Novemba

Yumi no save long olgeta samting i kamap long laip bilong Jona, olsem na yumi inap ting olsem em i no inapim asainmen bilong em, na em i no stap gut long God. Jehova i tokim em long tokaut long lain Ninive olsem bikpela bagarap bai painim ol. Tasol Jona i sakim tok, na em i kalap long sip i seil i go long narapela ples, na i olsem “em i laik ranawe lusim Jehova.” (Jna. 1:1-3) Yu ting yu bai givim narapela sans long Jona long inapim dispela asainmen? Ating nogat. Tasol Jehova i lukim olsem i stret long givim narapela sans long Jona. (Jna. 3:1, 2) Beten bilong Jona i kamapim klia pasin tru bilong em. (Jna. 2:1, 2, 9) Jona em man bilong beten, na em i beten taim em i stap insait long bel bilong pis, na dispela beten i helpim yumi long kisim stretpela tingting long em. Beten bilong em i soim olsem em i gat pasin daun, pasin bilong tok tenkyu, na em i laik tru long bihainim tok bilong Jehova. Olsem na Jehova i fogivim Jona; em i harim beten na helpim Jona, na yusim em long mekim yet wok profet! Em i bikpela samting long ol elda i mas “harim tok long as tru bilong wanpela hevi” paslain long ol i givim tok kaunsel! w20.04 15-16 par. 4-6

Long bipo, ol disaipel i holim ol bilip Kristen, na ol i larim holi spirit i helpim ol long kliagut long Tok Bilong God. Ol i mekim ol wok painimaut na bai ol inap save tru olsem ol dispela tok i kam long Ol Skripsa. (Apo. 17:11, 12; Hib. 5:14) Ol i tingim tru ol narapela, tasol i no dispela samting tasol i mekim na bilip bilong ol i kamap strong. Na tu, ol i amamas taim ol i bung wantaim ol wanbilip, tasol i no dispela samting tasol i kirapim ol long mekim wok bilong Jehova, nogat. Ol i kisim ‘stretpela save long God’ na dispela i mekim bilip bilong ol i kamap strong. (Kol. 1:9, 10) Tok i tru bilong Baibel i save stap wankain long olgeta taim. (Sng. 119:160) Ol dispela tok i no save senis sapos wanpela wanbilip i rongim yumi o em i mekim bikpela sin. Na ol dispela tok i no save senis taim hevi i painim yumi. Olsem na yumi mas kliagut tru long olgeta tok bilong Baibel na yumi mas save tru olsem ol dispela tok ol i tru. Taim yumi yusim ol tok bilong Baibel long strongim bilip, yumi bai sanap strong sapos traim i painim yumi, wankain olsem anka i holim strong bot long taim bilong bikpela win na ren. w20.07 9 par. 6-7

Taim yumi mekim wok bilong helpim ol Kristen God i anointim, Jisas i pilim olsem yumi helpim em. (Mat. 25:34-40) Nambawan rot bilong helpim ol em long givim bel olgeta long kamapim ol disaipel, em wok Jisas i bin tokim ol disaipel long mekim. (Mat. 28:19, 20) “Ol arapela sipsip” i gat rot long helpim tru ol brata bilong Krais long inapim wok bilong autim tok long olgeta hap bilong graun. (Jon 10:16) Sapos yu wanpela bilong ol arapela sipsip na yu autim tok, yu soim olsem yu laikim tru Jisas na ol brata bilong em. Yumi kamap pren bilong Jehova na Jisas taim yumi yusim mani kago bilong yumi long helpim wok autim tok. (Luk 16:9) Yumi inap givim donesen bilong helpim wok bilong Kingdom long olgeta hap bilong graun; donesen bilong yumi inap helpim ol lain i bungim hevi long taim bilong disasta long kisim klos, kaikai, na haus. Na tu, yumi inap givim donesen bilong helpim kongrigesen bilong yumi yet, na helpim ol narapela husat i sot long sampela samting.—Prov. 19:17. w20.04 24 par. 12-13

King bilong not i truim dispela tok profet na em i no “soim rispek long God bilong ol papa bilong em.” Em i mekim wanem? Soviet Yunion i holim tingting long pinisim ol lotu, na em i traim long pinisim strong bilong ol. Olsem na long 1918, gavman bilong Soviet Yunion i putim wanpela lo, na dispela lo i kirapim ol skul long skulim ol sumatin olsem i no gat God. Hau na king bilong not i “givim glori long god bilong ol strongpela banis”? Soviet Yunion i lusim traipela mani tru long mekim lain ami bilong em i kamap bikpela moa, na em i wokim planti tausen tul na ol masin bilong yusim long pait. Bihain, king bilong not na king bilong saut i bungim planti strongpela tul na masin bilong yusim long kilim planti bilion manmeri! King bilong not i wok bung wantaim king bilong saut long mekim wanpela bikpela samting; ol i kamapim “stingpela samting bilong kamapim bagarap”—Yunaitet Nesen.—Dan. 11:31. w20.05 6-7 par. 16-17

Husat lain inap helpim wok bilong painim ol lain i slek long bilip? Yumi olgeta—ol elda, ol painia, ol wanfamili, na ol pablisa long kongrigesen—inap helpim long painim ol. Olsem wanem? Yu gat wanpela pren o wanfamili husat i bin kamap slek long bilip? Yu bin bungim wanpela i slek long bilip taim yu autim tok long ol haus o long ol pablik ples? Tokim em olsem sapos em i laik bai ol elda i visitim em, orait yu bai amamas long givim atres o fon namba bilong em long ol elda long kongrigesen bilong yu. Wanpela elda, nem bilong em Thomas, i tok: “Pastaim, mi save askim sampela bratasista sapos ol i save long hap we ol pablisa i slek long bilip i stap long en. O mi save askim ol pablisa sapos ol inap tingim sampela em ol i no save kam moa long ol miting. Taim mi visitim ol bratasista i lusim kongrigesen, mi save askim long ol pikinini na ol wanblut bilong ol. Sampela bilong ol dispela bratasista i bin bringim ol pikinini bilong ol i kam long ol miting, na ating ol dispela pikinini i bin kamap pablisa. Yumi inap helpim ol tu long kam bek long Jehova.” w20.06 24 par. 1; 25 par. 6-7

Ol man inap kisim skul long rot bilong tingim na skelim ol samting i bin kamap long pastaim—ol animal i no inap mekim olsem. Yumi inap kisim save long ol lo i gutpela moa na senisim wei bilong yumi long tingting na mekim ol samting. (1 Kor. 6:9-11; Kol. 3:9, 10) Yumi inap trenim maus bilong bel long kliagut long wanem samting i stret na wanem samting i no stret. (Hib. 5:14) Yumi inap lain long soim pasin laikim, pasin sori, na pasin marimari. Na tu, yumi inap lain long mekim fea pasin. Memori bilong yumi em presen i kam long Jehova. Wanpela rot bilong soim tenkyu em olsem, yumi ken tingim olgeta samting Jehova i bin mekim bilong helpim na mekim isi bel bilong yumi. Dispela bai strongim bilip bilong yumi, olsem em bai helpim yumi long bihain. (Sng. 77:12; 78:4, 7) Narapela rot bilong soim tenkyu bilong yumi em olsem, yumi ken tingim na pilim tru ol gutpela samting ol narapela i bin mekim bilong helpim yumi. Ol saveman i luksave olsem ol manmeri husat i gat pasin bilong tok tenkyu, ol i stap amamas. w20.05 23-24 par. 12-13

Tingim hau Moses i bin pilim taim em i hait insait long hul bilong ston na em i lukim visen long glori bilong Jehova i kam abrusim em na i go. I no gat narapela man i bin lukim kain visen olsem paslain long Jisas i kam daun long graun! Moses i harim ol dispela tok, em wanpela ensel i mekim: “Jehova, Jehova, em God i gat pasin marimari na pasin sori, em i no save belhat kwik na i pulap tru long gutpela pasin laikim na pasin i tru, em i save kamapim gutpela pasin laikim long planti tausen lain manmeri, na lusim rong na asua na sin bilong ol.” (Kis. 33:17-23; 34:5-7) Ating Moses i save tingim dispela ekspiriens taim em i kolim nem bilong Jehova taim em i kolim ol tok i stap long teks bilong tude. Taim yumi tingim dispela nem Jehova, i gutpela long yumi tingim Man i holim dispela nem. Yumi mas tingim ol pasin bilong em, olsem bikpela strong, savetingting, stretpela pasin, na pasin laikim. Taim yumi tingim ol dispela pasin na ol narapela pasin tu, dispela bai kirapim yumi long rispektim em moa yet.—Sng. 77:11-15. w20.06 8-9 par. 3-4

Jisas i tok ol disaipel bilong em bai i gat pasin bilong laikim tru narapela narapela. (Jon 13:34, 35) Tasol yumi mas mekim sampela samting moa na bai bilip bilong yumi inap i stap strong. Yumi mas soim pasin laikim long ol narapela, tasol i gat sampela samting moa yumi mas mekim. Wai na yumi tok olsem? Tingim samting inap kamap sapos wanbilip i mekim bikpela rong—ating em wanpela elda o painia. O olsem wanem sapos wanbilip i bagarapim bel bilong yu? O ating wanpela i kamap apostet, na em i sutim tok olsem yumi no holim tok i tru. Sapos kain samting olsem i kamap, yu ting yu bai larim dispela i pundaunim yu na yu stop long mekim wok bilong Jehova? Skul yumi kisim em olsem: Sapos yu larim pasin bilong ol man i stiaim bilip bilong yu long God, na yu no tingim pasin bilong yu yet long pas gut wantaim Jehova, bilip bilong yu i no inap kamap strong. Bilip bilong yu i olsem haus; yu gat filings na tingting bilong yu yet, na tu, yu mas i gat save bilong ol strongpela tok i tru. Yu mas save tru olsem ol tok Baibel i skulim yu long en long Jehova, em ol tok i tru.—Rom 12:2. w20.07 8-9 par. 2-3

Planti ekspiriens i soim olsem ol ensel i wok bung wantaim yumi long painim ol lain i lusim kongrigesen na ol i laik tru long kam bek long Jehova. (Rev. 14:6) Eksampel: Silvio em wanpela brata long Ekwado, na em i beten strong long kisim helpim na bai em inap go bek long kongrigesen. Taim em i beten i stap, em i harim olsem ol man i nok long dua long haus bilong em. Tupela elda i kam long visitim em. Long dispela visit, ol i helpim em long kamap strong gen long bilip. Yumi bai kisim bikpela amamas tru taim yumi helpim ol lain i slek long bilip na bai ol inap kam bek long Jehova. Wanpela painia brata i save laik tru long helpim ol lain i lusim kongrigesen, na em i tok: “Mi save amamas, na sampela taim aiwara bilong mi save pundaun na mi save hatwok long stopim. Mi amamas tru long save olsem Jehova i kisim bek wanpela sipsip bilong em long han bilong Satan, na mi inap wok bung wantaim God long mekim dispela spesel wok.” Maski yu stop long bung wantaim kongrigesen, yu ken bilip tru olsem Jehova i no lusim pasin bilong em long laikim yu. Jehova i wet long lukim yu kam bek long em, na em bai amamas tru long welkamim yu. w20.06 29 par. 16-18

Jehova em “Nambawan Bikpela Tisa,” na em i larim ol eksampel i stap long Baibel bilong skulim yumi. (Ais. 30:21) Yumi kisim skul taim yumi tingim tingim stori bilong Baibel long ol manmeri em ol i bihainim ol pasin bilong God, olsem pasin daun. Na tu, yumi kisim skul taim yumi skelim stori bilong ol manmeri em ol i no bihainim ol pasin bilong God. (Sng. 37:37; 1 Kor. 10:11) Tingim samting i kamap long King Sol. Pastaim em i bihainim pasin daun. Taim em i yangpela man, em i tingim em yet olsem man i no gat nem, na em i surik taim ol i makim em long mekim bikpela wok. (1 Sml. 9:21; 10:20-22) Tasol bihain pasin bilong Sol i senis. Em i kisim pasin antap bihain tasol long em i kamap king. Wanpela taim, em i wetim profet Samuel inap sampela de, na em i les long wet na em i mekim sakrifais bilong paia i kukim olgeta, tasol em i no gat rait long mekim olsem. Jehova i no amamas moa long Sol, na em i no orait long Sol i mekim wok king. (1 Sml. 13:8-14) Eksampel bilong Sol i mas stap olsem tok lukaut na stiaim yumi long abrusim pasin antap. w20.08 10-11 par. 10-11

Em tru olsem long rot bilong Krais, Jehova i givim “ol man olsem ol presen” long kongrigesen bilong Em. (Efe. 4:8) “Ol man olsem ol presen” em ol memba bilong Gavening Bodi, helpim bilong Gavening Bodi, ol memba bilong Brens Komiti, ol wasman sekit, ol tisa bilong ol skul tiokratik, ol elda long kongrigesen, na ol kongrigesen sevan. Holi spirit i makim olgeta dispela brata long lukautim ol gutpela sipsip bilong Jehova na strongim kongrigesen. (1 Pita 5:2, 3) Holi spirit i makim ol brata long mekim kain kain wok. Narapela narapela hap bilong bodi, olsem han na lek, i save mekim wok bilong helpim bodi, na olsem tasol, ol brata em holi spirit i makim, ol i save wok hat long helpim kongrigesen. Ol i no laik bai ol narapela i litimapim nem bilong ol, nogat. Ol i wok hat long strongim ol bratasista bilong ol. (1 Tes. 2:6-8) Yumi tenkim Jehova long ol dispela brata em ol i winim mak long sait bilong bilip, na ol i daunim laik bilong ol yet na ol i tingim gut ol narapela! w20.08 21 par. 5-6

Wanpela risen na yumi autim tok em bikos ol manmeri “i stap nogut tru olsem ol sipsip i no gat wasman” na ol i mas kisim stretpela save long Kingdom bilong God. (Mat. 9:36) Jehova i laik bai olgeta kain man i kisim stretpela save long tok i tru na bai em i kisim bek ol. (1 Tim. 2:4) Yumi bai amamas long mekim dispela wok taim yumi save olsem wok autim tok bilong yumi inap helpim man long kisim laip. Yumi seivim laip bilong ol man. (Rom 10:13-15; 1 Tim. 4:16) Na tu, yumi mas i gat ol rait tul long autim tok. Na yumi mas save hau long yusim. Jisas i skulim gut ol disaipel bilong em long pasin bilong autim tok. Em i tokim ol long samting ol i mas karim, wanem hap ol i mas autim tok, na wanem tok ol i mas mekim. (Mat. 10:5-7; Luk 10:1-11) Long nau, oganaisesen bilong Jehova i kamapim Ol Tul Bilong Skulim Man, em ol tul we i wok gut tru. Na yumi bin kisim skul long hau yumi ken yusim ol dispela tul. Dispela skul i helpim yumi long strongim bel na lain long kamap gutpela tisa moa.—2 Tim. 2:15. w20.09 4 par. 6-7, 10

Piksaim bikpela amamas bilong aposel Jon taim em i harim olsem ol lain em i bin helpim long kisim save long tok i tru, ol i stap gut yet long mekim wok bilong Jehova. Ol i bungim planti hevi, na Jon i wok hat long strongim bilip bilong ol bikos em i tingim ol olsem ol pikinini bilong em long sait bilong bilip. Olsem tasol, yumi save amamas taim ol pikinini bilong yumi o ol lain yumi helpim long kisim save long tok i tru, ol i dediket long Jehova na wok yet long stap gut long em. (3 Jon 3) Long 98 C.E. samting, holi spirit bilong Jehova i kirapim Jon long raitim 3-pela pas. Em i laik kirapim ol Kristen long holim yet bilip bilong ol long Jisas na wokabaut yet long tok i tru. Jon i tingting planti long hevi em ol giaman tisa inap putim long ol kongrigesen. (1 Jon 2:18, 19, 26) Ol dispela apostet i tok ol i save long God, tasol ol i no bihainim ol lo bilong Jehova. w20.07 20 par. 1-3

Yumi bilip long tok yumi autim, olsem na yumi laik tru long autim dispela tok long planti manmeri moa. Yumi bilip long ol tok promis i stap long Tok Bilong God. (Sng. 119:42; Ais. 40:8) Yumi lukim ol tok profet bilong Baibel i kamap tru long taim bilong yumi. Yumi lukim ol man i mekim gutpela senis long i stap bilong ol taim ol i kirap long bihainim tok bilong Baibel. Dispela ol samting i helpim yumi long bilip tru olsem gutnius bilong Kingdom em wanpela tok olgeta man i mas harim. Na tu, yumi bilip long Jehova, em As bilong ol tok yumi autim, na yumi bilip long man em i makim olsem King bilong Kingdom, Jisas. Maski wanem samting i painim yumi, oltaim Jehova bai strongim yumi na stap olsem ples hait bilong yumi. (Sng. 46:1-3) Na tu, yumi bilip tru olsem Jisas i stap long heven na em i stiaim wok bilong autim tok, Jehova i givim strong na namba long em long mekim dispela wok. (Mat. 28:18-20) Bilip i strongim tingting bilong yumi olsem Jehova bai blesim hatwok bilong yumi. w20.09 12-13 par. 15-17

Sampela taim ol sista bai nidim wanpela long sambai long ol taim ol i bungim wanpela hevi. (Ais. 1:17) Olsem, wanpela wido o sista i divos inap nidim helpim bilong wanpela long mekim sampela wok em bipo man bilong em i save mekim. Wanpela lapun sista inap nidim helpim long toktok long ol dokta. O wanpela painia sista i mekim ol narapela wok tiokratik inap nidim wanpela long sambai long em sapos ol narapela i sutim tok long em olsem em i no kam autim tok planti taim olsem ol narapela painia i mekim. Tingim eksampel bilong Jisas. Jisas i redi long sambai long ol sista taim ol narapela i kisim tingting kranki long ol. Kain olsem, em i sambai long Maria taim Marta i sutim tok long em. (Luk 10:38-42) Na tu, em i sambai long Maria taim ol narapela i kros olsem samting em i mekim i no stret. (Mak 14:3-9.) Jisas i save long astingting bilong Maria na tok amamas long em. Em i mekim tok profet tu olsem ol man bai stori long gutpela pasin bilong em “long wanem wanem hap bilong graun ol i autim gutnius long en.” w20.09 24 par. 15-16

Gutpela wasman i save olsem ol sipsip inap lus. Na sapos sipsip i lusim banis, wasman i no inap mekim hatpela pasin long em. Tingim samting God i mekim taim em i helpim sampela wokman husat i bin lusim em inap sampela haptaim. Profet Jona i ranawe long asainmen bilong em. Maski i olsem, Jehova i no les kwik long Jona. Olsem gutpela wasman, Jehova i kisim bek em na strongim em long inapim asainmen bilong em. (Jna. 2:7; 3:1, 2) Bihain, God i yusim botol-got rop long helpim Jona long luksave olsem laip bilong ol man i dia tumas. (Jna. 4:10, 11) Yumi kisim wanem skul? Ol elda i no ken les kwik long ol lain i kamap slek long bilip. Ol i mas traim long kliagut long wanem samting i mekim na ol i lusim kongrigesen. Na taim ol dispela lain i kam bek long Jehova, ol elda i mas wok yet long bihainim pasin laikim na soim olsem ol i tingim ol. w20.06 20-21 par. 10-12

Taim gavman bilong Soviet Yunion i pundaun long 1991, lain bilong God long dispela bikpela kantri i amamas long kisim “liklik helpim”—ol i stap fri inap sampela haptaim. Ol i stap fri long autim tok long ol kantri em pastaim Soviet Yunion i bin bosim, olsem na planti handret tausen manmeri i kamap pablisa. Isi isi, Rasia na ol sapota bilong en i kamap king bilong not. Gavman i stap olsem king bilong not o king bilong saut i mas inapim 3-pela samting: (1) mekim wok bos long hap we planti manmeri bilong God i stap long en, o ol i birua long lain bilong God, (2) ol samting ol i mekim i soim olsem ol i birua long Jehova na ol manmeri bilong em, na (3) dispela 2-pela king i birua long narapela narapela. Rasia na ol sapota bilong en i tambuim wok autim tok na mekim nogut tru long planti handret tausen bratasista. Ol samting ol i mekim i soim olsem ol i heitim Jehova na ol manmeri bilong em. Na ol i wok long birua long king bilong saut, em Gavman Inglan-Amerika. w20.05 12-13 par. 3-4

Yumi mas skulim ol man na bai ol i ken kamap disaipel, em as na yumi laik mekim wok tisa bilong yumi i kamap gutpela moa. Yumi wok long skulim planti milion manmeri long tok i tru bilong Baibel. Yumi laikim ol tok bilong Baibel em yumi skulim ol man long en. So yumi inap mekim planti toktok taim yumi skulim ol narapela. Tasol long taim bilong Wastaua Stadi, Kongrigesen Baibel Stadi, o taim wanpela i mekim Baibel stadi wantaim narapela, stadi kondakta i no ken mekim planti toktok tumas. Bilong larim Baibel i skulim man, tisa i mas lain long bosim bel na no ken traim long stori planti long wanpela ves bilong Baibel o wanpela topik em i save gut long en. (Jon 16:12) Skelim save bilong Baibel yu gat long taim yu kisim baptais wantaim save yu gat long nau. Ating long pastaim, yu kliagut tasol long ol bikpela tok i tru. (Hib. 6:1) Planti yia i lus na yu kisim save long ol samting em yu save long en long nau, so no ken traim long skulim wanpela nupela sumatin long olgeta samting long wankain taim. w20.10 14-15 par. 2-4

Jehova i makim gutpela man na meri long kamap papamama bilong Jisas. (Mat. 1:18-23; Luk 1:26-38) Ol gutpela tok em Maria i bin mekim i stap long Baibel na i kamapim klia pasin bilong em long laikim tru Jehova na Tok bilong em. (Luk 1:46-55) Na pasin bilong Josep long redi long bihainim tok bilong Jehova i soim olsem em i laikim God na em i laik amamasim Em. (Mat. 1:24) Jehova i no makim tupela man na meri i gat planti mani kago long kamap papamama bilong Jisas. Ofa em Josep na Maria i givim bihain long Jisas i bon i soim olsem ol i stap rabis. (Luk 2:24) I luk olsem ol i no gat planti samting long i stap bilong ol, moa yet taim famili i go bikpela na tupela i gat 7-pela pikinini. (Mat. 13:55, 56) Jehova i lukautim Jisas long sampela hevi, tasol Em i no pasim Pikinini bilong Em long bungim olgeta hevi i kamap. (Mat. 2:13-15) Olsem, Jisas i gat ol wanblut em ol i no bilip olsem em i Mesaia. (Mak 3:21; Jon 7:5) Na tu, i luk olsem Jisas i bel hevi tru taim waspapa bilong em Josep i dai. w20.10 26-27 par. 4-6

Olsem wanem? I bin gat wanpela taim yu pilim olsem yu stap wanpis na i no gat man i stap bilong helpim yu long karim wanpela hevi yu bin feisim? Planti man i bin pilim olsem, na ol gutpela wokman bilong Jehova, ol tu i bin pilim olsem. (1 Kin. 19:14) Sapos kain samting i painim yu, tingim dispela tok promis bilong Jehova: “Mi no inap tru long lusim yu, na mi no inap givim baksait long yu.” Olsem na yumi ken bilip tru na tok: “Jehova em i helpim bilong mi; mi no inap pret.” (Hib. 13:5, 6) Aposel Pol i bin raitim ol dispela tok i go long ol Kristen i stap long Judia long 61 C.E. samting. Ol tok bilong em i kirapim yumi long tingim ol tok i stap long Buk Song 118:5-7. Olsem man bilong raitim song, Pol i save olsem Jehova em i Helpim bilong em bikos inap planti taim Jehova i bin helpim em. Winim 2-pela yia paslain long em i raitim pas i go long ol Kristen long Hibru, Pol i bin raun long sip antap long solwara i bin raf tru. (Apo. 27:4, 15, 20) Long dispela raun bilong em na ol yia paslain long dispela, Jehova i bin stap olsem Helpim bilong Pol long planti rot. w20.11 12 par. 1-2

Wai na yumi no ken holim tingting olsem laip bilong yumi long bipo i bin gutpela tru? Sapos yumi driman long laip bilong yumi long bipo, dispela inap mekim na yumi tingim tasol ol gutpela samting i bin kamap long bipo. Tingim eksampel bilong lain Israel long pastaim. Bihain long ol i lusim Isip, wantu tasol ol i lusim tingting long ol bikpela hevi ol i bin karim long dispela ples. Ol i wok long tingim tingim ol gutpela kaikai ol i bin kisim. Ol i tok: “Mipela i tingim taim mipela i bin stap long Isip, mipela i save kaikai pis em mipela i kisim nating. Na mipela i save kisim ol kukamba, ol melen, ol anian, na galik.” (Nam. 11:5) Tasol yu ting tru tru ol i “kisim nating” ol dispela kaikai? Nogat. Lain Israel i bin karim bikpela pen na hevi; long dispela taim ol i bin stap olsem ol sleiv na ol Isip i bin mekim nogut tru long ol. (Kis. 1:13, 14; 3:6-9) Tasol ol i lusim tingting long ol hevi ol i bin karim na ol i laikim ol samting em ol i bin kisim long bipo. Ol i tingim ol samting i bin kamap bipo, na ol i lusim tingting long ol samting Jehova i mekim bilong helpim ol. Jehova i no amamas long pasin ol i mekim.—Nam. 11:10. w20.11 25 par. 5-6

Sampela taim yumi inap tingting olsem yumi save stap sotpela taim tasol na laip bilong yumi i “pulap long kain kain hevi.” (Jop 14:1) Na dispela inap daunim tru yumi. Planti wokman na wokmeri bilong Jehova long pastaim ol i bin pilim olsem tu. Sampela bilong ol i askim God long tekewe laip bilong ol. (1 Kin. 19:2-4; Jop 3:1-3, 11; 7:15, 16) Tasol inap planti taim, Jehova em God ol i trastim, em i mekim isi bel bilong ol na strongim ol. Ol stori bilong ol i stap long Baibel bilong mekim isi bel bilong yumi na skulim yumi. (Rom 15:4) Tingim Josep em pikinini man bilong Jekop. Insait long sotpela haptaim, laip bilong Josep i senis olgeta—em i no stap moa olsem pikinini em papa i save laikim tru, nogat, em i kamap sleiv bilong wanpela man haiden long Isip. (Stt. 37:3, 4, 21-28; 39:1) Bihain meri bilong Potifa i sutim tok giaman olsem Josep i traim long reipim em. Potifa i no painimaut gut sapos tru tru dispela samting i bin kamap o nogat, na ol i pasim Josep long sen na putim em long kalabus. (Stt. 39:14-20; Sng. 105:17, 18) Olgeta dispela samting i mekim na bel bilong Josep i bagarap tru! w20.12 16-17 par. 1-4

Jisas i tok taim yumi beten, yumi mas beten long nem bilong God i mas i stap holi. Wanem mining bilong dispela tok? Ol samting i mas i stap klin na bai ol inap kamap holi. Sampela inap tingting olsem, ‘Nem bilong Jehova em i holi na klin pinis!’ Yumi inap kliagut long dispela sapos yumi tingim ol samting i stap insait long wanpela nem. Nem em wanpela wed yumi save raitim long pepa na kolim, tasol em i makim sampela samting moa. Baibel i tok: “I gutpela moa long man i makim na kisim gutpela nem, dispela i winim planti mani kago.” (Prov. 22:1; Ekl. 7:1) Wai na nem em i bikpela samting? Taim ol narapela i harim nem bilong wanpela man, ol i save tingim ol pasin bilong em. Hau yumi spelim nem long pepa—o wei yumi kolim dispela nem—em i no bikpela samting; bikpela samting moa em tingting ol man i gat taim ol i lukim o harim dispela nem. Taim ol man i mekim ol tok giaman long Jehova, ol i bagarapim gutnem bilong em. Taim ol i bagarapim gutnem bilong em, ol i sutim tok na daunim nem bilong em. w20.06 3 par. 5-7

Yumi inap tingting planti tru long ol hevi i kamap na dispela i pasim yumi long tingim ol narapela samting. Olsem, ating yumi wari olsem yumi no inap kisim inap mani long baim ol samting yumi nidim, o yumi bai kisim sik na yumi no inap go long wok o kampani inap pinisim yumi long wok. Na tu, yumi inap wari olsem nogut wanpela traim i kamap long yumi na yumi brukim lo bilong God na yumi no stap gut long em. Klostu nau Satan bai kirapim ol lain em i kontrolim long pait long ol manmeri bilong God, so yumi inap tingting planti long wanem samting yumi bai mekim long dispela taim. Yumi inap tingting olsem, ‘I stret mi wari long ol kain samting olsem?’ Jisas i bin tokim ol disaipel bilong em olsem: “Lusim pasin bilong tingting planti.” (Mat. 6:25) Yu ting tok bilong Jisas i makim olsem yumi no ken tingting planti long wanpela samting? Nogat! Sampela wokman bilong Jehova long pastaim i bin bel hevi na tingting planti, maski i olsem Jehova i orait yet long ol. (1 Kin. 19:4) Jisas i laik mekim isi bel bilong yumi. Em i no laik bai yumi tingting planti tru long ol samting yumi nidim na dispela i pasim yumi long mekim wok bilong God. w21.01 3 par. 4-5

Jehova na Jisas bai skelim man long pasin em i mekim long famili bilong em. (1 Pita 3:7) Jehova em i Het bilong bikpela lain famili bilong em long heven na long graun, olsem na em i gat namba long kamapim ol lo long pasin ol pikinini bilong em i mas mekim, na em i gat rait long tokim ol long bihainim ol dispela lo. (Ais. 33:22) Jisas em i het bilong kongrigesen Kristen, na em tu i gat namba long kamapim ol lo na tokim yumi long bihainim ol dispela lo. (Gal. 6:2; Kol. 1:18-20) Het bilong famili Kristen i bihainim eksampel bilong Jehova na Jisas, na em i gat namba long mekim ol disisen bilong famili bilong em. (Rom 7:2; Efe. 6:4) Tasol wok bos bilong em i gat mak bilong en. Olsem, ol lo em i putim i mas i stret long ol stiatok i stap long Tok Bilong God. (Prov. 3:5, 6) Na het bilong famili i no gat rait long kamapim ol lo bilong ol lain em ol i no insait long famili bilong em. (Rom 14:4) Na tu, taim ol pikinini man na ol pikinini meri bilong em i kamap bikpela na i lusim haus, ol bai wok yet long rispektim em, tasol ol i no stap aninit moa long wok bilong em olsem het bilong ol.—Mat. 19:5. w21.02 2-3 par. 3-5

Wanpela bikpela samting em het bilong famili i mas mekim bilong soim olsem em i laikim famili bilong em, em long givim ol samting bilong skin em famili i nidim. Tasol em i mas tingim olsem, ol samting bilong skin i no inap helpim famili bilong em long sait bilong bilip. (Mat. 5:3) Taim Jisas i stap long diwai pos, em i laik bai i gat wanpela i lukautim Maria. Maski Jisas i karim bikpela pen, em i stretim rot long aposel Jon i ken lukautim Maria. (Jon 19:26, 27) Wanpela brata husat i stap olsem het bilong famili em i gat planti bikpela wok bilong mekim. Em i mas givim bel long mekim gut wok mani bilong em so pasin bilong em inap givim biknem long Jehova. (Efe. 6:5, 6; Tai. 2:9, 10) Na ating em i gat wok long mekim insait long kongrigesen, olsem mekim wok sepeding na go pas long mekim wok autim tok. Long wankain taim, em i bikpela samting long oltaim em i mas stadi long Baibel wantaim meri na ol pikinini bilong em. Ol bai amamas long hatwok bilong em long helpim ol long stap gut long samting bilong skin, bel na tingting, na long sait bilong bilip.—Efe. 5:28, 29; 6:4. w21.01 12-13 par. 15, 17

Baibel i tok long wok bilong gutpela meri marit olsem em i save lukautim ol wok bilong haus, baim na salim graun, na mekim ol wok bisnis. (Prov. 31:15, 16, 18) Em i no wanpela sleiv husat i no gat rait long kamapim tingting bilong em, nogat. Man bilong em i save trastim em na putim yau long ol tingting em i kamapim. (Prov. 31:11, 26) Taim man marit i mekim gutpela pasin rispek olsem long meri bilong em, meri bai amamas long stap daun long em. Maski Jisas i mekim planti wok, em i stap daun long wok bilong Jehova olsem het na em i no pilim olsem dispela i daunim em. (1 Kor. 15:28; Fili. 2:5, 6) Olsem tasol, gutpela meri marit husat i bihainim pasin bilong Jisas, em i daun long man bilong em na em i no pilim olsem dispela i daunim em. Em i sapotim man bilong em bikos em i laikim em na moa yet bikos em i laikim na rispektim Jehova. Gutpela meri marit i no inap sapotim man bilong em sapos man i tokim em long mekim ol samting i brukim ol lo o ol stiatok bilong Baibel. w21.02 11 par. 14-15; 12 par. 19

Oltaim ol wokman bilong Jehova i bin larim pasin bilong ol long laikim God i helpim ol long karim ol hevi ol man i putim long ol. Olsem, taim bikpela suprim kot bilong ol Juda i bin tokim ol aposel olsem ol i mas stop long mekim wok autim tok, pasin bilong laikim God i bin kirapim ol aposel long “bihainim tok bilong God tasol,” na ol i no bihainim tok bilong ol man. (Apo. 5:29; 1 Jon 5:3) Kain strongpela pasin laikim i strongim tu ol brata bilong yumi long nau, planti bilong ol em ol i mas sanap strong na karim hevi long han bilong ol strongpela gavman nogut bilong nau. Yumi no bel hevi na larim dispela i daunim yumi, nogat, pasin bilong yumi long sanap strong na daunim pasin bilong ol man long heitim yumi i olsem wanpela gutpela samting long yumi. (Apo. 5:41; Rom 5:4, 5) Ating wanpela bikpela hevi tru i painim yumi em taim famili bilong yumi i birua long yumi. Taim yumi wok long kisim save long tok i tru, sampela long famili inap kisim tingting olsem lotu i wok long giamanim yumi. Ol narapela inap ting olsem yumi kamap longlong. (Skelim Mak 3:21.) Na ol inap mekim nogut tru long yumi. Tasol yumi no kirap nogut long dispela pasin nogut ol i mekim long yumi. Jisas i tok: “Ol wanhaus bilong man bai kamap birua bilong em.”—Mat. 10:36. w21.03 21 par. 6-7

Taim yu poromanim wanpela pablisa i go long mekim Baibel stadi bilong em, putim gut yau taim tisa na sumatin i toktok. Long dispela rot, yu bai save long wanem taim i stret long toktok. Em tru olsem yu mas skelim gut ol samting. Olsem, yu no laik toktok planti, o katim tok bilong tisa, o kamapim narapela topik. Tasol taim yu mekim liklik komen, wanpela tok piksa, o givim askim, yu inap kamapim klia bikpela poin bilong tok. Sampela taim, bai yu pilim olsem yu no gat planti tok long mekim long taim bilong stadi. Tasol taim yu tok amamas long sumatin na soim olsem yu tingim em, dispela inap mekim planti samting long helpim em long winim mak. Sapos i stret long mekim, yu ken stori liklik long sumatin long hau yu bin kisim save long tok i tru, hau yu winim wanpela hevi, o hau yu lukim Jehova i helpim yu long laip bilong yu. (Sng. 78:4, 7) Ating ekspiriens bilong yu em samting sumatin i nid long harim. Dispela inap strongim bilip bilong em na kirapim em long wok yet long winim mak bilong kisim baptais. w21.03 10 par. 9-10

Husat i mas kisim biknem long wok yumi mekim long autim tok? Pol i bekim dispela askim taim em i raitim dispela tok i go long kongrigesen long Korin: “Mi planim, na Apolos i givim wara, tasol God i save mekim kaikai i gro, olsem na man i planim kaikai na man i givim wara, tupela wantaim i no ken kisim biknem, nogat. God i mekim kaikai i gro, olsem na em tasol i mas kisim biknem.” (1 Kor. 3:6, 7) Wankain olsem Pol, oltaim yumi mas givim biknem long Jehova taim gutpela samting i kamap long wok autim tok. Olsem wanem yumi inap soim tenkyu bilong yumi long yumi inap “wok wantaim” God, Krais, na ol ensel? (2 Kor. 6:1) Wanpela wei em olsem, oltaim yumi mas painim rot bilong autim gutnius long ol manmeri. Taim yumi planim pinis sid bilong tok i tru, yumi mas givim wara long en. Sapos man i amamas long putim yau, orait yumi mas go bek na lukim em o stretim rot long narapela pablisa i ken visitim em na traim long kirapim Baibel stadi wantaim em. Sampela haptaim bihain long man i kirap stadi, yumi amamas taim yumi lukim olsem Jehova i stiaim em long senisim tingting na laik bilong em. w20.05 30-31 par. 14, 16-18