Jun

Jepta i gat wanpela pikinini tasol, na dispela pikinini tasol bai kamapim ol tumbuna pikinini bilong Jepta na holim yet nem bilong em long Israel. (Het. 11:34) Maski i olsem, Jepta i mekim tok i stap long Hetman 11:35 olsem: “Mi mekim strongpela promis long Bikpela na i no inap mi brukim.” Jepta i daunim tru laik bilong em yet na inapim tok promis bilong em, olsem na God i amamas long em na blesim em. Yu ting yu bai mekim wankain disisen olsem Jepta i bin mekim? Taim yumi dediketim laip bilong yumi long Jehova, yumi bin tok promis olsem yumi bai yusim laip olgeta bilong yumi long mekim laik bilong em. Yumi save olsem yumi mas daunim laik bilong yumi yet bambai yumi inap truim tok promis bilong yumi. Tasol taim yumi kisim wanpela asainmen we yumi no amamas long en, dispela inap traim pasin bilong yumi long redi long mekim wok. Taim yumi daunim laik bilong yumi yet na yumi mekim wok bilong God, dispela i soim klia olsem yumi stap gut long God. Olsem na God i save givim yumi ol blesing we i winim tru ol samting yumi bin lusim.—Mal. 3:10. w16.04 1:11, 14, 15

Jisas i yusim holi spirit long stiaim kongrigesen. Holi spirit bai helpim yumi long sakim ol traim, na strongim na redim yumi long mekim wok autim tok, na helpim yumi long mekim ol gutpela disisen. Olsem na yumi mas mekim olgeta samting yumi inap mekim bilong kisim holi spirit, na dispela i makim tu olsem yumi mas i go oltaim long olgeta miting bilong kongrigesen. Long planti miting, yumi save skelim gen truim bilong ol tok profet bilong Baibel. Dispela i save strongim bilip bilong yumi long truim bilong ol tok promis bilong Jehova long ol samting bai kamap bihain. Taim ol brata i sanap long pletfom na mekim tok, dispela i save strongim yumi. Na tu, taim ol wanbilip bilong yumi i bekim tok long miting na pilim tru ol tok ol i singim, dispela i save strongim tru yumi. (1 Kor. 14:26) Na tu, taim yumi toktok wantaim ol bratasista paslain na bihain long ol miting, yumi pilim olsem ol narapela i tingim tru yumi na dispela i save givim nupela strong long yumi.—1 Kor. 16:17, 18. w16.04 3:6, 7

Jisas i tokaut long wok autim tok bai i go inap long wanem hap na em i tok ol bai autim gutnius long “olgeta hap bilong graun.” (Mat. 24:14) Ol i mas “kamapim ol disaipel long olgeta lain man.” Dispela i makim olsem wok autim tok i mas kamap long olgeta hap bilong graun. Yumi ken skelim sampela samting bambai yumi inap kliagut long olsem wanem ol Witnes Bilong Jehova i truim tok profet bilong Jisas long sait bilong wok autim tok. Long Amerika, namba bilong ol pris pasto em inap olsem 6 handret tausen, tasol namba bilong ol Witnes Bilong Jehova em inap olsem 1 milion 2 handret tausen. Long olgeta hap bilong graun, namba bilong ol pris bilong Misin Katolik i winim 4 handret tausen. Orait, skelim namba bilong ol Witnes husat i bihainim tok bilong Baibel na autim tok bilong Kingdom. Long olgeta hap, inap olsem 8 milion Witnes i autim tok long 240 kantri. Ol i mekim gutpela wok tru, na dispela i litimapim nem bilong Jehova!—Sng. 34:1; 51:15. w16.05 2:13, 14

Dispela graun i pulap tru long ol manmeri husat i no laik bai ol narapela i stiaim ol, na ol i bihainim pasin antap, tingim ol yet tasol, jeles na mekim pasin resis. Taim ol man i bihainim ol dispela pasin, i olsem ol i wanbel long tok bilong Satan olsem i stret long ol i ken bihainim laik bilong ol yet, maski sapos dispela i putim hevi long ol narapela. (Stt. 3:1-5) Dispela pasin i kirapim ol long kros na pait. Jisas i skulim ol man long ol samting ol i mas mekim bilong i stap bel isi, maski dispela i no stret long laik bilong ol yet. Long Bikpela Tok Long Maunten, Jisas i givim gutpela skultok long pasin bilong stretim ol kros pait. Em i tokim ol disaipel long bihainim pasin isi, mekim i dai kros, abrusim ol pasin we inap mekim narapela i belhat, stretim kwik ol hevi, na laikim yet ol birua.—Mat. 5:5, 9, 22, 25, 44. w16.05 1:4, 5

Planti bilong yumi i bin mekim ol bikpela senis paslain long yumi kisim baptais. Yumi mekim olsem bambai wokabaut bilong yumi i stret wantaim lo bilong Baibel. Bihain long baptais, yumi laik bihainim gut moa ol pasin bilong God na Krais, olsem na yumi luksave olsem yumi mas wok yet long mekim sampela senis—em ol senis ol narapela i no inap luksave long en. (Efe. 5:1, 2; 1 Pita 2:21) Ating yumi luksave olsem yumi gat sampela pasin kranki, olsem pasin bilong sutim tok, pret long ol man, na tok baksait long ol narapela. Olsem wanem? Yu bin pilim olsem i hatwok tru long senisim ol dispela pasin? Yumi stap yet olsem ol sinman. (Kol. 3:9, 10) Maski yumi baptais, o yumi stap insait long tok i tru inap planti yia pinis, yumi no ken holim tingting olsem yumi no inap mekim ol popaia o kisim ol tingting kranki na ol laik nogut. Sampela pasin kranki bilong yumi inap i stap yet inap planti yia.—Jems 3:2. w16.05 4:3-5

Ating yu bin harim ol narapela i mekim kain tok olsem: ‘Bipo, mi no save amamas taim papamama i stretim pasin bilong mi. Tasol nau mi gat ol pikinini bilong mi yet na mi pilim tru pasin bilong papamama.’ Taim hevi i kamap long laip bilong yumi, yumi bai kisim tingting bilong Jehova—papamama i bin stretim stretim yumi bikos ol i laikim tru yumi. (Hib. 12:5, 11) Jehova i laikim tru yumi ol pikinini bilong em, olsem na em i save stretim stretim yumi na em i no les kwik long mekim olsem. Em i laik bai yumi mas bihainim savetingting na stap amamas na laikim em. (Snd. 23:15) Em i no laik bai yumi karim hevi. Em tru olsem yumi kisim sin long Adam, tasol God i no laik bai yumi kamap “olsem ol pikinini bilong kisim belhat bilong God” na yumi dai. (Efe. 2:2, 3) Bipo yumi stap “olsem ol pikinini bilong kisim belhat bilong God,” olsem na yumi bin mekim planti pasin em God i no amamas long en, na ating yumi bin mekim ol pasin nogut olsem bilong ol animal! Tasol Jehova i stretim pasin bilong yumi na yumi kisim pasin isi olsem ol pikinini sipsip.—Ais. 11:6-8; Kol. 3:9, 10. w16.06 1:7, 8

Ol pikinini i gat pasin daun na ol i save amamas long kisim save long ol nupela samting. (Mat. 18:1-4) Olsem na papamama i ken wok strong long skulim na kirapim pikinini long laikim tok i tru. (2 Tim. 3:14, 15) Tasol pastaim, papamama yet i mas laikim tumas tok i tru na bihainim long laip bilong ol bambai pikinini inap lukim eksampel bilong ol na bihainim. Na tu, taim papamama i stretim pikinini, pikinini bai holim tingting olsem papamama i laikim em na dispela i wankain long pasin laikim bilong Jehova. Sapos oltaim yumi stap daun long Jehova, em bai laikim yumi tumas wankain olsem em i laikim tumas profet Daniel. (Dan. 10:11, 19) Moa yet, Jehova bai wok yet long stretim stretim yumi long rot bilong tok bilong em long Baibel, holi spirit, na oganaisesen bilong em. w16.06 2:14, 17

Jehova i laikim Devit bikos em “i save bihainim pasin Bikpela i laikim.” (1 Sml. 13:13, 14) Tasol bihain Devit i mekim pasin adaltri wantaim Batseba na Batseba i gat bel. Man bilong Batseba em Uria, na em i mekim wok soldia. Devit i mekim rong wantaim Batseba taim Uria i go long pait. Taim Uria i kam i stap liklik haptaim long ples, Devit i stiaim tingting bilong em long slip wantaim Batseba bambai ol man i ting olsem Batseba i gat bel long man bilong em Uria. Tasol Uria i no laik mekim samting em king i laik stiaim em long mekim, olsem na Devit i stretim rot long kilim em i dai. Bikpela hevi i painim Devit na famili bilong em. (2 Sml. 12:9-12) Maski i olsem, Jehova i marimari long Devit bikos em i lusim bikpela haptaim long laip bilong em long “wokabaut long stretpela pasin.” (1 Kin. 9:4) Sapos yu bin stap long dispela taim bipo, yu bai mekim wanem? Bai yu larim rong bilong Devit i pundaunim yu? w16.06 4:7

Yumi ol Witnes Bilong Jehova i tingim tru tok lukaut bilong Jisas. Yumi save olsem yumi stap long “taim bilong pinis,” na klostu nau “traipela hevi tru” bai kirap! (Dan. 12:4, NW; Mat. 24:21) Yumi lukim ol bikpela woa, pasin pamuk, pasin bilong brukim lo, ol lotu i paul nabaut, bikpela hangre, ol bikpela sik, na guria i kamap long olgeta hap bilong graun. Yumi save olsem ol manmeri bilong Jehova i mekim bikpela wok tru long autim tok bilong Kingdom long olgeta hap. (Mat. 24:7, 11, 12, 14; Luk 21:11) Yumi wet long lukim Bikpela i kam, na yumi bai kisim ol gutpela blesing na lukim hau God bai kamapim samting em i tingting pinis long kamapim. (Mak 13:26, 27) Tasol long sait bilong traipela hevi tru, maski yumi taitim bun long mekim wok painimaut, yumi no inap tru long save long yia, de, na aua em dispela hevi bai kirap. w16.07 2:2-4

Jehova i soim bikpela pasin helpim na em i opim rot long yumi inap beten long em, na i olsem yumi go klostu long sia king bilong em long heven na toktok wantaim em. Pikinini Bilong Jehova i opim rot, olsem na “long rot bilong em, yumi stap fri long toktok na yumi ken i go klostu long God na i no pret. Yumi bilip long Jisas na yumi mekim olsem.” (Efe. 3:12) Yumi inap toktok wantaim Jehova long rot bilong beten, na dispela tu em wanpela gutpela blesing yumi kisim long bikpela pasin helpim bilong em. Pol i tok yumi no ken surik long beten na toktok wantaim Jehova. “Yumi mekim olsem bai em i ken marimari long yumi na mekim bikpela pasin helpim long yumi long taim stret.” (Hib. 4:16b) Taim hevi i painim yumi o yumi tingting planti long sampela samting, yumi ken beten askim Jehova long marimari na helpim yumi. Em inap helpim yumi long rot bilong ol bratasista bambai “yumi gat strongpela bel na tok: ‘Jehova em i helpim bilong mi. Mi no inap pret. Ol man bai mekim wanem long mi?’”—Hib. 13:6. w16.07 3:12, 13

Noa na 3-pela pikinini man bilong em i gat wan wan meri bilong ol yet, tasol long taim bilong ol bilipman i kamap bihain, ol man i maritim planti meri. Long planti kantri, pasin pamuk i kamap olsem nomol samting, na sampela lotu i orait long dispela pasin. Taim Abram (Abraham) na meri bilong em Sarai (Sara) i bihainim tok bilong God na i go sindaun long Kenan, ol manmeri long dispela kantri i no bihainim stretpela lo long sait bilong marit. Olsem na Jehova i bagarapim ol manmeri bilong Sodom na Gomora bikos ol i mekim kain kain pasin pamuk i nogut tru. Abraham i mekim gut wok bos insait long famili, na Sara i soim gutpela eksampel long bihainim pasin daun na stap aninit long wok bos bilong man. (1 Pita 3:3-5) Abraham i stretim rot na pikinini bilong em Aisak i maritim wanpela meri i lotuim Jehova. Wankain pasin bilong bihainim lotu i tru i stiaim pikinini bilong Aisak, em Jekop—bihain Jekop i kamap tumbuna papa bilong 12-pela lain Israel. w16.08 1:10

Dispela tok profet i wok long kamap tru long dispela haptaim bilong las de. Long sevis yia bilong 2015, inap 8,220,105 pablisa i autim tok long olgeta hap bilong graun! Olgeta wan wan Kristen i mas tingim tru laspela hap bilong dispela tok profet. Papa long heven i tok: “Mi Bikpela, mi tok, ol dispela samting bai i kamaphariap long taim mi makim pinis.” Ol pasindia long kar inap luksave olsem kar i wok long spit, na olsem tasol, yumi luksave olsem wok bilong kamapim disaipel i wok long kamap bikpela moa, i olsem dispela wok i spit moa. Dispela i kirapim yumi long mekim wanem? Yumi givim bel tru long autim tok bilong Kingdom? Planti bratasista i mekim wok painia oltaim na painia haptaim. Yumi amamas olsem planti pablisa i go autim tok long ol hap i sot tru long ol pablisa, na planti arapela pablisa i volantia long mekim ol narapela wok tiokratik. Maski yumi brata o sista, i gat planti samting yumi mas mekim long “wok bilong Bikpela.”—1 Kor. 15:58. w16.08 3:1, 2

Bihain tasol long God i wokim mirakel na kisim bek lain Israel long wok kalabus long Isip, lain Amalek i pait long ol. Josua i strongim bel na em i bihainim tok bilong Moses na lidim ol soldia bilong Israel na ol i go bilong pait long ol Amalek. Moses i kisim Aron na Hur, na ol i go antap long wanpela liklik maunten i stap klostu bambai ol inap lukluk i go daun long ples bilong pait. Moses i bihainim plen we i helpim ol Israel long winim pait. Moses i holim stik bilong God na em i apim i go antap. Taim Moses i mekim olsem, Jehova i strongim han bilong ol soldia bilong Israel na ol i wok long winim ol Amalek. Tasol taim han bilong Moses i taiet na em i slekim han i kam daun, ol Amalek i kirap gen long winim ol Israel. Aron na Hur i luksave long dispela samting, olsem na tupela “i kisim wanpela ston na putim long graun na Moses i sindaun long en. Na tupela i sanap klostu long Moses long hap na long hap na holim han bilong en antap. Tupela i holim i stap inap san i go daun.” Tru tumas, God i strongim lain Israel na ol i winim pait.—Kis. 17:8-13. w16.09 1:5-7

Pol i bilip tru olsem em inap winim dispela pait taim em i beten oltaim long Jehova na bilip long ofa bilong Jisas long baim bek ol man. Taim yumi mekim pait bilong daunim ol laik nogut bilong bodi, yumi inap winim dispela pait. Yumi mas mekim wanem? Yumi no ken bilip long strong bilong yumi yet, nogat. Yumi mas bihainim eksampel bilong Pol na beten askim Jehova long strongim yumi, na yumi mas bilip long ofa bilong Jisas long baim bek man. Taim wanpela hevi i kamap, sampela taim God inap larim yumi long kamapim klia tingting i stap long bel bilong yumi. Kain olsem: Yumi bai mekim wanem sapos yumi, o wanpela wanblut, i kisim bikpela sik o bungim hevi long pasin giaman bilong ol narapela? Yumi mas soim olsem yumi trastim Jehova taim yumi beten askim em long strongim yumi long holimpas bilip na stap amamas na mekim yet wok lotu. (Fili. 4:13) Ekspiriens bilong ol Kristen long taim bilong Pol na long nau i kamapim klia olsem pasin bilong beten inap strongim yumi long karim ol hevi i painim yumi. w16.09 2:14, 15

Taim planti manmeri moa i kam insait long kongrigesen Kristen, wanpela hevi i kamap. Ol disaipel i mekim tok Grik i komplein na tok ol disaipel i mekim tok Hibru i no tingim ol wido i save mekim tok Grik. Olsem na ol aposel i makim 7-pela man na salim ol i go bilong stretim dispela hevi. Ol dispela man i gat ol nem Grik, na dispela i soim olsem ol aposel i laik pinisim kros i stap namel long ol Kristen long sait bilong wanem lain ol i kam long en. (Apo. 6:2-6) Maski yumi luksave o nogat, kalsa bilong yumi i stiaim planti samting long laip bilong yumi. (Rom 12:2) Ating yumi save harim ol neiba, ol wanwok, na ol wanskul i mekim ol tok i daunim lain bilong narapela kalsa, kantri, o skin kala. Olsem wanem? Yumi tu i holim kain tingting olsem? Yumi save pilim olsem wanem taim wanpela man i mekim tok pani long kalsa bilong kantri yumi stap long en? w16.10 1:7, 8

Dispela tok “kliagut” i makim olsem man i luksave long wanpela samting we i hatwok long luksave hariap long en. (Hib. 11:3) Em i yusim ai na yau bilong em, na tu, em i tingting gut na skelim ol samting. Oganaisesen bilong Jehova i mekim gut wok painimaut na redim planti tul bilong helpim yumi. Ol dispela tul i helpim yumi na i olsem yumi inap “lukim” Krieta bilong yumi long ai bilong bilip. (Hib. 11:27) Sampela bilong ol dispela tul em vidio The Wonders of Creation Reveal God’s Glory, na buklet Was Life Created? na The Origin of Life—Five Questions Worth Asking, na buk Is There a Creator Who Cares About You? Nius Kirap! i save intaviuim ol saientis na ol narapela husat i no bilip long God long bipo, na ol i stori gut long ol samting i kirapim ol long bilip long God. Wanpela seksen long nius Kirap! i gat dispela het tok “Yu Ting Wanpela i Bin Wokim?” Ol atikol long dispela seksen i kamapim klia ol narakain wok ensinia i stap long ol animal na plaua samting. Ol saientis i traim hat long bihainim ol dispela wok ensinia na wokim ol masin samting. w16.09 4:4, 5

Ol dispela bilip lain em Hibru sapta 11 i stori long en, ol i dai paslain long Jisas Krais, em “pikinini” bilong promis, i opim rot bilong ol man long kisim laip long heven. (Gal. 3:16) Tasol ol bai kirap bek na kisim laip long Paradais long graun. (Sng. 37:11; Ais. 26:19; Hos. 13:14) Hibru 11:13 i stori long sampela bilip lain i stap paslain long taim bilong ol aposel, na i tok: “Ol dispela manmeri i holimpas bilip bilong ol i go inap long ol i dai. Taim ol i stap laip ol i no lukim truim bilong ol tok promis God i bin mekim long ol. Tasol ol i luksave olsem truim bilong ol dispela tok promis bai kamap bihain na ol i amamas long ol.” Wanpela bilong ol em Abraham. Yu ting em i bilip olsem em bai kisim laip taim “pikinini” bilong promis i mekim wok king? Jisas i bekim dispela askim taim em i tokim ol birua olsem: “Papa bilong yupela Abraham i bin i gat tingting long lukim taim bilong mi na em i amamas tru long dispela, na em i bin lukim na em i belgut.” (Jon 8:56) Sara, Aisak, Jekop, na planti arapela manmeri i bilip olsem ol bai kisim laip taim Kingdom i bosim graun, na “God em man husat i bin sanapim na wokim” dispela Kingdom.—Hib. 11:8-11. w16.10 3:4, 5

Yumi ken amamas tru bikos Jehova i yusim holi spirit long helpim yumi long luksave long tok i tru na bilip long gutnius! (Luk 10:21) Oltaim yumi mas tok tenkyu long Jehova long em i bringim yumi i go klostu long em yet long rot bilong Pikinini bilong em, “dispela Nambawan Gopas bilong bilip bilong yumi na Man Bilong Inapim Tru bilip bilong yumi.” (Hib. 12:2) God i soim bikpela pasin helpim long yumi, olsem na yumi mas soim tenkyu bilong yumi na wok yet long strongim bilip bilong yumi long rot bilong beten na stadi long Baibel. (1 Pita 2:2) Oltaim yumi mas mekim ol wok bilong soim olsem yumi bilip long ol tok promis bilong Jehova. Yumi mas mekim ol wok em ol narapela inap luksave long en. Kain olsem: Yumi mas wok yet long autim tok long Kingdom Bilong God na kamapim ol disaipel. Na tu, “yumi mas mekim gutpela pasin long olgeta man, tasol moa yet long ol wanbilip.” (Gal. 6:10) Yumi mas wok strong long “rausim olpela bel wantaim ol pasin bilong en.”—Kol. 3:5, 8-10. w16.10 4:11, 12

Olgeta samting long ples antap na long graun i wok gut wantaim. Dispela i soim klia olsem Jehova i laik bai ol manmeri bilong em i mas oganaisim gut wok bilong ol. Olsem na God i stretim rot long yumi inap i gat Baibel long stiaim yumi. Sapos God i no oganaisim ol samting na putim ol lo, laip bilong yumi bai pulap long pen na hevi. Lain Israel bilong bipo i oganaisim gut olgeta samting ol i mekim. Lo Bilong Moses i stiaim ol long oganaisim wok, olsem na “ol meri i save wok long dua bilong haus sel bilong bung wantaim God.” (Kis. 38:8) Bihain, King Devit i oganaisim ol Livai na ol pris na tilim ol long ol grup. (1 Sto. 23:1-6; 24:1-3) Kongrigesen Kristen long taim bilong ol aposel i oganaisim ol samting ol i mekim, na ol i kisim helpim long tok i kam long gavening bodi—ol aposel i stap olsem gavening bodi. (Apo. 6:1-6) Ol i raitim ol pas we i kamapim tok kaunsel na instraksen bilong stiaim ol Kristen.—1 Tim. 3:1-13; Tai. 1:5-9. w16.11 2:3, 6, 8, 9

Long 607 B.C.E., King Nebukatnesar Namba 2 i bringim bikpela lain ami bilong Babilon na ol i go daunim taun Jerusalem. Baibel i stori long bikpela bagarap i kamap na i tok: “[Nebukatnesar] i kilim i dai ol yangpela man bilong Juda long olgeta hap bilong Jerusalem na long haus bilong Bikpela yet. King i no sori liklik long ol Juda. Nogat tru. Ol Babilon i kilim i dai ol yangpela man na meri na ol lapun na ol lapun tru, klostu i laik i dai. . . . Ol Babilon i kukim haus bilong God na haus bilong king wantaim olgeta bikpela haus bilong Jerusalem. Na ol i bagarapim olgeta gutpela gutpela samting bilong taun na ol i brukim banis bilong taun olgeta.” (2 Sto. 36:17, 19) I no gat wok long ol manmeri long Jerusalem i kirap nogut long dispela hevi. Inap planti yia paslain, ol profet bilong God i givim tok lukaut long ol Juda olsem sapos ol i wok yet long sakim Lo Bilong God, ol bai karim hevi long han bilong ol Babilon. Planti manmeri bilong lain Juda bai dai long rot bilong bainat, na ol manmeri husat i stap laip yet, ol bai i go kalabus long Babilon inap long laip olgeta bilong ol. w16.11 4:1, 2

Adam em dispela “wanpela man” husat i mekim sin, na long rot bilong em “dai i painim olgeta manmeri.” Olsem na “rong bilong wanpela man i mekim na dai i stap olsem king.” Pol i tok moa olsem God i soim “bikpela pasin helpim . . . long rot bilong wanpela man, em Jisas Krais.” (Rom 5:12, 15, 17) Long dispela rot, olgeta lain manmeri inap kisim helpim. “Wanpela man [Jisas] i bin bihainim tok, na long dispela pasin planti manmeri i kamap stretpela manmeri.” Bikpela pasin helpim bilong God inap “kamapim laip oltaim long rot bilong Jisas Krais.” (Rom 5:19, 21) Jehova i no gat wok long salim Pikinini bilong em i kam long graun long givim pe bilong baim bek yumi. Na tu, yumi ol sinman long graun i no mekim wanpela gutpela samting na bai i stret long God na Jisas i redim pe bilong baim bek yumi na lusim rong bilong yumi. Olsem na taim God i fogivim yumi na opim rot bilong yumi long kisim laip oltaim, dispela em pasin helpim we yumi no gutpela inap long kisim. Bikpela pasin helpim bilong God i olsem presen em i givim long yumi, olsem na yumi mas tingim tru dispela pasin na larim dispela i stiaim wokabaut bilong yumi long olgeta wan wan de. w16.12 1:1, 6, 7

Yumi mas skelim ol samting yumi mekim. Pol i tok: “Sapos tingting bilong man i stap long ol laik bilong bodi, orait dispela man bai dai.” (Rom 8:6) Dispela em bikpela hevi tru—long nau man bai dai long sait bilong bilip, na bihain em bai dai tru tru. Tok bilong Pol i no makim olsem man bai i no gat rot long abrusim dai sapos em i putim “tingting” bilong em i go “long ol laik bilong bodi.” Em inap senisim pasin bilong em. Tingim man long Korin husat i bihainim “laik bilong bodi” na kongrigesen i rausim em. Bihain, em i senisim pasin na lusim pasin bilong bihainim laik bilong bodi, na em i kirap gen long bihainim stretpela pasin. (2 Kor. 2:6-8) Dispela man long Korin i senisim pasin, olsem na ol Kristen long nau tu inap senisim pasin bilong ol, na moa yet em ol man husat i no mekim ol bikpela rong olsem dispela man long Korin. Pol i tok bikpela hevi bai painim man husat “i tingting long ol samting bilong bodi,” olsem na dispela i mas kirapim ol Kristen long senisim ol pasin we i no stret! w16.12 2:5, 12, 13

Yumi amamas tru olsem yumi inap putim olgeta hevi bilong yumi long han bilong Jehova, na ‘bai em i strongim yumi’! Yumi ken bilip tru olsem “God inap mekim ol samting i winim tru ol samting [yumi] askim o tingting long en.” (Efe. 3:20) God bai mekim planti samting moa “i winim tru” olgeta narapela samting! Sapos yumi laik kisim blesing long bihain, yumi mas bilip tru long Jehova na no ken holim 2-pela tingting, na yumi mas bihainim tok bilong em. Moses i tokim lain Israel: “God, Bikpela bilong yumi, bai i mekim gut long yupela long dispela kantri em i laik givim long yupela . . . sapos yupela i harim gut tok bilong Bikpela na bihainim olgeta tok nau mi givim yupela. Bikpela bai i mekim gut long yupela olsem em i bin promis.” (Lo 15:4-6) Olsem wanem? Yu bilip tru olsem Jehova bai blesim yu sapos yu stap gut yet long mekim wok bilong em? I stret long yu holim dispela bilip. w16.12 4:8, 9

God i no mekim nating dispela samting. Planti handret yia paslain em i mekim dispela tok promis long Abraham, na nau em i truim dispela tok promis. (Stt. 22:15-18) Taim Jehova i yusim fridom bilong em, oltaim em i bihainim pasin laikim na stretpela pasin. Em i mekim olsem taim em i stretim lain Israel—planti taim ol i givim baksait long lotu i tru. Taim ol i tanim bel tru, Jehova i soim pasin laikim na marimari long ol na i tok: “Bai mi kisim bek ol dispela manmeri i bin lusim mi. Bai mi laikim ol long bel bilong mi olgeta.” (Hos. 14:4) Jehova i yusim fridom bilong em long helpim ol narapela, na yumi ken bihainim gutpela pasin bilong em! Taim Jehova i wokim ol ensel na ol man, em i larim ol i stap fri long mekim disisen bilong ol yet. Jisas em fes ensel long kisim fridom bilong mekim disisen bilong em yet. God i wokim em pastaim na em fesbon Pikinini na “piksa tru bilong dispela God ol man i no inap lukim.” (Kol. 1:15) Taim Jisas i stap long heven, em i mekim disisen long i stap gut long Papa na em i no bihainim Satan long mekim pasin bikhet. w17.01 2:3, 4

Ol senis i kamap long laip inap opim rot bilong yumi long mekim bikpela wok moa o liklik wok tasol long wok bilong Kingdom. Olsem wanem? Yu stap yangpela yet o yu lapun? Yu gat gutpela helt? Jehova i save skelim ol dispela samting na givim wok i stret long sindaun bilong yumi. Em i laik bai yumi mekim wok inap long skel bilong yumi, na em i save amamas long wok yumi mekim. Jisas i kisim amamas long olgeta asainmen em i mekim, na yumi tu inap kisim amamas long olgeta asainmen bilong yumi. (Snd. 8:30, 31) Sapos man i gat pasin daun, em i no inap pilim olsem ol asainmen bilong em long kongrigesen i putim presa long em. Em i no inap tingting planti long wanem kain asainmen em bai kisim long bihain, na em i no inap bel hevi sapos ol narapela i kisim wok insait long kongrigesen na em yet nogat. Em bai tingim wok em i mekim olsem wok i kam long Jehova, olsem na em bai mekim gut dispela wok na kisim amamas long en. Na tu, em bai rispektim wok em Jehova i givim long ol narapela. Pasin daun i save kirapim yumi long givim biknem long ol narapela na sambai long ol.—Rom 12:10. w17.01 3:13, 14

Long nau, ating sampela yangpela i go pas long stiaim ol wok we sampela lapun i insait long en. Ol dispela yangpela inap mekim gutpela disisen sapos ol i putim yau taim ol lapun i givim skultok na stori long ekspiriens bilong ol long mekim wok. Timoti em yangpela man, na em i wok wantaim aposel Pol inap planti yia. Pol i salim pas i go long ol Kristen long Korin na em i tok: “Mi salim Timoti i kam long yupela. Em i pikinini bilong mi na em i save mekim wok bilong Bikpela na mi laikim em tumas. Em bai kirapim yupela long tingim pasin bilong mi long mekim wok bilong Krais Jisas.” (1 Kor. 4:17) Dispela sotpela tok i kamapim klia olsem Pol na Timoti i wok bung wantaim. Pol i bin lusim sampela haptaim long skulim Timoti long “pasin” bilong em. Timoti i lain gut tru long mekim wok na Pol i laikim em, na Pol i bilip tru olsem Timoti inap helpim tru ol Kristen long Korin long sait bilong bilip. Ol elda i ken bihainim pasin bilong Pol na trenim ol narapela brata long i go pas long mekim wok insait long kongrigesen. w17.01 5:13, 14

Jehova i laik bai ol manmeri i stap laip, na em i no laik bai ol i dai. God em i as bilong laip, olsem na em i kamap Papa bilong ol manmeri husat i kirap bek. (Sng. 36:9) Olsem na i stret tru long Jisas i skulim yumi long beten na tok: “Papa bilong mipela long heven.” (Mat. 6:9) Jehova i makim Jisas long mekim bikpela wok bilong kirapim bek ol daiman. (Jon 6:40, 44) Long Paradais, Jisas bai truim tok bilong em olsem “kirap bek em mi yet na laip em mi yet.” (Jon 11:25) Jehova i save helpim olgeta kain manmeri. Jisas i tok: “Man o meri husat i bihainim laik bilong God, dispela man o meri em i brata na susa na mama bilong mi.” (Mak 3:35) God i laik bai “bikpela lain manmeri” bilong olgeta kantri na olgeta lain na olgeta tokples i lotuim em. Ol lain i bilip long pe bilong Krais long baim bek man na ol i mekim laik bilong God, ol bai singaut olsem: “God bilong mipela i sindaun long sia king, na Pikinini Sipsip, tupela i kisim bek mipela.”—Rev. 7:9, 10. w17.02 2:10, 11

Long 1884, ol i kamapim koporesen bilong Zion’s Watch Tower Tract Society, na dispela i helpim ol long kamapim ol tok bilong Baibel long narapela narapela tokples, na Charles Taze Russell i stap olsem presiden. Em i stadi gut long ol tok bilong Baibel, na em i no pret long tokaut olsem bilip bilong God Triwan na spirit i no save dai em ol tok giaman. Em i luksave olsem ol man i no inap lukim Krais long ai tru bilong ol taim em i kam bek, na “haptaim bilong ol manmeri bilong ol arapela lain” bai pinis long 1914. (Luk 21:24) Brata Russell i givim bikpela haptaim, strong, na mani bilong em long mekim wok bilong autim ol dispela tok long ol narapela. Jehova na Jisas i yusim Brata Russell long mekim dispela wok. Brata Russell i no laik bai ol man i givim biknem long em. Long 1896, em i tok: “Mipela i no laik bai ol manmeri i litimapim nem bilong mipela na ol tok mipela i raitim, na tu, mipela i no laik bai ol i kolim mipela olsem Reveren o Rabai. Mipela i no laik bai ol manmeri i yusim nem bilong mipela olsem nem bilong grup bilong ol.” Bihain em i tok: “Dispela em i no wok bilong ol man.” w17.02 4:8, 9

Yumi olgeta i mas mekim disisen long planti samting. I no olsem oltaim yumi mekim disisen long ol bikpela samting tasol, nogat. Planti disisen bilong yumi inap helpim yumi o kamapim hevi. Taim yumi mekim ol gutpela disisen, dispela inap helpim yumi long i stap gut na i stap bel isi, na yumi no paul nabaut, kros, o bel hevi. Wanem samting bai helpim yumi long mekim gutpela disisen? Yumi mas bilip long God, na no ken holim 2-pela tingting long pasin bilong em long redi long helpim yumi long bihainim savetingting. Yumi mas bilip tu long Baibel na pasin bilong Jehova long mekim ol samting, na trastim ol stiatok bilong em. (Jems 1:5-8) Taim yumi go klostu long God na laikim moa yet tok bilong em long Baibel, yumi bai trastim ol tok bilong em. Yumi bai kisim pasin bilong skelim Tok Bilong God paslain long yumi mekim ol disisen. w17.03 2:2, 3

Jehosafat i bihainim pasin bilong papa bilong em Asa, na em i stap gut yet long God maski ol strongpela birua i laik pait long em. (2 Sto. 20:2-4) Em tru olsem Jehosafat i pret! Maski i olsem, “em i gat strongpela tingting bilong painimaut laik bilong Bikpela.” Em i beten na tokim God olsem “bikpela lain ami i laik pait” long ol, na em na lain bilong em i pilim olsem ol “i no gat strong bilong pait long ol.” Em i bilip strong long Jehova na mekim tok i stap long teks bilong nau. Sampela taim, yumi inap pilim wankain olsem Jehosafat; yumi pret na yumi no save long wanem samting yumi mas mekim. (2 Kor. 4:8, 9) Tasol tingim, Jehosafat i beten long ai bilong ol manmeri na tokaut olsem em na ol manmeri bilong em i pilim olsem ol i no gat strong. (2 Sto. 20:5) Ol het bilong famili i ken bihainim pasin bilong Jehosafat na askim Jehova long stiaim ol na strongim ol long karim hevi. No ken pilim sem long famili bilong yu bai harim kain beten olsem. Ol bai luksave olsem yu trastim Jehova. God i bin helpim Jehosafat, na em bai helpim yu tu. w17.03 3:12, 13