Buk Bilong Baibel Namba 8—Rut
Man Bilong Raitim: Samuel
Ples Em i Bin Raitim: Israel
Raitim Pinis: 1090 B.C.E. samting
Taim: 11-pela yia ol hetman i bosim Israel
1. (a) Olsem wanem na yumi inap tok, stori bilong Buk Rut em i no wanpela gutpela stori nating tasol? (b) Baibel i kamapim wanem bikpela samting bilong Rut?
BUK Rut em i wanpela gutpela stori tru. Em i kamapim stori bilong Rut na Boas, em narapela i givim bel tru long narapela. Em i no wanpela gutpela stori nating tasol. Ol i no bin raitim dispela buk bilong amamasim bel bilong yumi tasol. Nogat. Dispela stori i kamapim klia laik bilong Jehova long kamapim wanpela man bilong bosim Kingdom bilong em, na i stori long gutpela pasin sori bilong Em. (Rut 1:8; 2:20; 3:10) Jehova i makim wanpela meri Moap bilong kamap wanpela tumbuna bilong Jisas. Dispela samting i kamapim bikpela pasin sori bilong Jehova, long wanem, dispela meri Moap, pastaim em i wanpela meri haiden i save lotuim god giaman Kemos, tasol bihain em i kamap wanpela meri bilong lotu tru long Jehova. Long lista bilong ol tumbuna bilong Jisas, kirap long Abraham, i gat nem bilong 4-pela meri tasol, na Rut em i wanpela bilong dispela 4-pela meri. (Mt 1:3, 5, 16) Ol i bin kisim nem bilong tupela meri tasol, em Rut na Esta, na putim olsem nem bilong tupela buk bilong Baibel.
2. Ol samting Buk Rut i stori long en i bin kamap long wanem taim? Ol i bin raitim long wanem taim? Husat i raitim?
2 Namba wan tok bilong Buk Rut em olsem: “Taim ol hetman i bosim ol Israel, . . . ” Orait, bihain long en dispela buk i kirap na kolim ol samting i bin kamap long dispela taim. Em wanpela gutpela stori tru bilong kaunim. Dispela namba wan tok bilong Buk Rut i helpim yumi long save, ol i bin raitim ol tok bilong en bihain long dispela taim, long taim ol king i bosim Israel. Tasol ol samting dispela buk i stori long en i bin kamap insait long 11-pela yia samting, taim ol hetman i bosim ol Israel. Baibel i no kolim nem bilong man i bin raitim ol dispela tok, tasol ating Samuel i bin raitim, long wanem, em i bin raitim tu ol tok bilong Buk Hetman, na em i wanpela gutpela man tru i bin stap long taim ol king i kirap bosim Israel. Laspela tok bilong dispela buk i makim olsem Devit i kisim biknem pinis, olsem na ating Samuel i bin raitim ol tok bilong Buk Rut long yia 1090 B.C.E. Samuel i save long tok promis bilong Jehova long wanpela “laion” i mas kamap long lain bilong Juda, na Jehova i bin givim wok long Samuel bilong makim Devit bilong kamap king bilong Israel, na Devit em i bilong lain Juda, olsem na yumi save, Samuel i laik tru long raitim lista bilong ol tumbuna bilong Devit.—Stt 49:9, 10; 1 Sam. 16:1, 13; Rut 1:1; 2:4; 4:13, 18-22.
3. Wanem samting i makim olsem Buk Rut em i hap tru bilong Baibel?
3 I no gat wanpela man i bin tok olsem Buk Rut em i no wanpela hap tru bilong Baibel. Jehova i kirapim Matyu long raitim lista bilong ol tumbuna bilong Jisas, na long Matyu 1:5 em i kolim nem bilong Rut, olsem na yumi save, i stret stori bilong Rut i stap long Baibel. Ol Juda bilong bipo ol i bilip olsem Buk Rut em i hap tru bilong Baibel. Olsem na yumi no ken kirap nogut long save, taim ol i painim Ol Olpela Rait Bilong Detsi long yia 1947, ol i painim tu sampela rait bilong Buk Rut. Na ol tok bilong Buk Rut i stret wantaim ol promis bilong Jehova long Kingdom, na ol tok bilong en i stret olsem Lo bilong Moses i makim. God i tambuim ol Israel long maritim sampela man o meri bilong lain Kenan o Moap, tasol sapos ol meri bilong ol dispela hap i tanim bel na kirap lotuim Jehova, olsem Rut i bin mekim, orait i no tambu long ol man Israel i maritim ol. Buk Rut i stori long ol i bin bihainim stret lo bilong baim bek ol samting na lo bilong maritim meri bilong brata i dai pinis.—Lo 7:1-4; 23:3, 4; 25:5-10.
HELPIM YUMI OLSEM WANEM?
9. Ol man long stori bilong Rut, olsem wanem ol i makim gutpela pasin yumi inap bihainim long nau?
9 Ol gutpela stori bilong Buk Rut inap helpim ol man i laikim tumas stretpela pasin na bai bilip bilong ol i ken kamap strong. Olgeta samting ol man i bin mekim long dispela stori i makim olsem ol i bilip long Jehova. “Dispela olgeta manmeri i bilip long God, na ol i kisim gutpela nem tru long ai bilong God.” (Hi 11:39) Ol i makim gutpela pasin yumi inap bihainim long nau. Naomi i bilip tru long Jehova bai mekim gutpela pasin long em. (Rut 1:8; 2:20) Rut i amamas long lusim as ples bilong em bambai em inap lotu tru long Jehova; em i stap gut long tambu meri bilong em na daun long em, na em i meri bilong wok strong. Boas i pilim tru lo bilong Jehova na em i bihainim pasin daun na em i amamas long bihainim laik bilong Jehova. Na Boas i laikim tru Naomi, long wanem, Naomi i bin stap gut long Jehova, na Boas i laikim tru Rut, long wanem, Rut i meri bilong wok strong, na ol dispela samting i mekim na Boas i bihainim dispela lo bilong marit long rot bilong baim bek ol samting.
10. Olsem wanem stori bilong Rut inap helpim yumi long bilip moa yet long ol samting Kingdom bai mekim?
10 Jehova em i as bilong marit, na tu, em i as bilong marit long rot bilong baim bek ol samting, na dispela samting i givim biknem long Jehova. Jehova em i Man bilong stretim rot na bai Boas na Rut inap marit, na em i mekim gut long tupela; em i mekim wok long tupela bilong lukautim lain bilong king bilong Juda i go inap long Devit, na i go olgeta long Man Devit i piksa bilong em, em Krais Jisas. Jehova i lukautim ol samting bambai Pikinini bilong Kingdom i ken kamap, na em i bihainim gut ol lo bilong em yet, na dispela samting i mas strongim bilip bilong yumi, na yumi inap bilip na wet long lukim truim bilong ol samting God i tok Kingdom bai mekim. Dispela samting i mas kirapim yumi long wok strong tru long mekim wok bilong “kisim kaikai” long nau, na yumi ken save Jehova bai mekim gut long yumi, em i God bilong Israel bilong spirit, na em bai “lukautim” yumi long taim ol tok promis bilong Kingdom i wok long kamap long nau. (2:12) Ol tok bilong Rut i helpim yumi long save moa yet long dispela Kingdom!