Septemba

Jehova na Jisas i save mekim planti wok, olsem na yu ting dispela i makim olsem yumi no gat nid long malolo? Nogat, i no olsem. Jehova i no save pilim taiet, olsem na em i no gat nid long malolo. Baibel i tok bihain long Jehova i wokim ol samting long ples antap na ol samting long graun, “em i stop long wok na em i malolo.” (Kis. 31:17) Dispela i makim olsem Jehova i kisim amamas long lukim ol samting em i bin wokim. Taim Jisas i stap long graun, em i bin mekim planti wok, tasol em i makim taim bilong malolo na kaikai wantaim ol pren bilong em. (Mat. 14:13; Luk 7:34) Baibel i kirapim ol manmeri bilong God long kisim amamas long mekim wok. Ol i mas i gat pasin bilong wok, na ol i no ken stap olsem lesman. (Prov. 15:19) Ating yu mekim wok mani na bai yu inap lukautim famili bilong yu. Olgeta disaipel bilong Krais i mas mekim wok bilong autim gutnius. Maski i olsem, yu mas kisim sampela malolo. w19.12 2 par. 2; 3 par. 4-5

No ken stori long wok bilong ol dimon. Yumi mas bihainim eksampel bilong Jisas. Paslain long em i kam long graun, em i bin stap long heven, na em i save gut long Satan na ol dimon. Tasol em i no stori long ol samting ol dispela spirit nogut i bin mekim. Jisas i laik stap olsem witnes bilong Jehova, na i no olsem man bilong tokim ol narapela long Satan. Yumi mas bihainim pasin bilong Jisas na no ken mekim stori bilong ol dimon. Yumi laik bai ol stori bilong yumi i kamapim klia olsem “planti gutpela nius i pulap long bel” bilong yumi, em nius bilong tok i tru. (Sng. 45:1) No ken pret long ol spirit nogut. Yumi stap long taim nogut, olsem na hevi inap painim yumi. Eksiden, sik, o dai inap kamap wantu. Tasol yumi no ken ting olsem ol spirit nogut i kamapim dispela hevi. Baibel i tok olgeta manmeri inap bungim hevi bilong “taim nogut na ol samting we man i no ting inap kamap.” (Ekl. 9:11) Jehova i soim olsem em i gat bikpela strong moa winim ol dimon. w19.04 23-24 par. 13-14

Yu ting ol elda i bihainim lo bilong gavman taim ol i ripotim wanpela husat i abiusim pikinini? Yes. Long ol kantri we i gat kain lo olsem, ol elda i bihainim dispela lo na bringim ripot i go long ol wokman bilong gavman. Ol dispela lo i no pait wantaim lo bilong God. (Apo. 5:28, 29) Olsem na taim ol elda i kisim ripot long wanpela i mekim rong, kwiktaim ol i painim rot long hau ol inap bihainim lo bilong gavman. Ol elda i toksave long viktim na papamama na ol narapela husat i save long dispela rong, olsem ol i fri long ripotim dispela rong long ol wokman bilong gavman. Tasol olsem wanem sapos wanpela long kongrigesen i mekim rong na bihain ol narapela long komiuniti i harim stori bilong dispela rong? Yu ting Kristen husat i givim ripot long ol wokman bilong gavman i mas pilim olsem samting em i mekim i bagarapim gutnem bilong God? Nogat. Man i mekim rong, em tasol i bagarapim gutnem bilong God. w19.05 10 par. 13-14

Baibel i kirapim ol poroman marit long rispektim narapela narapela na inapim tok promis bilong ol. Baibel i kirapim ol long pas gut wantaim, na i tok: “Man bai lusim papa na mama bilong em na em bai pas wantaim meri bilong em, na tupela bai kamap wanpela bodi.” (Stt. 2:24) Tasol savetingting bilong dispela graun i kirapim ol poroman marit long tingim laik bilong ol yet tasol. Wanpela buk bilong divos i tok: “Long sampela bung bilong marit, pastaim ol i save tok promis olsem ‘inap long olgeta taim mitupela i stap laip,’ tasol ol i senisim na tok ‘inap long laikim bilong mitupela long narapela narapela i pinis.’” Dispela kain tingting i mekim na planti marit i bruk na famili i stap bel hevi. Dispela i soim klia tru olsem ol manmeri bilong graun i holim longlong tingting long sait bilong marit. w19.05 23 par. 12

Pol i tingting planti bikos sampela Kristen i larim ol tingting kranki na savetingting bilong graun i stiaim tingting bilong ol. (Efe. 4:17-19) Dispela samting inap kamap tu long yumi. Satan em god bilong dispela graun na em i laik tru long pulim yumi long lusim Jehova, olsem na em i yusim kain kain trap. Wanpela trap em olsem: Sapos yumi laik tru long kisim biknem, Satan inap yusim dispela laik long pulim yumi i go longwe long God. Na tu, em inap yusim sampela samting long famili, kalsa, na ediukesen long kirapim yumi long bihainim tingting bilong em. Yu ting yumi inap rausim ol samting nogut i pas “strong” long tingting? (2 Kor. 10:4) Pol i tok: “Mipela i save daunim ol tingting kranki na olgeta samting i pasim rot bilong save bilong God, na mipela i bosim olgeta tingting na mekim tingting i bihainim tok bilong Krais.” (2 Kor. 10:5) Jehova inap helpim yumi long rausim ol tingting kranki. w19.06 8 par. 1-3

Maski Hana, Devit, na man bilong raitim song i bel hevi tru, ol i bilip na askim Jehova long helpim ol. Ol i beten na autim bel hevi bilong ol. Ol i tokim God long olgeta samting i mekim ol i bel hevi tru. Na tu, ol i go oltaim long ples bilong lotuim Jehova. (1 Sml. 1:9, 10; Sng. 55:22; 73:17; 122:1) Jehova i sori long ol na em i helpim olgeta wan wan bilong ol. Hana i kisim bel isi. (1 Sml. 1:18) Devit i tok: “Planti hevi i save painim stretpela man, tasol Jehova i save helpim em na ol dispela hevi i no save daunim em.” (Sng. 34:19) Man bilong raitim song i pilim olsem Jehova i “holim rait han” bilong em na givim gutpela edvais bilong stiaim em. (Sng. 73:23, 24) Yumi kisim wanem skul long ol dispela stori? Sampela taim ol bikpela hevi bai kamap na putim presa long yumi. Tasol yumi inap sanap strong na karim hevi sapos yumi tingim tingim hau Jehova i bin helpim ol narapela, na yumi ken beten askim em long helpim yumi, na yumi mas mekim ol samting em i tokim yumi long mekim.—Sng. 143:1, 4-8. w19.06 17 par. 14-15

No ken tru larim toktok o pasin bilong wanpela man i mekim na yu pilim sem long i stap olsem wanpela Witnes Bilong Jehova. (Mai. 4:5) Skelim samting ol aposel long Jerusalem i mekim bihain stret long ol birua i kilim i dai Jisas. Ol i save olsem ol lida bilong lotu Juda i heitim ol. (Apo. 5:17, 18, 27, 28) Tasol long olgeta de, ol i go long tempel na tokaut long pablik olsem ol i disaipel bilong Jisas. (Apo. 5:42) Ol i no larim pret i daunim ol. Yumi tu inap daunim pasin bilong pret taim yumi autim tok oltaim na tokaut klia olsem yumi Witnes Bilong Jehova—long ples wok, long skul, na long ples yumi stap long en. (Apo. 4:29; Rom 1:16) Wai na ol aposel i amamas? Ol i save olsem ol birua i heitim ol bikos ol i bihainim laik bilong Jehova, na em samting i stret long ol i ken amamas long en. (Luk 6:23; Apo. 5:41; 1 Pita 2:19-21) Taim yumi save olsem yumi bihainim stretpela pasin na long dispela risen ol man i heitim yumi, dispela bai strongim yumi na yumi no inap pret. w19.07 7 par. 19-20

Jisas na ol manmeri bilong lain Juda em ol i disaipel bilong em, ol i tingim Sabat bikos ol i stap aninit long Lo Bilong Moses. Toktok bilong Jisas na ol samting em i mekim i soim olsem i no gat rong long mekim ol gutpela samting long de Sabat. (Mat. 12:9-11) Long tingting bilong em, i no gat rong long mekim ol gutpela pasin na gutpela wok long de Sabat. Ol samting Jisas i mekim i kamapim klia bikpela risen bilong de Sabat. Ol manmeri bilong God i no inap mekim wok, olsem na ol inap tingim gut wok lotu. Jisas i kamap bikpela insait long famili em ol i yusim de Sabat long strongim pasin bilong ol long i go klostu moa long God. Baibel i stori long samting Jisas i mekim taim em i go long ples bilong em long Nasaret: “Olsem em i save mekim long de Sabat, em i go insait long sinagog, na em i sanap long ritim Rait Holi.” (Luk 4:15-19) Na tu, ol disaipel i rispektim lo bilong Sabat, olsem na bihain long ol i putim bodi bilong Jisas long matmat, ol i no redim ol samting bilong putim long bodi bilong em.—Luk 23:55, 56. w19.12 4 par. 10

Olgeta Kristen i helpim wok bilong painim ol man i gat gutpela bel. Dispela wok i wankain long wok bilong painim wanpela pikinini i lus. Wai na yumi tok olsem? Wanpela liklik boi i gat 3-pela krismas na em i bin lus. Inap 500 manmeri i traim long painim em. Ol i lusim inap 20 aua olgeta long painim em—wanpela volantia i painim em namel long traipela gaden kon. Dispela volantia i no laik bai ol manmeri i givim biknem long em. Em i tok: “Planti handret manmeri i wok bung wantaim long painim em.” Planti manmeri i olsem dispela pikinini. Ol i pilim olsem ol i lus. Ol i no save long wanpela samting ol inap bilip na wet long en, olsem na ol i laik kisim helpim. Yumi stap olsem ol volantia bilong painim ol dispela manmeri, na namba bilong yumi ol volantia i winim 8 milion. Ating yu yet i no inap bungim wanpela husat i laik stadi long Baibel. Tasol ol narapela pablisa husat i autim tok long wankain teritori inap bungim man husat i laik kisim save long tok i tru bilong Baibel. Taim wanpela pablisa i bungim man husat i kamap disaipel bilong Krais, olgeta insait long dispela wok i save kisim amamas. w19.07 16-17 par. 9-10

Aposel Pol i kirapim ol Kristen long Filipai long ran strong yet na no ken les kwik. Kirap long taim kongrigesen i kamap nupela long hap, ol manmeri i birua long ol Kristen. God i kirapim Pol long “kam long Masedonia,” olsem na Pol na Sailas i go kamap long Filipai long 50 C.E. (Apo. 16:9) Ol i bungim Lidia. Em i wok long “putim yau i stap na Jehova i opim bel bilong em long kisim” gutnius. (Apo. 16:14) I no longtaim em i kisim baptais, na olgeta lain long haus bilong em tu i kisim baptais. Tasol Satan i stat long kamapim hevi. Ol man bilong taun i pulim Pol na Sailas i go long ai bilong ol majistret na sutim tok giaman olsem tupela i kirapim bikpela trabel long taun. Olsem na ol manmeri i paitim tupela nogut tru, putim tupela long kalabus, na bihain ol i tokim tupela long lusim taun. (Apo. 16:16-40) Yu ting tupela i givap? Nogat tru! Na olsem wanem long ol bratasista long nupela kongrigesen? Ol tu i sanap strong na ol i no givap! Ol i kisim strong taim ol i lukim gutpela eksampel bilong Pol na Sailas. w19.08 2 par. 1-2

Dispela “stretpela pasin” i makim pasin bilong laikim Jehova na ol manmeri bilong em. Em makim tu pasin bilong yumi long autim bilip bilong yumi long Jisas na stori long ol samting yumi bilip na wet long en. Yumi mekim “stretpela pasin” taim yumi insait tru long sapotim nambawan bikpela wok, em wok bilong kamapim ol disaipel. (Mat. 28:18-20) Maski wanem ol samting i kamap long yumi, yumi inap stap olsem lait namel long ol manmeri bilong dispela graun. Wanpela hevi inap kamap na i luk olsem em bai pasim rot bilong yumi long autim tok, tasol dispela wankain hevi inap opim rot bilong autim tok. Tingim aposel Pol; em i stap kalabus long haus long Rom taim em i raitim pas i go long kongrigesen long Filipai. Tasol sen i no pasim em long autim tok long ol gad na ol visita. Pol i givim bel tru long autim tok long taim bilong hevi, na dispela i strongim ol bratasista long “autim tok bilong God na ol i no pret.”—Fili. 1:12-14; 4:22. w19.08 12 par. 15-16

Jehova i laikim tru man i gat pasin daun—dispela em nambawan bikpela risen bilong yumi long kisim pasin daun. Aposel Pita i strongim dispela tok taim em i mekim tok i stap long teks bilong tude. Buk “Come Be My Follower,” sapta 3, paragraf 23 i stori long tok bilong Pita na i tok: “Pasin antap i olsem posin. Em inap kamapim bikpela hevi. Maski man i gat gutpela save tru long mekim wok, God i no inap yusim em sapos em i gat pasin antap. Tasol Jehova inap yusim man i gat pasin daun long mekim planti samting. . . . [God] bai . . . amamas tru long givim gutpela pe long yu sapos yu gat pasin daun.” Nambawan gutpela samting yumi inap mekim em long amamasim Jehova! (Prov. 23:15) Taim yumi kisim pasin daun, yumi bai amamasim Jehova na kisim planti blesing. Ol narapela bai amamas long bung wantaim yumi. Tingim pasin bilong ol manmeri yu save amamas long bung wantaim ol.—Mat. 7:12. w19.09 4 par. 8-9

Ol elda i wok strong long helpim ol bratasista. Maski ol i gat namba long mekim wok bos, ol i no pilim olsem ol i winim ol narapela. Ol i lukautim gut kongrigesen. (1 Tes. 2:7, 8) Ol i gat bikpela pasin laikim na pasin daun, na dispela i kirapim ol long mekim ol gutpela tok long ol narapela. Andrew i mekim wok elda inap planti yia, na em i tok: “Mi luksave olsem ol bratasista i save amamas taim ol elda i mekim gutpela pasin na pasin isi. Dispela i kirapim ol long wok gut wantaim ol elda.” Tony em narapela brata husat i mekim wok elda inap planti yia, na em i tok: “Mi traim long bihainim tok bilong Filipai 2:3 na oltaim mi wok hat long tingim olsem ol narapela i winim mi. Dispela i helpim mi long abrusim pasin bilong fosim ol narapela long rispektim mi.” Jehova i gat pasin daun, olsem na ol elda tu i mas bihainim pasin daun. Maski Jehova em i King bilong heven na graun, em i save “lindaun” na litimapim ol “man i no gat nem [em ol] i stap long das.” (Sng. 18:35; 113:6, 7) Jehova i heitim ol man i hambak na ol i gat pasin antap. w19.09 16-17 par. 11-12

Sapos yumi laik kisim nupela strong aninit long plang bilong Jisas, orait yumi mas holim stretpela tingting. Yumi mekim wok bilong Jehova, olsem na yumi mas bihainim rot em i makim. Yumi ol wokman, na Jehova em Bosman. (Luk 17:10) Sapos yumi laik bihainim tingting bilong yumi yet, i olsem yumi sakim hap plang na dispela bai givim hevi long yumi. Tasol sapos yumi bihainim rot Jehova i makim, yumi inap mekim ol bikpela wok na yumi inap daunim olgeta kain hevi. Tingim, i no gat man inap stopim Jehova long inapim ol samting em i tingting pinis long mekim! (Rom 8:31; 1 Jon 4:4) Bikpela laik bilong yumi em long litimapim nem bilong Papa bilong yumi, Jehova. Long taim bilong Jisas, sampela manmeri i gat pasin gridi na ol i tingim laik bilong ol yet, olsem na ol i bel hevi na ol i no laik stap disaipel bilong Jisas. (Jon 6:25-27, 51, 60, 66; Fili. 3:18, 19) Tasol ol lain husat i laikim tru God na ol narapela, ol i amamas yet long mekim wok Jisas i givim long ol, na ol i gat hop long wok wantaim Krais long heven. Yumi tu bai stap amamas sapos yumi gat stretpela risen long mekim wok Jisas i givim long yumi. w19.09 20 par. 1; 24-25 par. 19-20

Tingim tu ol blesing yu kisim taim yu kamap fri long ol bilip giaman we i bin kalabusim yu inap planti yia. Yumi amamas tru long kisim dispela fridom! Yu ken bilip olsem yumi bai kisim bikpela moa fridom. Klostu nau, Jisas bai mekim bikpela wok bilong pinisim tru ol lotu giaman na ol gavman bilong graun. God bai lukautim “bikpela lain manmeri” husat i mekim wok bilong em, na ol bai amamas long planti blesing taim dispela graun i kamap ples paradais. (Rev. 7:9, 14) Planti manmeri tru bai kirap bek na ol bai gat rot long kamap fri long olgeta hevi em sin bilong Adam i bin kamapim. (Apo. 24:15) Insait long Wan Tausen Yia, Jisas na ol wanwok bilong em bai helpim olgeta lain man long kamap gutpela olgeta long bodi na long sait bilong bilip. Ol manmeri bai kisim bikpela fridom long dispela haptaim, na em bai wankain olsem yia bilong Jubili bilong lain Israel. Olgeta manmeri long graun husat i stap gut long mekim wok bilong Jehova, ol bai kamap gutpela olgeta na lusim kalabus bilong sin. w19.12 12-13 par. 14-16

Long taim bilong ol aposel, Josep (narapela nem bilong em Barnabas) i amamas long larim Jehova i yusim em long mekim wok. (Apo. 4:36, 37) Bihain long Sol i kamap Kristen, planti wanbilip i pret long bung wantaim em bikos bipo em i save birua long ol kongrigesen. Tasol Barnabas i helpim Sol, na ating Sol i amamas tru long pasin helpim bilong em. (Apo. 9:21, 26-28) Bihain, ol elda long Jerusalem i harim olsem ol wanbilip i stap longwe long Antiok bilong Siria i nidim tok bilong strongim ol. Ol elda i salim husat? Barnabas! Ol elda i mekim stretpela disisen. Barnabas i “kirapim olgeta long ol i mas strong long stap gut long Bikpela.” (Apo. 11:22-24) Long nau tu, Jehova inap helpim yumi long “mekim isi bel” bilong ol wanbilip. God inap helpim yumi long mekim isi bel bilong ol lain em wanpela ol i laikim tru i dai. O, God inap kirapim yumi long visitim o ringim wanpela husat i sik o bel hevi, na yumi inap mekim ol tok bilong strongim em. Olsem wanem? Yu bai larim Jehova i yusim yu long wankain pasin olsem em i bin yusim Barnabas?—1 Tes. 5:14. w19.10 22 par. 8

Taim yumi wok bung wantaim ol pren, yumi inap luksave long ol gutpela pasin bilong ol, tasol sampela taim yumi inap luksave tu long ol pasin kranki bilong ol. Wanem samting inap helpim yumi long pas gut yet wantaim ol maski ol i gat pasin kranki? Yumi mas holim stretpela tingting olsem ol bratasista bilong yumi inap mekim ol popaia. Olsem na taim yumi pas gut wantaim narapela, yumi mas wok hat long strongim dispela pasin pren. Sapos ol pren i mekim ol popaia, long gutpela pasin yumi ken yusim tok bilong Baibel long stretim ol. (Sng. 141:5) Sapos ol i mekim yumi bel hevi, yumi mas fogivim ol. Na taim yumi fogivim ol, yumi no ken toktok gen long dispela samting. Long taim nogut bilong nau, em i bikpela samting tru long yumi mas tingim ol gutpela pasin bilong ol bratasista, na no ken tru tingim ol pasin kranki bilong ol! Taim yumi mekim olsem, dispela bai strongim pasin pren namel long yumi—yumi bai nidim ol gutpela pren long taim bilong traipela hevi tru. w19.11 6 par. 13, 16

Taim yumi mekim ol Baibel stadi, yumi mas traim bes long “kamapim ol disaipel . . . [na] skulim ol long bihainim olgeta samting” Jisas i tokim yumi long mekim. Yumi mas helpim ol manmeri long luksave olsem em i bikpela samting long ol i mas mekim disisen long lotuim Jehova na sapotim Kingdom bilong em. Dispela i makim olsem yumi mas kirapim ol manmeri long pilim tok i tru, bihainim skul ol i kisim, dediketim laip bilong ol long Jehova, na kisim baptais. Long dispela rot tasol, ol inap abrusim bagarap long de bilong Jehova. (1 Pita 3:21) I gat liklik haptaim tasol i stap paslain long ol pasin nogut bilong nau i pinis. Olsem na yumi no gat taim long stadi wantaim ol manmeri husat i no laik kamap disaipel bilong Krais. (1 Kor. 9:26) Wok bilong yumi em i bikpela samting tru na yumi gat liklik haptaim tasol! Planti manmeri moa i mas harim tok bilong Kingdom paslain long pinis i kamap. w19.10 11-12 par. 14-15

Long olgeta yia, long De Bilong Karamapim Sin, lain Israel i save kam bung wantaim na ofaim ol animal. Ol dispela ofa i helpim lain Israel long tingim olsem ol i gat sin na ol i mas mekim sampela samting bilong kamap klin! Fes, hetpris i gat wok long kapsaitim gut paura holi long paia na rum i save pulap long switpela smel. Yumi inap kisim wanem skul long dispela pasin? Baibel i tok ol beten bilong ol man i stap gut long lotuim Jehova i olsem smok i gat gutpela smel. (Sng. 141:2; Rev. 5:8) Hetpris i soim bikpela pasin rispek taim em i bringim paura i gat gutpela smel i go long ai bilong Jehova. Olsem tasol, taim yumi beten long Jehova, yumi mas soim bikpela pasin rispek. Yumi tenkyu tru olsem Krieta bilong yumi i larim yumi i go klostu long em, olsem pikinini i save go klostu long papa. (Jems 4:8) Em i amamas long yumi kamap pren bilong em! (Sng. 25:14) Dispela em gutpela blesing tru na yumi no ken mekim ol samting em i no orait long en. w19.11 20-21 par. 3-5

Long ples yu stap long en, ol manmeri i holim wanem kain tingting long pasin bilong wok? Long planti kantri, ol manmeri i wok hat moa na ol i lusim bikpela haptaim long wok. Taim ol i wok hat tumas, ol i no gat taim bilong malolo, o lusim sampela haptaim long stap wantaim ol wanfamili, o kisim save long God. (Ekl. 2:23) Sampela manmeri i no laik tru long wok, na ol i save givim kain kain eskius. (Prov. 26:13, 14) Ol manmeri i holim kain kain tingting long pasin bilong wok, na tingting bilong ol i no wankain long tingting bilong Jehova na Jisas. Yumi save olsem Jehova em Man bilong wok. Jisas i tokaut long dispela samting na em i tok: “Papa bilong mi i wok i stap i kam inap long nau, na mi tu mi wok i stap.” (Jon 5:17) Tingim olgeta wok God i bin mekim taim em i wokim planti tausen ensel na ol sta na olgeta samting long ples antap. Na tu, yumi lukim planti naispela samting God i wokim long graun bilong yumi. w19.12 2 par. 1-2

Devit i mekim wanem na bai em inap i go klostu long Jehova? Devit i lukim kriesen na dispela i givim save long em long Jehova. Taim Devit i stap yangpela yet, em i lusim bikpela haptaim long stap ausait na lukautim ol sipsip bilong Papa. Ating long dispela taim, em i stat long tingim tingim ol samting Jehova i bin wokim. Taim Devit i lukluk i go antap long skai long nait, em i lukim planti tausen sta, na tu, em i luksave long ol pasin bilong Man i bin wokim ol sta. (Sng. 19:1, 2) Taim Devit i skelim hau Jehova i bin wokim ol manmeri, em i luksave olsem savetingting bilong God i nambawan tru. (Sng. 139:14) Taim Devit i kisim sampela save moa long ol samting Jehova i bin wokim, em i luksave olsem savetingting bilong God i antap moa na i winim tru tingting bilong em. (Sng. 139:6) Yumi inap kisim wanem skul? Long olgeta de, tingim tingim olsem wanem kriesen—ol diwai na plaua, ol animal, na ol manmeri—i givim save long yu long Jehova. Long olgeta wan wan de, yu bai kisim planti moa save long gutpela Papa bilong yu. (Rom 1:20) Na long olgeta de, pasin bilong yu long laikim God bai kamap strong moa. w19.12 19-20 par. 15-17

Moses i mekim wok bilong God. Taim Moses i gat 40 krismas samting, em i mekim disisen long bung wantaim lain Hibru, em ol manmeri bilong God, na em i no laik bai ol man i kolim em olsem “pikinini bilong Fero.” Moses i lusim biknem na namba em i holim. Em i stap long sait bilong ol Hibru, em lain i mekim wok sleiv long Isip, na Fero inap belhat na mekim nogut long em bikos Fero i gat bikpela namba na strong na ol Isip i tingim em olsem wanpela god. Tasol Moses i gat strongpela bilip! Em i trastim Jehova. Dispela i strongim pasin pren bilong em wantaim God, na dispela pasin pren bai i stap oltaim. (Prov. 3:5) Yumi inap kisim wanem skul? Wankain olsem Moses, yumi olgeta i gat disisen long mekim: Yumi bai mekim wok bilong God na bung wantaim ol manmeri bilong em, o nogat? Ating yumi mas daunim sampela laik bilong yumi yet na mekim wok bilong God, na yumi ekspektim pasin birua long han bilong ol man husat i no save long Jehova. Tasol sapos yumi trastim Papa bilong yumi long heven, yumi ken bilip tru olsem em bai sambai long yumi! w19.12 17 par. 5-6

Em tru olsem God i yusim graun long wokim yumi, tasol em i tingim yumi olsem samting i dia tumas. Skelim sampela samting i soim klia olsem yumi dia tru long ai bilong Jehova. Yumi inap bihainim ol pasin bilong em. (Stt. 1:27) Olsem na yumi ol man i winim tru olgeta narapela samting God i bin wokim, na yumi inap bosim graun na ol animal. (Sng. 8:4-8) Maski Adam i mekim rong, Jehova i tingim tru ol manmeri. Yumi dia tumas long em, olsem na em i salim Jisas, Pikinini em i laikim tumas, long givim laip bilong em olsem pe bilong baim bek yumi long sin. (1 Jon 4:9, 10) Jehova bai yusim dispela pe long kirapim bek ol man i dai pinis, “em ol stretpela man na ol man nogut wantaim.” (Apo. 24:15) Baibel i soim olsem yumi dia tumas long ai bilong God maski yumi gat hevi long sait bilong helt na mani, o yumi kamap lapun.—Apo. 10:34, 35. w20.01 15 par. 5-6

Man i no inap kisim hop bilong i go long heven sapos God i bin anointim wanfamili bilong em. God yet i save givim dispela hop long man. (1 Tes. 2:12) Yumi no ken givim ol askim we inap bagarapim bel bilong ol narapela. Olsem, yumi no ken askim meri bilong wanpela brata em God i anointim long em i pilim olsem wanem long em bai stap laip oltaim long graun na man bilong em i no stap wantaim em. Yumi ken save tru olsem long nupela taim, Jehova bai “inapim laik bilong olgeta samting i gat laip.” (Sng. 145:16) Sapos yumi abrusim pasin bilong givim biknem long ol Kristen God i anointim, yumi bai lukautim yumi yet. Hau? Baibel i tok sampela Kristen God i anointim inap lusim bilip. (Mat. 25:10-12; 2 Pita 2:20, 21) Sapos yumi abrusim pasin bilong laikim tumas ol narapela na “mekim ol switpela tok” long ol, yumi no inap bihainim ol, maski God i anointim ol o planti man i save long ol o ol i mekim wok bilong Jehova inap planti yia. (Jut 16) Olsem na sapos ol i no stap gut long God o ol i lusim kongrigesen, yumi bai bilip yet long Jehova na wok yet long lotuim em. w20.01 29 par. 9-10

God “i laikim [yumi] tumas na [yumi] stap olsem ol pikinini bilong em,” olsem na yumi wok strong tru long bihainim ol pasin bilong em. Yumi bihainim ol pasin bilong em taim yumi soim pasin laikim, gutpela pasin, na fogivim ol narapela. Planti manmeri i no save long God, olsem na taim ol i lukim ol gutpela pasin bilong yumi, dispela inap kirapim ol long kisim sampela save moa long em. (1 Pita 2:12) Ol papamama Kristen i mas tingim ol pasin bilong Jehova na dispela i mas stiaim pasin ol i mekim long ol pikinini. Taim ol i mekim olsem, dispela inap kirapim ol pikinini tu long kisim pasin bilong pas gut wantaim gutpela Papa bilong yumi. Yumi amamas tru long Papa bilong yumi, Jehova, na yumi laik bai ol narapela tu i save long em. Yumi pilim wankain olsem King Devit, em i tok: “Oltaim mi bai preisim Jehova.” (Sng. 34:2) Tasol olsem wanem sapos yumi gat pasin bilong sem? Olsem wanem yumi inap kisim pasin bilong strongim bel? Yumi inap strongim bel taim yumi putim tingting i go long amamas yumi inap givim long Jehova, na bikpela helpim ol narapela inap kisim taim ol i save long em. Jehova bai strongim bel bilong yumi. Em i bin helpim ol Kristen long taim bilong ol aposel, na em bai helpim yumi tu.—1 Tes. 2:2. w20.02 11 par. 12-13

Planti man i stadi long Baibel na ol i kisim baptais. Sampela i save mekim Baibel stadi long olgeta taim, tasol ol i surik long kamap disaipel. Ol i amamas long stadi, tasol ol i no winim mak bilong kisim baptais. Sapos yu stadi wantaim wanpela long Baibel, orait mipela i save olsem yu laik helpim em long bihainim skul em i kisim na bai em inap kamap disaipel bilong Krais. Jehova i laik bai ol manmeri i lotuim em bikos ol i laikim em. So yumi laik helpim ol Baibel sumatin long kliagut olsem Jehova i tingim tru na laikim tru olgeta wan wan bilong ol. Yumi laik helpim ol long tingim Jehova olsem “papa bilong ol pikinini i no gat papa na man bilong lukautim ol wido.” (Sng. 68:5) Taim ol Baibel sumatin i pilim tru pasin laikim bilong God, dispela bai kirapim ol long laikim em moa yet. Olsem na helpim ol Baibel sumatin long kliagut olsem God bilong yumi i laik bai ol i kisim laip oltaim, na em i redi long helpim ol long kisim laip oltaim. w20.01 3 par. 7-8

Aposel Pol i gat pasin daun, olsem na em i askim ol pren long strongim em. Taim em i tok olsem ol narapela i bin strongim em, sampela inap tingim em olsem man i no gat strong, tasol em i no tingting planti long dispela samting long taim em i bel hevi. (Kol. 4:7-11) Taim yumi tokaut olsem yumi nidim tok bilong strongim yumi, ol bratasista bai amamas long sambai long yumi. Pol i save olsem tok bilong Ol Skripsa inap strongim em. (Rom 15:4) Na tu, Tok Bilong God i givim em savetingting na em inap sanap strong na karim kain kain hevi i painim em. (2 Tim. 3:15, 16) Taim Pol i kalabus namba 2 taim long Rom, em i pilim olsem dai bilong em i kam klostu. Em i tokim Timoti long kam kwiktaim na bringim “ol skrol.” (2 Tim. 4:6, 7, 9, 13) Wai? Bikos ol dispela skrol i hap bilong Ol Skripsa Hibru em Pol inap yusim long mekim stadi bilong em yet. Taim yumi bihainim eksampel bilong Pol na stadi oltaim long Tok Bilong God, Jehova inap yusim tok bilong ol Skripsa long mekim isi bel bilong yumi—maski yumi bungim wanem kain hevi. w20.02 23 par. 14-15

Elifas, Bildat, na Sofar, ol i no lusim sampela haptaim long tingting long olsem wanem ol inap helpim Jop. Ol i tingting moa long hau ol inap soim klia olsem Jop i bin mekim rong. Sampela tok bilong ol i tru, tasol planti tok ol i mekim long pasin bilong Jop na Jehova, em i no stret na i no tru. Ol i sutim tok olsem Jop em man nogut. (Jop 32:1-3) Jehova i mekim wanem? Em i belhat tru long ol dispela 3-pela man. Em i tok ol i mekim ol kranki toktok na ol i mas askim Jop long mekim beten bilong helpim ol. (Jop 42:7-9) Yumi kisim sampela skul long stori bilong Elifas, Bildat, na Sofar. Namba 1: Yumi no ken skelim pasin bilong ol bratasista. (Mat. 7:2-5) Yumi mas putim gut yau long ol paslain long yumi toktok. Long dispela rot tasol yumi bai kliagut long hevi bilong ol. (1 Pita 3:8) Namba 2: Taim yumi toktok, yumi mas mekim ol tok we i gutpela na i stret. (Efe. 4:25) Namba 3: Jehova i laik tru long save long ol tok yumi mekim long narapela narapela. w20.03 22-23 par. 15-16

Taim yumi skulim ol narapela long Jehova, yumi yet bai save gut moa long em. Yumi luksave long pasin sori bilong Jehova taim em i stiaim yumi go long ol manmeri i gat gutpela bel. (Jon 6:44; Apo. 13:48) Taim yumi stadi wantaim ol manmeri na ol i lusim ol pasin nogut na kisim ol nupela pasin, dispela i helpim yumi long luksave olsem Tok Bilong God i gat pawa. (Kol. 3:9, 10) Rot i op yet long ol manmeri long kisim save long God na bai em inap kisim bek ol, na dispela i soim klia olsem God i no les kwik. (Rom 10:13-15) Tasol maski yumi mekim wok bilong Jehova inap planti yia pinis, yumi no ken ting olsem pasin pren bilong yumi wantaim God em samting nating. Sapos yumi tingim tru dispela pasin pren, yumi bai toktok wantaim God long rot bilong beten. Sapos yu laik pas gut moa wantaim pren bilong yu, orait oltaim yu mas toktok wantaim em. Olsem tasol, oltaim yu mas beten long God na no ken pret long autim ol tingting tru i stap long bel bilong yu. w19.12 19 par. 11, 13-14

Dispela tok i mekim yumi belgut! Jisas i stap King long Kingdom Bilong God, na em bai pinisim olgeta hevi em Satan na lain bilong em i putim long yumi. (Ais. 65:17; 1 Jon 3:8; Rev. 21:3, 4) Dispela i mekim yumi bilip strong long gutpela samting bai kamap! Jisas i givim bikpela wok long yumi, tasol em i stap wantaim yumi na sambai long yumi long dispela taim bilong las de. (Mat. 28:19, 20) Dispela i strongim tru bel bilong yumi! Taim yumi stap belgut, bilip strong long gutpela samting bai kamap, na yumi strongim bel, dispela bai helpim yumi long i stap bel isi. Taim ol bikpela hevi tru i painim yu, yu ken mekim wanem na bai yu inap stap bel isi? Yu ken bihainim pasin bilong Jisas. Namba 1: Beten oltaim. Namba 2: Bihainim tok bilong Jehova na givim bel tru long autim tok maski i hatwok long mekim olsem. Namba 3: Larim ol pren i helpim yu long taim bilong hevi. Long dispela rot, bel isi bilong God bai lukautim tingting na bel bilong yu. (Fili. 4:6, 7) Olsem Jisas, yu tu bai winim olgeta kain hevi.—Jon 16:33. w19.04 13 par. 16-17