Epril

Jisas i bin laikim yumi tru taim em i redi long givim laip bilong em bilong helpim yumi. (Jon 15:13) Yumi no gat rot bilong bekim pasin laikim em Jehova na Jisas i mekim long yumi. Tasol yumi ken soim olsem yumi tenkyu tru long ol long rot bilong ol samting yumi mekim long olgeta wan wan de. (Kol. 3:15) Ol Kristen God i makim i tingim tru pe bilong baim bek man, long wanem, dispela i opim rot long ol inap kisim laip long heven. (Mat. 20:28) Ol i bilip long ofa bilong Krais, olsem na Jehova i kolim ol olsem stretpela man na em i kisim ol olsem ol pikinini em i adoptim. (Rom 5:1; 8:15-17, 23) Lain arapela sipsip tu i tenkyu long pe bilong baim bek man. Ol i bilip long ofa bilong Jisas, olsem na ol i stap olsem stretpela man long ai bilong God, na ol i bilip tru olsem ol inap “winim dispela traipela hevi tru.” (Rev. 7:13-15) Tupela lain wantaim i soim olsem ol i tenkyu long pe bilong baim bek man, em long insait long Memorial long olgeta yia. w22.01 23 par. 14-15

Jisas i wari moa long risen na ol i kilim em i dai. Em i wari long ol i sutim tok giaman long em olsem em i no rispektim God na nem bilong God. (Mat. 26:64-66) Dispela i mekim em bel hevi na em i laik bai Papa bilong em i no ken larim em i kisim kain sem olsem. (Mat. 26:38, 39, 42) Jisas i mas hangamap na dai long diwai pos bambai em i ken kisim bek ol Juda em ol i stap long mak bilong bagarap. (Gal. 3:10) Ol dispela Juda i bin promis long bihainim Lo bilong God, tasol ol i no bin bihainim. Dispela i mekim na ol i stap long mak bilong bagarap, na tu, ol bai bagarap bikos ol i tumbuna pikinini bilong Adam. (Rom 5:12) Lo God i givim i tok sapos wanpela man i mekim sin na i stret em i mas dai, orait ol i mas kilim em i dai na hangamapim bodi bilong em long wanpela pos. (Lo 21:22, 23; 27:26) Taim Jisas i hangamap long diwai pos, dispela i opim rot long ol Juda i ken kisim helpim long ofa bilong em, maski ol i bin sakim em. w21.04 16 par. 5-6

Lukim ol samting i kamap long laspela de bilong Jisas long stap laip long graun. Ol soldia bilong Rom i arestim em na paitim em nogut tru. (Mat. 26:52-54; Jon 18:3; 19:1) Ol i wipim em long wanpela kain wip we i brukim na kamautim ol mit long bodi bilong em. Blut i wok long ron yet long baksait bilong em, na ol i putim traipela diwai long baksait bilong em long karim. Jisas i karim dispela diwai na pulim i go long ples we ol bai kilim em long en, tasol bihain ol i askim wanpela man long karim dispela diwai. (Mat. 27:32) Taim Jisas i kamap long ples we ol bai kilim em long en, ol soldia i nilim tupela han na lek bilong em long dispela diwai. Taim ol i sanapim pos, hevi bilong bodi bilong Jisas i mekim na skin bilong em i wok long bruk long hap we ol i sutim nil long en. Ol pren bilong em i krai na mama bilong em i krai sori, tasol ol hetman bilong Juda i wok long tok bilas long Jisas. (Luk 23:32-38; Jon 19:25) Inap sampela aua Jisas i pilim bikpela pen nogut tru. Em i hangamap na em i lusim planti blut, olsem na klok bilong em i hatwok long pamim blut na em i hatwok long pulim win. Em i pulim laspela win bilong em na em i mekim wanpela beten. Na em i daunim het na em i dai. (Mak 15:37; Luk 23:46; Jon 10:18; 19:30) Ol i mekim nogut long em na em i pilim bikpela pen tru na ol i semim em long ai bilong ol man na em i dai. w21.04 16 par. 4

Jisas i tokim 11-pela aposel bilong em long 2-pela kontrak—em nupela kontrak na kontrak bilong Kingdom. (Luk 22:19, 20, 28-30) Ol dispela kontrak i opim rot long ol dispela gutpela aposel bilong Jisas na ol narapela hap lain—ol liklik lain—long mekim wok king na pris long heven. (Rev. 5:10; 14:1) Liklik lain remnan, em ol i insait long dispela 2-pela kontrak, ol tasol i save kisim bret na wain long taim bilong Memorial. Samting Jehova i givim long ol long bilip na wet long en em laip oltaim long heven we ol bai i no inap dai gen, na ol bai mekim wok wantaim Jisas Krais husat i kisim pinis glori na ol narapela lain i insait long 144,000. Na bikpela samting moa, ol bai stap long ai bilong God Jehova! (1 Kor. 15:51-53; 1 Jon 3:2) Ol Kristen God i makim ol i mas stap gut long God i go inap long ol i dai.​—2 Tim. 4:7, 8. w22.01 21 par. 4-5

Tupela raskolman i hangamap klostu long Jisas. (Luk 23:40, 41) Wanpela bilong ol i tanim na lukluk long Jisas na em i tok: “Tingim mi taim yu kamap King.” (Luk 23:42) Em i save olsem Papa bilong em i gat pasin marimari, olsem na em i mekim ol dispela tok bilong givim hop long dispela raskolman. (Sng. 103:8; Hib. 1:3) Jehova i laik tru long fogivim yumi na marimari long yumi sapos yumi sori tru long ol rong yumi bin mekim na yumi bilip tru olsem God bai fogivim yumi long rot bilong ofa bilong Jisas Krais. (1 Jon 1:7) Sampela i pilim hatwok long bilip olsem Jehova bai fogivim ol. Sapos yu pilim olsem, orait tingim dispela: Paslain long Jisas i dai, em i mekim ol tok bilong soim olsem em i marimari long dispela raskolman husat i kirap nau tasol long bilip. Sapos Jehova i ken marimari long dispela raskolman, orait em bai marimari moa yet long ol wokman bilong em!​—Sng. 51:1; 1 Jon 2:1, 2. w21.04 9 par. 5-6

Jisas i stap gut long God i go inap long em i dai, na dai bilong em i mekim wanem? Namba 1: Dai bilong em i kamapim klia olsem Satan em man bilong giaman. Jisas i soim olsem man i gutpela olgeta inap stap gut long God maski Satan i putim wanem ol hevi long em. Namba 2: Jisas i givim laip bilong em olsem pe bilong baim bek ol man. Dai bilong Jisas i opim rot long ol sinman i ken pas gut wantaim God, na tu, em i opim rot long ol i ken kisim laip oltaim long bihain. Namba 3: Jisas i kamapim klia olsem i stret long Jehova i mekim wok bos, na tu, em i stretim bek gutnem bilong Papa bilong em. Long olgeta de, tingim olsem em laspela de bilong yu long holimpas bilip bilong yu! So maski sapos dai i laik painim yumi, yumi inap long tok olsem, “Jehova, mi bin wok strong long holimpas bilip bilong mi, na pruvim olsem Satan em man bilong giaman, na mi bin stretim bek gutnem bilong yu na sapotim wok bos bilong yu!” w21.04 12 par. 13-14

Ol man i sutim tok giaman long Jisas na ol i tok em i gilti long wanpela rong em i no bin mekim, ol i tok bilas long Jisas, ol i paitim em nogut tru na nilim em long diwai pos. Ol i sutim nil long tupela han na lek bilong em. Long olgeta win em i pulim, long olgeta tok em i mekim, em i pilim bikpela pen tru. Tasol em mas toktok bikos em gat sampela bikpela tok long autim. Yumi kisim planti gutpela skul long ol laspela tok bilong Jisas! Yumi kisim skul olsem yumi mas fogivim ol narapela na bilip olsem Jehova bai fogivim yumi. Gutpela samting yumi gat em yumi insait long bikpela lain famili em ol bratasista bilong yumi. Ol i redi long helpim yumi, olsem na taim yumi nidim helpim, yumi yet mas go pas long askim ol long helpim yumi. Yumi ken save tru olsem Jehova bai helpim yumi long sanap strong na karim wanem ol hevi i painim yumi. Na em i bikpela samting long tingim olsem, long olgeta de yumi mas mekim ol samting bilong stap gut long Jehova na bilip tru olsem laip bilong yumi i stap seif long han bilong em. w21.04 8 par. 1; 13 par. 17-18

Bihainim lek mak bilong Jisas bai bringim yumi i go long laip oltaim. Taim wanpela yangpela maniman i askim long wanem samting em i ken mekim bambai em i ken kisim laip oltaim, Jisas i tokim em: “Kam bihainim mi.” (Mat. 19:16-21) Jisas i tokim ol Juda husat i no bilip olsem em i Krais, em i tokim ol olsem: “Ol sipsip bilong mi i save . . . bihainim mi. Mi givim laip oltaim long ol.” (Jon 10:24-29) Yumi bilip long Jisas taim yumi bihainim ol tok em i skulim ol man long en na yumi bihainim eksampel bilong em. Taim yumi mekim olsem, yumi bai wokabaut yet long rot i go long laip oltaim. (Mat. 7:14) Yumi mas save gut long Jisas bambai yumi ken bihainim gut lek mak bilong em. Dispela tok “kisim save” i makim olsem yumi mas wok yet long kisim save long Jisas. Na yumi mas wok yet long kisim save gut long em long rot bilong lain gut long ol pasin bilong em, tingting bilong em, na ol lo bilong em. Maski yumi stap long tok i tru longpela taim, o nau tasol yumi kam insait long tok i tru, yumi mas wok yet long kisim save long Jehova na Pikinini bilong em. w21.04 4-5 par. 9-10

Ating sampela taim aposel Pol i bel hevi taim em i tingim ol samting em i bin mekim paslain long em i kamap Kristen. Olsem na yumi no kirap nogut olsem em i kolim em yet olsem “mi man tru bilong mekim sin winim olgeta arapela sinman”! (1 Tim. 1:15) Paslain long Pol i kisim save long tok i tru, em i save mekim nogut tru long ol Kristen—putim sampela long kalabus, na sampela em i tok orait long kilim ol i dai. (Apo. 26:10, 11) Tingim samting Pol bai pilim sapos em i bungim wanpela yangpela Kristen we em i bin givim tok orait long kilim papamama bilong em. Pol i sori tru long ol rong em i bin mekim bipo, tasol em i save em i no inap senisim ol samting i kamap pinis. Em i bilip tru olsem Jisas i dai bilong helpim em, na em i tok: “Long rot bilong bikpela pasin helpim bilong God mi kisim dispela wok.” (1 Kor. 15:3, 10) Yumi inap kisim wanem skul long em? Yu mas bilip tru olsem Jisas i dai bilong helpim yu na dispela i opim rot long yu inap pas gut moa wantaim Jehova. (Apo. 3:19) Bikpela samting long tingting bilong God em ol samting yumi mekim nau na ol samting yumi bai mekim long bihain.Na em i no tingim ol popaia yumi bin mekim long bipo.​—Ais. 1:18. w21.04 23 par. 11

Planti Juda long taim bilong Jisas i no ting Mesaia bai dai, tasol lukim tok profet Baibel i mekim, Baibel i tok: “Em i bin givim laip bilong em na dai na ol man i tingim em olsem wanpela man bilong mekim sin; em i bin karim sin bilong planti manmeri, na em i bin mekim samting bilong helpim ol sinman.” (Ais. 53:12) So i no gat as long ol Juda i pundaun long bilip taim ol man i kilim i dai Jisas olsem wanpela sinman. Long nau, yumi mas kisim save long ol stori i tru na bai yumi no ken pundaun. Long Bikpela Tok Long Maunten, Jisas i givim tok lukaut long ol man i harim tok bilong em olsem, ol man bai “giaman na sutim kain kain tok nogut long” yupela. (Mat. 5:11) Satan em i as bilong ol dispela tok giaman. Em i kirapim ol birua long mekim ol tok giaman bilong krungutim gutnem bilong ol lain i laikim tok i tru. (Rev. 12:9, 10) Yumi mas sakim ol tok giaman em ol birua bilong yumi i mekim. Yumi no ken larim ol dispela tok giaman i pretim yumi o daunim bilip bilong yumi. w21.05 11-12 par. 14; 12 par. 16

Helpim Baibel sumatin bilong yu long trastim Jehova. Jisas i tokim ol disaipel olsem Jehova bai helpim ol bikos Em i laikim ol. (Mat. 10:19, 20, 29, 30) Kirapim sumatin long tingim olsem Jehova bai helpim em tu. Yu ken helpim em long trastim Jehova taim yu beten wantaim sumatin long ol mak em i laik winim. Franciszek i stap long Polan, na em i tok: “Planti taim tisa bilong mi i save kolim long beten bilong em ol mak mi laik winim. Taim mi lukim olsem Jehova i bekim ol beten bilong em, mi tu i stat long beten. Mi pilim tru olsem Jehova i helpim mi taim mi askim bos long kisim ol de-of long nupela wok bilong mi bilong go long ol miting na kibung.” Jehova i save tingim tru ol Baibel sumatin bilong yumi. Em i pilim tru gutpela wok tisa em ol Kristen i mekim bilong helpim ol manmeri long i go klostu long em, na em i laikim ol long dispela pasin bilong ol. (Ais. 52:7) Maski sapos yu no gat wanpela Baibel stadi long nau, yu ken helpim ol Baibel sumatin long winim mak na kisim baptais taim yu go wantaim ol narapela pablisa long mekim ol Baibel stadi bilong ol. w21.06 7 par. 17-18

Yumi ken soim olsem yumi amamas long gutpela presen yumi gat, em Tok Bilong God, long rot bilong ritim long olgeta de. Yumi mas makim taim bilong ritim Baibel na mekim pesenel stadi, na yumi no ken mekim tasol long taim yumi pilim olsem yumi gat taim bilong mekim. Taim yumi mekim pesenel stadi bilong yumi long olgeta taim, dispela inap helpim yumi long holimpas strongpela bilip. Yumi no wankain olsem “ol man i gat savetingting na ol klevaman” bilong dispela graun, nogat, yumi gat strongpela bilip em Tok Bilong God i as bilong en. (Mat. 11:25, 26) Yumi stadi long Tok Bilong God, olsem na yumi save long risen na ol pasin nogut bilong dispela graun i wok long i go nogut moa, na yumi save long ol samting Jehova bai mekim bilong stretim ol dispela hevi. So yumi mas tingting strong long strongim bilip bilong yumi na helpim planti manmeri moa long bilip long Krieta bilong yumi. (1 Tim. 2:3, 4) Na yumi luk fowed long taim we olgeta manmeri i stap long graun bai mekim tok i stap long Revelesen 4:11, em i tok: “Jehova, yu God bilong mipela, i stret tru long yu kisim glori . . . long wanem, yu bin wokim olgeta samting.” w21.08 19 par. 18-20

Ol elda ol i wasman na ol i gat wok long givim tok kaunsel taim i gat nid long mekim olsem. Ol i mas wok strong long givim tok kaunsel we inap helpim man na em ol tok we “i save mekim bel i amamas.” (Prov. 27:9) Ol elda i laikim ol bratasista bilong ol. Sampela taim, ol i soim dispela pasin laikim taim ol i givim tok kaunsel long wanpela husat i bihainim rot nogut. (Gal. 6:1) Paslain long wanpela elda i toktok long dispela man o meri, i gutpela em i skelim ol tok em aposel Pol i mekim long man i gat pasin laikim. Em i tok: “Man i gat pasin laikim em i no save les kwik, na em i save mekim gutpela pasin. . . . Em i no save larim wanpela samting i daunim em, em i save bilip long olgeta samting, em i save wetim ol gutpela samting i kamap, na em i save sanap strong long olgeta hevi i kamap long em.” (1 Kor. 13:4, 7) Taim elda i tingim tingim ol dispela tok bilong Baibel, dispela bai helpim em long skelim gut astingting bilong em long givim tok kaunsel na bai em i toktok long brata o sista bilong em long gutpela pasin. Taim brata o sista i pilim olsem elda i tingim em, orait em bai redi long kisim dispela tok kaunsel na bihainim. w22.02 14 par. 3; 15 par. 5

Jehova i wokim ol pikinini spirit na ol pikinini bilong em long graun i gutpela olgeta. Tasol bihain, wanpela pikinini spirit bilong em, em Satan, (mining bilong en “Birua”) i kirapim Adam na Iv, em tupela manmeri i gutpela olgeta, long sakim Jehova. Ol narapela ensel na ol manmeri tu i insait long dispela pasin bikhet. (Jut 6) Jehova i pilim olsem ol i givim baksait long em. Maski i olsem, Em i sanap strong yet na karim hevi, na em bai sanap strong yet i go inap long em i pinisim olgeta bikhetlain. Na dispela bai bringim bikpela amamas long ol manmeri i stap gut long em—em ol manmeri i karim wankain hevi olsem em long dispela haptaim nogut bilong nau! Satan i sutim tok long gutpela wokman bilong Jehova, em Jop, na em i tok olsem olgeta gutpela wokman bilong Jehova i mekim wok bilong Em bikos ol i tingim ol yet. (Jop 1:8-11; 2:3-5) Satan i wok yet long sutim tok giaman long ol manmeri i kam inap long nau. (Rev. 12:10) Yumi ken mekim ol samting bilong pruvim olsem ol tok bilong Satan i giaman long rot bilong sanap strong na karim ol hevi, na wok yet long stap gut long Jehova bikos yumi laikim Em. w21.07 9 par. 7-8

Aposel Pol i yusim wanpela gutpela tok piksa bilong skulim yumi olsem em i bikpela samting tru long yumi mas senisim ol pasin bilong yumi. Em i tok yumi mas nilim olpela pasin bilong yumi “long pos.” (Rom 6:6) Pol i kirapim yumi long bihainim eksampel bilong Krais. Yumi mas kilim i dai, o lusim olgeta, ol pasin em Jehova i heitim. Taim yumi mekim olsem, yumi bai gat klinpela maus bilong bel na yumi bai bilip na wet long kisim laip oltaim long bihain. (Jon 17:3; 1 Pita 3:21) Jehova i no inap senisim ol lo bilong em bilong amamasim yumi, nogat. Yumi mas senisim ol pasin bilong yumi na bihainim ol lo bilong em. (Ais. 1:17, 18; 55:9) Maski yu baptais pinis, yu mas wok strong yet long sakim ol laik nogut bilong bodi. Beten long Jehova na trastim holi spirit bilong em long helpim yu, na no ken bilip long strong bilong yu yet. (Gal. 5:22; Fili. 4:6) Yumi mas tingting strong long rausim olpela pasin na yumi no ken tru kisim gen dispela pasin. w22.03 6 par. 15-17

Jehova i promis long givim yumi kaikai, klos, na haus samting sapos yumi putim wok bilong Kingdom i stap fes na bihainim ol stretpela lo bilong em. (Mat. 6:33) Em as na yumi mas sakim dispela tingting olsem mani kago bilong dispela graun inap mekim yumi stap bel isi na amamas. Yumi save olsem wanpela rot tasol bilong i stap bel isi tru em long mekim laik bilong Jehova. (Fili. 4:6 7) Maski yumi gat mani inap long baim planti samting, yumi mas skelim sapos yumi gat taim na strong long yusim na lukautim gut ol dispela samting, o nogat. Olsem wanem? Yumi laikim tumas ol dispela samting? Tingim olsem God i givim wok long yumi wan wan insait long famili bilong em. Dispela i makim olsem yumi no ken larim wanpela samting i pulim nabaut tingting bilong yumi. Yumi no laik kamap wankain olsem dispela man husat i no laik mekim wok bilong Jehova na em i no laik stap olsem pikinini em God i adoptim bikos em i laikim tumas ol mani kago bilong em!​—Mak 10:17-22. w21.08 6 par. 17

Taim yu stadi long Baibel, yu bai luksave long wanpela pasin bilong God, em wanpela pasin bilong em we i stap ples klia long ol samting em i wokim. Taim yumi kisim save long ol pasin bilong Jehova, dispela i helpim yumi long bilip tru olsem Jehova em wanpela Man i stap tru. (Kis. 34:6, 7; Sng. 145:8, 9) Taim yu kisim planti save moa long Jehova, yu bai bilip tru long em, yu bai laikim em moa yet, na pasin bilong yu long pas gut wantaim em bai kamap strong moa. Tokaut long ol narapela olsem yu bilip long God. Tasol yu bai mekim wanem sapos wanpela yu autim tok long em i tok i no gat God, na yu no save long wanem bekim bai yu givim? Traim long painim bekim bilong Baibel long ol pablikesen bilong yumi na stori wantaim dispela man o meri long en. Na tu, yu ken askim wanpela Witnes i gat bikpela ekspiriens long helpim yu. Maski dispela man o meri i bilipim ol tok bilong Baibel yu mekim o nogat, gutpela samting bai kamap taim yu mekim risets. Bilip bilong yu bai kamap strong moa. w21.08 18 par. 14-15

I no olsem yumi mas lusim olgeta samting yumi save amamas long mekim bambai yumi ken amamasim Jehova, nogat. (Ekl. 5:19, 20) Tasol sapos yumi larim ol samting bilong skin i pasim yumi long mekim wok bilong God, orait yumi inap mekim wankain popaia olsem man long tok piksa bilong Jisas. Em i bungim planti gutpela samting long laip bilong em yet na em i lusim tingting long God. (Luk 12:16-21) Taim yumi bungim ol hatwok, yumi ken beten long kisim helpim na wokim gut tingting long wanem samting yumi inap mekim. (Prov. 3:21) Jehova i save blesim yumi long planti rot. Olsem na yumi ken soim olsem yumi amamas long ol dispela blesing long rot bilong mekim olgeta samting yumi inap mekim bilong preisim em. (Hib. 13:15) Dispela inap makim olsem yumi mekim bikpela wok moa bilong autim tok, na long dispela rot yumi bai kisim planti blesing moa. Long olgeta de, yumi mas painim rot bilong lukim truim bilong dispela tok “yupela i mas traim na lukim na bai yupela i save olsem Jehova i gutpela.” (Sng. 34:8) Long dispela rot, bai yumi ken mekim wankain tok olsem Jisas, em i tok: “Kaikai bilong mi em long mekim laik bilong man i bin salim mi i kam na long inapim wok em i givim long mi.”​—Jon 4:34. w21.08 30-31 par. 16-19

Satan i laik bai yumi kisim pasin antap. Em i save olsem sapos yumi larim pasin antap i bosim yumi, yumi bai kamap wankain olsem em na yumi no inap kisim laip oltaim. Olsem na aposel Pol i givim tok lukaut olsem, man inap “kisim pasin antap na kisim wankain kot olsem Devil i bin kisim.” (1 Tim. 3:6, 7) Dispela samting inap painim yumi olgeta, maski yumi nupela long tok i tru o yumi mekim wok bilong Jehova inap planti yia. Ol man i gat pasin antap, ol i save tingim ol yet tasol. Satan i laik kirapim yumi long tingim yumi yet tasol na yumi no ken tingim Jehova, moa yet long taim yumi gat hevi. Olsem wanem? Wanpela i bin sutim tok giaman long yu? O wanpela i mekim pasin i no stret long yu? Satan i laik bai yu sutim tok long Jehova o long kongrigesen. Em i laik bai yu ting olsem wanpela rot tasol bilong stretim dispela hevi em long bihainim laik bilong yu yet na no ken bihainim ol stiatok bilong Jehova long Baibel.​—Ekl. 7:16, 20. w21.06 15 par. 4-5

Jehova i givim wanpela bikpela wok long profet Hagai. Hagai em wanpela bilong ol manmeri husat i bin lusim kalabus long Babilon long 537 B.C.E. na kam bek long Jerusalem. Bihain tasol long ol i kam kamap pinis, ol dispela gutpela wokman bilong Jehova i wokim faundesen bilong haus bilong Jehova, o tempel. (Esr. 3:8, 10) Tasol sotpela taim bihain, hevi i kamap. Pasin birua i mekim na ol i bel hevi na ol i stopim wok bilong ol. (Esr. 4:4; Hag. 1:1, 2) Olsem na long 520 B.C.E., Jehova i salim Hagai i kam bilong helpim ol na strongim ol long pinisim dispela wok ol i bin kirapim bilong wokim tempel. (Esr. 6:14, 15) As na Jehova i salim Hagai i go em bilong helpim ol manmeri long bilip long Jehova. Dispela tok “Jehova, bosman bilong bikpela lain ami” i strongim tru bel bilong ol. Jehova i gat bikpela lain ami em ol ensel i stap aninit long em, olsem na lain Juda i mas bilip long Jehova na wetim em i helpim ol long mekim gut dispela wok. w21.09 15 par. 4-5

Long nau, Ol Witnes Bilong Jehova long olgeta hap i laikim tru narapela narapela na ol i stap wanbel wantaim. Yumi no wankain long olgeta narapela lotu—yumi pas gut wantaim olsem wanpela famili maski yumi bilong narapela narapela kantri, skin kala, na sindaun. Long ol miting bilong yumi, na long ol bikpela na liklik kibung, yumi save lukim olsem pasin laikim i stap strong. Dispela samting i strongim tru bilip bilong yumi olsem Jehova i orait long pasin bilong lotu yumi bihainim long nau. (Jon 13:34) Baibel i tok: “Yupela i mas laikim tru ol arapela.” (1 Pita 4:8) Wanpela samting yumi ken mekim bilong soim olsem yumi laikim tru ol narapela em long fogivim narapela narapela na lusim tingting long ol pasin kranki bilong ol. Na yumi painim rot bilong givim samting long ol narapela na helpim ol narapela long kongrigesen, maski sampela taim ol i mekim ol samting i bagarapim bel bilong yumi. (Kol. 3:12-14) Kain pasin laikim olsem em i nambawan rot bilong soim olsem yumi Kristen tru. w21.10 22 par. 13-14

Taim man i raus, yu ting dispela inap helpim em long tanim bel na senisim ol pasin bilong em? Yes, dispela inap helpim em long mekim olsem. Planti em ol i bin pundaun na mekim bikpela sin, ol i bin pilim olsem pasin bilong ol elda long sanap strong long tok bilong Baibel na givim strafe long ol, dispela i bin helpim ol long wokim gut tingting, senisim pasin bilong ol, na kam bek long Jehova. (Hib. 12:5, 6) Tingim dispela tok piksa. Wasman bilong sipsip i luksave olsem wanpela sipsip bilong em i sik. Em i save olsem bilong helpim dispela sipsip long kamap orait, em i mas putim em i stap wanpis long wanpela hap, na em i no ken bungim em wantaim ol narapela sipsip. Tasol ol sipsip i gat pasin bilong bung na stap wantaim. So em i gat laik long stap wantaim ol narapela sipsip, na em i no amamas taim wasman i rausim em i go stap em yet. Yu ting wasman i mekim hatpela pasin taim em i rausim dispela sipsip i gat sik i go stap em yet? Nogat tru. Em i save olsem sapos dispela sipsip i gat sik i stap wantaim ol narapela sipsip, em inap givim sik long ol. Taim em i rausim sik sipsip i go stap em yet, dispela i lukautim gut ol narapela sipsip. w21.10 10 par. 9-10

Yumi amamas olsem yumi insait long wanpela bikpela famili, em ol bratasista bilong yumi i stap long olgeta hap bilong graun. Yumi laik bai planti manmeri moa i joinim yumi long lotuim God bilong yumi. Olsem na yumi no laik mekim wanpela samting we inap bagarapim gutnem bilong lain bilong Jehova o bagarapim gutnem bilong Papa bilong yumi long heven. Yumi laik bihainim ol gutpela pasin na bai dispela i kirapim ol man long kisim save long gutnius. Sampela taim ol man inap tok bilas long yumi o mekim nogut long yumi bikos yumi bihainim tok bilong Papa bilong yumi long heven. Yumi ken mekim wanem sapos yumi pret long autim bilip bilong yumi long ol narapela? Yumi ken save tru olsem Jehova na Pikinini bilong em bai helpim yumi. Jisas i tokim ol disaipel bilong em olsem ol i no ken wari long hau ol bai toktok o wanem tok ol bai mekim. Bilong wanem? Long wanem, Jisas i tok: “Long dispela taim stret yupela bai kisim tok yupela bai autim. I no yupela tasol bai toktok, nogat, spirit bilong Papa bilong yupela bai i autim tok long maus bilong yupela.”​—Mat. 10:19, 20. w21.09 24 par. 17-18

Moses i bin yusim wankain tok piksa i stori long ples hait. (Sng. 90:1, ftn.) Klostu long taim em i dai, Moses i kirapim yumi long tingim dispela naispela tok. Em i tok: “God em i wanpela ples hait bilong bipo bipo yet, oltaim oltaim han bilong em i save sapotim yu.” (Lo 33:27) Dispela tok “oltaim oltaim han bilong em i save sapotim yu” i helpim yumi long kisim wanem save long Jehova? Taim Jehova i stap olsem Ples Hait bilong yumi, yumi bai pilim seif. Tasol sampela taim, yumi inap bel hevi na i hatwok long daunim bel hevi bilong yumi. Long kain taim olsem, Jehova bai mekim wanem bilong helpim yumi? (Sng. 136:23) Em bai putim 2-pela han bilong em i kam aninit long yumi, na isi isi em bai apim yumi, na helpim yumi long sanap gen. (Sng. 28:9; 94:18) Yumi save olsem oltaim yumi bai kisim helpim long God, na dispela i helpim yumi long tingim 2-pela rot em God i blesim yumi. Namba 1: Yumi gat gutpela ples hait maski yumi stap long wanem hap bilong graun. Namba 2: Gutpela Papa bilong yumi long heven i save tingim tru yumi. w21.11 6 par. 15-16

Jisas i save olsem pasin i no stret bai traim bilip bilong ol disaipel bilong em. Bilong helpim ol long karim dispela hevi, em i mekim wanpela tok piksa i stap long Buk Luk. Jisas i stori long wanpela wido i wok yet long askim jas long helpim em, maski dispela jas i no save mekim stretpela pasin. Em i bilip olsem sapos em i wok yet long askim, jas bai helpim em. Bihain jas i harim singaut bilong em na mekim samting em i askim long en. Yumi inap kisim wanem skul long dispela stori? Jehova i save mekim stretpela pasin. Jisas i tok: “Olsem wanem? Ol manmeri God i bin makim na ol i wok long krai long em long san na nait, ating God bai i no stretim rong ol arapela i mekim long ol, a?” (Luk 18:1-8) Bihain Jisas i tok moa olsem: “Taim Pikinini bilong man i kam, bai em i lukim trupela bilip i stap long graun o nogat?” Taim yumi karim hevi bilong pasin i no stret, yumi mas pruvim olsem yumi gat strongpela bilip wankain olsem dispela wido—yumi mekim olsem taim yumi no les kwik na yumi beten strong yet. Taim yumi gat kain strongpela bilip, yumi ken save olsem long taim stret, Jehova bai helpim yumi. Yumi mas bilip tu long strong bilong beten. w21.11 23 par. 12; 24 par. 14

Ol yangpela, sampela taim yu save pilim olsem ol lo bilong Jehova i pasim yu tumas? Satan i laik yu mas i gat kain tingting olsem. Em i laik bai yu putim tingting long ol manmeri i wokabaut long bikpela rot na ol samting ol i mekim, long wanem, i luk olsem ol i enjoim laip. Em inap yusim ol samting ol wanskul i mekim o ol samting yu lukim long Intenet bilong mekim yu pilim olsem yu mis aut long kisim bikpela amamas. Satan i laik bai yu ting olsem ol lo bilong Jehova i pasim yu long enjoim laip bilong yu. Tasol tingim dispela: Satan i no laik bai ol manmeri husat i wokabaut long bikpela rot i save long wanem samting em rot i kisim ol i go long en. (Mat. 7:13, 14) Tasol Jehova i laik yu save olsem laip bilong yu bai gutpela tru taim yu wokabaut yet long liklik rot i go long laip.​—Sng. 37:29; Ais. 35:5, 6; 65:21-23. w21.12 23 par. 6-7

Yumi save olsem yumi mas fogivim ol narapela na i stret long yumi mekim olsem. Tasol yumi inap pilim hatwok long mekim olsem. Ating aposel Pita tu i bin pilim olsem sampela taim. (Mat. 18:21, 22) Wanem samting i ken helpim yumi long fogivim ol narapela? Namba 1: Tingim tingim long bel olsem wanem Jehova i fogivim yu. (Mat. 18:32, 33) Yumi no gutpela inap long em i ken fogivim yumi, tasol em i save redi long mekim olsem. (Sng. 103:8-10) Olsem na “yumi tu i gat wok long laikim narapela narapela.” Yumi mas fogivim ol narapela; em samting yumi mas mekim. Yumi gat wok long fogivim ol bratasista bilong yumi. (1 Jon 4:11) Namba 2: Traim long tingim ol gutpela samting we inap kamap taim yumi fogivim wanpela wanbilip. Olsem: Yumi inap helpim em, strongim pasin wanbel insait long kongrigesen, lukautim pasin pren bilong yumi wantaim Jehova, na yumi inap kisim bikpela bel isi. (2 Kor. 2:7; Kol. 3:14) Namba 3: Yumi mas beten long God husat i laik bai yumi mas fogivim ol narapela. No ken larim Satan i pinisim bel isi i stap namel long yu na ol wanbilip bilong yu. (Efe. 4:26, 27) Yumi nidim helpim bilong Jehova na bai yumi ken abrusim trap bilong Satan. w21.06 22 par. 11; 23 par. 14

Devit i tingim laip bilong em na em i ranawe. Sol, em strongpela king bilong Israel, em i tingting strong long kilim em i dai. Taim Devit i sot long kaikai, em i stop long taun bilong Nop, na long dispela hap em i askim long 5-pela bret. (1 Sml. 21:1, 3) Bihain, em na ol ami bilong em i hait long wanpela keiv. (1 Sml. 22:1) Hau dispela hevi i painim Devit? Sol i jeles nogut tru long Devit bikos planti man i save long em na em i bin winim planti pait. Na tu, Sol i save olsem em i sakim tok bilong Jehova, olsem na Jehova i no laik em i stap king bilong Israel, na Jehova i makim Devit long mekim wok king. (1 Sml. 23:16, 17) Maski i olsem, Sol i stap olsem king bilong Israel, olsem na em i gat bikpela lain ami na planti man i sapotim em, dispela i mekim na Devit i tingim laip bilong em na em i mas ranawe. Yu ting Sol inap stopim samting em God i tingting pinis long mekim, em long makim Devit i kamap king? (Ais. 55:11) Baibel i no tok olsem, tasol yumi ken save tru long wanpela samting: Sol i kamapim hevi long em yet. Ol man husat i pait long God, oltaim ol i save lus! w22.01 2 par. 1-2

Jisas i givim bel tru long autim tok. Em i soim olsem em i laikim ol manmeri taim em i wok yet long autim tok taim rot i op. (Luk 19:47, 48) Wanem samting i kirapim em long mekim olsem? Jisas i sori tru long ol. Sampela taim, planti manmeri tru i laik harim tok bilong Jisas, olsem na em na ol disaipel bilong em “i no inap kaikai.” (Mak 3:20) Na tu, em i redi long autim tok long nait—wanpela taim em i autim tok long wanpela man i redi long putim yau. Planti manmeri em pastaim ol i bin harim tok bilong Jisas, ol i no kamap ol disaipel bilong em. Tasol olgeta man husat i bin harim tok bilong em, em i givim bel tru long autim tok long ol. Long nau, yumi laik autim gutnius long olgeta kain manmeri taim rot i op long mekim olsem. (Apo. 10:42) Bilong inapim dispela wok, ating yumi mas mekim sampela senis long wei bilong yumi long autim tok. Yumi no ken redi tasol long autim tok long ol taim we i stret long yumi, nogat, yumi mas redi long mekim senis long sediul bilong yumi na autim tok long ol taim we yumi inap bungim planti manmeri moa. Sapos yumi mekim olsem, yumi ken save tru olsem Jehova bai amamas long yumi. w22.01 17 par. 13-14

Long nau planti man i pilim hatwok long trastim ol man i gat namba. Ol i luksave olsem ol man i gat namba long sait bilong lo na politik, ol i save mekim wansait pasin long ol maniman na ol man i gat pawa na ol i no mekim pasin fea long ol rabisman. Na tu, sampela bikman bilong lotu i mekim ol pasin nogut na dispela i mekim ol manmeri i bel hevi, olsem na sampela man i lusim pasin bilong trastim God. Em as na taim wanpela man i orait long yumi stadi wantaim em long Baibel, yumi mas wok hat tru long helpim em long strongim pasin bilong em long trastim Jehova na trastim ol man em i makim long i go pas long yumi. Em tru olsem ol Baibel sumatin i mas lain long trastim Jehova na oganaisesen bilong em. Tasol yumi ol Kristen husat i bin stap insait long tok i tru inap planti yia, yumi no ken lusim tingting olsem oltaim wei bilong Jehova long mekim ol samting em i nambawan tru. Sampela taim ol samting i kamap inap traim pasin bilong yumi long trastim wei bilong Jehova long mekim ol samting. w22.02 2 par. 1-2