Epril

Olsem wanem yumi inap kisim helpim long ol elda? Wanpela rot em yumi ken bihainim gutpela eksampel bilong ol na pasin bilong ol long bilip. Narapela rot em long bihainim ol tok kaunsel bilong Baibel ol i givim bilong stretim yumi. (Hib. 13:7, 17) Tingim, ol elda i laikim yumi na ol i laik bai yumi kamap strong long bilip. Kain olsem, sapos ol i luksave olsem yumi no wok long kam long ol miting o yumi no givim bel moa long autim tok, kwiktaim ol bai helpim yumi long kamap strong gen long bilip. Ol bai putim gut yau long yumi, mekim ol gutpela tok bilong strongim yumi, na ol bai yusim ol tok bilong Baibel we i stret long hevi yumi karim. Olsem wanem? Yu luksave olsem helpim yu kisim long ol elda i soim pasin laikim bilong Jehova? Sampela taim ol elda inap pilim hatwok taim ol i stretim yumi. Yu inap mekim wanem bambai ol i no pilim hatwok long givim ol tok bilong stretim yu? Yu mas kisim pasin bilong tok tenkyu, bihainim pasin daun, na stap olsem man o meri em ol narapela inap toktok long em. Yu mas luksave olsem helpim yu kisim long ol elda i soim pasin laikim bilong God. Yu bai stap amamas, na ol elda tu bai amamas long wok ol i mekim. w18.03 31 15-16

Olgeta pikinini i no wankain; sampela i kamap bikpela long tingting paslain long ol narapela. Sampela pikinini i save wokim tingting hariap o ol inap pilim tru ol tok ol i harim, olsem na bel i kirapim ol long winim mak na kisim baptais. Sampela bai i no redi long baptais inap long taim ol i kamap bikpela. Olsem na papamama i gat gutpela tingting i no save fosim pikinini long kisim baptais, nogat. Ol bai skelim pasin bilong pikinini long mekim wok lotu na helpim em long kamap strong long bilip. Papamama i ken amamas taim pikinini i bihainim gutpela tingting na mekim gutpela disisen, olsem teks bilong nau i kamapim. Tasol ol papamama i no ken lusim tingting long nambawan wok bilong ol—helpim pikinini long kamap disaipel. Olsem na ol papamama i ken askim ol yet olsem, ‘Pikinini bilong mi i save gut long tok bilong Baibel bambai em i ken dediket na kisim baptais?’ w18.03 9 6

Taim wanpela i invaitim yumi na yumi tok orait long en, i no stret long senisim tingting na tok nogat sapos yumi no gat gutpela risen. Ating em i tromoi bikpela taim na strong long redim kaikai, na sapos yumi senisim tok bilong yumi, hatwok bilong em bai lus nating. (Mat. 5:37) Sampela taim ol narapela i senisim tingting bilong ol bambai ol i ken go long narapela bung we ol i ting em i gutpela moa. Yu ting dispela i soim pasin laikim na pasin rispek? Yumi mas amamas long gutpela pasin ol narapela i mekim bilong redim ples na kaikai bilong yumi. (Luk 10:7) Sapos i gat gutpela risen na yumi no inap i go long wanpela bung, orait long pasin laikim yumi mas toksave hariap long ol lain i singautim yumi. Long dispela rot, yumi soim olsem yumi tingim ol. Yumi mas soim rispek long kastam bilong ples yumi stap long en. Long sampela hap, ol man i kam long haus bilong ol narapela long laik bilong ol yet. Tasol long ol narapela hap, yumi mas toksave long papa bilong haus paslain long yumi go long haus bilong em. Long sampela kalsa, sapos man i invaitim yu long go long wanpela bung, i no gat rong long tok nogat long namba 1 o namba 2 taim. Tasol long sampela kalsa, sapos yu tok nogat, ol bai ting olsem yu no amamas long ol. Yumi laik wok strong long mekim gutpela pasin na amamasim ol lain i invaitim yumi. w18.03 18 20-21

Maski yumi gat save long Baibel, dispela tasol i no inap helpim yumi long kamap strong long bilip. (1 Kin. 4:29, 30; 11:4-6) Yumi mas wok yet long kamap strong long bilip. (Kol. 2:6, 7) Wanpela samting yumi mas mekim em long stadi long buk, “Stap Insait Yet Long Pasin Laikim Bilong God.” Taim yu stadi long olgeta sapta bilong dispela buk, bai yu luksave long olsem wanem yu inap bihainim ol stiatok bilong Baibel long laip bilong yu. Sapos yu stadi pinis long dispela buk, yu ken stadi long ol narapela buk we inap helpim yu long sanap strong long bilip. (Kol. 1:23) Yu save beten na tingim tingim ol samting yu inap mekim bilong bihainim ol tok yu kisim save long en? Taim yumi stadi na tingim tingim ol tok, yumi mas wok strong long amamasim Jehova na putim mak long kisim pasin bilong bihainim ol lo bilong em. (Sng. 40:8; 119:97) Na tu, yumi mas wok strong long sakim ol samting we inap pasim yumi long kamap strong long bilip.—Tai. 2:11, 12. w18.02 24-25 7-9

Sapos yumi laik kisim wankain bilip olsem Noa, yumi mas stadi gut long Tok Bilong God, tingim tingim long bel ol samting yumi lainim, na larim dispela save i stretim na stiaim yumi. (1 Pita 1:13-15) Sapos yumi mekim olsem, bilip na savetingting bilong God bai lukautim yumi na yumi no inap pundaun long trap bilong Satan na ol pasin nogut bilong graun. (2 Kor. 2:11) Pasin na tingting bilong dispela graun i kirapim ol man long pait na mekim pasin pamuk, na kirapim ol manmeri long tingting tasol long ol laik nogut bilong bodi. (1 Jon 2:15, 16) Dispela inap mekim na ol lain i no strong long bilip i no luksave olsem de bilong God i kam klostu pinis. Taim Jisas i tok long haptaim bilong yumi bai wankain long taim bilong Noa, em i no tok long pasin bilong pait na pasin pamuk, nogat. Em i tingim ol samting we inap mekim yumi kamap slek long bilip. (Mat. 24:36-39) Askim yu yet: ‘Pasin bilong mi i soim olsem mi save gut long Jehova? Bilip bilong mi i kirapim mi long bihainim ol stretpela lo bilong God na tokaut long ol dispela lo?’ Ating ol bekim bilong yu i soim olsem yu tu i ‘stap pren bilong God tru.’—Stt. 6:9, 10. w18.02 9-10 8-10

Oltaim yumi bai stap namel long ol man bilong bihainim pasin nogut. Ating yumi wok wantaim ol, go long skul wantaim ol, o yumi stap wantaim ol long wanpela haus. Tasol yumi inap bosim yumi yet na bai yumi no bihainim tingting na pasin bilong ol. Yumi inap mekim olsem sapos yumi strongim bilip bilong yumi long rot bilong Baibel stadi, na bung wantaim ol lain i givim bel long mekim wok bilong Jehova. Yumi mas wok strong long helpim ol narapela long kamap strong long bilip. Painim ol rot bilong autim tok, na askim Jehova long helpim yu bambai yu inap mekim ol gutpela tok long taim stret. Na tu, yumi mas tokim ol narapela olsem yumi ol Witnes Bilong Jehova. Taim yumi mekim ol gutpela pasin, ol manmeri bai givim glori long God na i no long yumi. Yumi lain long “givim baksait long olgeta samting i no stret wantaim laik bilong God na long givim baksait long olgeta laik nogut bilong dispela graun. Na tu, dispela pasin i skulim yumi long bihainim gutpela tingting na stretpela pasin na pasin bilong givim bel tru long God nau long dispela taim.” (Tai. 2:11-14) Sapos yumi wok strong long bihainim ol pasin em God i laikim, ol narapela bai luksave na ol bai tok olsem: “Mipela i harim olsem God i stap wantaim yupela. Olsem na mipela i laik kamap wanlain wantaim yupela.”—Sek. 8:23. w18.01 31 17-18

Yu ting i gat rong long laikim yumi yet? Nogat. Em nomol long yumi laikim yumi yet, na em samting yumi olgeta i save mekim. Jehova i wokim yumi olsem. Jisas i tok: “Yu mas laikim ol arapela man olsem yu laikim yu yet.” (Mak 12:31) Sapos yumi no laikim yumi yet, yumi no inap laikim ol narapela. Baibel i tok: “Ol maritman i mas laikim meri bilong ol olsem ol i laikim bodi bilong ol yet. Man i laikim meri bilong en, em i laikim em yet. Long wanem, i no gat wanpela man i save heitim bodi bilong em yet, nogat. Em i save givim kaikai long en na tingim olsem samting i dia tumas.” (Efe. 5:28, 29) Olsem na i no gat rong long yumi laikim yumi yet. Pasin laikim em 2 Timoti 3:2 i stori long en, em i no gutpela pasin laikim. Man i gat dispela kain pasin laikim, em i save tingim em yet tasol. Ol man husat i laikim ol yet tasol, ol i ting ol i gat nem winim ol narapela. (Rom 12:3) Ol i tingting tasol long ol yet, na ol i no save tingim ol narapela. Taim ol hevi i kamap, ol i save sutim tok long ol narapela na ol i no laik tokaut olsem em asua bilong ol na hevi i kamap. Ol man i gat pasin bilong tingim ol yet, ol i no stap amamas tru. w18.01 23 4-5

Taim yumi mekim pesenel stadi, yumi inap putim yau long ol tok bilong Jehova, na taim yumi beten, yumi inap toktok long em. Ol Kristen i no ken tingim beten olsem samting nating, o tingim beten olsem wanpela rot bilong helpim ol long mekim gut wok. Yumi mas tingim olsem beten em i rot bilong yumi long toktok wantaim Krieta bilong yumi. Jehova i laik bai yu toktok long em. (Fili. 4:6) Taim yu bungim hevi na yu tingting planti, yu mas bihainim tok bilong Baibel. Em i tok: “Olgeta hevi yu karim, em yu mas putim long han bilong Bikpela.” (Sng. 55:22) Olsem wanem? Yu bilipim dispela tok? Planti milion bratasista i lukim truim bilong dispela ves, na ol inap helpim yu long bilipim dispela tok. Dispela ves inap helpim yu! Beten i opim rot long yu inap askim Jehova long helpim yu, na tu, yu inap tok tenkyu long em. Sampela taim ol hevi i daunim tru yumi na yumi no luksave long ol blesing yumi kisim. Long olgeta de, yu ken tingim 3-pela blesing yu kisim, na beten long Jehova na tok tenkyu long dispela. w17.12 25-26 10-11

Planti tausen Baibel sumatin i dediket long Jehova na kisim baptais. Planti em ol yangpela husat i kamap bikpela insait long tok i tru, na ol i mekim laik bilong God. (Sng. 1:1-3) Sapos yu papa o mama Kristen, ating yu laik lukim pikinini bilong yu i kisim baptais. (Skelim 3 Jon 4.) Ol papamama i laik bai pikinini bilong ol i kliagut long ol rait holi, dispela i makim Ol Skripsa Hibru na Ol Skripsa Grik. Maski ol pikinini i liklik yet, ol inap lainim tok Baibel i mekim long ol manmeri na ol samting i bin kamap long bipo. Oganaisesen bilong Jehova i kamapim planti tul em ol papamama inap yusim bilong helpim ol pikinini. Tingim: Save yumi gat long ol tok bilong Baibel bai helpim yumi long strongim pasin pren bilong yumi wantaim Jehova. w17.12 18 1; 19 4

Olsem wanem sapos yu wanpela meri marit na yu pilim olsem man bilong yu husat i no wanbilip i no mekim gut long yu? Yu ting yu mas kros wantaim em bambai em i senisim pasin bilong em? Maski yu kros long em na em i mekim ol samting yu laik bai em i mekim, yu ting dispela bai kirapim em long kam insait long tok i tru? Ating nogat. Sapos yu rispektim em na daun long wok bos bilong em, yu bai helpim famili long i stap bel isi, litimapim nem bilong Jehova, na kirapim man long kisim tok i tru. Yutupela wantaim inap kisim laip oltaim. (1 Pita 3:1, 2) Olsem wanem sapos yu maritman na yu pilim olsem meri bilong yu husat i no wanbilip i no rispektim yu? Yu ting em bai rispektim yu sapos yu bikmaus long em bilong soim olsem yu het bilong famili? Nogat tru! God i laik bai yu bihainim pasin bilong Jisas na soim pasin laikim insait long famili. Jisas i stap olsem het bilong kongrigesen na em i save soim pasin laikim na em i no les kwik long yumi. (Luk 9:46-48) Taim maritman i bihainim pasin bilong Jisas, dispela inap kirapim meri bilong em long kam insait long lotu i tru. w17.11 28-29 13-14

Tingting bilong graun i kirapim ol man long sakim ol stretpela lo bilong Jehova, na em inap kirapim yumi long sakim ol stiatok bilong God, na isi isi yumi inap kamap slek long bilip. Long nau, em isi long yumi kisim tingting bilong graun long rot bilong TV, Intenet, ples wok, na skul. Long planti kantri, sampela manmeri i tok ol i no bilip long God na ol i no gat lotu. Ating ol i no laik painimaut sapos tru tru God i stap o nogat. Ol i holim tingting olsem ol i stap fri long mekim ol samting ol i laik mekim. (Sng. 10:4) Ating ol narapela i pilim olsem ol i gat bikpela save na ol i tok, “Mi no bilip long God, tasol mi save bihainim stretpela pasin.” Yu ting ol man i bilip olsem i no gat Krieta, ol i painimaut ol evidens bilong sapotim tingting bilong ol? Taim yumi skelim wok painimaut bilong ol saientis long olsem wanem laip i bin kamap, em isi long tok bilong ol i paulim tingting bilong yumi. Tasol i no hatwok long save long laip i kamap olsem wanem. Olgeta haus i gat man i bin wokim ol, olsem tasol i mas i gat Man i wokim olgeta samting i gat laip! w17.11 20-21 2-4

Tingim risen na em i bikpela samting long i go long Memorial. Ol miting bilong kongrigesen em hap bilong wok lotu bilong yumi. Jehova na Jisas i luksave long husat i save givim bel long i go long Memorial, em spesel bung yumi mekim long olgeta yia. Sapos yumi kisim bikpela bagarap long bodi o yumi sik nogut tru na yumi no inap i go long dispela bung, orait tupela i save long dispela. Taim yumi soim olsem yumi tingim ol miting olsem bikpela samting long yumi, orait Jehova bai putim nem bilong yumi long “buk bilong laip.” Dispela “buk i gat nem bilong ol manmeri” husat bai kisim laip oltaim. (Rev. 20:15) Sampela de paslain long Memorial, yumi ken lusim sampela haptaim long beten na skelim gut pasin pren bilong yumi wantaim Jehova.—2 Kor. 13:5. w18.01 13 4-5

Taim man i ranawe i go hait long taun, ol birua i no inap bagarapim em. Jehova i tok, sapos wanpela man i popaia na kilim narapela, orait “em i ken ranawe i go long wanpela bilong ol dispela taun na hait.” (Jos. 20:2, 3) Jehova i tokaut olsem ol hetman i no ken kotim dispela man long wankain rong em i bin mekim. Na tu, wanblut bilong man i dai i no ken kam insait long taun na kilim i dai dispela man. Olsem na man i hait long taun i no gat wok long pret olsem ol birua bai kilim em. Taim em i stap long dispela taun, Jehova i lukautim em na em i stap gut. Dispela taun i no olsem wanpela haus kalabus. Dispela man inap mekim ol wok, helpim ol narapela, na mekim wok bilong Jehova. Tru tumas, em bai stap amamas na laip bilong em bai gutpela! Sampela wokman bilong God i mekim ol bikpela rong na ol i tanim bel, tasol ol i pilim olsem maus bilong bel i kotim ol yet na oltaim Jehova bai tingim rong ol i mekim. Sapos yu pilim olsem, yu ken bilip tru olsem taim Jehova i fogivim yu, em bai no tingim gen rong yu mekim! w17.11 9 6; 11 13-14

Wanpela rot bilong strongim pasin bilong pas gut wantaim ol wanbilip em olsem, yumi mas tingim tingim mining bilong bret na wain ol i yusim long Memorial. Paslain long Memorial o long taim bilong Memorial, i gutpela long tingim tingim mining bilong bret i no gat yis na retpela wain. (1 Kor. 11:23-25) Bret i makim bodi bilong Jisas we i no gat sin long en na em i givim olsem sakrifais, na wain i makim blut bilong em. Tingim olsem ofa bilong baim bek ol man i kamapim klia bikpela pasin laikim bilong Jehova na Jisas. Jehova i laikim yumi na em i givim Pikinini bilong em long helpim yumi, na Jisas i laikim yumi na em i redi long givim laip bilong em long baim bek yumi. Taim yumi tingim tingim pasin bilong tupela long laikim yumi, dispela bai kirapim yumi long laikim ol. Pasin bilong yumi long laikim Jehova i stap olsem rop we i pasim yumi wantaim na strongim pasin bilong yumi long pas gut wantaim. w18.01 14 11

Jehova i laikim tru yumi ol manmeri na em i tingim yumi olsem samting i dia tumas. Em i yusim blut bilong Pikinini bilong em bilong kisim bek yumi, na yumi inap kisim laip oltaim. (Jon 3:16) Sapos Jehova i no truim ol tok promis bilong em, Satan inap sutim tok long God olsem em i man bilong giaman na em i mekim wok bos long pasin i no stret. Na tu, ol man bai tok bilas long God olsem: “Em i bin tok promis olsem em bai kam i stap, tasol em i stap we? Kirap long taim ol tumbuna bilong yumi i bin i dai na i kam inap nau, olgeta samting i stap wankain olsem bipo tru taim God i mekim ol samting i kamap.” (2 Pita 3:3, 4) Olsem na taim Jehova i stretim bek rait bilong em long stap nambawan bos, em bai kisim bek tu ol manmeri i stap daun long em! (Ais. 55:10, 11) Na tu, Jehova i save mekim wok bos long pasin laikim. Olsem na yumi ken bilip tru olsem oltaim God bai laikim na tingim gut ol wokman i stap gut long em.—Kis. 34:6. w17.06 23 7

Taim Jehova i tok promis long salim Man Bilong Kisim Bek yumi, olsem Stat 3:15 i kamapim, long tingting bilong Em i olsem dispela samting i kamap pinis. Inap 4 tausen yia bihain, Jehova i salim Pikinini tru bilong em i kam long graun bilong baim bek ol manmeri. (Jon 3:16) Yumi pilim tru pasin laikim bilong Jehova! Yumi inap kamapim pasin laikim bikos God i wokim yumi olsem em yet. Abel i soim olsem em i laikim God taim em i givim namba 1 pikinini sipsip olsem ofa long God. (Stt. 4:3, 4) Noa tu i kamapim pasin laikim taim em i autim tok bilong God inap planti yia maski ol man i no putim yau. (2 Pita 2:5) Abraham i putim pasin bilong laikim God i stap namba 1, olsem na em i bihainim tok bilong God na em i redi long givim Aisak olsem ofa. (Jems 2:21) Yumi inap bihainim pasin bilong ol dispela bilipman na kamapim pasin laikim maski yumi karim ol hevi. w17.10 7-8 3-4

Yumi ken bilip tru olsem long rot bilong Hetpris bilong yumi Jisas, em bai lusim ol sin bilong yumi na “[God] i ken marimari long yumi na mekim bikpela pasin helpim long yumi long taim stret.” (Hib. 4:16) Yumi mas bilip long ofa bilong Jisas. Yu ken bilip tru olsem pe bilong baim bek man em bilong helpim yu. (Gal. 2:20, 21) Yu mas bilip olsem long rot bilong pe bilong baim bek man, God bai fogivim ol rong bilong yu. Na tu, yu ken bilip tru olsem pe bilong baim bek man bai helpim yu long kisim laip oltaim. Ofa bilong Jisas i olsem presen Jehova i givim long yu. Maski yumi mekim wanpela bikpela rong, sapos yumi tanim bel long rong yumi mekim, Jehova bai fogivim yumi. Em i no inap tru long tingim gen dispela rong o kotim yumi gen long dispela rong. (Sng. 103:8-12) Yes, yumi mas bilip long pasin bilong Jehova long fogivim yumi. w17.11 11-12 14-17

Long nait ol i mekim Kaikai Bilong Bikpela, Jisas i beten long God long ol disaipel i ken pas gut wantaim, wankain olsem em i pas gut wantaim Papa. Jehova i bekim beten bilong Pikinini bilong em, olsem na planti milion manmeri long nau i bilip olsem Jehova i salim Pikinini bilong em i kam bilong helpim yumi. Ol Witnes Bilong Jehova i save mekim bung bilong Memorial, na dispela i soim klia olsem ol i pas gut wantaim. Long sampela hap, ol manmeri i no bin lukim ol lain bilong narapela narapela kantri na skin kala i bung wantaim, na sampela i no amamas long ol kain bung olsem. Tasol Jehova na Jisas i laikim tru pasin bilong bung wantaim! Yumi ol manmeri bilong Jehova i amamas long pas gut wantaim. Jehova i bin tok profet long dispela samting.—Ese. 37:15-17; Sek. 8:23. w18.01 14 7-9

“Ol kamda” i makim ol lida bilong Juda em ol i sakim Mesaia. Ol i givim baksait long Jisas na ol i no bilip olsem em i Krais. Planti Juda i sakim em na ol i singaut long kilim em i dai. (Luk 23:18-23) Tru tumas, ol i kirapim ol bikman long kilim Jisas. Sapos ol i bin sakim Jisas na kilim em i dai, olsem wanem em inap kamap “nambawan ston bilong strongim banis bilong haus”? Jisas i mas kirap bek bambai em inap stap olsem ston bilong strongim banis bilong haus. Aposel Pita i stori long “Jisas Krais bilong Nasaret, em man [ol] i bin nilim long pos na God i bin kirapim em bek long indai.” (Apo. 3:15; 4:5-11; 1 Pita 2:5-7) Dispela Pikinini husat i kirap bek em man “God i makim namel long ol manmeri bilong kisim bek yumi.”—Apo. 4:12; Efe. 1:20. w17.12 9-10 6-9

Jisas i tingim traipela hevi tru we klostu nau bai kamap, na em i tok: “Ol bai lukim Pikinini bilong man i stap antap long ol klaut na kam wantaim pawa na bikpela glori. Bikpela krai bilong trampet bai kamap na [Jisas] bai salim ol ensel bilong en i go. Na ol bai bungim lain bilong em, em lain God i bin makim.” (Mat. 24:29-31) Taim Jisas i tok, ‘bungim lain God i bin makim,’ em i minim haptaim we ol Kristen God i bin makim na ol i stap yet long graun bai kisim laip long heven. Dispela samting bai kamap bihain long traipela hevi tru i kirap, na paslain long Armagedon. Lain 144,000 bai sapotim Jisas long daunim ol king bilong graun. (Rev. 17:12-14) Olsem na laspela Memorial bai kamap paslain long taim ol ensel i bungim hap lain em God i bin makim, long wanem, Jisas bai “kam” na ol bai kisim laip long heven. w18.01 16 15

Jisas bai “stap laip oltaim oltaim” long heven, na em i no inap dai. (Rev. 1:5, 18; Rom 6:9; Kol. 1:18; 1 Pita 3:18) Jisas i tokim ol aposel olsem ol bai mekim wok king wantaim em long heven. (Luk 22:28-30) Pol i tok: “God i bin kirapim bek Krais long dai. Em i kirap bek paslain long ol arapela man i dai pinis, olsem namba 1 kaikai i redi long gaden.” Pol i tok i gat ol arapela manmeri em ol bai kisim laip long heven. Em i tok: “Olgeta wan wan i kisim laip long taim bilong ol yet: Krais pastaim, em i olsem namba 1 kaikai i redi long gaden, na bihain ol lain bilong Krais bai kisim laip long taim em i kam i stap.” (1 Kor. 15:20, 23) Kirap long 1914, yumi stap long dispela haptaim Jisas i tok promis long i “kam i stap.” Yumi stap yet long dispela haptaim na pinis bilong las de i kam klostu tru. w17.12 10 11; 11 14-16

God i bel hevi tru taim ol man em i laikim tru i dai, olsem Abraham, Aisak, Jekop, Moses, na King Devit. (Nam. 12:6-8; Mat. 22:31, 32; Apo. 13:22) Tok Bilong God i helpim yumi long bilip tru olsem Jehova i gat bikpela laik tru long kirapim bek ol dispela bilipman. (Jop 14:14, 15) Ol bai stap amamas na i gat gutpela helt. Pikinini Bilong God i bin ‘mekim God i amamas’; em i karim bikpela pen na em i dai. (Snd. 8:22, 30, 31) Jehova i bel hevi tru taim Pikinini bilong em i karim bikpela pen. (Jon 5:20; 10:17) Yumi inap bilip tru olsem Jehova bai mekim gut bel bilong yumi. Olsem na yumi mas beten na kamapim bel na tingting bilong yumi long em. Yumi amamas long save olsem Jehova i pilim tru bel hevi bilong yumi na em i givim ol gutpela tok bilong mekim gut bel bilong yumi long taim stret!—2 Kor. 1:3, 4. w17.07 13 3-5

Long nau, bel i kirapim planti milion manmeri husat i mekim lotu i tru long givim ol “namba wan” samting bilong ol long God. Ol i givim taim, strong, na ol samting ol i gat long sapotim lotu i tru. (Snd. 3:9) Jehova i no inap lusim tingting long ol gutpela wok yumi mekim na pasin bilong yumi long laikim em. Long nau, ol wok yumi mekim bilong sapotim lotu i tru i kamapim klia olsem Krais i stiaim yumi na Jehova i blesim wok bilong yumi. Yumi stap insait long oganaisesen we pasin wanbel i stap. Dispela oganaisesen i stap strong na em bai stap oltaim. Yu ken amamas long i stap namel long ol manmeri bilong Jehova, na “bihainim stret olgeta tok bilong God.” (Sek. 6:15) Sapos yu mekim olsem, yu bai stap aninit long lukaut bilong King na Hetpris bilong yumi. Wok strong long sapotim lotu i tru. Taim yu mekim olsem, Jehova bai lukautim yu long dispela haptaim bilong las de, na em bai lukautim yu inap oltaim oltaim! w17.10 30 18-19

Klostu nau, Graun bilong Satan—ol wok politik, ol lotu, na ol wok bisnis—olgeta bai bagarap. Profet Esekiel na Sefanaia i tokaut olsem gol na silva, em ol samting ol bisnis i yusim bilong kisim planti mani kago, olgeta bai pinis. (Ese. 7:19; Sef. 1:18) Yu bai pilim olsem wanem taim laip bilong yu i laik pinis na yu luksave olsem yu lusim bikpela haptaim na strong long bungim planti “mani nogut” we i no bin helpim yu? Yu bai pilim wankain olsem man i bin wok hat tru long bungim planti mani, tasol bihain em i painimaut olsem em giaman mani. (Snd. 18:11) Yes, ol dispela samting bai pinis olgeta, olsem na yumi mas wok strong long yusim ol dispela samting bilong pas gut wantaim God. Yumi mas mekim olgeta samting yumi inap mekim bilong sapotim Kingdom Bilong Jehova na yumi bai kisim planti blesing. w17.07 11 16

Sampela Kristen i mekim bikpela rong, tasol ol i haitim rong bilong ol. Ol i no laik semim ol yet o mekim ol narapela i bel hevi. (Snd. 28:13) Sapos Kristen i mekim olsem, em i putim hevi long em yet na ol narapela na em i no soim pasin laikim. Dispela bai pasim holi spirit bilong God long stiaim laip bilong em, na tu, bel isi i no inap stap insait long kongrigesen. (Efe. 4:30) Pasin laikim bai kirapim Kristen husat i mekim rong long toktok wantaim ol elda na kisim helpim. (Jems 5:14, 15) Pasin laikim em i nambawan pasin tru winim ol narapela pasin. (1 Kor. 13:13) Sapos yumi soim pasin laikim, yumi soim olsem yumi ol disaipel bilong Jisas na yumi bihainim pasin bilong Jehova, em As bilong pasin laikim. Pol i tok, sapos “mi no gat pasin laikim, orait mi olsem samting nating.” (1 Kor. 13:2) Yumi laik wok yet long soim pasin laikim “long tok” yumi mekim na “ol samting yumi mekim na long pasin i tru.”—1 Jon 3:18. w17.10 11 17-18

Josep i strongim bel na sakim meri bilong Potifa taim em i laik pulim Josep long slip wantaim em. Josep i save olsem bikpela hevi bai painim em sapos em i sakim meri bilong Potifa, tasol em i strongim bel na ranawe. (Stt. 39:10, 12) Rahap tu i soim olsem em i gat strongpela bel. Taim 2-pela man Israel i go lukstil long Jeriko, Rahap i haitim ol long haus bilong em na bihain em i helpim ol long ranawe. (Jos. 2:4, 5, 9, 12-16) Maski ol Sadyusi i birua long ol aposel, ol aposel i bihainim pasin bilong Jisas na ol i strongim bel na tokaut yet long nem bilong Jisas. (Apo. 5:17, 18, 27-29) Josep, Rahap, Jisas, na ol aposel i gat pasin bilong strongim bel na dispela i kirapim ol long mekim ol gutpela wok. Ol i no bilip long strong bilong ol yet, nogat. Ol i larim Jehova i strongim ol. Yumi tu i save bungim ol hevi, tasol yumi mas strongim bel. Yumi no laik bilip long strong na save bilong yumi yet, nogat. Yumi mas larim Jehova i helpim yumi.—2 Tim. 1:7. w17.09 29 6-9

Yumi no inap lusim ol pasin bilong olpela bel long strong bilong yumi yet. Planti manmeri i bin taitim bun tru long lusim ol dispela pasin. Ol i larim Tok Bilong God na holi spirit i stiaim bel na tingting bilong ol bambai ol inap lusim ol dispela pasin. (Luk 11:13; Hib. 4:12) Sapos yumi laik bai holi spirit i helpim yumi, orait yumi mas ritim Baibel long olgeta de, tingim tingim ol tok bilong en, na beten askim God long givim yumi savetingting na strong long bihainim ol skultok bilong Baibel. (Jos. 1:8; Sng. 119:97; 1 Tes. 5:17) Tok Bilong God na holi spirit inap helpim yumi taim yumi redi gut na go long ol miting Kristen. (Hib. 10:24, 25) Na tu, yumi mas kisim ol kaikai bilong strongim bilip em gutpela bosboi i redim bilong helpim ol manmeri bilong God long olgeta hap. (Luk 12:42) Ol Kristen i mas rausim ol pasin bilong olpela bel na kisim ol nupela pasin bambai God i orait long ol.—Kol. 3:10. w17.08 21 16-17

King Devit i karim planti hevi long han bilong ol birua. Taim Devit i liklik mangi, Jehova i makim em long kamap king bilong Israel. Tasol em i mas wet inap 15 yia long mekim wok king. (2 Sml. 2:3, 4) Insait long dispela haptaim, King Sol i traim long painim rot bilong kilim Devit. Olsem na sampela taim Devit i ranawe i go long ol narapela kantri o em i go i stap long ol keiv long ples drai nating. Taim Sol i dai, Devit i wet gen inap 7-pela moa yia bilong kamap king long Israel. (2 Sml. 5:4, 5) Bilong wanem Devit i no les kwik? Em i bilip olsem Jehova bai kisim em bek, na tu, em i tingim ol samting Jehova i bin mekim bilong lukautim em. (Sng. 13:6) Devit i save olsem gutpela samting bai kamap sapos em i no les kwik. w17.08 6 14-15

Ol tokples i save senis insait long sampela haptaim. Pastaim ol tok inap makim wanpela samting, tasol bihain mining bilong ol i senis. Wankain samting i kamap long tokples Hibru na tokples Grik, em ol tokples ol i bin yusim long raitim planti hap bilong Baibel. Tokples Hibru na Grik bilong nau i no wankain long taim ol man i bin raitim Baibel. Olsem na sapos ol man i laik kliagut long tok bilong Baibel, ol i mas ritim long tokples bilong ol yet. Dispela i makim tu ol lain i mekim tokples Hibru na Grik long nau. Sampela i pilim olsem ol i mas lainim tokples Hibru na Grik bilong bipo bambai ol inap ritim ol tok bilong Baibel em ol i raitim long namba 1 taim. Tasol ol i no inap kliagut long tok ol i ritim. Yumi amamas tru olsem ol i tanim Baibel olgeta o sampela hap bilong en long winim 3,200 tokples. Jehova i laik bai ol manmeri bilong “olgeta kantri, na olgeta lain, na olgeta tokples” i mas ritim tok bilong em long Baibel. (Rev. 14:6) Tru tumas, God i gat pasin laikim na em i save mekim wankain pasin long olgeta man, na dispela i kirapim yumi long i go klostu long em. w17.09 19 4

Sapos wanpela long famili i raus, yu mas bosim bel bambai yu no painim kain kain rot bilong bung wantaim em. I hatwok long mekim olsem, tasol yumi inap bosim bel taim yumi bihainim eksampel bilong God na bihainim ol stiatok bilong em. Tingim stori bilong King Devit. Maski em i gat bikpela strong, em i bosim bel na em i no larim pasin bilong belhat i kirapim em long pait long Sol na Simei. (1 Sml. 26:9-11; 2 Sml. 16:5-10) Tasol bihain, Devit i no bosim bel na em i mekim pasin pamuk wantaim Batseba, na tu, em i laik kilim Nabal. (1 Sml. 25:10-13; 2 Sml. 11:2-4) Yumi inap kisim skul long stori bilong Devit. Namba 1: Ol lain i go pas long stiaim ol manmeri bilong God i mas i gat pasin bilong bosim bel bambai ol i no mekim wok nogut long namba bilong ol. Namba 2: Yumi no ken ting olsem yumi no inap pundaun long traim.—1 Kor. 10:12. w17.09 5-6 12-13