mekim olsem. . . . Dispela kibung i kamapim klia olsem ol man inap wok na stap gut wantaim.”
Ating planti man bai tok olsem ol lo Kristen i no inap helpim ol man long taim bilong yumi. Tasol wanem samting i bin helpim o bai helpim ol man? Ol lo Kristen inap helpim tru komiuniti bilong yu long nau sapos ol man i bihainim ol dispela lo, na dispela bai mekim na long olgeta hap ol man bilong ‘olgeta lain, kantri, na skin’ bai stap wanbel wantaim aninit long wok bos bilong Kingdom bilong God.—KTH 7:9, 10.
[Rait long pes 23]
Ol man bilong olgeta lain na skin i wok wantaim
[Rait long pes 24]
Pasin Kristen inap helpim ol man. Wanem narapela samting i bin helpim ol?