Jun

Pasin laikim i kirapim Jehova long stretim, skulim, na trenim yumi bambai yumi ken stap yet insait long pasin laikim bilong em na bihainim rot i go long laip oltaim. Taim yumi stretim narapela, sampela taim yumi mas givim tok kaunsel long em na mekim sampela samting moa. Taim man i mekim bikpela rong, em inap lusim ol wok em i holim insait long kongrigesen. Dispela i kamapim klia pasin laikim bilong God. Taim man i lusim ol wok bilong kongrigesen, em bai luksave olsem em i bikpela samting long em i mas mekim pesenel stadi, tingim tingim ol tok bilong Baibel, na beten. Dispela bai helpim em long kamap strong long bilip. (Sng. 19:7) Bihain, em inap kisim gen ol wok bilong em. Taim kongrigesen i rausim man, dispela i soim pasin laikim bilong Jehova. Na tu, dispela i helpim kongrigesen long i stap longwe long ol lain i insait long ol pasin nogut. (1 Kor. 5:6, 7, 11) God i save bihainim stretpela pasin taim em i stretim ol man, olsem na taim man i raus long kongrigesen, em bai save olsem em i mekim bikpela rong na em i gat wok long tanim bel.—Apo. 3:19. w18.03 24 5-6

Woda i no save long Tok Bilong God. Olsem na sapos em i laik kliagut long ol tok bilong Rait Holi, em i mas kisim save long ol bikpela tok bilong Rait Holi, kliagut long samting em i mas mekim bilong i stap olsem wokman bilong God, na tingting strong long bihainim tok bilong Jisas. Insait long liklik haptaim tasol, save em i kisim long Rait Holi i kirapim em long kisim baptais. (Apo. 16:25-33) Bihain em i kisim sampela save moa. Papamama Kristen bai mekim wanem sapos pikinini i soim olsem em i pilim tru ol bikpela tok bilong Baibel na em i kliagut long risen na pasin bilong dediket na baptais em i bikpela samting? Ol i ken helpim em long lukim ol elda bambai ol elda i ken skelim sapos em i winim mak bilong baptais. Wankain olsem ol Kristen i baptais pinis, pikinini bai kisim sampela save moa long samting Jehova i tingting pinis long mekim, na em bai mekim olsem inap oltaim oltaim.—Rom 11:33, 34. w18.03 10 8-9

Taim yumi wok long kisim ol pasin bilong tingim ol samting long sait bilong bilip, holi spirit bai strongim yumi long senisim tingting bilong yumi. Isi isi yumi inap holim tingting wankain olsem bilong Krais. Na tu, holi spirit bai helpim yumi long rausim ol laik nogut bilong bodi, na kisim ol gutpela pasin em God i amamas long en. Taim yumi holim wankain tingting olsem bilong Krais, dispela bai stiaim toktok bilong yumi, pasin bilong yumi long ples wok na long skul, na ol disisen yumi mekim long wan wan de. Ol dispela disisen bai soim olsem yumi wok strong long i stap disaipel bilong Krais. Yumi no laik larim wanpela samting i bagarapim pasin bilong yumi long pas gut wantaim Papa bilong yumi long heven. Taim ol traim i painim yumi, tingting bilong Krais bai kirapim yumi long sakim ol dispela traim. Taim yumi mekim ol disisen, yumi bai tingim ol dispela askim: ‘Wanem ol stiatok bilong Baibel inap helpim mi long mekim disisen? Krais bai mekim wanem sapos dispela samting i painim em? Wanem disisen bai amamasim Jehova?’ w18.02 25 12; 26 14

Long taim bilong tumbuna papa bilong Noa, em Enok, ol manmeri i mekim ol kain kain pasin nogut tru. Ol i mekim ol “tok nogut tru” long Jehova. (Jut 14, 15) Pasin bilong pait na bagarapim man i go bikpela. Long taim bilong Noa, ol man “long olgeta hap bilong graun ol i wok long pait na bikhet tasol.” Ol bikhet ensel i kamap olsem ol man long graun na kisim ol meri na kamapim ol pikinini. Ol dispela pikinini i gat bikpela strong, na ol i save pait na bikhet. (Stt. 6:2-4, 11, 12) Tasol pasin bilong Noa i narapela kain long pasin bilong ol dispela manmeri. “Noa em i gutpela man, na wokabaut bilong en i stret long ai bilong God. Em i pren tru bilong God.” (Stt. 6:9) Tingim ol tok em Baibel i mekim long dispela stretpela man. Planti man long nau i save stap laip inap 70 o 80 yia. Tasol paslain long Bikpela Tait i kamap, Noa i stap gut long God klostu 600 yia! (Stt. 7:11) Long taim bilong Noa, i no gat ol manmeri husat i stap gut long God bambai em i ken bung wantaim ol. Na tu, ol bratasusa bilong em i no stap gut long God. w18.02 4 4-5

Ol man i laikim tumas mani bai tingting tasol long bungim mani, na ol bai “givim pen long ol” yet. (1 Tim. 6:9, 10; Sav. 5:10) Yumi olgeta i nidim mani bilong lukautim yumi yet. (Sav. 7:12) Tasol yu ting man bai stap amamas tru sapos em i gat liklik samting tasol? Yes, em bai stap amamas! (Sav. 5:12) Agur em pikinini bilong Jake. Em i tok: “Yu no ken larim mi i kamap maniman o rabisman. Nogat. Yu ken givim mi kaikai inap long skel bilong mi.” Yumi ken kliagut long risen na em i no laik kamap rabisman tru. Em i no laik bai bel i kirapim em long stil bikos God i no amamas long pasin bilong stil. Tasol bilong wanem em i beten na tok em i no laik kamap maniman? Em i tok: “Nogut mi gat planti samting tumas na mi givim baksait long yu, na mi tok, ‘Bikpela em husat?’” (Snd. 30:8, 9) Jisas i tok: “I no gat wanpela man inap stap wokboi bilong tupela bosman. Em bai laikim wanpela na i no laikim narapela, o em bai pas long wanpela na les long narapela. Yupela i no inap stap wokboi bilong God na mani wantaim.”—Mat. 6:24. w18.01 24 9-11

Taim yumi fogivim ol narapela, yumi strongim pasin bilong pas gut wantaim. Na tu, yumi soim olsem yumi pilim tru pasin bilong God long fogivim yumi long rot bilong ofa bilong Krais long baim bek ol man. Tingim tok piksa Jisas i mekim long Matyu 18:23-34, na askim yu yet: ‘Mi save bihainim tok em Jisas i mekim? Mi no les kwik long wanbilip na mi kliagut long tingting na filings bilong em? Mi redi long fogivim ol lain i rongim mi?’ Sampela rong ol narapela i mekim long yumi em bikpela tru na i hatwok long yumi ol sinman i lusim tingting long en. Maski i olsem, tok piksa bilong Jisas i kamapim klia olsem Jehova i laik bai yumi mas fogivim ol narapela. Jisas i kamapim klia olsem Jehova i no inap fogivim yumi sapos yumi no fogivim wanbilip bilong yumi. Taim yumi bihainim tok bilong Jisas na fogivim rong ol narapela i mekim long yumi, orait yumi lukautim pasin bilong yumi long pas gut wantaim ol manmeri bilong God. w18.01 15 12

Daniel i save olsem em inap lusim laip bilong em. Maski i olsem, em i no laik bai ol man i ting em i givim baksait long God tru na em i lusim bilip. Jehova i blesim Daniel long pasin bilong em long skelim gut ol samting na sanap strong, olsem na Daniel i abrusim bagarap long han bilong ol birua. Dispela stori i go kamap long ol manmeri i stap long ol longwe ples long Midia-Persia, na dispela i opim rot long ol inap kisim save long Jehova! (Dan. 6:25-27) Olsem wanem yumi inap kisim wankain bilip olsem Daniel? Yumi mas ritim Tok Bilong God na “kisimgut mining bilong en.” (Mat. 13:23) Taim yumi kliagut long ol stiatok bilong Baibel, yumi bai holim wankain tingting olsem Jehova long ol samting yumi mekim. Yumi mas tingim tingim long bel ol tok yumi ritim. Na tu, em i bikpela samting long beten oltaim, na moa yet taim yumi bungim ol hevi. Taim yumi beten askim Jehova long givim yumi savetingting na strong, em bai amamas long givim ol dispela samting long yumi.—Jems 1:5. w18.02 10-11 13-15

Taim yu yangpela yet na yu kisim baptais, yu inap traim na lukim olsem Jehova i gutpela. Dispela samting inap kamap taim yu autim bilip bilong yu long ol narapela na Jehova i sambai long yu. Yu inap autim tok taim yu raun long ol teritori na long taim yu stap long skul. Sampela yangpela i pilim hatwok long autim tok long ol wanskul. Ating ol i gat tupela tingting long ol narapela bai i gat wanem tingting long tok ol i autim. Na tu, ol i pilim hatwok long autim tok long planti wanskul, tasol em isi moa long ol i autim tok taim wanpela i stap em yet. Wanem samting inap helpim ol? Pastaim, yu mas skelim gut risen na yu gat strongpela bilip. Sapos ol stadi atikol long jw.org i stap long tokples bilong yu na yu no save, orait lusim sampela haptaim long painimaut. Ol dispela atikol bai helpim yu long skelim bilip bilong yu, risen na yu bilip, na olsem wanem yu inap stori long bilip bilong yu long ol narapela. Taim yu kliagut long samting yu bilip long en na yu redi gut, dispela bai kirapim yu long autim nem bilong Jehova long ol narapela.—Jer. 20:8, 9. w17.12 26 12, 14-15

Yumi mas mekim sampela samting moa taim yumi skulim ol pikinini long tok Baibel i mekim long ol manmeri, na ol samting i bin kamap long bipo. Pol i helpim Timoti “long bilip.” Long tok Grik, dispela tok “helpim yu long bilip” i makim olsem “yu save tru” o “yu bilip olsem dispela tok em i tok i tru.” Timoti i save long Ol Skripsa Hibru taim em i liklik yet. Taim em i kamap bikpela, em i skelim ol tok em i lainim, na dispela i helpim em long bilip olsem Jisas em Mesaia. Olsem wanem yu inap helpim pikinini long kamap strong long bilip olsem Timoti? Pastaim, yu mas i gat pasin bilong i no les kwik. Yumi no inap kamap strong long bilip wantu tasol, na tu, pikinini i no inap kamap strong long bilip bikos yu bilip, nogat. Pikinini yet i mas yusim “gutpela tingting” long bilipim tok i tru bilong Baibel. (Rom 12:1) Yupela ol papamama i mekim bikpela wok tru long helpim ol pikinini, moa yet taim pikinini i kamapim ol askim. w17.12 19 3, 5-6

Marta em gutpela pren na disaipel bilong Jisas. Em i krai sori bikos brata bilong em Lasarus i dai. Olsem wanem? I gat wanpela samting we inap pinisim bel sori bilong em? Jisas i tokim em: “Brata bilong yu bai kirap bek.” (Jon 11:20-23) Marta i bilip olsem Lasarus bai kirap bek long bihain. Jisas i wokim mirakel na long dispela de yet em i kirapim bek Lasarus. Yumi no ken ting Jisas o Papa bilong em bai wokim kain mirakel olsem long nau. Tasol yu bilip olsem wanpela em yu laikim tru bai kirap bek long bihain? Ating poroman marit, mama o papa, o ol bubu bilong yu i dai. O ating yu krai sori long pikinini i dai. Yu laik tru long hagim em, toktok wantaim em, na lap wantaim em. Wankain olsem Marta, yu inap mekim dispela tok, ‘Mi save olsem ol lain mi laikim tru em ol i dai pinis, ol bai kirap bek.’ Tasol em i bikpela samting long wan wan Kristen i mas tingim risen na ol i bilip long kirap bek. w17.12 3 1-2

Jisas i laikim Lo Bilong Moses. Man i stap nambawan tru long laip bilong Jisas i kamapim dispela Lo—Papa bilong em, Jehova. Jisas i laikim tru lo bilong God olsem tok profet i stap long teks bilong nau i stori long en. Ol tok na pasin bilong Jisas i kamapim klia olsem Lo Bilong God i gutpela, inap helpim yumi, na i gat truim bilong en. (Mat. 5:17-19) Ating Jisas i bel hevi tru taim em i lukim olsem ol saveman bilong lo na ol Farisi i no bihainim stret Lo bilong Papa bilong em! Ol i strong long bihainim ol liklik liklik lo, olsem na Jisas i tok: “Yupela i save givim namba 10 hap bilong ol spais olsem mint na dil na kumin.” Bilong wanem Jisas i mekim dispela tok? Em i tok moa: “Yupela i no tingim ol bikpela tok bilong Lo, olsem stretpela pasin na pasin marimari na pasin bilong bilip.” (Mat. 23:23) Jisas i no olsem ol saveman bilong lo na ol Farisi, nogat. Jisas i kliagut long risen na God i givim Lo, na em i luksave long ol pasin bilong God. w17.11 13 1-2

Ol manmeri inap tok: “Yumi stap laip bilong kisim amamas. I no gat rong long slip wantaim wanpela husat i no poroman marit.” Tasol dispela pasin i no stret. Bilong wanem? Tok Bilong God i tok yumi mas sakim pasin pamuk. (1 Tes. 4:4-8) Jehova i wokim yumi, olsem na em i gat rait long givim ol lo bilong stiaim yumi. Lo God i givim i tokaut klia olsem maritpasin em bilong ol lain i marit tasol. God i laikim yumi na em i givim ol lo bilong lukautim yumi. Taim yumi bihainim ol dispela lo, pasin laikim, pasin rispek, na pasin wanbel bai stap insait long famili. God bai kotim ol manmeri husat i sakim lo bilong em na mekim pasin pamuk na pasin adaltri. (Hib. 13:4) Tok Bilong God i skulim yumi long rot bilong sakim pasin pamuk. Wanpela rot em long was gut long ol samting yumi lukim. (Mat. 5:28, 29) Kristen i no ken lukim ponografi o harim ol musik i stori long pasin pamuk.—Efe. 5:3-5. w17.11 22 9-10

Long bipo yet na i kam inap long nau, ol manmeri i lotuim Jehova i save pilaim musik bilong litimapim nem bilong em. Taim lain Israel i mekim wok bilong Jehova, ol i save pilaim musik na mekim ol singsing long taim bilong lotu. Taim ol i redim ol samting bilong lotu long tempel, King Devit i makim 4 tausen Livai long pilaim musik. Namel long dispela lain Livai, inap 288 bilong ol i “skul gut long singim ol song bilong litimapim nem bilong Bikpela. . . . Olgeta dispela man i save gut tru long mekim musik.” (1 Sto. 23:5; 25:7) Taim ol i dediketim tempel, ol Livai i singsing na pilaim musik. Baibel i tok: “Ol lain man bilong mekim musik i stat long winim biugel na paitim plet bras, na ol i kirapim song bilong litimapim nem bilong Bikpela. . . . Taim ol i kirapim dispela song, orait wantu klaut i pulapim haus bilong Bikpela.” Ating dispela samting i bin strongim tru bilip bilong ol manmeri!—2 Sto. 5:11-13, 14; 7:6. w17.11 4 4-5

Jisas i save olsem tok bilong em inap kamapim pasin birua namel long ol manmeri. Olsem na ol lain i bihainim em i mas strongim bel taim ol narapela i birua long ol. (Jon 18:37) Dispela inap givim hatwok long ol Kristen husat i wok strong long holimpas tok i tru sapos ol pren na ol wanfamili i birua long ol. Sapos ol disaipel i laik i stap gut long Krais, ol i mas redi long karim hevi taim wanfamili i tok bilas o rausim ol long haus. Ol disaipel bilong Jisas bai kisim planti samting moa winim ol samting ol i lusim. (Mak 10:29, 30) Maski ol wanfamili i birua, yumi mas wok yet long soim pasin laikim long ol. Tasol tingim olsem pasin bilong yumi long laikim God na Krais i mas i stap namba 1. (Mat. 10:37) Satan i laik bai pasin bilong yumi long laikim famili i stap namba 1 winim pasin bilong yumi long i stap gut long God. w17.10 13 3-6

Dispela visen i kamapim klia olsem Jehova i no inap larim pasin nogut i stap namel long ol manmeri bilong em. Kwiktaim em bai rausim ol man i mekim pasin nogut. (1 Kor. 5:13) Taim ensel i pasim bek maus bilong basket, dispela i soim olsem God bai pinisim tru pasin nogut. Visen bilong Sekaraia i mekim isi bilong bel bilong lain Juda long taim bilong Sekaraia, bikos Jehova i tok promis long kirapim gen lotu i tru! Tasol dispela visen i kirapim tu lain Juda long tingim olsem ol i mas wok yet long bihainim klinpela pasin na mekim ol wok lotu. Pasin nogut i no ken stap namel long ol manmeri bilong Jehova. Taim yumi kam insait long oganaisesen bilong God, em i lukautim yumi bambai yumi abrusim ol pasin nogut, olsem na yumi mas wok yet long sakim ol pasin nogut na stap klin. Olsem wanem? Yumi wok strong long stap gut long God? Yumi mas sakim olgeta kain pasin nogut we inap bagarapim pasin bilong yumi long pas gut wantaim God. w17.10 24 14-15; 25 17-18

Lain Israel i bin raitim 39 buk bilong Baibel. “God i putim ol tok holi bilong en long han bilong ol Juda bai ol i ken lukautim.” (Rom 3:1, 2) Tasol klostu long yia 300 B.C.E., planti Juda i no kliagut long tokples Hibru. Bikpela King Aleksander i pait na kisim planti ples na planti manmeri i stap aninit long gavman Grik. (Dan. 8:5-7, 20, 21) Tokples Grik i kamap bikpela tokples em planti manmeri i mekim, na dispela i makim tu ol Juda i stap long ol narapela hap. Planti Juda i mekim tokples Grik, olsem na i hatwok long ol i kliagut long Ol Skripsa Hibru. Wanem samting i helpim ol? Ol i pinisim wok bilong trensletim Ol Skripsa Hibru long 200 B.C.E. Ol i bungim ol dispela buk na kolim olsem Baibel Grik Septuagint. Baibel Septuagint em fes Baibel we ol i bin trensletim olgeta hap bilong Ol Skripsa Hibru i go long tokples Grik. w17.09 20 7-9

Sapos bos i askim yu long wok ovataim long apinun na long wiken—ating yu makim dispela haptaim long mekim famili lotu, autim tok, na go long ol miting—orait yu mas strongim bel na tokim bos long ol wok lotu yu mas mekim. Yu bai stap gutpela eksampel long ol pikinini. Ol papamama i soim tu olsem ol i gat strongpela bel taim ol i helpim pikinini long winim ol mak bilong bilip. Sampela papamama i no stiaim ol pikinini long putim mak long mekim wok painia, mekim wok long hap i sot long ol pablisa, wok long Betel o konstraksen. Ating ol i pret olsem pikinini i no inap lukautim ol taim ol i kamap lapun. Tasol sapos papamama i gat savetingting, ol bai strongim bel na bilipim ol tok promis bilong Jehova. (Sng. 37:25) Taim ol papamama i mekim olsem, ol inap kirapim ol pikinini long strongim bel na bilip long Jehova.—1 Sml. 1:27, 28; 2 Tim. 3:14, 15. w17.09 30 14-15

Olsem wanem yu inap helpim ol pikinini bilong yu long kisim pasin bilong bosim bel? Ol pikinini i no bon wantaim dispela pasin. Olsem na ol papamama i mas kamapim pasin bilong bosim bel bambai ol pikinini i ken bihainim. (Efe. 6:4) Sapos yu luksave olsem ol pikinini i no bosim bel long sampela samting, askim yu yet olsem yu stap gutpela eksampel long ol, o nogat. Gutpela samting bai kamap sapos oltaim yu mekim wok autim tok, go long ol miting, na mekim famili lotu. Sampela taim i gutpela long tok nogat long sampela samting em pikinini i askim long en! Jehova i putim ol lo bilong stiaim Adam na Iv bambai ol i holim stretpela tingting long wok bos bilong God. Olsem tasol, taim papamama i putim sampela lo na stretim ol pikinini, dispela bai stiaim pikinini long kisim pasin bilong bosim bel. Papamama i mas helpim pikinini long daun long wok bos bilong God na rispektim ol lo bilong em, na dispela bai lukautim gut pikinini.—Snd. 1:5, 7, 8. w17.09 7 17

Satan i kontrolim dispela graun, olsem na yumi karim hevi bilong no gat wok mani, bikpela sik, pasin birua, ol disasta, pasin raskol, na ol narapela hevi. Olsem na yumi mas kamapim pasin sori long olgeta manmeri. Dispela bai kirapim yumi long soim pasin helpim long ol narapela. (Efe. 4:32) Ol dispela pasin bai helpim yumi long bihainim ol pasin bilong God na mekim isi bel bilong ol narapela. (2 Kor. 1:3, 4) Insait long kongrigesen, olsem wanem yumi inap soim olsem yumi tingim tru ol lain i kam long ol narapela kantri na ol lain i no gat planti samting? Yumi mas mekim pasin pren long ol na helpim ol long luksave olsem ol i stap olsem blesing insait long kongrigesen. (1 Kor. 12:22) Na tu, pasin sori i kirapim ol Witnes long lainim narapela tokples bambai ol inap helpim ol lain i kam long ol narapela kantri. (1 Kor. 9:23) Dispela i mekim na ol i kisim planti blesing. w17.08 23-24 7-9

Yumi olgeta wan wan i no ken les kwik. Wanem samting bai helpim yumi? Beten askim God long givim holi spirit na bai yu inap kisim pasin bilong i no les kwik. (Efe. 3:16; 6:18; 1 Tes. 5:17-19) Askim Jehova long helpim yu long sanap strong na i no les kwik. Tingim ol bilipman olsem Abraham, Josep, na Devit. Ol i no les kwik long lukim truim bilong ol tok promis bilong Jehova. Ol i bilip long Jehova bikos em i bin mekim gut long ol. Ol i no tingim ol yet na ol samting ol i nidim. Taim yumi tingim ol gutpela blesing ol i kisim long pasin bilong i no les kwik, dispela bai strongim yumi long wet long God i truim ol tok promis bilong em. Maski yumi bungim ol hevi, yumi mas tingting strong long “wet” na i no les kwik. Tasol sampela taim yumi inap askim olsem, ‘Bikpela, wanem taim?’ (Ais. 6:11) Holi spirit inap strongim yumi long mekim wankain tok em Jeremaia i mekim olsem i stap long teks bilong nau. w17.08 7 18-20

Taim Jisas i pikinini yet, em i pilai na kisim amamas. Baibel i tok, i gat “taim bilong lap” na “taim bilong singsing.” (Sav. 3:4) Na tu, Jisas i stadi gut long ol Rait Holi na em i go klostu moa long Jehova. Taim em i gat 12 krismas, em i toktok wantaim ol tisa long tempel long ol tok profet na ol i kirap nogut tru long “save bilong en na ol tok em i bekim long ol.” (Luk 2:42, 46, 47) Jisas i save olsem God i laik bai em i mas “autim gutnius long ol rabisman, . . . na ol aipas i ken lukluk.” (Luk 4:18) Jisas i mekim laik bilong God, olsem na em i stap amamas. Em i amamas tru long tokim ol manmeri long Papa bilong em long heven. (Luk 10:21) Wanpela taim Jisas i skulim meri Samaria long lotu i tru, na bihain em i tokim ol disaipel: “Kaikai bilong mi em long mekim laik bilong man i bin salim mi i kam na long inapim wok em i givim long mi.” (Jon 4:31-34) Jisas i kamapim klia olsem em i laikim God na ol narapela, olsem na em i stap amamas. Yumi tu inap i stap amamas taim yumi mekim olsem. w17.07 23 4-5

Taim Jisas i stap long graun, toktok na pasin em i mekim long ol manmeri i kamapim klia bikpela pasin sori bilong Jehova. (Jon 5:19) God i salim Jisas long mekim gut bel bilong “ol man i stap wantaim bikpela wari,” na “ol manmeri i sori na i krai.” (Ais. 61:1, 2; Luk 4:17-21) Olsem na Jisas i sori tru na pilim hevi bilong ol manmeri, na em i laik tru long mekim isi bel bilong ol. (Hib. 2:17) Baibel i tok: “Jisas Krais i stap wankain long asde na long nau, na inap oltaim oltaim.” (Hib. 13:8) Jisas em “Nambawan Gopas Bilong Laip,” na em i save long bel hevi yumi gat taim wanpela yumi laikim tru i dai. Olsem na “em inap helpim ol man em traim i painim ol.” (Apo. 3:15; Hib. 2:10, 18) Krais i wok yet long pilim hevi bilong ol narapela, na mekim gut bel bilong ol long “taim stret.”—Hib. 4:15, 16. w17.07 13 6-7; 14 10

Oltaim Satan na lain bilong em i laik bagarapim pasin bilong yumi long laikim tru ol gutpela samting yumi gat long sait bilong bilip em Jehova i givim yumi. Yumi inap pundaun long bilip sapos yumi wok strong long bungim mani kago, painim gutpela wok mani, na kisim gutpela sindaun. Aposel Jon i kirapim yumi long tingim gen olsem dispela graun na ol laik bilong en bai pinis. (1 Jon 2:15-17) Olsem na yumi mas wok strong long lukautim pasin bilong yumi long laikim tru ol gutpela samting long sait bilong bilip. Yu mas redi long lusim ol samting we inap daunim pasin bilong yu long laikim tru Kingdom Bilong God. Wok yet long givim bel long autim tok, na holim strong pasin bilong laikim tru dispela wok. Na tu, yu mas wok yet long kisim save long ol tok i tru bilong Baibel. Ol dispela samting em “ol gutpela samting [yu] bungim long heven na ol i no inap pinis. Long heven stilman i no inap go klostu long ol dispela samting na binatang i no inap kaikai.”—Luk 12:33. w17.06 13 19-20

Jehova i no save mekim wok bos long hatpela pasin. Em i larim yumi stap fri long makim wanem samting yumi laik mekim, na dispela i mekim yumi stap amamas. (2 Kor. 3:17) Devit i stori long pasin bilong God na i tok: “Bikpela i stap long haus bilong en na em i gat biknem na i stap king. Na em i as bilong olgeta strong na olgeta pasin bilong amamas.” (1 Sto. 16:7, 27) Etan em wanpela man i bin raitim Buk Song, na em i tok: “Ol manmeri i save mekim song na lotu long yu, na i save wokabaut long marimari bilong yu olsem ol i wokabaut long lait, ol i ken amamas. Ol i save tingting long gutpela pasin yu bin mekim long ol, na olgeta de long san na long nait ol i save amamas na litimapim nem bilong yu.” (Sng. 89:15, 16) Sapos oltaim yumi tingim tingim ol gutpela pasin bilong Jehova, dispela inap strongim bilip bilong yumi olsem wok bos bilong em i nambawan tru. Jehova em Man i wokim yumi, olsem na em i save long ol samting yumi nidim bilong i stap amamas tru, na em i save givim yumi ol dispela samting. God i tokaut long samting yumi ken mekim bilong i stap amamas tru, maski yumi mas lusim sampela samting bilong yumi yet.—Ais. 48:17. w17.06 29 10-11

Tingim wanpela sista long Inglan, em i laik tru long i gat pikinini, tasol em i no inap karim pikinini. Em i bel hevi tru. Olsem na em na man bilong em i adoptim wanpela pikinini. Em i tok: “Maski mipela i adoptim pikinini, mi bel hevi yet bikos dispela i no wankain long taim meri i karim pikinini bilong em yet.” Baibel i stori olsem “wok bilong karim pikinini bai helpim ol meri long stap gut.” (1 Tim. 2:15) Dispela i no makim olsem meri i mas karim pikinini bambai em inap kisim laip oltaim, nogat. Taim meri i gat pikinini, em bai bisi long lukautim famili bilong em, na em i no gat taim bilong tok baksait long ol narapela o subim nus long hevi bilong ol.—1 Tim. 5:13. w17.06 5-6 6-8

Yu ting tok bilong Elihu i makim olsem hatwok bilong yumi long mekim wok bilong God bai lus nating? Nogat. Tok bilong em i makim olsem Jehova i no sot long wanpela samting na em i no nidim yumi long mekim wok bilong em. Jehova i gat olgeta samting. I no olsem em i nidim wok bilong yumi long mekim em i kamap maniman o kisim bikpela strong moa. Tasol God i givim yumi save, strong, na ol gutpela pasin, na em i skelim hau yumi yusim ol dispela samting. Taim yumi soim gutpela pasin long ol wokman bilong Jehova, em i tingim olsem yumi soim dispela pasin long em. Sindaun 19:17 i tok: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.” Yu ting dispela skripsa i makim olsem Jehova i tingim olgeta samting yumi mekim bilong helpim ol rabisman? Yu ting Krieta bilong heven na graun i pilim olsem em i gat dinau long ol manmeri nating husat i soim pasin marimari long ol narapela, na em bai orait long ol na blesim ol? Yes, Pikinini bilong God yet i strongim dispela tok.—Luk 14:13, 14. w17.04 29 3-4

Taim yumi ritim Baibel na ol pablikesen bilong Baibel, dispela inap helpim yumi long laikim tru ol tok bilong Baibel. Tasol yumi ken mekim wanem ol samting moa? Taim yumi go oltaim long ol miting, dispela inap strongim pasin bilong yumi long laikim tru tok bilong Baibel. Long olgeta wan wan wik, yumi yusim Wastaua long stadi long ol tok bilong Baibel, na dispela em nambawan rot bilong yumi long kisim skul. Yumi mas redim gut Wastaua stadi na bai yumi inap kliagut long samting yumi stadi long en. Yumi ken skelim olgeta wan wan skripsa i stap long hap bilong stadi long Wastaua. Long nau, yumi inap daunlodim Wastaua long jw.org Web-sait o yumi inap lukim long JW Library long planti tokples. Sampela stail bilong ol dispela program inap helpim yumi long lukim kwik ol tok bilong ol skripsa i stap long ol stadi atikol. Maski yumi yusim wanem rot long redim ol stadi, taim yumi ritim gut ol skripsa na tingim tingim ol tok bilong en, dispela bai strongim pasin bilong yumi long laikim tru ol tok bilong Baibel. w17.05 20 14

Bihain long baptais, yumi mas mekim yet wok bilong God na truim dediket bilong yumi. I no gat rot long kisim bek tok promis yumi mekim long God taim yumi dediket long em. Sapos Kristen i pilim taiet long mekim wok bilong Jehova o bihainim pasin Kristen, em i no inap tok olsem em i no pilim tru dediket bilong em. Na tu, em i no inap tok olsem baptais bilong em i no gat strong na i no gat mining. Maski em i pilim olsem wanem, dediket i makim olsem em i bin tokim God olsem em bai givim laip olgeta bilong em long mekim wok bilong God. Sapos em i mekim bikpela rong, Jehova na kongrigesen bai skelim em. Yumi no laik bai ol narapela i tok olsem ‘yumi lusim pinis pasin laikim yumi bin gat long pastaim.’ Yumi laik bai Jisas i tokim yumi olsem: “Mi save long ol samting yu mekim, na pasin laikim bilong yu na bilip bilong yu na wok bilong yu na pasin bilong yu long sanap strong. Na mi save olsem ol samting yu mekim long nau, ol i winim ol samting yu bin mekim bipo.” (Rev. 2:4, 19) Olsem na yumi mas givim bel yet long inapim tok promis bilong dediket, na Jehova bai belgut long yumi. w17.04 6-7 12-13

Abraham i tok: “Jas bilong olgeta graun, em i mas bihainim stretpela pasin.” (Stt. 18:25) Abraham i bilip tru olsem Jehova bai mekim stretpela pasin taim em i bagarapim Sodom na Gomora. Abraham i bilip olsem Jehova i no inap “kilim ol gutpela man wantaim ol man nogut.” Abraham i save olsem dispela “i no gutpela pasin.” Em i save olsem pasin bilong Jehova i gutpela na stretpela olgeta. Long Ol Skripsa Hibru, planti taim dispela tok, “stretpela” na “gutpela,” i save stap wantaim long ol ves. Mining bilong dispela 2-pela tok i klostu wankain. Jehova yet i putim ol lo bilong stretpela pasin, olsem na em i save bihainim stretpela pasin long olgeta samting em i mekim. Baibel i tok: “Bikpela i laikim olgeta gutpela pasin na olgeta samting i stret.”—Sng. 33:5. w17.04 18 1-2

Papamama, gutpela eksampel bilong yu bai helpim pikinini long wokabaut long rot i go long laip oltaim. Taim yu “wok yet long painim Kingdom pastaim,” dispela bai kirapim pikinini long bilip olsem Jehova bai lukautim em long ol samting em i nidim long olgeta wan wan de. (Mat. 6:33, 34) Olsem na daunim laik bilong bungim mani kago na mekim ol wok bilong strongim bilip bilong yu. Wok strong long abrusim pasin bilong kisim dinau. Painim “ol samting i dia tumas long heven,” olsem mekim ol wok em Jehova i orait long en, na no ken painim mani kago o mekim ol samting bambai “ol man i litimapim nem” bilong yu. (Mak 10:21, 22; Jon 12:43) Yu mas lusim haptaim long i stap wantaim pikinini. Tokim em olsem yu amamas long disisen bilong em long putim Jehova i stap namba 1 long laip bilong em, na em i no tingting long kisim biknem o mani kago bilong helpim em yet o helpim yu. Abrusim giaman tingting olsem pikinini i mas mekim wok bilong lukautim papamama bambai papamama i kisim gutpela sindaun. Baibel i tok: “Ol pikinini i no ken bungim ol samting bilong helpim papamama, nogat, ol papamama i mas bungim ol samting bilong helpim ol pikinini.”—2 Kor. 12:14. w17.05 8-9 3-4