Novemba

Satan i sutim tok olsem ol man i mekim wok bilong Jehova bikos ol i tingim laik bilong ol yet. (Jop 2:4, 5) Yu ting Satan i lusim pinis dispela pasin? Nogat tru! Ol i rausim Satan long heven, na Baibel i kolim em olsem “man bilong kotim ol brata bilong yumi, em i save kotim ol long ai bilong God long san na long nait.” (Rev. 12:10) Satan i no lusim tingting long tok em i sutim long ol wokman bilong God. Em i laik tru bai yumi pundaun long traim na sakim wok bos bilong God. Taim bikpela hevi i painim yu, piksaim dispela samting: Satan na ol bikhet ensel i stap long wanpela sait na ol i poinim pinga long yu na tok olsem yu bai givap long karim hevi na yu bai pundaun long traim. Tasol long narapela sait yu lukim Jehova, Pikinini bilong em husat i mekim wok king, ol Kristen God i makim em ol i kirap bek pinis, na planti milion ensel. Ol i sapotim yu bikos long olgeta de, yu sanap strong na karim hevi na sapotim wok bos bilong Jehova. Tingim olsem Jehova i toktok long yu na em i kamapim tok i stap long teks bilong nau. w16.04 2:8, 9

Sapos ol i helpim yu na yu stretim hevi, orait yu bai “kisim bek brata bilong yu.” Tasol sapos yu traim planti taim long stretim dispela hevi na hevi i stap yet, orait yu mas toksave long ol elda. Wan wan taim tasol ol brata i bihainim olgeta 3-pela rot i stap long Matyu 18:15-17. Dispela i makim olsem paslain long hevi i kamap bikpela na man i raus long kongrigesen, ol i save painim rot bilong stretim kwik ol hevi. Planti taim, man i luksave long rong em i mekim na em i save stretim hevi. Taim em i mekim olsem, man em i rongim bai luksave olsem i no gat wok moa long sutim tok long dispela man, na em bai fogivim dispela man. Maski wanem kain hevi i kamap namel long 2-pela Kristen, tok bilong Jisas i makim olsem i no gat wok long toksave kwik long kongrigesen long dispela hevi. Yupela i ken toksave long ol elda sapos yupela i bihainim pinis narapela 2-pela rot em Jisas i kolim na sapos yupela i gat evidens bilong stori gut long hevi i kamap. w16.05 1:15, 16

Sapos yumi laik stap daun long Kingdom bilong God, orait yumi mas sakim ol wok politik na woa. Long dispela rot, yumi inap i gat klinpela maus bilong bel taim yumi autim gutnius olsem Kingdom Bilong God tasol bai pinisim ol hevi. Yumi no ken bihainim pasin bilong ol lotu giaman, em ol i save insait long ol wok politik na brukim lain. Lotu i tru i lukautim yumi olgeta bratasista long pas gut wantaim na yumi no insait long ol wok politik na ol woa. (1 Pita 2:17) Klostu nau ol wok nogut bilong Satan bai pinis, olsem na ol man bai birua long yumi taim yumi no insait long ol wok politik na ol woa. Dispela graun i pulap long ol manmeri husat “i no laik kamap wanbel” na ol i gat “strongpela het,” olsem na pasin bilong brukim lain bai i go bikpela moa. (2 Tim. 3:3, 4) Long sampela kantri, wok politik i go bikpela moa na ol man i birua long ol bratasista bikos ol i no laik insait long ol dispela samting. Olsem wanem? Yu luksave olsem em i bikpela samting long yumi mas strongim bilip bilong yumi long nau? Sapos yumi no strongim bilip bilong yumi long nau, yumi inap insait long ol wok politik na ol pait, na dispela bai bagarapim pasin bilong yumi long sanap strong long bilip. w16.04 4:3, 4

Sampela i pilim olsem yumi ken bihainim laik bilong yumi yet. Tasol sapos yumi laik mekim gutpela disisen em Jehova i amamas long en, yumi mas skelim na bihainim ol lo na ol stiatok i stap long Baibel. Olsem, sapos yumi laik bai God i orait long yumi, yumi mas bihainim lo bilong em long sait bilong blut. (Stt. 9:4; Apo. 15:28, 29) Pasin bilong beten bai helpim yumi long mekim ol disisen i stret wantaim ol stiatok na ol lo bilong Baibel. Ol bikpela disisen inap helpim o nogutim yumi long sait bilong bilip. Olgeta disisen yumi mekim bai strongim o bagarapim pasin pren bilong yumi wantaim Jehova. Sapos yumi no mekim gutpela disisen, dispela inap bagarapim bilip bilong ol narapela, pundaunim ol, na bagarapim pasin wanbel insait long kongrigesen. Tru tumas, yumi mas skelim gut ol disisen yumi mekim.—Rom 14:19. w16.05 3:4, 5

Jehova i save amamas taim yumi wok strong long “yusim gut taim” bilong yumi long ritim Baibel long olgeta taim na mekim pesenel stadi. (Efe. 5:15, 16) Ating yumi no gat taim long ritim na skelim gut olgeta buk na nius bilong yumi. Tasol hevi inap painim yumi sapos yumi no was gut. Sapos yumi holim tingting olsem tok bilong sampela buk i bilong ol narapela lain tasol, yumi inap lus long kisim helpim. Olsem wanem sapos wanpela hap bilong Baibel i no stret long laip bilong yumi? O, olsem wanem sapos wanpela pablikesen i bilong helpim narapela lain, na i no bilong helpim yumi? Yumi save lukluk nating long ol tok bilong en, o yumi save abrusim olgeta? Sapos yumi mekim olsem, yumi inap lus long kisim ol tok we inap helpim tru yumi. Yumi olgeta i mas tingim olsem, God yet i save kamapim ol tok bilong helpim yumi long pas gut wantaim em. w16.05 5:5, 6

Jehova i yusim kongrigesen Kristen na ol elda long stretim stretim yumi olgeta wan wan inap long skel bilong yumi. Kain olsem, sapos ol elda i luksave olsem yumi gat hevi long sait bilong bilip, ol i no inap yusim save bilong ol yet long stretim yumi, nogat. Ol i save beten askim God long stiaim ol long bihainim savetingting taim ol i stretim yumi. Ol elda i save tingim ol samting ol i beten long en na skelim ol tok bilong Baibel na ol pablikesen bilong yumi. Taim ol i mekim olsem, dispela i redim ol long helpim yumi. Taim yumi kliagut long ol rot bilong God long stretim stretim yumi, dispela inap helpim yumi long pas gut wantaim ol wanbilip, na holim stretpela tingting long ol manmeri long teritori na ol Baibel sumatin bilong yumi. God i no save fosim man long mekim ol senis, nogat. Em i save kamapim klia ol stretpela lo bilong em bambai man yet i ken luksave na stretim ol pasin bilong em. w16.06 1:13, 14

Aposel Jon i tok lukaut olsem man i laikim ol samting bilong dispela graun—“laik nogut bilong bel na pasin bilong aigris na pasin bilong hambak long mani kago”—orait “pasin bilong laikim Papa i no stap long em.” (1 Jon 2:15, 16) Dispela i makim olsem oltaim yumi mas skelim gut bel bilong yumi na painimaut sapos yumi save laikim ol amamas bilong graun, ol poroman ausait, na ol stail bilong bilas em ol manmeri bilong graun i save bihainim. Na tu, sapos man i laikim ol samting bilong dispela graun, em inap go long bikpela skul bambai em inap kisim “ol gutpela samting.” Yumi stap pinis long dua bilong i go insait long nupela taim em God i bin tok promis long kamapim. Olsem na em i bikpela samting long yumi mas tingim strongpela tok bilong Moses long Lo 6:4! Sapos yumi kliagut na bilip tru olsem Jehova “em wanpela tasol em i God bilong yumi,” yumi bai mekim olgeta samting yumi inap mekim long lotuim em wanpela tasol long pasin em i laikim.—Hib. 12:28, 29. w16.06 3:14

Sapos yu askim ol man long kolim ol samting ol i nidim, ol bai kolim sampela samting tasol, na sapos yu askim ol long kolim ol samting ol i laikim, ol bai kolim planti samting moa. Planti man i no gat stretpela save long samting ol i nidim na samting ol i laikim. “Samting yu nidim” em ol samting yu mas i gat bambai yu inap i stap laip. Kain olsem, kaikai, klos, na haus. “Samting yu laikim” em ol samting yu no inap mekim wok long en long olgeta taim yu stap laip. Long wanpela kantri, ol manmeri inap laikim ol samting em ol manmeri long narapela kantri i no laikim. Long ol kantri i no gat planti wok bisnis, planti manmeri i laik kisim mani bilong baim fon, motobaik, o hap graun bilong i stap long en. Long ol kantri i gat planti mani, ol man i laik baim bikpela haus, na klos na kar i gat bikpela pe. Maski yumi stap long wanem kantri, hevi inap painim yumi—yumi inap kisim laik bilong bungim planti mani kago, maski yumi nidim o nogat, na maski yumi gat mani o nogat.—Hib. 13:5. w16.07 1:1-3

Planti manmeri i larim ol samting bilong wan wan de i mekim na ol i no pilim olsem ol i “hangre long kisim save long God.” (Mat. 5:3) Tingting bilong ol i pas tru long mani kago bilong dispela graun, olsem na ol i kisim “laik nogut bilong bel na pasin bilong aigris.” (1 Jon 2:16) Yumi mas sakim tingting bilong dispela graun, na larim spirit bilong God i stiaim yumi. Jehova i yusim spirit bilong em long helpim yumi long kliagut long ol bikpela samting bai kamap klostu nau. (1 Kor. 2:12) Tasol yumi save olsem sapos yumi lusim bikpela haptaim long mekim ol nomol samting yumi save mekim long laip bilong yumi na yumi no mekim wok lotu, dispela inap mekim yumi slip long sait bilong bilip. (Luk 21:34, 35) Taim ol narapela i lukim olsem yumi wok long was i stap, ol inap tok bilas long yumi, tasol dispela i no ken pasim yumi long tingim olsem taim i sot pinis. (2 Pita 3:3-7) Oltaim yumi mas bung wantaim ol wanbilip Kristen long ol miting bilong kongrigesen, em ples we spirit bilong God i stap long en. w16.07 2:13, 14

Planti man i save beten bikos dispela pasin i mekim ol i stap bel isi, tasol ol i no bilip olsem God i save harim beten bilong ol. Ol i mas save olsem Jehova em Man bilong “harim beten.” Jisas i tokim ol disaipel bilong em: “Olgeta samting yupela i askim long nem bilong mi, bai mi mekim.” (Jon 14:14) Taim Jisas i tok, “olgeta samting,” dispela i makim ol samting i stret wantaim laik bilong Jehova. Jon i tok: “Bilip yumi gat long em i olsem, maski wanem wanem samting yumi askim em long en na i stret wantaim laik bilong em, em bai harim yumi.” (1 Jon 5:14) Em i gutpela samting tru long skulim ol narapela olsem beten em gutpela rot bilong “i go klostu long sia king bilong God husat i save mekim bikpela pasin helpim long yumi”! (Hib. 4:16) Taim yumi skulim ol long beten long stretpela wei, na beten long Man yumi mas beten long em, na beten long ol samting i stret, yumi inap helpim ol long i go klostu long Jehova na kisim bel isi long taim bilong hevi.—Sng. 4:1; 145:18. w16.07 4:11, 12

Olgeta Witnes Bilong Jehova i holim wankain tingting olsem Devit. Tasol olsem wanem sapos yu sik o yu lapun na yu no inap mekim bikpela wok bilong autim tok? Oltaim yu mas tingim olsem taim yu autim gutnius long ol lain i lukautim yu na ol narapela, wok bilong yu i litimapim nem bilong God. Sapos yu laik holimpas bilip bilong yu na long dispela risen ol i kalabusim yu, na rot i op na yu autim tok long ol narapela, dispela i save mekim Jehova i belgut. (Snd. 27:11) Sapos famili bilong yu i stap long ol narapela lotu, tasol yu bihainim yet sediul bilong yu long mekim wok lotu, dispela tu i save mekim God i amamas. (1 Pita 3:1-4) Maski sapos bikpela hevi i painim yu, i gat rot long yu inap litimapim nem bilong Jehova na kamap strong moa long bilip. Jehova bai blesim yu sapos yu wok yet long autim tok bilong em. w16.08 3:19, 20

Dispela i no makim olsem meri i no gat nem na em i kamap olsem samting nating, nogat. Stiatok bilong Baibel bai helpim maritmeri long mekim gut wok em God i laik bai em i mekim. Taim God i wokim fes meri, em i tok: “Em i no gutpela long dispela man [Adam] i stap wanpis. Mi mas mekim kamap wanpela poroman bilong helpim em.” (Stt. 2:18) “Krais i stap het bilong kongrigesen” na em i laikim kongrigesen, na olsem tasol, maritman i stap het bilong meri na em i mas bihainim pasin laikim. Taim maritman i mekim olsem, meri bai pilim olsem em i stap gut, em bai rispektim man, helpim em, na stap daun long em. Sapos yumi laik bihainim eksampel bilong Jisas, orait yumi mas laikim narapela narapela wankain olsem em i laikim yumi. (Jon 13:34, 35; 15:12, 13; Efe. 5:25) Pasin laikim namel long ol marit Kristen i mas strong tru; em pasin laikim we inap kirapim wanpela long givim laip bilong em long helpim narapela. w16.08 2:3, 4

Ol gutpela tok bilong yu inap strongim ol arapela na kirapim ol long mekim ol gutpela wok. Yu inap helpim ol long givim bel olgeta long mekim wok bilong Jehova. Taim yu bekim gut ol tok long miting, dispela inap strongim tru ol narapela. Jehova i strongim Nehemia na ol wanwok bilong em long sanapim banis. Ol i pinisim banis bilong Jerusalem insait long 52 de tasol! (Neh. 2:18; 6:15, 16) Nehemia i no bosim tasol ol man i mekim wok, nogat. Em yet i insait tu long wok bilong sanapim banis bilong Jerusalem. (Neh. 5:16) Olsem tasol, planti elda i soim pasin laikim na ol i bihainim pasin bilong Nehemia na ol yet i mekim wok bilong klinim na mekim meintenens long Haus Kingdom. Taim ol i autim tok wantaim ol narapela pablisa, na mekim sepeding visit, dispela tu bai strongim ol arapela husat i stap bel hevi.—Ais. 35:3, 4 w16.09 1:15, 16

Lain bilong God i wok strong long bihainim dispela tok bilong Baibel: “Yupela i mas kilim i dai ol laik i stap long ol hap bilong bodi bilong yupela, olsem pasin pamuk, pasin i no klin, bel i kirap.” (Kol. 3:2, 5) Ol wanbilip bilong yumi i laik bihainim dispela stiatok, olsem na yumi no ken putim hevi long ol. Ol brata na sista husat i bihainim ol dispela pasin nogut long bipo na ol i lusim ol dispela pasin, ating ol i pait yet long daunim ol laik nogut bilong bodi. (1 Kor. 6:9, 10) Yumi no laik mekim na bai ol i hatwok moa yet long daunim ol laik nogut. Taim yumi stap wantaim ol bratasista, bilas bilong yumi i mas strongim olgeta long kongrigesen long bihainim klinpela pasin. Yumi stap fri long makim wanem kain klos yumi laik werim. Maski i olsem, yumi olgeta i gat wok long werim ol klos we bai helpim ol narapela long bihainim klinpela pasin, na bihainim ol lo bilong God long stap holi long tingting, toktok, na pasin.—1 Pita 1:15, 16. w16.09 3:9, 10

Tupela marit long Frans i tok: “Maski mipela i bilip long Jehova, dispela i no makim olsem ol pikinini tu bai bilip.” Tupela i tok moa: “Bilip em i no samting ol pikinini bai kisim nating long papamama, nogat. Isi isi ol bai lain long pasin bilong bilip.” Wanpela brata long Australia i tok: “Bikpela wok bilong papamama em long helpim pikinini long kisim pasin bilong bilip. . . . Ating yu pilim olsem yu bekim gut wanpela askim bilong pikinini. Tasol bihain em bai mekim gen wankain askim! Maski yu bekim gut askim bilong pikinini long nau, long neks de em bai laik painimaut long sampela samting moa. Olsem na i gat sampela samting em oltaim yu mas toktok wantaim pikinini long en.” Sapos yu papa o mama, ating sampela taim yu pilim olsem yu no fit long skulim na trenim pikinini long kisim pasin bilong bilip. Yumi no inap mekim dispela wok long save bilong yumi yet! (Jer. 10:23) Yumi inap mekim gut dispela wok sapos yumi askim God long helpim yumi. w16.09 5:1, 2

Ol lain i kam long narapela kantri bai traim bes long bihainim nupela kalsa. Rut i soim gutpela pasin ol narapela i ken bihainim. Namba 1: Rut i soim rispek long kastam bilong nupela kantri em i stap long en na em i askim long kisim tok orait long kolektim ol hap kaikai long gaden. (Rut 2:7) Taim Rut i kisim tok orait, em i no tingim dispela olsem samting nating na pilim olsem ol narapela i gat wok long lukautim em, nogat. Namba 2: Rut i tok tenkyu long gutpela pasin ol narapela i mekim long em. (Rut 2:13) Taim ol manmeri i go nupela long wanpela kantri na ol i bihainim kain pasin olsem, ol asples na ol wanbilip bai rispektim ol. Yumi amamas tru olsem Jehova i mekim bikpela pasin helpim na em i opim rot long olgeta kain man i ken harim gutnius. Long kantri bilong ol, ating i no gat rot long ol inap mekim Baibel stadi o bung wantaim lain bilong Jehova. Tasol nau rot i op na ol i bung wantaim yumi, olsem na yumi mas helpim ol bambai ol i pilim amamas long stap wantaim yumi. w16.10 1:17-19

Planti milion manmeri husat i lotuim God long nau, ol i bihainim pasin bilong Jisas na ol i tingim gut ol samting ol i bilip na wet long en na ol i no larim ol hevi i daunim bilip bilong ol. Tingim Brata Rudolf Graichen. Mama i karim em long Jemani long 1925. Em i tingim bek ol piksa insait long haus bilong ol—em ol piksa bilong ol samting em Baibel i stori long en. Em i tok: “Long wanpela piksa, pikinini sipsip i stap wantaim wel dok, pikinini meme i stap wantaim lepat, na pikinini bulmakau i stap wantaim laion—olgeta i stap bel isi na liklik mangi i bosim ol. . . . Mi no lusim tingting long ol samting mi lukim long dispela piksa.” (Ais. 11:6-9) Inap planti yia, Rudolf i karim hevi long han bilong lain Gestapo—polis bilong lain Natsi. Bihain, em i karim hevi long han bilong lain Stasi—polis bilong gavman Komiunis long Is Jemani—tasol Rudolf i bilip strong olsem dispela graun bai kamap Paradais. Planti moa hevi i painim Rudolf. Mama bilong em i stap long kalabus nogut long Ravensbrück, na em i kisim sik taifas na em i dai. Na tu, papa bilong em i kamap slek long bilip na em i sainim pepa bilong tokaut olsem em i no stap moa olsem wanpela Witnes Bilong Jehova. w16.10 3:12-14

Ol wokman bilong Jehova i rispektim tru Baibel, em Buk Bilong God. Yumi olgeta i sinman, olsem na yumi save kisim tok kaunsel i kam long Baibel. Yumi bai mekim wanem taim yumi kisim tok kaunsel? Tingim stori bilong Yuodia na Sintike. Bikpela hevi i kamap namel long dispela 2-pela meri em God i makim long holi spirit. Dispela hevi namel long Yuodia na Sintike inap bagarapim bel isi insait long kongrigesen. Baibel i no stori long samting i kamap bihain, tasol yumi ken ting olsem dispela 2-pela sista i bihainim tok kaunsel bilong aposel Pol. (Fili. 4:2, 3) Long nau, kain hevi olsem i save kamap namel long ol manmeri bilong Jehova. Tasol yumi inap stretim na abrusim ol dispela kain hevi sapos yumi bihainim tok kaunsel i stap long Baibel, em Tok Bilong God. Sapos yumi rispektim tru Buk Bilong Jehova, yumi bai bihainim ol tok bilong en.—Sng. 27:11. w16.11 3:1-3

Yumi olgeta i nidim ol narapela long strongim yumi. Ol pikinini i nidim ol narapela long strongim ol. Timothy Evans em wanpela saveman na em i tok: “Ol pikinini . . . i nidim ol narapela long strongim ol wankain olsem ol plaua i nidim wara. Taim ol pikinini i kisim ol tok bilong strongim ol, ol bai pilim olsem ol i gat nem na ol narapela i amamas long ol.” Tasol yumi stap long taim nogut bilong planti hevi. Ol manmeri i tingim laik bilong ol yet tasol, na ol i no gat pasin bilong laikim ol wanfamili, na ol i no gat pasin bilong strongim narapela. (2 Tim. 3:1-5) Satan i laik mekim yumi bel hevi bikos em i save olsem dispela inap mekim na yumi kamap slek long sait bilong bilip. Jop em man bilong bihainim stretpela pasin, olsem na Satan i kamapim ol hevi bilong daunim bilip bilong Jop, tasol Jop i no lusim bilip. (Jop 2:3; 22:3; 27:5) Yumi inap winim Satan taim yumi mekim gutpela tok bilong strongim ol wanfamili bilong yumi na ol bratasista long kongrigesen. Taim yumi mekim olsem, dispela inap helpim yumi long pilim olsem Haus Kingdom em ples we yumi inap stap bel isi na amamas. w16.11 1:4, 6

Long ol yia bihain long 1500 C.E., sampela man i strongim bel na ol i trensletim Tok Bilong God i go long ol tokples bilong ol man nating. Taim ol man i trensletim ol tok bilong Baibel, ol manmeri i ritim ol tok bilong en na ol i laik save: ‘Wanem hap bilong Baibel i stori long klinpaia, pasin bilong baim ol pris pasto long mekim fiuneral, na wok bilong ol pop na ol kadinal?’ Ol dispela askim i kamapim bikpela hevi insait long lotu. Ol lida bilong lotu i pilim olsem i no stret long ol manmeri i givim ol dispela askim long ol! Lotu i tok ol manmeri i laik kamapim lotu bilong ol yet, olsem na ol i sakim bilip bilong lotu. Lotu i putim lo bilong kilim i dai man i mekim rong, na gavman i bihainim dispela lo. Ol i mekim olsem bilong stopim ol man long ritim Baibel na kwestenim bilip bilong lotu. Dispela lo i pretim planti man. Tasol sampela manmeri i no pret long dispela lo. Ol i kisim sampela save long Tok Bilong God, na ol i laik kisim planti save moa! w16.11 4:13

Ol Kristen i mas bihainim onest pasin. (Efe. 4:25) Satan em “papa bilong pasin giaman.” Ananaias na meri bilong em i lusim laip bilong ol bikos ol i mekim tok giaman. Yumi no ken bihainim pasin bilong ol—yumi no ken mekim tok giaman. (Jon 8:44; Apo. 5:1-11) Wanem samting moa i mas kirapim yumi long mekim tok tru long olgeta taim? Taim yumi bihainim onest pasin, dispela i soim olsem yumi pilim tru bikpela pasin helpim bilong God. Pasin giaman i makim olsem man i mekim tok i no tru. Tasol i gat sampela samting moa em Jehova i no laik bai ol manmeri bilong em i mekim. God i tokim lain Israel bilong bipo olsem: “Yupela i mas i stap holi. . . . Long wanem, mi God, Bikpela bilong yupela, mi holi.” Em i kolim ol samting ol i mas mekim bilong i stap holi. God i tok: “Yupela i no ken stilim ol samting bilong narapela man, na yupela i no ken giamanim narapela man, bilong pulim ol samting bilong en. Na yupela i no ken tok giaman long narapela man.” (Wkp. 19:2, 11) Wanpela man inap tok olsem em bai mekim tok tru long olgeta taim, tasol sapos em i no was gut, em inap mekim pasin giaman na trikim ol narapela. w16.12 1:17, 18

Long Baibel, yumi inap lukim ol tok bilong Jisas we i givim bel isi long yumi. Ol tok bilong em i givim nupela strong long ol manmeri i putim yau long em. Planti manmeri i bihainim em bikos em i mekim isi bel bilong ol man i bel hevi, na strongim ol man i no gat strong. (Mat. 11:28-30) Em i helpim gut ol manmeri long sait bilong bilip, strongim bel bilong ol, na givim kaikai long ol. (Mak 6:30-32) Jisas i tok promis olsem em bai sambai long yumi. Em bai helpim yumi long wankain pasin olsem em i bin helpim ol aposel. I no olsem yu mas lukim Jisas long ai tru bilong yu na bai yu inap kisim helpim long em, nogat. Jisas i stap King long heven na em i wok yet long pilim hevi bilong yumi. Olsem na taim yumi gat hevi, em inap soim pasin marimari na “mekim bikpela pasin helpim long yumi long taim stret.” Yes, ol skultok bilong Jisas inap helpim yu long karim hevi, daunim pasin bilong pret, na bilip na wet long gutpela samting bai kamap bihain.—Hib. 2:17, 18; 4:16. w16.12 3:4, 6

Noa i stap long taim we ol manmeri i “pait na bikhet” na mekim pasin pamuk. (Stt. 6:4, 9-12) Noa i givim bel tru long autim tok lukaut bilong Jehova long ol manmeri, tasol em i no inap fosim ol long bihainim tok bilong em, na tu, em i no inap mekim Bikpela Tait i kamap hariap. Noa i bilip olsem Jehova bai inapim tok promis bilong Em long taim stret na em bai pinisim pasin nogut. (Stt. 6:17) Yumi stap long taim we pasin nogut i pulap tru long dispela graun, na yumi save olsem Jehova i tok promis pinis long bagarapim ol manmeri nogut. (1 Jon 2:17) Tasol yumi no inap fosim ol manmeri long harim “gutnius bilong Kingdom.” Na tu, yumi no inap mekim “traipela hevi tru” i kamap hariap. (Mat. 24:14, 21) Wankain olsem Noa, yumi mas i gat strongpela bilip olsem klostu nau God bai pinisim ol manmeri i mekim pasin nogut. (Sng. 37:10, 11) Yumi bilip tru olsem Jehova i no inap larim pasin nogut bilong dispela graun i stap longpela taim moa na abrusim taim em i makim pinis long pinisim ol pasin nogut.—Hab. 2:3. w17.01 1:5-7

Planti manmeri i mekim nabaut long fridom bilong ol na ol i bagarapim ol narapela manmeri. Olsem Baibel i tok profet long en, “long taim bilong las de,” ol man “bai i no tok tenkyu.” (2 Tim. 3:1, 2) Yumi no ken mekim nabaut long presen i kam long Jehova o tingim olsem samting nating. Orait, hau bai yumi no ken mekim nabaut long dispela presen? Yumi olgeta i gat fridom long makim husat yumi laik poromanim, wanem kain stail bilong klos na bilas yumi laik werim, na wanem kain amamas yumi laik kisim. Tasol dispela fridom inap “i stap olsem rot bilong mekim pasin nogut” sapos yumi bihainim ol laik nogut bilong yumi yet o yumi bihainim ol pasin doti bilong dispela graun. (1 Pita 2:16) Yumi no ken yusim fridom bilong yumi “long inapim ol laik nogut bilong bel,” nogat. Yumi mas tingting strong long mekim ol disisen we i helpim yumi long bihainim dispela tok: “Yupela i mas mekim olgeta samting bilong givim glori long God.”—Gal. 5:13; 1 Kor. 10:31. w17.01 2:12-14

Stori bilong Nehemia i soim olsem pasin daun inap helpim yumi na yumi no bilip long strong na save bilong yumi yet taim asainmen bilong yumi i senis o yumi kisim sampela moa asainmen. Sapos wanpela elda i bilip long strong na save bilong em yet, em i no inap beten askim Jehova long stiaim em taim em i laik mekim ol wok bilong kongrigesen. Ating ol narapela bai yusim save bilong ol yet long mekim disisen, na bihain ol bai beten askim Jehova long blesim disisen bilong ol. Tasol yu ting ol i bihainim pasin daun? Man i gat pasin daun bai askim God long helpim em, na tu, em bai kisim helpim long ol narapela manmeri bilong God. Taim hevi i kamap, yumi no ken pilim olsem tingting na save bilong yumi yet bai helpim yumi. (Snd. 3:5, 6) Yumi stap long oganaisesen bilong God, olsem na yumi mas tingting long inapim wok bilong yumi insait long famili na kongrigesen, na yumi no ken tingting long kisim namba na biknem.—1 Tim. 3:15. w17.01 4:7, 8

Long pastaim tru, Jehova i wokim ol man bilong i stap laip oltaim long dispela graun. (Stt. 1:28; Sng. 37:29) Em i givim planti gutpela presen bilong helpim Adam na Iv long i stap laip. (Jems 1:17) Jehova i larim ol i stap fri long mekim disisen, na ol inap tingting gut na skelim ol samting, na ol inap laikim narapela narapela na stap olsem ol gutpela pren. God i toktok long Adam na tokim em long ol samting em i mas mekim bilong soim olsem em i bihainim tok bilong God. Adam i kisim skul long olsem wanem em inap lukautim em yet, ol animal, na dispela graun. (Stt. 2:15-17, 19, 20) Na tu, Adam na Iv inap pilim teis bilong ol samting, tatsim ol samting, lukim ol samting, harim nois, na smelim ol samting. Olsem na ol i amamas tru long ol naispela samting i stap long ples paradais ol i stap long en. I gat planti wok tru em Adam na Iv inap mekim na kisim amamas long en, na planti samting tru bilong kisim save long en. Taim Jehova i wokim Adam na Iv, em i redim tupela long kamapim ol pikinini i gutpela olgeta. Dispela graun olgeta bai kamap olsem ples ol bai stap oltaim long en.—Sng. 115:16. w17.02 1:6, 7

Tok Bilong God i mekim wanem long ol man i mekim wok olsem lida? Tingim stori bilong King Josaia. Taim ol man i lukim buk i gat Lo Bilong Moses long en, kuskus bilong Josaia i ritim na Josaia i putim yau. Tok Bilong God i stiaim Josaia na em i mekim bikpela wok long rausim ol god giaman na stretim rot long mekim bikpela bung bilong Pasova—dispela bung i winim ol narapela bung bilong Pasova ol i mekim long bipo. (2 Kin. 22:11; 23:1-23) Tok Bilong God i stiaim Josaia na ol narapela lida, olsem na ol i redi long kamapim ol senis na skulim gut ol manmeri long Tok Bilong God. Ol dispela senis i kirapim lain bilong God long bipo long bihainim laik bilong Em. Tasol i no olgeta king i bosim ol manmeri bilong God long bipo i bihainim ol lo bilong God. Olsem na sampela taim Jehova i givim strongpela tok bilong stretim ol, na sampela taim em i makim narapela man long kisim ples bilong ol na kamap lida. (1 Sml. 13:13, 14) Bihain, God i makim wanpela man long kamap lida, na dispela man i winim tru olgeta narapela man husat i bin stap lida. w17.02 3:11, 12, 14

God i wokim ol manmeri “i kamap olsem [em] yet.” (Stt. 1:27) Olsem na ol manmeri inap kamapim sampela pasin bilong God. Ol manmeri inap soim pasin laikim, pasin helpim, na pasin sori long ol narapela. God i wokim ol man na putim maus bilong bel long ol. Maus bilong bel bai toksave olsem wanpela samting em rait o rong, tru o giaman, na stret o i no stret. Tasol sampela taim maus bilong bel inap giamanim man. (Rom 2:14, 15) Planti manmeri i laikim ol samting i klin na i luk nais. Ol i laik i stap bel isi wantaim ol narapela. Ating ol i no luksave olsem ol i bihainim sampela gutpela pasin bilong Jehova, olsem na i stret long ol narapela i soim rispek na givim ona long ol. Tasol taim yumi laik givim ona long ol narapela manmeri, yumi mas skelim gut wanem kain ona yumi laik givim, na yumi laik givim ona i go inap long wanem mak. w17.03 1:5, 6

God i no save hariap long mekim disisen taim em i belhat, em pasin we planti man i save mekim. Taim Jehova i lukim olsem lain Ninive i tanim bel na senisim pasin nogut bilong ol, em i senisim disisen bilong em. Em i bihainim stretpela tingting, pasin daun, na pasin sori. Ating sampela taim i gutpela long yumi ken skelim gen na senisim disisen yumi mekim pinis. Yumi ken mekim olsem taim sampela senis i kamap. Sampela taim Jehova i senisim disisen bilong em taim senis i kamap. (1 Kin. 21:20, 21, 27-29; 2 Kin. 20:1-5) Yumi ken senisim disisen bilong yumi sapos yumi kliagut moa long sampela samting i kamap. Mefiboset em tumbuna pikinini bilong Sol. Wokboi bilong Mefiboset i mekim tok giaman long King Devit. Bihain, Devit i save olsem dispela tok i no tru, olsem na em i senisim disisen bilong em.—2 Sml. 16:3, 4; 19:24-29. w17.03 2:14, 15

Taim hevi i kamap, yumi mas skelim gut na bihainim ol stiatok bilong Baibel we inap helpim yumi long stretim hevi. Kain olsem, wanpela sista i save olsem em i gat wok long autim gutnius. (Apo. 4:20) Man bilong dispela sista i no stap long tok i tru, olsem na wanpela taim sista i laik i go autim tok, tasol man i laik bai sista i stap long haus. Man bilong sista i tok tupela i no bin lusim sampela haptaim long stap na mekim sampela samting o sampela wok bilong ol yet. Sista inap tingim ol stiatok bilong Baibel i stori long pasin bilong bihainim tok bilong God na kamapim ol disaipel. (Mat. 28:19, 20; Apo. 5:29) Tasol sista i mas tingim tu olsem maritmeri i mas i stap daun long man bilong em na bihainim gutpela tingting. (Efe. 5:22-24) Sista i ken skelim olsem: Man bilong em i tambuim em long mekim wok autim tok, o em i laik bai sista i mekim narapela samting long wanpela de tasol? Em tru olsem yumi mas mekim laik bilong God, tasol yumi no ken mekim samting we bel inap kotim yumi. w17.03 4:17