Oktoba

Taim yumi kisim save long Jisas, yumi bai bihainim tingting na pasin bilong em. Na taim yumi save gut long Jisas na bihainim wei bilong em long tingting, yumi bai pas gut moa wantaim em. Hau bai yumi inap bihainim pasin bilong Jisas? Tingim wanpela eksampel. Jisas i tingting moa long helpim ol narapela, na em i no tingting long amamasim em yet. (Mat. 20:28; Rom 15:1-3) Em i tingim ol narapela, olsem na em i daunim laik bilong em yet na fogivim ol. Em i no kros taim ol narapela i sutim kain kain tok long em. (Jon 1:46, 47) Na em i no tingim rong ol i mekim long pastaim na sutim tok yet long ol. (1 Tim. 1:12-14) Em i bikpela samting long bihainim pasin bilong Jisas, bikos em i tok: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:35) Askim yu yet, “Mi bihainim eksampel bilong Jisas na mekim olgeta samting mi inap mekim bilong strongim pasin wanbel namel long mi na ol bratasista?” w20.04 24 par. 11

Maski yumi stap namel long ol manmeri husat i save sutim tok na tok bilas long nem bilong Jehova, rot i op long yu inap autim tok i tru—olsem Jehova em i holi, em i gat stretpela pasin, em i save mekim gutpela pasin, na em i gat pasin laikim. Yu inap sapotim wok bos bilong God. Yu inap helpim ol manmeri long luksave olsem wok bos bilong Jehova tasol i stretpela olgeta, na dispela wok bos bai bringim bel isi long olgeta lain long graun na long ples antap. (Sng. 37:9, 37; 146:5, 6, 10) Taim yumi skulim ol narapela long ol tok i tru bilong Baibel, planti taim yumi save stori long wok bos bilong God, na tokaut klia olsem Jehova i gat rait long bosim heven na graun, na dispela tok em i tru na i stret olgeta. Em tru olsem yumi mas skulim ol man long ol lo bilong God, tasol bikpela tingting bilong yumi em long helpim ol long kisim pasin bilong laikim Jehova, em Papa bilong yumi, na stap gut long em. Olsem na yumi mas tokim ol long ol naispela pasin bilong Jehova, na helpim ol long luksave olsem Jehova em i wanem kain God. (Ais. 63:7) Taim yumi skulim ol gut long Jehova, yumi bai helpim ol long laikim Jehova na daun long em bikos ol i laik stap gut long em. w20.06 6 par. 16; 7 par. 19

Kru bilong yumi em narapela kain samting. Taim yu stap long bel bilong mama, kru bilong yu i bihainim disain i stap pinis, na planti tausen nupela sel bilong kru i kamap long olgeta wan wan minit! Ol saveman i tok kru bilong bikpela man i gat klostu olsem 100 bilion sel em ol i kolim nuron, na olgeta dispela sel i kamapim kru bilong yumi na hevi bilong kru em inap olsem 1.5 kilogram. Wanpela samting em kru i save helpim yumi long mekim em long toktok. Long olgeta wan wan tok yu mekim, kru i save kontrolim klostu olsem 100 masol long tang, nek, lips, wasket, na bros bilong yu. Olgeta dispela masol i mas muv long rait taim na bai yu inap kolim klia ol tok. Wanpela wok painimaut long 2019 i soim olsem taim ol bebi i bon nupela, ol inap harim na luksave long olgeta wan wan tok. Dispela wok painimaut i sapotim tingting bilong planti saveman—taim yumi bon, yumi inap harim na luksave long wanpela tokples na lainim. Yumi inap toktok—dispela em presen i kam long God. w20.05 22-23 par. 8-9

Abraham i redi long lusim gutpela sindaun bilong em long taun Ur. Wai? Bikos em i wetim “dispela taun i gat faundesen tru tru.” (Hib. 11:8-10, 16) Dispela taun em Abraham i wetim em Kingdom Bilong God. Jisas Krais em King bilong dispela Kingdom, na 144,000 Kristen em God i anointim, ol tu bai mekim wok King wantaim em. Pol i kolim dispela Kingdom olsem “wanpela taun bilong God i gat laip, em Jerusalem bilong heven.” (Hib. 12:22; Rev. 5:8-10; 14:1) Jisas i skulim ol disaipel long beten long dispela Kingdom i ken i kam na bai laik bilong God i ken kamap long graun olsem i kamap long heven. (Mat. 6:10) Yu ting Abraham i gat sampela save long hau Kingdom Bilong God bai kamap? Nogat. Inap planti handret yia, dispela save i stap olsem “tok hait holi.” (Efe. 1:8-10; Kol. 1:26, 27) Tasol Abraham i save olsem sampela tumbuna pikinini bilong em bai mekim wok king. Jehova i bin mekim dispela tok promis long Abraham.—Stt. 17:1, 2, 6. w20.08 2-3 par. 2-4

Yumi mas sakim tingting bilong ol apostet. Stat long taim kongrigesen Kristen i kirap nupela, Devil i yusim planti man long giamanim ol wokman bilong God na kirapim ol long kisim 2-pela tingting. Olsem na yumi mas kliagut long hau yumi inap luksave long wanem ol tok i tru na wanem ol tok i giaman. Ol birua inap yusim Intenet o sosel netwok long daunim pasin bilong yumi long trastim Jehova, na daunim tu pasin bilong yumi long laikim ol wanbilip. Tingim olsem Satan i kamapim ol dispela tok giaman, olsem na yumi mas sakim ol dispela tok! (1 Jon 4:1, 6; Rev. 12:9) Sapos yumi laik sakim ol trap bilong Satan, orait yumi mas strongim pasin bilong yumi long trastim Jisas na wok em i mekim bilong kamapim ol samting God i tingting pinis long kamapim. Na tu, yumi mas trastim wanpela rot tasol em Jehova i yusim long stiaim oganaisesen bilong em long nau. (Mat. 24:45-47) Yumi strongim moa yet bilip bilong yumi taim yumi stadi oltaim long Tok Bilong God. Bilip bilong yumi bai kamap strong olsem diwai em ol rop bilong en i go daun insait tru long graun. Aposel Pol i mekim wankain tok taim em i raitim ol tok i stap long teks bilong tude. w20.07 23-24 par. 11-12

Yumi olgeta i sinman, olsem na yumi gat pasin bilong skelim lukluk bilong ol narapela. (Jon 7:24) Tasol yumi no inap save gut long narapela sapos yumi skelim tasol lukluk bilong em. Tingim dispela tok piksa: Maski dokta i gat bikpela save na ekspiriens, em i no inap save long sik bilong man sapos em i skelim tasol lukluk bilong em. Em i mas putim gut yau long toktok bilong sikman na bai em inap save long ol sik bilong em long pastaim, save long tingting na filings bilong em, na luksave sapos bodi bilong man i gat sampela sain bilong sik. Ating dokta bai tokim sikman long kisim eksre na bai dokta inap luksave long sik i stap insait long bodi. Sapos dokta i no mekim ol dispela samting, em inap givim rong marasin long sikman. Olsem tasol, sapos yumi skelim tasol lukluk bilong ol wanbilip, yumi no inap save gut long ol. Yumi mas traim long kliagut long pasin tru bilong ol. Yumi no inap lukluk i go insait long bel bilong man. Tasol yumi inap traim bes long bihainim pasin bilong Jehova. Em i save putim yau long tok bilong ol. Em i save tingim laip na sindaun ol i kamap bikpela long en. Na em i save soim pasin sori long ol. w20.04 14-15 par. 1-3

Yumi mas kisim pasin daun bikos ol manmeri i gat pasin antap, ol i no gat “gutpela tingting.” Ol manmeri i gat pasin antap, ol i save tok pait na mekim pasin bikhet. Tingting na pasin bilong ol i save givim pen long ol yet na long ol narapela. Sapos ol i no holim gutpela tingting, Satan inap pasim tingting bilong ol na bagarapim ol. (2 Kor. 4:4; 11:3) Man i gat pasin daun, em i gat gutpela tingting. Em i save holim stretpela tingting long em yet, na em i luksave olsem ol narapela i gutpela moa na winim em long planti samting. (Fili. 2:3) Na em i save olsem “God i save sakim ol man i mekim pasin antap. Tasol em i save kamapim bikpela pasin helpim long ol man i gat pasin daun.” (1 Pita 5:5) Ol manmeri i gat gutpela tingting, ol i no laik bai ol i stap olsem birua bilong Jehova. Sapos yumi laik bihainim yet pasin daun, orait yumi mas bihainim tok bilong Baibel na “rausim olpela pasin wantaim ol samting [yumi] bin mekim bipo, na [yumi] mas werim nupela pasin olsem [yumi] werim klos.” Yumi mas stadi long eksampel bilong Jisas na traim bes tru long bihainim pasin bilong em.—Kol. 3:9, 10; 1 Pita 2:21. w20.07 7 par. 16-17

Yumi gat gutpela blesing tru long stap insait long kongrigesen bilong Jehova! Yumi stap long paradais long sait bilong bilip we ol manmeri i amamas na stap bel isi. Orait, yu mekim wanem wok insait long kongrigesen? Aposel Pol i tok kongrigesen i stap olsem wanpela bodi. Em i tok tu olsem olgeta wan wan insait long kongrigesen i olsem ol wan wan hap bilong bodi. (Rom 12:4-8; 1 Kor. 12:12-27; Efe. 4:16) Wanpela lesen yumi inap kisim long tok piksa bilong Pol em olsem, yumi olgeta wan wan i gat spesel wok insait long famili bilong Jehova. Pol i kirapim tok piksa bilong em olsem: “Yumi save olsem wanpela bodi i gat planti hap bilong en. Tasol olgeta wan wan hap bilong bodi i no save mekim wankain wok. Olsem tasol maski yumi planti, yumi olgeta i stap olsem wanpela bodi na yumi pas wantaim Krais. Na tu yumi olgeta wan wan i stap olsem ol hap bodi i join wantaim.” (Rom 12:4, 5) Pol i laik kamapim wanem poin? Yumi olgeta wan wan i gat narapela narapela wok insait long kongrigesen, na yumi olgeta wan wan i dia tru. w20.08 20 par. 1-2; 21 par. 4

Yupela ol papamama, hau bai yupela inap bihainim eksampel bilong Jehova long mekim pasin daun? Sapos i stret long mekim, orait kisim tingting bilong ol pikinini long wei bilong mekim wanpela wok. Na sapos i stret, orait yupela i ken bihainim tingting bilong ol. Jehova i stap gutpela eksampel long pasin bilong i no les kwik maski ol manmeri bilong em i kwestenim ol disisen bilong em. Em i putim yau taim Abraham i kwestenim disisen bilong bagarapim Sodom na Gomora. (Stt. 18:22-33) Na tingim pasin Jehova i mekim long Sara, meri bilong Abraham. God i tok promis olsem Sara bai gat bel taim em i lapun tru, na God i no kros o belhat taim Sara i lap long dispela tok promis. (Stt. 18:10-14) Em i soim rispek long Sara. Yupela ol papamama na ol elda, yupela inap kisim wanem skul long eksampel bilong Jehova? Yupela i save mekim wanem taim ol pikinini o ol pablisa i kwestenim ol disisen bilong yupela? Wantu yupela i laik stretim ol? O yupela i traim long pilim tingting bilong ol? Ol famili na ol kongrigesen i save stap gut taim ol lain i mekim wok bos i bihainim eksampel bilong Jehova. w20.08 10 par. 7-9

Taim yumi stat long bung wantaim ol manmeri bilong Jehova, ating yumi amamas taim ol narapela i helpim yumi bikos yumi luksave olsem long sait bilong bilip, yumi stap yet olsem ol pikinini na i gat planti samting yumi mas lainim. (1 Kor. 3:1, 2) Tasol olsem wanem long nau? Sapos yumi mekim wok bilong Jehova inap planti yia na save bilong yumi i kamap bikpela, ating yumi no inap amamas tumas taim narapela i laik helpim yumi, moa yet sapos yumi stap long tok i tru planti yia moa winim wanbilip husat i laik helpim yumi. Tasol tingim, planti taim Jehova i save yusim ol wanbilip long strongim yumi. (Rom 1:11, 12) Yumi mas tingim dispela sapos yumi laik bai Jehova i strongim yumi. Yumi inap mekim sampela bikpela wok sapos yumi bihainim pasin daun na trastim Jehova, na i no olsem yumi mekim ol dispela wok long strong na save bilong yumi yet, o bikos yumi i gat mani kago na gutpela sindaun. Yumi olgeta i ken mekim gut ol wok taim yumi (1) trastim Jehova, (2) kisim skul long ol eksampel long Baibel, na (3) kisim helpim long ol wanbilip. Long dispela rot, Jehova bai strongim yumi taim yumi pilim olsem yumi no gat strong! w20.07 14 par. 2; 19 par. 18-19

Wanpela samting inap mekim na yumi pilim hatwok long holim pasin bilong i no les kwik em taim yumi autim tok long ol wanfamili em ol i no wanbilip. Stiatok i stap long Eklisiastis 3:1, 7 inap helpim yumi. Em i tok: “I gat . . . taim bilong pasim maus na taim bilong toktok.” Yumi mas larim gutpela pasin bilong yumi i autim tok long ol, na tu, oltaim yumi laik redi long tokim ol long tok i tru. (1 Pita 3:1, 2) Yumi no ken les kwik long olgeta man—na tu, ol wanfamili bilong yumi—taim yumi givim bel long autim tok na skulim ol man. Yumi ken kisim skul long pasin bilong i no les kwik long ol bilipman em stori bilong ol i stap long Baibel, na tu, ol bilipman long taim bilong yumi. Habakuk i laik tru long lukim pasin nogut i pinis, tasol em i no les kwik taim em i tok: “Mi bai sanap i stap long ples we mi save was.” (Hab. 2:1) Aposel Pol i tok em i laik tru long “pinisim” wok autim tok bilong em. Olsem na em i no les kwik long “autim gut tru dispela gutnius.”—Apo. 20:24. w20.09 12 par. 12-14

Jisas i gat bikpela strong na em i stap nambatu long Jehova, tasol em i no tingim em yet olsem em i nambawan tru. Yumi ol wokman bilong Jehova i bihainim pasin bilong Jisas na strongim pasin laikim insait long oganaisesen bilong God. (Luk 9:48; Jon 13:35) Yu mas mekim wanem sapos i gat ol hevi insait long kongrigesen na yu pilim olsem ol elda i no stretim ol dispela hevi? No ken komplein; mobeta yu bihainim pasin daun na sapotim wok bilong ol elda. (Hib. 13:17) Yu ken askim yu yet olsem: ‘Tru tru ol dispela hevi em bikpela tru na i gat nid long stretim? Nau em rait taim long stretim ol dispela hevi? Em wok bilong mi long stretim ol dispela hevi? Tru tru mi laik strongim pasin wanbel, o mi laik apim nem bilong mi yet?’ Maski yumi gat save, Jehova i laik bai yumi bihainim pasin daun, na maski yumi inap mekim planti wok, em i laik bai yumi gat pasin wanbel. Olsem na yu mas bihainim pasin daun taim yu mekim wok bilong Jehova. Taim yu mekim olsem, yu bai strongim pasin wanbel insait long kongrigesen.—Efe. 4:2, 3. w20.07 4-5 par. 9-11

Jisas i amamas long ol bilipmeri i givim “ol samting bilong ol yet” long helpim em. (Luk 8:1-3) Em i kamapim klia ol bikpela tok i tru long laik bilong God long ol. Olsem, em i tokim ol olsem em bai dai na kirap bek. (Luk 24:5-8) Wankain olsem em i bin mekim long ol aposel, em i redim ol dispela meri long ol hevi ol bai bungim long bihain. (Mak 9:30-32; 10:32-34) Em i bikpela samting long tingim olsem, maski ol aposel i ranawe taim ol man i arestim Jisas, sampela bilong ol dispela meri husat i bin sapotim em ol i stap wantaim em taim em i dai long diwai pos. (Mat. 26:56; Mak 15:40, 41) Ol bilipmeri ol i fes lain long lukim em taim em i kirap bek. Em i tokim ol dispela meri long tokim ol aposel olsem em i kirap bek pinis. (Mat. 28:5, 9, 10) Na long Pentikos 33 C.E., ating ol meri i bin stap taim God i makim ol disaipel long holi spirit na olgeta lain i stap long dispela hap i kisim save long mekim narapela tokples na tokim ol man long “ol strongpela wok bilong God.”—Apo. 1:14; 2:2-4, 11. w20.09 23 par. 11-12

Wok bilong kamapim disaipel em wok bilong seivim laip bilong ol man! Hau yumi save long dispela? Taim Jisas i mekim tok i stap long Matyu 28:19, 20, em i tok: “Yupela i mas i go na kamapim ol disaipel . . . , na baptaisim ol.” Bilong wanem baptais em i bikpela samting? Baptais i opim rot long God i ken kisim bek yu. Man i laik kisim baptais, em i mas bilip olsem God bai kisim bek em long rot bilong ofa bilong Jisas na kirap bek bilong em. Em as na aposel Pita i tokim ol wanbilip Kristen olsem: “Samting i kisim bek yupela long nau, em baptais yupela i kisim, long wanem, yupela i bilip long Jisas Krais husat i bin kirap bek.” (1 Pita 3:21) So taim wanpela nupela disaipel i kisim baptais, em i stap long rot bilong kisim laip oltaim. Sapos yumi laik kamapim ol disaipel, yumi mas “mekim gutpela wok tisa.” (2 Tim. 4:1, 2) Wai? Bikos Jisas i tokim yumi olsem, ‘Yupela i mas i go na kamapim ol disaipel na skulim ol.’ Aposel Pol i tok yu mas “wok strong yet” long mekim dispela wok, “na long dispela rot yu bai kisim laip na ol man i harim tok bilong yu, ol tu bai kisim laip.” w20.10 14 par. 1-2

Pita i laikim wok bilong kisim ol manmeri. Jehova i sapotim em na em i mekim gut tru dispela wok. (Apo. 2:14, 41) Yumi autim tok bikos yumi laikim Jehova; dispela em nambawan risen i kirapim yumi long mekim dispela wok. Pasin bilong yumi long laikim Jehova bai helpim yumi long daunim ol tingting kranki olsem yumi no gat save inap long mekim dispela wok. Taim Jisas i singautim Pita long kamap man bilong kisim ol man, em i tokim Pita: “No ken pret.” (Luk 5:8-11) Pita i no pret long wanem samting bai kamap sapos em i kamap disaipel. Tasol em i kirap nogut long mirakel Jisas i bin mekim na ol i kisim planti pis tru, na Pita i pilim olsem em i no gutpela man inap long wok wantaim Jisas. Ating yu tu bai pilim hatwok taim yu luksave long ol samting yu mas mekim bilong stap olsem disaipel bilong Krais. Sapos olsem, strongim pasin bilong yu long laikim Jehova, Jisas, na ol narapela, na dispela bai kirapim yu long bihainim singaut bilong Jisas long kamap man bilong kisim ol manmeri.—Mat. 22:37, 39; Jon 14:15. w20.09 3 par. 4-5

Yumi amamas long givim taim, strong, na ol samting bilong yumi long painim ol man em “bel bilong ol i gutpela long kisim laip oltaim.” (Apo. 13:48) Taim yumi mekim olsem, yumi bihainim eksampel bilong Jisas. Em i tok: “Kaikai bilong mi em long mekim laik bilong man i bin salim mi i kam na long inapim wok em i givim long mi.” (Jon 4:34; 17:4) Yumi tu i laik mekim olsem. Yumi laik inapim wok em Jisas i givim long yumi. (Jon 20:21) Na yumi laik bai ol narapela, dispela i makim tu ol lain i lusim wok autim tok, long sanap strong na mekim yet dispela wok wantaim yumi. (Mat. 24:13) Em tru olsem bilong inapim dispela bikpela wok Jisas i givim long yumi, bai i gat hatwok bilong en. Tasol yumi no stap wanpis long mekim dispela wok. Jisas i tok promis olsem em bai stap wantaim yumi. Yumi insait long dispela wok bilong kamapim ol disaipel na yumi stap olsem “ol wanwok bilong God” na “ol disaipel bilong Krais.” (1 Kor. 3:9; 2 Kor. 2:17) Olsem na yumi ken inapim dispela wok. Em wanpela gutpela wok tru na yumi amamas long mekim dispela wok na helpim ol narapela tu long mekim dispela wok!—Fili. 4:13. w20.11 7 par. 19-20

Sampela taim, ol disisen papamama i mekim i save mekim bikpela samting long laip bilong ol pikinini bilong ol. Sapos papamama i no mekim ol gutpela disisen, ol inap kamapim hevi long pikinini bilong ol. Tasol sapos ol i mekim ol gutpela disisen, ol i opim rot long ol pikinini bilong ol i ken stap amamas, na i gat gutpela laip. Ol pikinini tu i mas mekim ol gutpela disisen. Nambawan gutpela disisen wanpela inap mekim em long mekim wok bilong Papa bilong yumi long heven, Jehova. (Sng. 73:28) Tupela papamama bilong Jisas i tingting strong long helpim ol pikinini bilong ol long lotuim Jehova, na disisen tupela i mekim i soim olsem dispela em nambawan mak ol i putim. (Luk 2:40, 41, 52) Olsem tasol, Jisas i mekim gutpela disisen we i helpim em long inapim asainmen bilong em long mekim laik bilong Jehova. (Mat. 4:1-10) Jisas i gat gutpela pasin, pasin bilong stap gut long narapela, na em i gat strongpela bel. Ol papamama husat i laikim Jehova bai amamas long i gat kain pikinini man olsem. w20.10 26 par. 1-2

Tingim ol dispela eksampel. Wanpela lapun sista i tingim ol gutpela samting i bin kamap long laip bilong em long bipo. Maski laip bilong em long nau i gat ol hatwok, em i givim bel yet long mekim wok bilong Jehova inap long skel bilong em. (1 Kor. 15:58) Olgeta de em i save piksaim em yet na ol wanblut bilong em i stap long nupela taim em God i tok promis long en. Narapela sista i tingim olsem wanpela sista i bin rongim em, tasol em i no tingim tingim na holim yet bel nogut long em. (Kol. 3:13) Wanpela brata i luksave long ol rong em i bin mekim long bipo, tasol em i putim tingting long stap gut long God kirap long nau na i go. (Sng. 51:10) Wanem samting i wankain long dispela 3-pela Kristen? Olgeta i bin tingim ol dispela samting i bin painim ol long bipo, tasol oltaim ol i no laik tingim tingim ol dispela samting, nogat. Ol i “lukluk i go stret” long ol samting bai kamap bihain. Wai na dispela i bikpela samting? Sapos man i wok long lukluk i go long baksait, em bai no inap long wokabaut stret. Olsem tasol, yumi no inap mekim gut wok bilong Jehova sapos oltaim yumi wok long tingim tingim ol samting i bin kamap long laip bilong yumi long bipo.—Luk 9:62. w20.11 24 par. 1-3

Goliat em hapman bilong pait na em i gat bikpela strong, na em i tingim Devit olsem man i no gat strong. Goliat em traipela man moa, em i gat ol tul bilong pait, na em i bin kisim gutpela trening moa long wei bilong pait. Devit em yangpela mangi tasol, na em i no bin kisim trening, na em i no gat ol tul bilong pait. Devit i trastim Jehova, na Jehova i strongim em na em inap daunim birua. (1 Sml. 17:41-45, 50) Devit i feisim narapela hevi we inap mekim na em i pilim olsem em i no gat strong. Devit i stap gut long Sol, em man Jehova i makim long mekim wok king long Israel. Pastaim King Sol i rispektim Devit. Bihain, Sol i kisim pasin antap na em i jeles long Devit. Sol i mekim nogut long Devit, na em i laik kilim em. (1 Sml. 18:6-9, 29; 19:9-11) Maski Devit i karim hevi long han bilong King Sol, em i wok yet long soim rispek long Sol olsem man em Jehova i makim long mekim wok king. (1 Sml. 24:6) Devit i bilip olsem Jehova bai helpim em, na em bai inap long sanap strong na winim dispela hevi.—Sng. 18:1, na supaskripsen. w20.07 17 par. 11-13

Bikpela hap bilong dispela tok profet bilong king bilong not na king bilong saut i kamap tru pinis, olsem na yumi ken bilip tru olsem ol narapela hap tok bilong dispela tok profet bai kamap tru. Sapos yumi laik kliagut long tok profet bilong Daniel sapta 11, orait yumi mas tingim gut olsem: Dispela tok profet i makim ol lida na ol gavman husat i mekim wok bos long hap we planti manmeri bilong God i stap long en o ol i birua long lain bilong God. Taim yumi skelim populesen bilong ol manmeri long graun, ol manmeri bilong God i liklik lain, tasol ol bikpela hevi i save painim ol. Bilong wanem? Bikos Satan na lain bilong em i holim wanpela tingting tasol—ol i laik tru long bagarapim ol manmeri husat i mekim wok bilong Jehova na Jisas. (Stt. 3:15; Rev. 11:7; 12:17) Na tu, tok profet bilong Daniel i mas stret wantaim ol narapela tok profet bilong Baibel. Sapos yumi laik kisim stretpela save long tok profet bilong Daniel, orait mobeta yumi skelim wantaim ol narapela tok bilong Baibel. w20.05 2 par. 1-2

Planti man long nau i gat kain kain tingting long samting i painim ol daiman. Tasol Baibel i skulim yumi long wanem samting? Taim man i dai, bodi bilong em i save sting na tanim i kamap graun gen. Tasol God inap kirapim bek dispela man na givim bodi i stret long em; God inap mekim olsem bikos em Man husat i bin wokim dispela yunives. (Stt. 1:1; 2:7) Aposel Pol i mekim wanpela tok piksa bilong soim olsem taim God i kirapim bek ol lain husat bai kisim laip long heven, em bai givim nupela bodi long ol. Tingim “wanpela liklik sid” o “sid bilong wit.” Taim man i planim sid bilong wit long graun, dispela sid i save putim nupela kru na gro i go antap. Taim dispela wit i kamap bikpela, em i no wankain moa olsem dispela liklik sid. Pol i mekim dispela tok piksa bilong soim olsem “long laik bilong God yet, em i save givim bodi” long man. Pol i tok tu olsem “i gat ol bodi bilong heven na ol bodi bilong graun.” Wanem insait bilong dispela tok? Long graun, bodi bilong yumi i gat mit na blut, tasol long heven i gat bodi bilong spirit, olsem bodi bilong ol ensel.—1 Kor. 15:36-41. w20.12 9-10 par. 7-9

Yumi olgeta i laik stap isi na stap bel isi. I no gat wanpela man i save amamas long tingting planti. Tasol sampela taim yumi inap tingting planti na mekim wankain askim em King Devit i bin mekim long teks bilong tude. Yumi no inap kontrolim sampela samting we inap mekim yumi tingting planti. Olsem, long olgeta yia pe bilong ol kaikai, klos, na haus i go antap, na yumi no inap daunim pe bilong ol dispela samting; na tu, planti taim ol wanwok na ol wanskul bai traim long pulim yumi long mekim tok giaman o mekim pasin pamuk, na yumi no inap kontrolim ol. Na yumi no inap stopim ol manmeri long mekim pasin raskol long hap yumi stap long en. Ol dispela hevi i stap bikos yumi stap long graun we planti manmeri i no bihainim ol stiatok bilong Baibel. Satan em god bilong dispela graun, na em i save olsem sampela manmeri bai larim “ol wari bilong laip long dispela taim” i pasim ol long lotuim Jehova. (Mat. 13:22; 1 Jon 5:19) Olsem na graun i pulap long kain kain hevi we i mekim ol manmeri i tingting planti! w21.01 2-3 par. 1, 3

Aposel Jon i kirapim yumi tu long yumi no ken heitim ol bratasista bilong yumi. Sapos yumi no bihainim dispela tok, yumi opim rot long Satan inap stiaim tingting bilong yumi. (1 Jon 2:11) Dispela samting i bin kamap long sampela Kristen long taim bilong ol aposel. Satan i wok strong tru long mekim ol manmeri bilong God i heitim narapela narapela na em i laik pinisim pasin wanbel namel long ol. Long taim Jon i raitim ol pas bilong em, ol man em ol i bihainim wankain pasin olsem Satan ol i stap insait long kongrigesen. Olsem, Diotrefes i kamapim pasin bilong brukim lain insait long wanpela kongrigesen. (3 Jon 9, 10) Em i no rispektim ol elda em gavening bodi i salim i kam. Taim ol brata long kongrigesen i laik mekim gut long ol narapela em Diotrefes i no laikim ol, Diotrefes i laik rausim ol dispela brata long kongrigesen. Em i mekim pasin antap! Long nau tu, Satan i laik tru long mekim ol manmeri bilong God i heitim narapela narapela na em i laik pinisim pasin wanbel namel long ol. Yumi no ken tru larim pasin bilong heitim narapela i pinisim pasin wanbel namel long yumi. w21.01 11-12 par. 14

Long taim bilong Wol Woa 1, ol wokman bilong God i tok nogat long insait long pait, olsem na gavman Jemani na gavman Inglan i mekim nogut tru long ol. Na gavman bilong Amerika i kalabusim ol man husat i go pas long mekim wok autim tok. Dispela hevi i truim tok profet i stap long Revelesen 11:7-10. Long ol yia bihain long 1930 na long taim bilong Wol Woa 2, king bilong not i mekim hatpela pasin tru long ol manmeri bilong God. Hitler na ol sapota bilong em i tambuim wok bilong ol manmeri bilong God. King bilong not i kilim i dai 1,500 manmeri long lain bilong Jehova na kalabusim planti tru bilong ol long ol banis kalabus nogut. King bilong not i mekim hatpela pasin tru bilong stopim ol manmeri bilong God long onarim nem bilong Jehova, na long dispela rot i olsem em i “mekim doti ples holi” na “rausim sakrifais bilong oltaim.” (Dan. 11:30b, 31a) Hitler em lida long sait bilong king bilong not, na em i tok promis long pinisim olgeta manmeri bilong God long Jemani. w20.05 5-6 par. 12-13

Taim yumi sori na laikim tru narapela narapela, yumi helpim kongrigesen long daunim pasin bilong resis wantaim narapela narapela. Tingim, Jonatan i no traim long resis wantaim Devit na traim long kisim ples bilong em olsem king, nogat. (1 Sml. 20:42) Yumi olgeta i ken bihainim eksampel bilong Jonatan. Abrusim pasin bilong resis wantaim ol wanwok bilong yupela bikos ol i gat save long mekim gut ol wok, “yupela i mas daunim yupela yet na tingim olsem ol arapela i winim yupela.” (Fili. 2:3) Tingim olsem olgeta insait long kongrigesen i ken mekim ol wok bilong helpim kongrigesen. Taim yumi wok yet long daunim yumi yet, yumi bai lukim ol gutpela pasin bilong ol wanbilip bilong yumi na kisim helpim long gutpela eksampel bilong ol. (1 Kor. 12:21-25) Taim yumi sori na laikim tru narapela narapela, yumi strongim pasin wanbel namel long ol manmeri bilong God. Yumi soim klia olsem yumi ol disaipel bilong Jisas, na dispela i save kirapim ol manmeri i gat gutpela bel long kam insait long lotu i tru. Bikpela samting moa, yumi givim glori long Jehova, em “Papa bilong marimari na God bilong mekim isi bel bilong ol man long olgeta kain taim.”—2 Kor. 1:3. w21.01 24 par. 14; 25 par. 16

Yumi stap olsem ol manmeri bilong Jehova, olsem na sampela taim ol narapela i luk daun long yumi na tok bilas olsem yumi no gat save na strong. Yumi no bihainim pasin bilong ol man bilong dispela graun. Yumi daunim yumi yet na yumi redi long bihainim tok. Tasol ol man bilong graun i givim biknem long ol man i gat pasin antap na pasin bikhet. Yumi no insait long wok politik, na yumi no save joinim ami bilong ol kantri. Yumi stap narapela kain long ol man bilong dispela graun, olsem na ol i luk daun long yumi. (Rom 12:2) Maski ol man bilong graun i ting olsem yumi no gat strong, Jehova i yusim yumi long mekim ol bikpela wok. Long nau, em i stiaim bikpela wok autim tok i kamap long olgeta hap bilong graun winim olgeta narapela taim bipo. Lain bilong God i winim olgeta narapela lain long sait bilong trensletim na tilim ol nius long planti moa tokples, na ol i yusim Baibel long helpim planti milion manmeri long mekim laip bilong ol i kamap gutpela moa. Ol inap mekim ol dispela bikpela wok bikos Jehova i bin helpim ol. w20.07 15 par. 5-6

Jisas i stap daun long Jehova, tasol em i no mekim olsem bikos em i no gat save, nogat. Em i save skulim ol man long ol tok i isi na i klia long ol i ken kisimgut na dispela i soim olsem em i gat bikpela save tru. (Jon 7:45, 46) Jehova i rispektim save bilong Jisas long mekim wok, olsem na em i larim Jisas i wok wantaim em taim Jehova i wokim yunives. (Prov. 8:30; Hib. 1:2-4) Na bihain long Jisas i kirap bek, Jehova i givim em “namba long bosim olgeta samting long heven na long graun.” (Mat. 28:18) Maski Jisas i gat bikpela save, em i save larim Jehova i stiaim em. Wai? Bikos em i laikim Papa bilong em. Jehova i no wokim meri na putim em i stap aninit long man bikos Em i tingim ol meri olsem samting nating, nogat. Jehova i soim klia olsem em i tingim ol meri taim em i makim ol meri long mekim wok king wantaim Jisas. (Gal. 3:26-29) Jehova i soim olsem em i bilip long Pikinini bilong em taim em i putim wok bos long han bilong em. Olsem tasol, man marit i gat gutpela tingting em bai givim sampela wok i gat namba long meri bilong em. w21.02 11 par. 13-14

Tok Bilong God i olsem wanpela mira, na em i save helpim yumi long luksave long ol pasin bilong yumi em yumi mas stretim. (Jems 1:23-25) Olsem, taim yumi stadi long Tok Bilong God, ating yumi luksave olsem yumi mas kisim pasin bilong bosim bel. Yumi ken larim Jehova i helpim yumi na yumi ken lain long mekim pasin isi taim ol manmeri o ol hevi i mekim yumi belhat. Long dispela rot, yumi inap tingting klia moa na yumi inap mekim ol gutpela disisen. (Jems 3:13) Olsem na em i bikpela samting long yumi mas save gut long Baibel! Sampela taim yumi lain long abrusim wanpela samting bihain long yumi mekim popaia. Gutpela rot bilong kisim savetingting em long lain long samting ol narapela i bin mekim na gutpela samting i kamap na lain long ol popaia bilong ol. Em as na Jems i kirapim yumi long skelim eksampel bilong ol manmeri em Baibel i stori long ol, olsem Abraham, Rahap, Jop, na Elaija. (Jems 2:21-26; 5:10, 11, 17, 18) Ol dispela gutpela wokman na wokmeri bilong Jehova i bin sanap strong na karim ol hevi we inap pinisim amamas bilong ol. Pasin bilong ol long sanap strong i soim olsem yumi tu i ken mekim wankain samting taim yumi kisim helpim i kam long Jehova. w21.02 29-30 par. 12-13

Long taim bilong Baibel stadi, em wok bilong Baibel tisa long helpim sumatin long kliagut long Tok Bilong God. Sapos tisa i singautim yu long go wantaim em, yu mas tingim yu yet olsem poroman bilong em. Wok bilong yu em bilong helpim em. (Ekl. 4:9, 10) Yu ken mekim wanem na bai gutpela samting i kamap long dispela taim bilong stadi? Redim gut stadi. Pastaim, askim tisa long stori liklik long yu long dispela sumatin. Wanem bekgraun bilong Baibel sumatin? Yu bai stadi wantaim em long wanem topik? Wanem bikpela tok yu laik stori long en? I gat sampela samting we mi ken mekim o mi no ken mekim o mi ken tok o mi no ken tok long taim bilong stadi? Wanem samting inap strongim sumatin long winim ol mak? Em i tru olsem, tisa i no inap tokim yu long ol pesenel samting bilong sumatin, tasol ol samting em i tokim yu long en inap helpim yu. Wanpela misineri nem bilong em Joy i tok: “Taim mi stori gut wantaim poroman bilong mi, dispela i save helpim em long tingim sumatin na save long wanem ol tok em i ken mekim long dispela stadi.” w21.03 9 par. 5-6

Sampela taim ol man i heitim yumi bikos yumi save bihainim ol stretpela lo bilong God. Ol dispela stretpela lo i narapela kain olgeta long ol lo em ol man bilong dispela graun i bihainim long stretpela pasin. Olsem, planti man long nau ol i orait tasol long ol stingpela pasin em bipo ol lain long taun Sodom na Gomora i bin mekim na God i bin bagarapim ol! (Jut 7) Na yumi bihainim ol stretpela lo bilong Baibel na yumi sakim ol kain pasin nogut olsem, em as na ol man i save tok bilas long yumi na ol i no laikim yumi! (1 Pita 4:3, 4) Wanem ol samting inap helpim yumi long karim hevi taim ol man i heitim yumi na tok nogut long yumi? Yumi mas gat strongpela bilip olsem Jehova bai helpim yumi. Bilip bilong yumi i olsem wanpela hap plang na em inap “mekim i dai olgeta spia paia bilong Satan.” (Efe. 6:16) Yumi mas i gat bilip na wanpela narapela pasin tu. Yumi mas i gat pasin laikim. Wai? Bikos pasin laikim “em i no save belhat kwik.” Em i no save larim wanpela samting i daunim em, na em i save sanap strong long olgeta hevi i kamap long em. (1 Kor. 13:4-7, 13) Laikim Jehova, laikim ol wanbilip, na laikim ol man i birua long yumi bai helpim yumi long daunim pasin bilong ol man long heitim yumi. w21.03 21 par. 3-4

Sampela taim, yumi soim olsem yumi laikim ol bratasista bilong yumi long ol samting yumi no mekim. Olsem, yumi no bel hevi hariap long ol tok ol i mekim. Tingim samting i kamap long laspela haptaim bilong Jisas long stap long graun. Em i tokim ol disaipel bilong em olsem bilong kisim laip ol i mas kaikai bodi bilong em na dringim blut bilong em. (Jon 6:53-57) Dispela tok i mekim ol i kirap nogut na planti disaipel bilong em i lusim em—tasol ol gutpela pren bilong em ol i no lusim em. Ol i stap gut long em. Ol i no kliagut long tok Jisas i mekim, na ating ol tu i kirap nogut long dispela tok. Tasol ol i no ting olsem tok bilong em i no stret na ol i bel hevi long dispela, nogat. Ol i trastim em bikos ol i save olsem em i autim tok i tru. (Jon 6:60, 66-69) Em i bikpela samting long yumi no ken bel hevi hariap long tok ol pren bilong yumi i mekim! Yumi laik givim taim long ol long kamapim klia tok bilong ol.—Prov. 18:13. w21.01 11 par. 13