Kingdom Bilong God i ‘Kam’ Olsem Wanem?
1. “Las taim” bilong olgeta hap bilong graun i stap yet, nau long yia 1983, na bilong wanem yumi no ken kirap nogut long dispela samting?
HAMAS mun o yia moa na bai taim bilong “bikpela hevi tru” i kirap, em yumi no save. “Las taim” bilong ol Juda i kirap long yia 29 CE. na i pinis long yia 70 CE. Em inap olsem 41 yia olgeta. Tasol nau God i laik pinisim pasin i stap long olgeta hap bilong graun. Em i laik pinisim olgeta samting Seten i bin kamapim long graun, olgeta lotu giaman na lotu giaman bilong Krisendom tu wantaim. Olsem na “las taim” bilong dispela taim nau i stap inap 69 yia pinis, kirap long yia 1914 na i kam inap long nau, long yia 1983. “Las taim” bilong nau i no ken pinis kwik, long wanem i gat wanpela bikpela wok i mas kamap. Em wanem wok?
2. Ol Kristen bilong pastaim i mekim wanem na yumi ken bihainim pasin bilong ol?
2 Orait, ol Kristen bilong pastaim i mekim wanem wok long “las taim” bilong ol Juda? O1 i autim tok! Ol i toksave long ol man! Ol i wok strong na insait long liklik hap taim tasol aposel Pol i tok, “dispela gutnius yupela i bin harim. … mipela i autim long olgeta manmeri i stap long graun.”—Kolosi 1:2
3, 4. Spirit bilong Jehova i strongim husat na ol i autim tok long nau? Na wanem samting i bin kamap?
3 Nau yumi mas autim tok long olgeta manmeri i stap long olgeta hap bilong graun! Tasol long strong bilong spirit bilong God ol witnes Kristen bilong Jehova ol i bin i go long olgeta hap na autim tok. Ol i bin autim tok long 160 samting tok ples. Ol i bin autim tok na planti manmeri bilong olgeta lain ol i kain olsem “sipsip” ol i kam bung wantaim, inap olsem 5,980,000 ol i bung long taim bilong Memorial long yia 1981. Lain ol i mekim wok olsem wasman, em dispela lain i olsem “wokboi i gat gutpela tingting,” ol i paslain long mekim wok bilong autim tok long de bilong Jehova bilong bekim pe nogut, na bilong mekim gut bel bilong ol man i krai. (Aisaia 21:11, 12; 61:1, 2) Inap wan handet yia pinis Ol Witnes Bilong Jehova i bin autim tok na ol i bin tilim planti Baibel na ol buk bilong Baibel, inap olsem 460,000,000 na planti Wastaua na Kirap! inap olsem 4,767,000,000. Ol i mekim bikpela wok tru bilong litimapim nem bilong Jehova na kingdom bilong em, a?
4 Nau dispela wok bilong autim gutpela tok bilong Kingdom i laik pinis! Ol gutpela misinari na painia na ol pablisa long olgeta hap bilong graun, ol i bin wok gut wantaim na mekim bikpela wok tru. ‘I no long strong bilong wanpela ami o long narapela strong; nogat; long strong bilong spirit bilong God tasol.’ Jehova i tok olsem. (Sekaraia 4:6) Na planti milion manmeri i kam bung wantaim ‘gutpela wokboi’ na ol i tok: “Mipela bai go wantaim yupela, long wanem, mipela harim ol i tok God i stap wantaim yupela.”—Sekaraia 8:23.
5. Danyel sapta 2 i tok piksa olsem wanem long Kingdom ‘i kam’?
5 Nau yumi wet tasol long kingdom bilong God “i kam”! Em bai kam olsem wanem? Olsem profet Danyel i tok long sapta 2! Danyel i tok, kingdom bilong Mesaia o Krais i olsem wanpela “ston” ol i bin katim long “maunten.” Dispela “maunten” i makim wok king bilong Jehova i stap oltaim. Dispela “ston” i sut “i kam” bilong bagarapim ol gavman ol man i bin kamapim na i krungutim ol olgeta. Bihain dispela Kingdom “ston” yet i kamap olsem wanpela bikpela “maunten” i kisim olgeta hap bilong graun. Olgeta dispela samting i givim biknem long Jehova na litimapim nem bilong Em.—Danyel 2:34, 35, 44, 45.
Bagarapim “Pamukmeri”
6. (a) Jehova bai mekim wok long sampela gavman bilong graun bilong bekim pe nogut na bilong wanem yumi no ken kirap nogut long dispela samting? (b) Jerusalem bilong bipo i mekim wanem samting long nau? Ol dispela misin i hap bilong wanem samting?
6 Tasol i gat sampela samting i mas kamap pastaim na bihain bai ol dispela gavman bilong graun i bagarap. Hap bilong Revelesen long Baibel i tok, pastaim Jehova i mas mekim wok long sampela lain insait long Yunaitet Nesen olsem wanpela “hama” bilong bagarapim samting. Yumi no ken kirap nogut long dispela samting, long wanem bipo Jehova i mekim wok long bikpela gavman bilong Babilon olsem wanpela “hama” bilong bekim pe nogut long Jerusalem. (Jeremaia 50:23) Dispela Jerusalem bilong bipo i lusim Jehova i makim ol misin bilong Krisendom bilong nau. Ol i tok ol i lotuim God bilong Baibel, tasol ol i insait long lain bilong ol lotu giaman i bosim ol manmeri long olgeta hap bilong graun. “Bikpela taun Babilon, em mama tru bilong olgeta pamukmeri, na bilong olgeta pasin nogut tru long graun.”—Revelesen 17:5, NT
7. (a) Ol lotu giaman i tingting pinis na ol i laikim wanem samting? (b) Ol man i stap olsem maus bilong ol dispela misin ol i tok wanem na yumi ken save long ol samting ol i wet long en bilong helpim ol? (c) Tasol Baibel i makim wanem samting tasol inap helpim yumi?
7 Ol dispela lotu giaman i tingim pinis ol rot ol i laik bihainim. Ol i sakim kingdom bilong God na Krais nau i laik i kam, na ol i givim bel long wanpela samting ol man i bin kamapim olsem senis bilong dispela kingdom. Long nau ol pris pasto bilong ol lotu bilong dispela graun ol i givim bel long helpim Yunaitet Nesen. Wanpela pris bilong lotu Juda i tok, Yunaitet Nesen tasol “inap kamapim pasin sekan long graun na helpim olgeta manmeri bambai ol i no ken bagarap.” Na Pop John Paul II i tok, Yunaitet Nesen i olsem ‘nambawan bikpela kot bilong skelim ol samting na kamapim pasin sekan na stretpela pasin.’ Tasol olsem wanem? Yunaitet Nesen i bin kamapim pasin sekan na stretpela pasin long graun? Yunaitet Nesen tasol inap helpim ol manmeri? O kingdom bilong God tasol inap helpim ol? Tru tumas, kingdom bilong God na Krais i mas “i kam” bilong helpim ol man!—Matyu 12:18, 21.
8. Taim ol i kamapim Yunaitet Nesen long pastaim ol i tok wanem long wok bilong en na yumi tingim tok bilong 1 Tesalonaika 5:3? Bilong wanem yumi mas tingim dispela samting?
8 Taim ol man i kamapim Yunaitet Nesen long pastaim ol i tok, wok bilong en i bilong “kamapim gutaim na helpim olgeta lain man long i stap gut.” Yumi Ol Witnes Bilong Jehova i bin harim dispela tok bipo, a? Tru tumas! Long wanem aposel Pol i tok: “Bai ol i tok, ‘Em i gutaim nau, yumi stap gut.’ Long dispela taim tasol samting bilong bagarapim ol bai i kamap kwiktaim long ol, olsem pen i save kamap long meri i laik karim pikinini. Na ol i no inap abrusim dispela samting.” (1 Tesalonaika 5:3, NT) Liklik taim tasol na bai dispela “las taim” bilong nau i pinis, olsem na yumi wetim ol man i mekim sampela narapela kain tok long ‘gutaim i kamap na ol man i stap gut.’ Na taim ol lain man i harim dispela tok, wanem samting bai kamap? Baibel i tok: ‘Wantu samting bilong bagarapim ol bai i kamap long ol na bai ol i no inap abrusim!’
9. (a) Wanem bikpela bagarap bai painim olgeta lotu giaman? (b) Ol bikpela man bilong wok politik na wok bisnis bai ting olsem wanem long dispela samting i painim ol misin? Bilong wanem ol bai mekim olsem?
9 Nau ol lotu bilong dispela graun i “prenim” Yunaitet Nesen, tasol liklik taim na bai dispela pasin pren i pinis na bai bagarap i painim ol! Wantu tasol, insait long “wanpela aua tasol,” bai ol i bagarap! Ol “10-pela kom” bilong “wel abus,” em Yunaitet Nesen, bai ol i bagarapim Bikpela Babilon. Sampela lain ol i strong long mekim pait na ol i insait long Yunaitet Nesen ol bai birua long dispela “Pamukmeri.” Bai ol i tekewe olgeta gutpela samting bilong en gutpela gutpela klos bilong em, na bagarapim em na kukim em olgeta long paia. Ol man bilong politik ol i giaman na mekim pasin i no stret na ol i bin mekim wok long ol lotu giaman bilong helpim wok bilong ol, na ol bikpela man bilong bisnis i bin mekim wok long dispela “pamukmeri” bilong baim gan i go long ol man na bilong mekim ol narapela wok tu bilong kisim win mani, ol bai sanap longwe long em na krai. Bai ol i tok: “Sori, sori tumas long Babilon! Yu bikpela taun, na yu strongpela taun! Long wanpela aua tasol pe nogut bilong sin bilong yu em i kamap pinis long yu! … Long wanpela aua tasol, dispela olgeta mani na bilas em i bagarap olgeta.”—Revelesen 18:10, 17, NT.
Amagedon—Na Bihain Long En
10. Bilong wanem Amagedon bai kamap wantu tasol long dispela taim? Na wanem samting bai kamap?
10 Kwiktaim bai pinis i kamap. Ol dispela lain politik, olsem ol “kom” bilong wel abus, ol i bin bagarapim dispela “pamukmeri,” wantu bai ol i birua long ol witnes bilong Jehova na i laik bagarapim ol. Ol i ting i no gat man bilong helpim dispela lain, ol i stap nating. Tasol nogat. Bai ol i pait wantaim dispela King Jehova i bin makim, em i winim olgeta narapela bikpela man na king. Bai ol i kamap long Amagedon. Na long dispela taim bai kingdom bilong Jehova na Krais “i kam” bilong mekim nambawan bikpela wok bilong en bilong stretim bek nem bilong Jehova na helpim ol gutpela wokboi bilong Em. Dispela pait bai pinis kwiktaim. Ol gavman politik na gavman ami Seten i bin kamapim bilong bosim graun, ol bai pinis, na Seten yet bai kalabus long hul i no gat as inap 1,000 yia, bambai “em i no inap giamanim ol lain manmeri gen.”—Revelesen 16:14; 17:14; 19:11-21; 20:2, 3, NT.
11. (a) Taim Kingdom ‘i kam’ olsem wanem ol gutpela samting bilong helpim ol man bai kamap? (b) Taim 1,000 yia i pinis Krais i givim kingdom long husat? Na wanem ol gutpela samting bai kamap?
11 Bihain bai wanem samting i kamap? Dispela kingdom bilong 1,000 yia em bai kamap! Ol manmeri i winim taim bilong Amagedon ol bai amamas! Gutpela pasin sori na amamas na pasin sekan bai pulap long olgeta hap bilong graun! Ol manmeri i dai pinis bai ol i kirap bek na bung gen wantaim ol manmeri ol i laikim tumas ol! Narapela gutpela samting tu bai kamap, em olsem: Jisas wantaim ol wanwok king na pris ol bai mekim wok long ofa Krais i givim bilong baim bek ol man, na bai ol i helpim ol planti milion milion manmeri bambai skin na tingting bilong ol i kamap gutpela olgeta! Olgeta manmeri pastaim ol i stap aninit long kingdom bilong Krais bilong 1,000 yia na bihain ol i aninit long wok king bilong Jehova em bilong oltaim, na ol i winim laspela traim Seten i putim long ol, ol bai amamas tru long lukim ol gutpela samting bilong oltaim i kamap!—Revelesen 20:7-9; 21:3, 4.
12. Wanem samting i mekim na ol dispela gutpela samting inap kamap? Dispela samting i mas kirapim yumi long mekim wanem long nau?
12 Taim kingdom bilong God long han bilong Krais “i kam” bai ol dispela gutpela samting i kamap. Dispela samting i kirapim yumi nau long taim bilong pinis bilong ol samting bilong Seten na yumi autim tok long ol narapela man na tokim ol long “ol strongpela wok bilong God,” na long gutpela wok king bilong em, na long kingdom bilong Krais, a? (Sam 145:11; Aposel 2:11, NT; Hibru 12:28) Yumi tingim ol samting kingdom bilong God bai mekim na dispela samting i kirapim yumi long beten strong long Papa bilong yumi long heven, olsem: “Kingdom bilong yu i mas i kam.”—Matyu 6:9, 10, NT.
13. Bilong wanem yumi mas givim bel long beten na tok, “Kingdom bilong yu i mas i KAM”?
13 Yes, kingdom bilong God i mas “I KAM” na bagarapim olgeta wok na lain bilong Seten hia long graun! Yes, Kingdom i mas “I KAM” bambai Krais i ken mekim wok king long dispela 1,000 yia na kamapim bek paradais long graun, na kirapim bek ol manmeri i dai pinis, na helpim ol planti milion milion manmeri bambai skin na tingting bilong ol i kamap gutpela olgeta! Yes, kingdom bilong Krais i mas “I KAM” na stretim bek inap oltaim nem bilong Nambawan Bikpela JEHOVA!
DISPELA KINGDOM NA LAIK BILONG GOD
□ Ol profet bilong Jehova i tok dispela kingdom bai kam
□ Kingdom bilong Devit i olsem piksa na i makim dispela kingdom
□ Ol disaipel bilong Jisas i autim tok bilong dispela kingdom
□ Dispela kingdom i kamap pinis long heven long yia 1914
□ Bihain long yia 1919 ol i bin autim tok bilong dispela kingdom long olgeta lain man
□ ‘Bikpela lain manmeri’ i bung nau bambai God i ken kisim bek ol
□ Pinis bai kamap taim—Ol i tok, ‘Em i gutaim nau, yumi stap gut!’ Na ‘Bikpela Babilon’ i bagarap Na Kingdom i bagarapim ol hetman bilong graun wantaim ol ami na ol manmeri i helpim ol
□ Taim Kingdom i kam na bosim graun bai olgeta manmeri i stap amamas na bel isi na litimapim nem bilong Jehova
[Piksa long pes 25]
Kingdom, olsem dispela “ston,” em yet i kamap olsem wanpela bikpela “maunten” i kisim olgeta hap bilong graun