Ogas

Ol manmeri husat i kamap gutpela pren bilong Jisas, ol tasol bai kisim bikpela helpim tru long ofa bilong em. Jisas i tok em bai “lusim laip bilong em bilong helpim ol pren bilong em.” (Jon 15:13) Ol bilip lain husat i bin stap paslain long Jisas i kam long graun, bihain ol tu i mas kisim save long Jisas na kisim pasin bilong laikim em. Ol bilip lain bai kirap bek, tasol ol i mas kamap pren bilong Jisas na bai ol inap kisim laip oltaim. (Jon 17:3; Apo. 24:15; Hib. 11:8-12, 24-26, 31) Yumi amamas long stap olsem ol wanwok bilong Jisas long autim tok na skulim ol manmeri long gutnius bilong Kingdom. Taim Jisas i stap long graun, em i mekim wok tisa. Taim Jisas i go bek long heven, stat long dispela taim na i kam inap long nau em i stap olsem het bilong kongrigesen, na em i stiaim yet wok bilong autim tok na skulim ol manmeri. Em i lukim na pilim tru hatwok bilong yu long helpim planti manmeri moa long kisim save long em na Papa. Yumi mas kisim helpim i kam long Jehova na Jisas, na long dispela rot tasol yumi bai inapim wok bilong autim tok na skulim man.—Jon 15:4. w20.04 22 par. 7-8

Long bipo, ol dispela biknem “king bilong not” na “king bilong saut” i makim ol gavman i stap long hap not na hap saut bilong kantri Israel. (Dan. 10:14) Ol manmeri bilong kantri Israel i bin stap olsem ol manmeri bilong God, tasol senis i kamap long Pentikos 33 C.E. Kirap long dispela taim, Jehova i soim klia tru olsem em i tingim ol disaipel bilong Jisas olsem ol manmeri tru bilong em. Olsem na bikpela hap bilong tok profet long Daniel sapta 11 i makim ol samting bai kamap long ol disaipel bilong Krais, na i no long ol manmeri bilong kantri Israel. (Apo. 2:1-4; Rom 9:6-8; Gal. 6:15, 16) Narapela narapela lida o gavman i senis senis long stap olsem king bilong not na king bilong saut. Tasol sampela samting i wankain long ol dispela lida o gavman. Namba 1: Ol dispela lida o gavman i bin mekim wok bos long hap we planti manmeri bilong God i stap long en o ol i birua long lain bilong God. Namba 2: Pasin birua ol i mekim long lain bilong God i soim olsem ol i heitim Jehova, em God tru. Namba 3: Dispela 2-pela king i birua long narapela narapela bikos ol i laik kisim biknem. w20.05 3 par. 3-4

Jehova inap mekim olsem bikos em inap kamap wanem samting em i laik kamap bilong inapim ol samting em i tingting pinis long mekim. Na tu, Jehova inap stiaim ol manmeri bilong em long kamap wanem wanem kain em i laikim bambai ol inap lotuim em na inapim samting em i tingting pinis long mekim. (Ais. 64:8) Long ol dispela rot, Jehova i save kamapim laik bilong em. I no gat wanpela samting inap stopim em long kamapim ol samting em i tingting pinis long mekim. (Ais. 46:10, 11) Yumi inap pilim moa yet ol pasin bilong Papa bilong yumi long heven sapos yumi tingim tingim ol samting em i bin mekim na ol samting em i stiaim yumi long mekim. Eksampel, taim yumi tingim tingim ol samting long kriesen, yumi pilim tru olgeta samting Jehova i bin mekim. (Sng. 8:3, 4) Na taim yumi tingim tingim ol samting Jehova i bin helpim yumi long mekim na bai i stret long laik bilong em, yumi kisim pasin bilong rispektim em. Dispela nem Jehova em i narapela kain tru! Dispela nem i makim olgeta pasin bilong Papa, na olgeta samting em i bin mekim, na olgeta samting em bai mekim.—Sng. 89:7, 8. w20.06 9-10 par. 6-7

Oksijen em win ol manmeri na ol animal i save pulim na bai ol inap stap laip. Ol wok painimaut i soim olsem insait long wanpela yia, ol samting i gat laip i save pulim wan handret bilion kilogram bilong win oksijen. Na ol i save rausim win nogut—kabon daioksait. Maski i olsem, ol i no save pinisim olgeta win oksijen, na kabon daioksait i no save kamap planti moa na daunim win oksijen na bagarapim ples. Wai na i olsem? Jehova i wokim ol traipela diwai na ol gras i liklik na liklik tru, na ol dispela diwai na gras i save kisim kabon daioksait na givim oksijen. Raun bilong oksijen i truim tok i stap long teks bilong tude. God i givim yumi nambawan gutpela planet na ol samting bilong lukautim yumi, olsem na hau bai yumi inap kisim pasin bilong tenkim em? (Sng. 115:16) Wanpela rot em olsem, yumi mas tingim tingim ol samting Jehova i bin wokim. Dispela bai kirapim yumi long tenkim Jehova long olgeta wan wan de long ol gutpela presen em i givim long yumi. Yumi soim tu tenkyu bilong yumi taim yumi klinim gut ples yumi stap long en. w20.05 22 par. 5, 7

Jehova i bihainim savetingting, na em i no les kwik, na em i mekim stretpela pasin taim em i stretim samting Satan i mekim. Na tu, em i mekim planti samting we i soim klia bikpela strong bilong em. Pasin laikim bilong em i stap ples klia long olgeta samting em i mekim. (1 Jon 4:8) Oltaim Jehova i mekim olgeta kain samting long mekim holi nem bilong em. Long nau, Satan i wok yet long bagarapim nem bilong God. Em i trikim ol manmeri na ol i kisim 2-pela tingting long bikpela strong, stretpela pasin, savetingting, na pasin laikim bilong God. Eksampel, Satan i laik kirapim ol man long ting olsem Jehova em i no Krieta. Na sapos ol man i bilip olsem God i stap tru, Satan i laik bai ol i ting olsem God na ol lo bilong em i hatpela tumas na i no fea. Satan i skulim tu ol manmeri olsem Jehova i no gat pasin laikim na pasin sori, na em i save kukim ol man long helpaia. Taim ol manmeri i bilipim ol kain tok giaman olsem, dispela inap kirapim ol long sakim stretpela wok bos bilong Jehova. Satan i mekim wok bos yet, olsem na em bai traim long stiaim yu tu long sakim wok bos bilong Jehova. Yu ting Satan bai win? w20.06 5 par. 13-15

Long planti kongrigesen, bai i gat ol bratasista em ol i traim bes long lainim nupela tokples. Ating ol i hatwok long kamapim stret tingting bilong ol taim ol i yusim nupela tokples. Yumi no ken tingim dispela, mobeta yumi tingim olsem ol i laikim tru Jehova na ol i laik mekim wok bilong em. Sapos yumi tingim ol dispela gutpela pasin, yumi bai tingim tru na rispektim ol dispela bratasista. Maski ol i no save gut long tokples bilong yumi, yumi no inap tok, “Mi no nidim yu.” (1 Kor. 12:21) Jehova i givim gutpela blesing tru long yumi—em i opim rot na yumi inap stap insait long kongrigesen bilong em. Maski yumi man o meri, singel o marit, yangpela o lapun, o yumi save gut long wanpela tokples o nogat, yumi dia tru long ai bilong Jehova na long narapela narapela. (Rom 12:4, 5; Kol. 3:10) Oltaim yumi mas rispektim yumi yet, na rispektim tu ol narapela insait long kongrigesen bilong Jehova. w20.08 31 par. 20-22

Aposel Pol i no givap long lain Atens, maski taun bilong ol i pulap long ol imis, pasin pamuk, na save bilong ol haiden, na tu, em i no larim tok bilas bilong ol i pasim em long autim tok. Pol i kamap Kristen, maski bipo em i “tok nogut long God na mekim nogut long ol lain bilong em na . . . mekim pasin bikhet.” (1 Tim. 1:13) Jisas i tingim olsem Pol inap kamap disaipel, na long wankain pasin, Pol i tingim olsem lain Atens inap kamap disaipel. Tingting bilong Pol i no popaia. (Apo. 9:13-15) Long taim bilong ol aposel, ol manmeri bilong kain kain sindaun i kamap disaipel bilong Jisas. Taim Pol i raitim pas i go long ol Kristen long Korin, em wanpela taun bilong Grik, em i tok long bipo sampela Kristen long dispela kongrigesen i stap olsem ol raskol na ol i bin insait long ol pasin pamuk i nogut tru. Na em i tok: “Tasol God i mekim yupela i kamap klin pinis.” (1 Kor. 6:9-11) Yu ting yu bai tingim olsem ol dispela manmeri inap senisim pasin na kamap disaipel? w20.04 12 par. 15-16

Ol elda i no ken hariap long skelim ol lain i holim 2-pela tingting long mekim wok bilong Jehova. Ol elda i no ken daunim ol; mobeta ol i traim long kliagut long risen bilong toktok na pasin ol i mekim. Long dispela rot tasol, ol elda bai inap long yusim tok bilong Baibel long strongim ol. Profet Elaija i ranawe long Kwin Jesebel. (1 Kin. 19:1-3) Em i pilim olsem wok em i mekim i samting nating na em i laik dai. (1 Kin. 19:10) Jehova i no daunim Elaija; em i tokim Elaija olsem em i no stap wanpis, na em inap bilip long strong bilong God, na i gat planti wok i stap yet long em i mas mekim. Jehova i putim gut yau taim Elaija i kamapim ol wari bilong em, na em i givim ol nupela asainmen long Elaija. (1 Kin. 19:11-16, 18) Yumi kisim wanem skul? Yumi olgeta, na moa yet ol elda, i mas soim gutpela pasin long ol wokman bilong Jehova. Maski man i kros o pilim olsem em i no gutpela man inap long Jehova i ken marimari long em, ol elda i mas putim yau taim em i stori long ol wari bilong em. Ol i mas helpim em long bilip olsem Jehova i laikim em. w20.06 21-22 par. 13-14

Jehova i laik bai yumi amamas long bung wantaim ol pren na ol wanfamili. (Sng. 133:1) Jisas i gat ol gutpela pren. (Jon 15:15) Baibel i stori long ol gutpela samting inap kamap sapos yumi gat ol gutpela pren. (Prov. 18:24) Na Baibel i tok i no gutpela long yumi stap yumi yet. (Prov. 18:1) Planti manmeri i pilim olsem fon na Intenet em rot bilong kisim planti pren na man i no inap pilim olsem em i stap wanpis. Tasol yumi mas lukaut taim yumi yusim fon na Intenet. Ol ripot i soim olsem taim ol manmeri i lusim bikpela haptaim long lukim ol piksa long fon na Intenet, dispela i save mekim ol i pilim olsem ol i stap wanpis na ol i bel hevi. Wai? Wanpela risen em olsem, ol narapela i save putim ol piksa i soim ol bikpela samting i bin kamap long laip bilong ol, na ol naispela piksa bilong ol yet, ol pren bilong ol, na ol naispela ples ol i go raun long en. Taim man i lukim ol dispela piksa, em inap pilim olsem laip bilong em yet i no gat amamas na i no gat wanpela spesel samting long en. w20.07 5-6 par. 12-13

Wastaua bilong Oktoba 1, 1988 i tok: “Ol elda i luksave olsem Krais inap yusim holi spirit long stiaim tingting bilong wanpela elda long kamapim stiatok bilong Baibel we inap helpim ol long stretim wanpela hevi o long mekim bikpela disisen. (Apo. 15:7-15) Holi spirit i save helpim olgeta elda, na i no wanpela elda tasol.” Sapos elda i rispektim ol narapela elda, em i no inap stap olsem fes man bilong toktok long olgeta miting bilong ol elda. Em bai larim ol narapela tu long toktok, na em i no inap pilim olsem oltaim tingting bilong em i stret. Em bai bihainim pasin daun taim em i kamapim tingting bilong em. Em bai putim gut yau long tingting bilong ol narapela. Bikpela samting moa, em i laik tru long kamapim ol stiatok bilong Baibel na putim yau long daireksen i kam long “gutpela wokboi i gat savetingting.” (Mat. 24:45-47) Sapos ol elda i soim pasin laikim na pasin rispek taim ol i stap long miting bilong ol, holi spirit bilong God bai i stap, na em bai stiaim ol long mekim ol rait disisen.—Jems 3:17, 18. w20.08 27-28 par. 5-6

Ol birua bilong aposel Pol i gat bikpela strong moa winim em. Planti taim ol man i paitim em na kalabusim em. Na tu, ol man em pastaim ol i stap pren bilong Pol, ol i mekim nogut long em. Sampela long kongrigesen tu i birua long em. (2 Kor. 12:11; Fili. 3:18) Tasol Pol i no larim ol birua i daunim em. Em i mekim wanem? Em i wok yet long autim tok maski ol man i birua long em. Em i stap gut yet long ol wanbilip maski ol i mekim em i bel hevi. Bikpela samting moa, em i stap gut long God i go inap long em i dai. (2 Tim. 4:8) Pol i trastim Jehova na Jehova i strongim em long mekim olgeta dispela samting; Pol i no mekim long strong bilong em yet. Olsem wanem? Ol narapela i sutim tok na mekim nogut long yu? Yu mas putim Tok Bilong God i go insait long tingting na bel bilong ol. Yu inap mekim olsem taim yu yusim Baibel long bekim askim bilong ol manmeri, soim pasin rispek na gutpela pasin long ol man i mekim nogut long yu, na mekim gutpela pasin long olgeta manmeri, na long ol birua tu.—Mat. 5:44; 1 Pita 3:15-17. w20.07 17-18 par. 14-15

Yu ting i stret long tok olsem Jehova i gat pasin daun? Yes, i stret long yumi inap tok olsem, wankain olsem Devit i bin mekim long teks bilong tude. (Sng. 18:35) Ating Devit i tingim gen taim we profet Samuel i kam long haus bilong papa bilong Devit long anointim neks king bilong Israel. Devit i gat 7-pela brata, na em i las bon; maski i olsem, Jehova i makim em long kisim ples bilong King Sol. (1 Sml. 16:1, 10-13) Devit bai wanbel long tok bilong man i raitim wanpela hap bilong Buk Song, em i tok long Jehova olsem: “Em i save lindaun na lukluk long heven na graun, na em i save litimapim man i no gat nem i stap long das. Na em i save litimapim rabisman . . . [na] mekim ol i sindaun wantaim ol bikman.” (Sng. 113:6-8) Taim yumi skelim ol samting Jehova i mekim long yumi ol lain i lotuim em, yumi luksave olsem Em i gat pasin daun. Em i wanbel long wok lotu bilong yumi, na em i tingim yumi olsem ol pren bilong em. (Sng. 25:14) Jehova i laik stretim rot na bai yumi inap kamap pren bilong em, olsem na long laik bilong em yet, em i givim Pikinini bilong em olsem sakrifais bilong baim bek yumi long sin. Em i marimari tru na sori tru long yumi! w20.08 8-9 par. 1-3

Jehova i makim pinis de na aua bilong pinisim olgeta man nogut long graun. (Mat. 24:36) Em i no inap les kwik na mekim dispela samting paslain long taim em i makim pinis. Em i laik tru long kirapim bek ol daiman, tasol em i wet na em i no les kwik. (Jop 14:14, 15) Em i wetim taim stret em i makim bilong kirapim bek ol daiman. (Jon 5:28) I gat planti gutpela risen na yumi pilim tru pasin bilong Jehova long i no les kwik. Tingim: Jehova i no les kwik, na dispela i opim rot long planti manmeri, na yumi tu, long “tanim bel.” Jehova i laik bai planti manmeri moa i kisim laip oltaim. Olsem na yumi mas soim klia olsem yumi pilim tru pasin bilong God long i no les kwik. Hau bai yumi inap mekim olsem? Yumi mas givim bel olgeta long painim ol manmeri “em bel bilong ol i gutpela long kisim laip oltaim,” na helpim ol long laikim Jehova na mekim wok bilong em. (Apo. 13:48) Long dispela rot, ol tu bai kisim helpim long pasin bilong Jehova long i no les kwik. w20.08 18-19 par. 17

Sumatin i mas laikim ol tok em i lainim long stadi bilong em na bikpela samting moa em i mas pilim tru long bel ol dispela tok. Wai? Bikos bel bilong yumi—em ol laik, ol tingting, na ol filings—i save kirapim yumi long mekim samting. Jisas i skulim ol man long ol tok we i kirapim ol long wokim tingting na ol i amamas long kisim skul long em. Tasol ol manmeri i save bihainim em bikos ol i pilim tru long bel ol tok em i skulim ol long en. (Luk 24:15, 27, 32) Sumatin i mas tingim Jehova olsem wanpela Man i stap tru, na em i ken kamap pren bilong Em, na tingim em olsem Papa, God, na Pren bilong em. (Sng. 25:5) Long taim bilong stadi, helpim sumatin long tingim ol gutpela pasin bilong God. (Kis. 34:5, 6; 1 Pita 5:6, 7) Long wanem wanem sapta yutupela i stadi long en, kamapim klia olsem em i bikpela samting long yumi mas save gut long ol tingting na pasin bilong Jehova. Helpim sumatin long tingim tru ol gutpela pasin bilong Jehova em pasin laikim, gutpela pasin, na pasin marimari. Jisas i tok olsem “namba 1 lo . . . i winim ol arapela lo” em “yu mas laikim Jehova, God bilong yu.” (Mat. 22:37, 38) Traim bes long helpim sumatin long laikim tru God long bel olgeta. w20.10 10 par. 12

Jisas i tingim gut olgeta meri. (Jon 4:27) Em i rispektim tru ol meri i mekim laik bilong Papa bilong em. Em i tingim ol olsem ol sista bilong em na em i kolim nem bilong ol wantaim nem bilong ol man we em i tingim ol olsem famili bilong em. (Mat. 12:50) Na tu, Jisas i stap olsem gutpela pren bilong ol. Tingim pasin pren bilong em wantaim Maria na Marta, tupela wantaim i singel. (Luk 10:38-42) Toktok na pasin bilong Jisas i mekim na ol i stap bel isi. Maria i no pret long sindaun klostu long lek bilong em olsem wanpela disaipel. Na Marta i bel hevi bikos Maria i no helpim em, na em i no pret long tokim Jisas long tingting bilong em. Long dispela taim, Jisas i helpim tupela wantaim long kisim skul long ol bikpela samting. Na em i soim olsem em i tingim dispela tupela meri na brata bilong ol, Lasarus, taim em i go lukim ol. (Jon 12:1-3) Olsem na taim Lasarus i sik nogut tru, Maria na Marta i save olsem ol inap go long Jisas bilong kisim helpim.—Jon 11:3. w20.09 20 par. 3; 21 par. 6

Ol disaipel bilong Jisas i laik tru olsem Kingdom i mas “kamap ples klia wantu tasol” na kisim bek ol long wok bos bilong Rom. Yumi laik tru long lukim dispela taim we Kingdom Bilong God bai pinisim olgeta sik na bringim yumi i go long nupela taim i pulap long ol manmeri i bihainim stretpela pasin. (2 Pita 3:13) Maski i olsem, yumi no ken les kwik na wet long taim Jehova yet i makim. Jehova i larim haptaim i lus long Noa i wokim sip na mekim wok olsem “man bilong tokaut long stretpela pasin.” (2 Pita 2:5; 1 Pita 3:20) Jehova i putim yau taim Abraham i mekim planti askim long disisen bilong Em long bagarapim ol manmeri nogut long taun Sodom na Gomora. (Stt. 18:20-33) Inap planti yia, Jehova i no les kwik long bikhetlain Israel. (Neh. 9:30, 31) Yumi lukim pasin bilong Jehova long i no les kwik taim em i larim haptaim i lus na bai ol man husat i laik kamap pren bilong em i ken “tanim bel.” (2 Pita 3:9; Jon 6:44; 1 Tim. 2:3, 4) Eksampel bilong Jehova i soim olsem yumi mas kisim pasin bilong i no les kwik taim yumi wok yet long autim tok na skulim man. w20.09 10-11 par. 8-9

Taim Jehova i kirapim bek ol daiman, em bai givim bek olgeta memori bilong ol wantaim ol pasin bilong ol. Dispela i kamapim klia wanpela samting. Jehova i laikim yu tru, olsem na em i luksave na tingim gut olgeta samting yu putim long memori, na em i tingim gut ol filings, ol tok, na ol samting yu mekim. Olsem na sapos yu dai na God i kirapim bek yu, em bai inap tru long givim bek olgeta memori wantaim ol pasin bilong yu. King Devit i luksave olsem Jehova i save gut tru long yumi olgeta wan wan. (Sng. 139:1-4) Taim yumi tingim olsem Jehova i save gut tru long yumi, dispela i mas kirapim yumi long pilim olsem wanem? Taim yumi tingim tingim olsem Jehova i save gut tru long yumi, dispela i mas mekim na yumi no ken tingting planti. Wai? Tingim olsem Jehova i save wari tru long yumi. Em i tingim tru ol pasin bilong yumi olgeta wan wan. Em i luksave long olgeta samting i kamap long laip bilong yumi we i stiaim ol pasin na tingting bilong yumi. Dispela i mekim isi bel bilong yumi! Yumi no ken tru pilim olsem yumi stap wanpis. Long olgeta wan wan minit long olgeta de, Jehova i stap wantaim yumi na em i save redi tru long helpim yumi.—2 Sto. 16:9. w20.08 17 par. 13-14

Jehova i save amamas tru long skulim ol manmeri bilong em. Em i laik bai ol i kisim save long em, laikim em, na kisim laip oltaim olsem ol pikinini bilong em. Ol i no inap mekim olsem sapos ol i no kisim stretpela save long em. (Jon 17:3) Jehova i yusim kongrigesen Kristen long taim bilong ol aposel long skulim ol manmeri bilong em. (Kol. 1:9, 10) Holi spirit em “dispela helpim” Jisas i bin tok promis long en i bin helpim tru ol disaipel. (Jon 14:16) Holi spirit i helpim ol disaipel long kliagut moa long Tok Bilong God. Na i helpim ol long tingim gen ol tok Jisas i bin skulim ol long en na ol wok em i bin mekim—bihain ol i bin raitim stori bilong ol dispela samting long Ol Gutnius. Dispela save i strongim bilip bilong ol Kristen long pastaim, na i strongim tu pasin bilong ol long laikim God, Jisas, na laikim narapela narapela. Long taim bilong yumi, Jehova i bin tok profet olsem “long taim bilong las de,” ol manmeri bilong olgeta kantri bai joinim lotu i tru na bai ol inap kisim skul long ol pasin bilong em. (Ais. 2:2, 3) Yumi lukim truim bilong dispela tok profet i kamap. w20.10 24-25 par. 14-15

Wanem samting inap mekim na wanpela inap sakim ol gutpela tok i kam long wanpela gutpela pren? Pasin antap. Ol man i gat pasin antap, ol i laik harim “ol tok em yau bilong ol i sikirap long harim.” Na “ol bai i no laik harim moa tok i tru.” (2 Tim. 4:3, 4) Ol i no laik harim tok bilong ol narapela bikos ol i ting olsem ol i bikpela samting moa winim ol narapela. Tasol aposel Pol i tok: “Sapos man i ting em i gat nem, tasol tru tru em i no gat nem, orait em i giamanim em yet.” (Gal. 6:3) King Solomon i stori gut long dispela samting. Em i tok: “Pikinini i stap rabis na i gat savetingting, em i winim king i lapun na i gat longlong pasin na i no gat gutpela tingting moa long bihainim wanpela tok lukaut.” (Ekl. 4:13) Yumi ken skelim gutpela pasin bilong aposel Pita taim aposel Pol i stretim em long ai bilong ol narapela. (Gal. 2:11-14) Ating Pita inap belhat long tok Pol i mekim long em bikos long pasin Pol i bihainim bilong mekim dispela tok na bikos em i mekim dispela tok long ai bilong ol narapela. Tasol Pita i gat savetingting. Em i kisim dispela tok bilong stretim em na em i no holim bel kros long Pol, nogat. Bihain Pita i bin kolim Pol olsem “brata bilong yumi Pol, em man yumi laikim tumas.”—2 Pita 3:15. w20.11 21-22 par. 9, 11-12

Wanem samting bai helpim gut Baibel sumatin long kamap strong long bilip? Em i mas go long ol miting Kristen. Taim em i go long ol miting Kristen em bai kisim sampela save moa long ol tok bilong Baibel, na dispela bai strongim bilip bilong em na helpim em long strongim pasin bilong em long laikim God. (Apo. 15:30-32) Na tu, wanpela pablisa i ken tokim sumatin olsem pasin bilong em long laikim tru Jehova i kirapim em long bihainim ol tok bilong God. (2 Kor. 7:1; Fili. 4:13) Na taim Baibel sumatin i save gut long narapela narapela pablisa, em bai kisim skul long eksampel bilong ol long olsem wanem em i ken bihainim tok bilong Krais long laikim God na laikim ol narapela. (Jon 13:35; 1 Tim. 4:12) Em inap luksave olsem ol pablisa i bin karim ol wankain hevi olsem em na em inap lain olsem em tu inap mekim ol senis na kamap wanpela disaipel bilong Krais. (Lo 30:11) Olgeta wan wan insait long kongrigesen i ken helpim Baibel sumatin long narapela narapela rot bilong em i ken kamap strong long bilip.—Mat. 5:16. w20.11 5 par. 10-12

Ating aposel Pol i stori long em i bin pait wantaim ol animal tru tru long wanpela stediam long Efesus. (2 Kor. 1:8; 4:10; 11:23) O ating em i stori long ol Juda i birua long em na ol narapela man em ol i olsem “ol wel animal.” (Apo. 19:26-34; 1 Kor. 16:9) Maski wanem samting i bin kamap, Pol i bin karim ol bikpela hevi. Tasol em i bilip olsem gutpela samting bai painim em long bihain. (1 Kor. 15:30, 31; 2 Kor. 4:16-18) Yumi stap long haptaim nogut. Sampela bratasista bilong yumi i karim hevi long pasin raskol. Ol narapela i stap long ol hap we i gat ol bikpela woa i kamap na ol i no pilim seif. Sampela narapela i mekim wok bilong Jehova long ol kantri we gavman i putim tambu long wok lotu bilong yumi, tasol ol i autim tok yet maski gavman inap kalabusim ol o kilim ol i dai. Ol dispela bratasista i givim bel yet long mekim wok bilong Jehova, na ol i stap gutpela eksampel long yumi inap bihainim. Ol i save olsem maski ol inap lusim laip bilong ol long nau, Jehova i promis long givim gutpela samting moa long ol long bihain. w20.12 9 par. 3-4

Olsem wanem? Sampela taim yu bel hevi bikos ol man long hap bilong yu i no laik harim tok yu autim o i no gat planti man i stap long haus taim yu autim tok? Long kain taim olsem, yumi inap mekim wanem bilong holimpas yet amamas bilong yumi? Em i bikpela samting long yu mas holim stretpela tingting long wok autim tok. Wanem insait bilong dispela tok? Putim tingting long wok bilong tokaut long nem bilong God na Kingdom bilong em. Jisas i tokaut klia olsem liklik lain tasol bai bihainim rot i go long laip. (Mat. 7:13, 14) Taim yumi autim tok, yumi ken amamas olsem yumi wok wantaim Jehova, Jisas, na ol ensel. (Mat. 28:19, 20; Rev. 14:6, 7) Jehova i save kirapim ol man i gat gutpela bel long kam long Em. (Jon 6:44) So sapos wanpela man i no putim yau long tok yumi autim long nau, ating em bai putim yau long narapela taim yumi bungim em. Deborah em wanpela sista, em i tok: “Pasin bilong bel hevi em wanpela strongpela tul Satan i save yusim bilong pait long yumi.” Tasol God Jehova i gat bikpela strong moa winim Satan na ol tul bilong em. w20.12 26 par. 18-19; 27 par. 21

Planti Kristen i mas wok mani fultaim so ol i ken sapotim ol yet na famili bilong ol. Maski i olsem, ol dispela gutpela pablisa i save sapotim oganaisesen bilong God long kain kain rot. Olsem, sampela i helpim wok bilong disasta rilif, ol narapela i helpim wok bilong ol konstraksen projek, na olgeta i ken givim donesen bilong sapotim wok i kamap long olgeta hap bilong graun. Ol i mekim ol dispela samting bikos ol i laikim God na ol narapela. Long olgeta wan wan wik, yumi soim olsem yumi laikim ol bratasista bilong yumi taim yumi go long ol miting na insait long bekim tok. Maski yumi pilim taiet, yumi save go long ol dispela miting. Maski yumi gat pasin bilong sem, yumi save bekim tok long ol miting. Na maski yumi olgeta i gat ol hevi bilong yumi yet, yumi save strongim ol narapela paslain na bihain long ol miting. (Hib. 10:24, 25) Yumi amamas tru long ol wok ol bratasista bilong yumi i mekim! w21.01 10-11 par. 11

Ol man i gat pasin antap, ol i save pilim hatwok long tok amamas long ol narapela bikos ol i laik bai ol yet i kisim biknem. Ol i save skelim ol yet wantaim ol narapela na ol i gat pasin bilong resis. Ol i no inap trenim ol narapela na givim namba long ol long mekim wok; ating ol bai tok olsem, “Sapos yu laik wok i kamap gut”—long wei ol i laikim—“orait yu yet i mas mekim dispela wok.” Man i gat pasin antap, em i save painim rot bilong i stap namba 1, na em i save jeles long ol narapela. Sapos yumi yet i luksave olsem yumi gat pasin antap, yumi mas beten strong na askim Jehova long helpim yumi long “kisim nupela tingting” na bai pasin antap i no ken kamap pasin bilong yumi. (Rom 12:2) Yumi amamas tru olsem Jehova i stap gutpela eksampel yumi inap bihainim! (Sng. 18:35) Em i bihainim pasin daun long ol samting em i mekim long ol wokman bilong em, na yumi laik bihainim pasin bilong em. Na tu, yumi laik bihainim gutpela eksampel bilong ol manmeri em stori bilong ol i stap long Baibel, em ol i bin mekim pasin daun na wokabaut wantaim God. Oltaim yumi mas givim ona na glori long Jehova bikos i stret long em i kisim biknem.—Rev. 4:11. w20.08 13 par. 19-20

Marit em wanpela presen i gutpela olgeta i kam long God, tasol ol manmeri ol i no gutpela olgeta. (1 Jon 1:8) Olsem na Baibel i givim tok lukaut long ol marit olsem ol bai bungim sampela hevi long marit bilong ol olsem “ol bai karim pen na hevi long bodi bilong ol.” Jehova i laik bai ol man marit Kristen i mas givim ol samting famili i nidim long sait bilong bilip, bel na tingting, na long sait bilong skin. (1 Tim. 5:8) Ol meri marit em ol i sista, ol i save bisi tru, tasol ol i mas makim haptaim long olgeta de long ritim Tok Bilong God na tingim tingim long bel ol dispela tok na toktok wantaim Jehova long rot bilong beten. Ating ol bai hatwok long mekim olsem. Ol meri marit i save bisi, tasol em i bikpela samting tru long ol i mas lusim haptaim bilong mekim olsem. Wai? Bikos Jehova i laik bai yumi wan wan i kisim pasin bilong pas gut wantaim em na wok yet long strongim dispela pasin pren. (Apo. 17:27) Em tru olsem meri marit i mas wok strong long stap aninit long wok bos bilong man bilong em husat i no gutpela olgeta. Tasol em bai pilim isi long mekim dispela wok Jehova i givim long em sapos em i save na em i kliagut long ol risen Baibel i givim long as na meri i mas i stap daun long man bilong em. w21.02 9 par. 3, 6-7

Ol traim i kain olsem paia ol i save kukim ain bleid long en bilong strongim bleid. Taim ol i kukim ain bleid na bihain mekim i kamap kol, dispela i save mekim ain bleid i strong tru. Olsem tasol, taim yumi sanap strong na winim ol traim, dispela i save mekim bilip bilong yumi i kamap strong tru. Em as na Jems i tok: “Yupela i mas larim pasin bilong sanap strong i inapim wok bilong en, olsem bai yupela inap stap gutpela olgeta na inap tru long olgeta samting.” (Jems 1:4) Taim yumi lukim olsem ol traim i mekim bilip bilong yumi i kamap strong tru, dispela bai mekim yumi amamas long karim ol hevi. Long pas bilong Jems, em i stori long sampela hevi we inap mekim na yumi lusim amamas bilong yumi. Wanpela hevi em taim yumi no save long wanem samting yumi bai mekim. Taim yumi karim wanpela hevi, yumi mas askim Jehova long helpim yumi long mekim ol disisen i amamasim em, na i helpim ol bratasista bilong yumi, na tu, i helpim yumi long stap gut long Jehova. (Jer. 10:23) Yumi nidim savetingting bilong save long wanem rot yumi mas bihainim na wanem tok yumi ken mekim long ol lain i birua long yumi. Sapos yumi no save long wanem tok yumi bai mekim, orait yumi inap pilim bel hevi olsem yumi no gat rot bilong stretim hevi na kwiktaim dispela inap pinisim amamas bilong yumi. w21.02 28 par. 7-9

Jehova i stap gutpela eksampel em yumi ken bihainim. Pasin laikim bilong em long yumi i strong tru, olsem na sapos yumi stap gut long em, i no gat wanpela samting inap tekewe yumi long pasin laikim bilong God. (Rom 8:38, 39) Dispela tok “laikim tru” i makim olsem yumi mas taitim bun o wok strong tru long laikim ol narapela. Sampela taim, yumi mas subim yumi yet long soim pasin laikim long ol wanbilip bilong yumi. Taim ol narapela i mekim yumi bel hevi, yumi mas wok yet long “karim hevi ol arapela i putim long [yumi] na mekim wantaim pasin laikim. Na wok strong long holimpas pasin wanbel bilong holi spirit na stap bel isi, em pasin i save bungim yumi wantaim.” (Efe. 4:1-3) Yumi bai tingim ol gutpela pasin bilong ol na yumi no tingim ol rong bilong ol na yumi bai holim wankain tingting olsem bilong Jehova long ol wanbilip bilong yumi. (1 Sml. 16:7; Sng. 130:3) Yumi inap pilim hatwok long sori na laikim tru ol bratasista bilong yumi, moa yet taim yumi luksave long ol popaia bilong ol. Sampela Kristen long taim bilong ol aposel i gat dispela hevi, kain olsem Yuodia na Sintike. Aposel Pol i kirapim tupela long “kamap wanbel na pas wantaim Bikpela.”—Fili. 4:2, 3. w21.01 22-23 par. 10-11

Ol bratasista i gat bikpela krismas i amamas tru long yupela ol yangpela man husat i “wanbel wantaim” ol long mekim wok bilong Jehova! (Sef. 3:9) Ol i laikim pasin bilong yupela long amamas tru na givim bel tru long mekim ol wok em yupela i kisim insait long kongrigesen. Yupela i stap olsem samting i dia tru long ai bilong ol. Yupela ol yangpela brata, no ken lusim tingting olsem Jehova i laikim yu na em i trastim yu. Em i tok profet olsem long taim bilong las de, ol yangpela man bai stap olsem bikpela lain ami na ol bai redi long givim ol yet long mekim wok bilong em. (Sng. 110:1-3) Em i save olsem yupela i laikim em na yupela i laik yusim gut save bilong yupela long mekim wok bilong em. So no ken les kwik long ol narapela, na no ken les kwik long yu yet tu. Taim yu mekim ol popaia, redi long kisim trening na tok bilong stretim yu; tingim olsem ol dispela helpim i kam long Jehova. (Hib. 12:6) Givim bel tru long mekim olgeta asainmen yu kisim. Na bikpela samting moa, long olgeta samting yu mekim, mekim ol samting bilong amamasim Papa bilong yu long heven.—Prov. 27:11. w21.03 7 par. 17-18

I gat planti samting inap mekim yumi bel hevi—sampela em ol samting long bel na tingting bilong yumi, na sampela em samting i kamap long i stap bilong yumi. Sampela bilong ol dispela samting em ol popaia bilong yumi, ol pasin kranki bilong yumi, na sampela sik yumi gat. Narapela samting inap mekim yumi bel hevi em ating yumi no kisim wanpela asainmen yumi laikim tru long wok bilong Jehova, o yumi autim tok long hap we i no gat planti man i putim yau long tok bilong yumi. Em isi long yumi pilim nogut long ol popaia na ol pasin kranki bilong yumi yet. Dispela inap mekim na yumi holim tingting olsem Jehova i no inap larim yumi go insait long nupela taim. Kain tingting olsem inap nogutim yumi. Baibel i tok, “olgeta man i bin mekim sin”—wanpela man tasol husat i no gat sin em Jisas Krais. (Rom 3:23) Na Man i bin kamapim ol tok bilong Baibel, em i no save painim popaia long yumi o ting yumi mas gutpela olgeta, nogat. Em wanpela Papa i gat pasin laikim na em i gat laik long helpim yumi. Na tu, em i no save les kwik. Em i luksave long hatwok bilong yumi olgeta long daunim ol pasin kranki bilong yumi na holim stretpela tingting long yumi yet, na em i redi long helpim yumi.—Rom 7:18, 19. w20.12 22-23 par. 1-3

Yumi olgeta i wok long wokabaut long rot i go long wanpela longwe ples tru. Ples yumi laik go long en em nupela taim aninit long gutpela wok bos bilong Jehova. Long olgeta de, yumi traim long wokabaut yet long dispela rot i go long laip. Tasol olsem Jisas i tok, dispela rot em i liklik tru na sampela taim i hatwok long bihainim. (Mat. 7:13, 14) Yumi gat sin na yumi no gutpela olgeta, olsem na em isi long yumi lusim dispela rot. (Gal. 6:1) Sapos yumi laik wokabaut yet long dispela liklik rot i go long laip, orait yumi mas redi long stretim ol tingting bilong yumi, ol laik bilong yumi, na ol pasin bilong yumi. Aposel Pol i kirapim yumi long “stretim ol samting [yumi] i gat wok long stretim.” I hatwok long yumi wan wan yet long skelim bel na tingting bilong yumi. Bel bilong yumi i save tingting oltaim long mekim pasin giaman, dispela i mekim na i hatwok long save long samting bel inap kirapim yumi long mekim. (Jer. 17:9) Em isi long “larim ol tingting giaman i giamanim [yumi] yet.” (Jems 1:22) Olsem na yumi mas yusim Tok Bilong God long skelim yumi yet. Tok Bilong God inap kamapim long ples klia ol samting i stap insait tru long bel bilong yumi, em ol “tingting na laik i stap long bel” bilong yumi.—Hib. 4:12, 13. w20.11 18, 20 par. 1-3

Taim yumi bihainim pasin daun, yumi bai amamas. Wai? Taim yumi luksave olsem yumi no gat strong na save bilong mekim sampela samting, yumi bai amamas long kisim helpim long ol narapela. Eksampel: Tingim stori bilong Jisas i oraitim 10-pela lepraman. Namel long ol, wanpela tasol i tanim i go bek na tenkim Jisas long oraitim sik nogut bilong em—dispela man i no gat strong na save bilong oraitim em yet. Dispela man i bihainim pasin daun na em i tok tenkyu long helpim em i kisim, na em i litimapim nem bilong God. (Luk 17:11-19) Ol man i gat pasin daun, ol i save pas gut wantaim ol narapela na ol i gat ol gutpela pren. Wai? Ol i luksave olsem ol narapela i gat ol gutpela pasin na ol i save trastim ol. Ol man i gat pasin daun i save amamas taim ol narapela i mekim gut ol asainmen bilong ol, na ol i save tok amamas na givim ona long ol. w20.08 12-13 par. 17-18